4 minute read
EMILE JOUBERT
KOELE WATERS
Emile Joubert is a PR practitioner by profession, but a food and wine enthusiast by desire. Check out his blog: www.winegoggle.co.za
Advertisement
MENS SOU DINK DAT DIE LUILEKKER DAE VAN SOMER BETER IS VIR DIE GENOT VAN VIS. NEE WAT. WINTER IS VISTYD, REKEN EMILE JOUBERT.
Winter is dalk nie die beste manier om seekos te loop soek nie, maar dis dan wanneer die visse en skulpvis en ander lekkernye die beste smaak. Koue, vars water, sien. En die kos vries mooi, so jy kan jou seekos in die binneland koop, en dit gaan puik wees.
Snoek is winterkos, al is hy regdeur die jaar beskikbaar. Dan is hy vet en blink, en maak mooi kos.
Hier in die Kaap kook ek al 40 jaar snoek, en onthou dis die dae toe die snoek so volop in die Kaap was dat jy jou hande voor jou swembroek moes indruk as daar ’n skool van die visse in die omtrek was. Gebraaide snoek is natuurlik koningskos, maar as ek my lyf Kaaps hou dan is daar min dinge wat smoorsnoek klop. Met bietjie kerrie by.
KERRIESMOORSNOEK Vir vier tot ses porsies
750g gerookte snoek ½ koppie (125ml) kookolie. (Nie olyf nie, kookolie.) 4 uie, in skywe gesny 1½ eetlepel (22,5ml) vars gemmer, gekap 2 rooi rissies, gekap 5 medium aartappels, geskil Swart peper 1 tot 2 teelepels kerriepoeier (tuisgemaak of uit die boks)
1 Breek die snoek met jou hande in vlokkies en verwyder daardie grate wat so baie pyn kan veroorsaak en dokters by noodklinieke so geamuseerd hou. Kook die aartappels in water totdat hulle gaar is – sowat 20 minute. Laat die aartappels afkoel en sny hulle in blokkies. 2 Nou braai jy die uie in die olie saam met die rissie, gemmer en jou kerriepoeier. Wag tot die ui sag is en voeg die aartappelblokkies by. As dinge nog nie genoeg kleur vir jou het nie, sprinkel ’n teelepel borrie by. Onthou, jy eet met jou oë ook, en as die woord “kerrie” daar is, moet die kos kleur hê. 3 As die kleur dus reg is, sit jy die snoek bo-op die kerrie-aartappels – en uie. Dit sal binne sekondes warm raak. Hou warm tot jy dit vir jou mense bedien. 4 Sommige smulpape hou daarvan om ’n geposjeerde eier bo-op elke bord kerriesmoorsnoek te sit saam met bietjie Hollandaisesous. Ek bak ’n eier vir elke mens, sit dit bo-op die porsie met ’n bietjie mayonnaise. Die romerige eier vorm nogal ’n aangename geur-ervaring saam met die kerrie. 5 Rys is opsioneel – nes jy lus is. Ek vind die aartappels gee genoeg stysel vir die lang pad terug.
DIE DING CALAMARI Dis mos die seekatterige dier, volop in die see en al wat restaurant is. Maar laat ek jou sê, as jy eens jou eie calamari gemaak het, bestel jy dit nie sommer weer as jy uiteet nie.
Ek raak nostalgies, want goeie calamari laat my aan die ou en beter dae dink toe daar nog wettige perlemoen in die omtrek was. Hierdie calamari-resep laat my nogal aan perlemoen dink. Dis ’n bogger om perfek murgsag te kry, maar volg hierdie stappe en jy kry geurige calamari met die tekstuur van baba-boudjies.
Vir vier tot ses mense
600g se calamari steaks (die meeste viswinkels van Onrus tot Messina het dit) 3 teelepels (15mg) koekmeel knippie sout Gemaalde swartpeper 1 teelepel fyngestampte droë rissie 1 liter sonneblomolie
1 Sny die calamari in strokies wat ongeveer 2cm breed is en droog die strokies af met kombuispapier of jou buurvrou se haardroër. Meng die meel, sout, peper en rissie saam in ’n bak. 2 Sit nou jou olie in ’n pot en plaas dié oor jou hitte. Laat die olie warm genoeg raak om ’n vulkaan te blus ... ek meen die rook moet uit die olie trek. ’n Swart pot oor ’n stel warm kole is uitstekend hiervoor. 3 Wanneer die olie hel-warm is, vat jy ’n paar stukkies calamari, doop dit in die meel sodat dit met die mengsel bedek is en sak dit dan in die olie. Versigtig: een spatsel van daardie olie brand vir jou laat jy vir jou ouma skree. 4 Sodra die calamari ’n goudbruin-skynsel kry, is dit reg. 5 Dis nou hoe dit sag word. Laat hom net sekondes in die olie bly en haal dan uit. Braai ook net ’n paar – vier of vyf – stukkies op ’n slag. Te veel calamari op ’n slag trek die hitte uit die olie uit, en dis nie wat ons soek nie. 6 Ek bedien die calamari oor ’n slaai gemaak uit stampkoring en koljanderblare. Ek eet dit met my vingers, bietjie mayonnaise en suurlemoensap.
