LGU DINAGAT ISLANDS MIPAHIGAYON OG DIORAMA UG PHOTO EXHIBIT

LGU Dinagat Islands mipahigayon og diorama ug photo exhibit

Agi’g paghandom sa ika-77 nga kasumaran sa Historic Battle of Surigao Strait (BOSS), nagmugna ang lokal nga pangagamhanan sa Dinagat Islands og diorama ug photo exhibit.

Sa pakigtambayayong kang Jake Miranda, ang BOSS Memorial Council Chairperson sa Surigao City mibisita ang mga Sangguniang Kabataan (SK) sa Kalikasang Buhay Park niadtong Oktubre 28, 2021 aron mahibalo sila isip mga leader sa kabatan-onan alang sa paghandom sa kultura ug kasaysayan sa Dinagat Islands.

Tumong ug tinguha usab sa maong kalihukan nga mahatagan og maka-ideya sila kung unsaon pagmugna ug mga polisiya para sa hapsay na paggiya sa mga bisita puhon nga gustong mosuroy sa Dinagat Islands.

Ang maong kalihukan usa kini sa programa ni Gob. Kaka Bag-ao kung diin gihatagan niya ug katungod ang mga kabatan-onan nga mahimong “local tour operators” sa probinsya ilabi na sa ilang mga tagsa-tagsa ka mga munisipyo puhon nga kung modawat na ug turista ang probinsya.

Atol sa ilang pagbisita, han-ay nga gipasabot ngadto kanila ang mga mahinungdanong bahin sa kasaysayan sa pinakaulahing “battleship-to-battleship” nga Historic Battle of Surigao Strait.

Mipartisipar sa gipahigayon nga tour exhibit ang grupo sa mga kabatan-onan gikan sa lungsod sa Libjo, Cagdianao, ug Loreto. (Dinagat Islands-PIO/PIADinagat Islands)