DBC FUND FOR YOUNG ENTREPRENEURS GILUSAD NI GOB. CORVERA

Gilusad ni Gob. Dale B. Corvera sa Agusan del Norte ang gitawag niya nga “DBC Fund for Young Entrepreneurs,” usa ka pundo nga iyang gisugdan gikan sa iyang personal fund aron mahimong tinubdan sa seed fund sa mga ideya sa negosyo sa kabatan-onan sa probinsya nga modaug sa “TuoNegosyo” o uban pang sukdanan sa kamaayo sa usa ka ekonomikanhong proyekto.

Gihimo kini sa gobernador pinaagi sa paghatag sa gikometir niya nga dugang seed fund nga tag P100,000 matag usa sa mitapos sa indigay nga unom ka contestants sa “TuoNegosyo” sa tuig 2021 atol sa pag-abli sa “Agus Trade Fair” sa SM City Butuan nga gihimo isip kasaulogan sa ikaduhang tuig sa AGUSAN UP!, ang kampanya sa pagpalambo sa administrasyon ni Gov. Dale B. Corvera kaabag ang buhatan ni Kong. Angel Amante-Matba.

Ang DBC Fund, sumala pa ni Gob. Corvera, maghatag og P100,000 nga seed fund sa labing ubos lima ka ideya sa mapiling proyekto sa mga batan-on matag tuig. Ang dugang detalye sa DBC Fund, padayon sa gobernador, himoon sa mosunod nga mga adlaw.

Saysay ni Gob. Corvera nga nadasig gyod siya sa nahimong resulta sa “TuoNegosyo” nga gilusad niya isip kabahin sa AGUSAN UP! sa miaging tuig.

Butyag ni Gob. Corvera nga sama sa mga batan-on nga apil sa “TuoNegosyo” gusto gyod niya nga magnegosyo niadtong batan-on pa siya. Apan kulang lang gyod siya sa capital. Kini ang nagdugso kaniya nga himoon ang maong suporta sa mga batan-on nga naay mga maayong ideya sa negosyo karon. (Shena Mae Pabia ug Sonny Montilla, LGUAgusan del Norte/PIAAgusan del Norte)