TUISNYWERHEID

Emile Joubert is a PR practitioner by profession, but a food and wine enthusiast by desire. Check out his blog: www.winegoggle.co.za

SPESERYE IS DEEL VAN SUID AFRIKA SE ERFENIS EN ’N REDE VIR ONS LAND SE ONTSTAAN. SOOS ONS MENSE, IS DAAR UNIEKE KOSSOORTE. EN VIR MY STAAN EEN KOP EN SKOUERS UIT.

Met al die nuus oor die Gupta-familie se doen en late, is daar een aspek van die Indiër samelewing waaroor ek maar nooit sal twyfel nie. En dit is kerrie. Kerriekos, kos van my hart, voedsel vir my siel. Om ’n ordentlike kerrie self te maak, met sterk komplekse geure, het mens ’n hoër diploma nodig in chemie, spesery-kunde en Asiatiese antropologie. Dus eet ek maar my kerries by restaurante as ek groot wil gaan. Verkieslik lam. Verkieslik sterk genoeg om my ooghare te skroei elke keer dat ek die vurk optel. Maar daar is een of twee eenvoudige kerrieresepte binne bereik van die meeste kokke en wat eksoties genoeg is om jou aan die Taj Mahal, ’n goeie draaibal-bouler en daardie oulike sari’s te dink wat die meisies daar in Indië dra. Ek maak myne sommer in die pot, oor die kole. Boere en Indiërs is immers eindig maats, en die kruisbestuiwing werk puik. BESTANDDELE

4 bakhandevol vars koljander (danja) 10 ontbeende hoenderborsies, sonder vel Vier sprietuie Drie huisies knoffel Drie tot vyf vars rissies, afhangende van hoeveel woema jy soek 1 blik (400ml) kokosneutmelk Sap van twee suurlemoen 2 eetlepels olyfolie 1 eetlepel suiker 1 eetlepel matige kerriepoeier 1 teelepel sout 1 eetlepel gewone kookolie

Om ’n ordentlike kerrie self te maak, met sterk komplekse geure, het mens ’n hoër diploma nodig in chemie, speserykunde en Asiatiese antropologie.

AKSIE 1 Sny hoenderborsies in blokke wat groot genoeg is om in die mond van ’n normale mens te pas. Sit hoender in bak en gooi suurlemoensap oor, asook die suiker en sout. Roer deur en laat staan in rus en vrede vir 30 tot 40 minute, verkieslik in ’n koelplek tensy jy ’n dringende begeerte het om salmonella op te doen. 2 Neem koljander, knoffel, olyfolie, kerriepoeier en rissies. Ruik en kyk daarna. Heerlik. Besluit nou hoe jy dit als saam so fyn as moontlik kan kry. Fyn soos in ’n pasta. Jy kan dit met ’n baie skerp mes fyn opkap en dan met die mes se rand verder stamp. Jy kan ’n voedselverwerker gebruik. Of, as jy baie slim is, maak jy die pasta in jou voedselverwerk by die huis en karwei dit in ’n Tupperware, in ’n koelkas. (Die geure raak net beter hoe langer dit saamstaan.) 3 Gaaf. Nou maak jy jou pot warm. (Boeppens- of platboompot is fyn.) Gooi kookolie in. Wag tot die olie ’n rokie gooi. Gooi hoender in pot, sonder marinade. Roer hoender tot bleek-bruin. Gooi oortollige marinade by en reduseer tot ’n karamelagtige stroop terwyl die heeltyd geroer word. Gooi nou daardie groen pasta van jou by en roer totdat die hoender met die pasta bedek is. 4 Laat kom daardie dik en romerige kokosneutmelk. Roer deur tot als begin prut. Maak die pot halftoe. Prut vir 20 minute. Kap sprietuie op en voeg by jou pot. Prut vir nog 5 minute, en daar is hy. 5 Bedien op rys saam met ’n tamatieen uieslaai, en spoel afmet ’n yskoue ongehoute Chardonnay of’n Sauvignon Blanc. 6 Dis nie net daardie driepoot-pot oor die kole wat hierdie gereg ’n plaaslike geur gee nie. Ek sukkel om enige kerrie ernstig op te neem as hy nie bedien word met ’n goeie skeut Mrs Ball’s Chutney nie. Sy moes in haar vorige lewe ’n Indiese prinses gewees het, en ek eer haar elke keer as die kerrielus toeslaan. Soos wat mens moet.