COCONUT PROCESSING CENTER BUILDING SA JABONGA HAPIT NA MAHUMAN

Hapit na mahuman ang gi construct nga building ug nangabot na usab ang pipila ka ekwipo alang sa upgrading ug pagpalapad pa sa virgin coconut oil processing project sa Libas Farmers Multi-Purpose Cooperative (LFMPC) sa Jabonga, Agusan del Norte.

Kini ang gitaho ni Rebecca Felix, chairperson sa LFMPC, sa pakighinabi sa AGUSAN Update ning semanaha.

Ang pagpalapad sa operisyon sa virgin coconut oil processing project sa LFMPC ngadto sa multi-product Coconut Processing Center ang gipunting nga ipalambo sa probinsya nga core processing project sa lungsod sa jabonga ubos sa proyektong Process! Process! Process! sa AGUSAN UP!, ang kampanya sa pagpalambo sa administrasyon ni Gob. Dale B. Corvera kaabag ang buhatan ni Kong. Angel Amante-Matba, nga gilusad dul-an sa tulo ka tuig na ang milabay. Mahinumdoman nga gitabangan pagpahiluna ang maong proyekto sa nagkalain-laing ahensya apil na ang pagpangita og pundo nila ni Gob. Corvera ug Kong. Amante-Matba. Nakakalap og Php17 milyong nga pundo sa miaging tuig gikan sa buhatan sa Philippine Coconut Authority (PCA) ubos sa Bayanihan to Recover as One Act II ug gipangunahan karon sa ahensya ang mga buluhaton pagpabarug sa building ug pagpalit

og dugang mga ekwipo ubos sa Convergence in Coconut Farming Communities Towards Sustainable Rural Enterprises Project.

Sa samang higayon nagtambayayong usab ang Department of Trade and Industry (DTI) ug ang probinsya pinaagi sa AGUSAN UP! Coordinating Center sa pagpahigayon og mga product and market development activities alang sa LFMPC. Nauna na’ng nagpadangat ang DTI og mga ekwipo sa proyekto nga maoy gigamit sa operisyon sa LFMPC pipila ka tuig na karon.

Nauna na usab ang Department of Agrarian Reform (DAR) pagpadangat og organizational and institutional capability development training aron mahimong takus ang kooperatiba pagpadagan sa proyekto.

Sumala pa ni Felix nga gipunting nga mahuman ang pag construct sa processing facility karong March 27. Miabot na usab ang duha (2) ka units sa Centrifuge, usa (1) ka yunit sa Vibro Screen og duha (2) ka units sa Expeller or Extractor.

Padayon ni Felix nga daku ang iyang kalipay tungod kay nakita na ang kabag-ohan nga anaa na silay dako ug luag nga area ug naghinam-hinam na sila nga makagamit sa maong bag-ong processing center ug mga ekwipo.

“Dako kaayo ni ikatabang (processing center) kay planta na gyod siya nga building dili pareha sa una... ang pag process mas hayahay, mas sayon ang pag process sa virgin coconut oil kung mahuman na siya,” saysay niya.

Gihimo ang groundbreaking sa maong building sa Mayo sa milabayng tuig. (SMP, LGU-Agusan del Norte/ PIA-Agusan del Norte)

Mga nag negosyo’g buhangin, gipahimangnuan

Padayon ang probinsya sa Agusan del Norte pinaagi sa buhatan sa Environment and Natural Resources Division (ENRD) sa pagpahimangno sa mga sand and gravel quarry permit holders sa mga responsibilidad niini sa padayong pagpabaskug ug pagprotektar sa kinaiyahan.

Lambigit niini, gipahigayon ang panagtigum nga gitambongan sa 50 ka quarry permit holders sa probinsya niadtong Pebrero 28 aron hisgutan ang ilang pagtamud sa ilang kaakuhan pagseguro sa kahimsog sa kinaiyahan diha sa ilang operisyon.

Usa sa mga gihisgutan sa maong tigum mao ang padayon nga pag-identify sa mga issues ug uban pang mga panginahanglan sa Cabadbaran River Dredging and Rehabilitation Project (CRDP).

Sumala ni Engr. Dan Winstine Bacolod, personahe sa ENRD, kinahanglang padayon ang pag-mentinar sa armoring activities tungod kay kinahanglan kini pagpa lig-on sa mga riverbanks.

“Armoring activity must be properly maintained aron mapalig-on nato atong mga river banks to fully contain any sudden increase volume of the water flowing thru the channel,” sumala ni Engr. Bacolod.

Niini, padayon gipahimangnoan sa probinsya ang mga permit holders nga motuman sa provision sa Provincial Ordinance nga nagmando sa hustong armoring ug gradual sloping aron malikayan ang pagsaka ug pagpundo sa tubig nga nakalatid sa Environmental Compliance Certificate (ECC) sa Environmental Management Bureau (EMB).

Ang pagpabaskug sa kinaiyahan usa sa mga nag-unang proyekto sa programang Lunhaw’ng Agusan sa AGUSAN UP!, ang kampanya sa pagpalambo sa administrasyon ni Governor Dale Corvera kaabag ang buhatan ni Congresswoman Angel Amante-Matba.

Apil usab sa mga kalihukan ubos sa Lunhaw’ng Agusan mao ang pagpananom og kahoy sa mga protection zones, apil na niini ang mga riverbanks. (ENRD/ LGU-Agusan del Norte/PIAAgusan del Norte)