TANANG MUNISIPYO UG SIYUDAD DINHI SA SURIGAO DEL SUR, ADUNA NAY KAUGALINGON NGA FIRE STATION SIGON SA BFP-CARAGA

Aduna na karon kaugalingong Fire Station ang tanang mga munisipyo ug siyudad dinhi sa Surigao del Sur. Kini human sa gipahigayon nga blessing ug pag-activate sa bag-ong fire station sa lungsod sa Tago ning miaging adlaw’ng Biyernes.

Sa pakighinabi sa Radyo Pilipinas (RP) – Tandag, gibutyag ni Dir. Fred Trajeras, Regional Director sa Bureau of Fire Protection (BFP) – Caraga, nga usa kini sa iyang gitambongan nga aktibidad sa iyang pagbisita dinhi sa probinsya.

Sumala pa nga ang maong lungsod maoy pinakaulahing munisipyo nga nabutangan og kaugalingong fire station, mga bombero, ug fire truck. Mikantidad matud pa sa 7.2 – million pesos ang nasangpit nga proyekto kung diin niadtong bulan sa Pebrero ning tuiga gisugdan ang konstruksiyon niini.

Samtang gidugang usab ni Dir. Trajeras nga sa umalabot bulan sa Nobyembre, posibleng magamit na usab ang bag-ong gitukod nga fire station sa lungsod sa Madrid ug Cortes, sakop ning probinsya. (RP1Tandag/PIA-Surigao del Sur)