EMILE JOUBERT

KERRIE SOOS DIE BOERE KAN

Emile Joubert is a PR practitioner by profession, but a food and wine enthusiast by desire. Check out his blog: www.winegoggle.co.za

SPESERYE HET TOT DIE ONTDEKKING VAN NUWE WÊRELDE GELEI EN NASIONALE KOOKWYSE VERANDER. ONS AS SUID-AFRIKANERS HET OOK SPESERYE TE DANKE VIR ONS ONTSTAAN HIER AAN DIE SUIDELIK E PUNT VAN AFRIKA. EN KERRIE: MALEIS OF INDIES, SONDER SPESERYE WERK DIT NIE.

Daar was onlangs ’n gefladder en ’n gestik in teekoppies toe dit bekend gemaak is dat kerrie nou meer verteenwoordigend van – en gewilder – in Brittanje is as daardie nasie se geliefde vis-en-tjips. Vir ’n kerrie-verslaafde soos ek was dit geen verrassing nie, veral aangesien die Engelse se kookvernuf oor die algemeen vir enige skool-koshuismoeder na Julia Child laat lyk.

Die lekkerste vir my is dat geen kerrie ooit dieselfde proe nie. Jy kan botterhoender by ses restaurante bestel, en elke liewe een sal anders smaak danksy die buigsame verhouding wat die sjef met sy of haar speserye en gaarmaakmetode het. Ek het as spruit in dieselfde straat as vier Indiese gesinne wie almal dahl (lensiekerrie) gemaak het. Nodeloos om te sê, mevrou Singh se gereg het heeltemal anders gelyk, geruik en geproe as mevrou Patel s’n.

Danksy Suid-Afrikaners se liefde vir kerrie en die wondere van kulturele osmose, het die Boerekerrie ontstaan. Nee, die belang van speserye en vleis en ’n deeglike kooktegniek is nie afgeskeep nie. Daar het net ’n paar ekstra lekkerstes bygekom om die kerrie te maak aanpas by dinge waarvan ons palette hou. En dis ’n soetigheid saam met die speserye. Dus, dames en here, word die kulturele kleinood van appelkooskonfyt – die fyn soort – gevind in onse kerries. Die soetsuur smaak bind ongelooflik goed saam met die speserye van die kerriepoeier. En die ander byvoegsel is iets so Suid-Afrikaans soos Peppermint Crisps en gehekelde doilies, naamlik Mrs Ball’s Chutney. Hy word nie in die kookproses gebruik nie, maar mildelik bygevoeg tot die eindproduk. Maar voor my mond te erg begin water, hiermee ’n resep vir boerekerrie: 500 g droë, groot witbone, oornag geweek óf 3 tot 4 blikke botterbone as jy nie tyd het om oornag te week nie sonneblomolie 8 stukke lamsnek 8 stukke kort lamsribbetjie 2 uie, fyngekap 20 ml matige kerriepoeier – Rajah of enige kommersiële handelsmerk 30 ml borrie 15 ml fyn appelkooskonfyt 8 middelslag-aartappels, geskil sout en vars gemaalde swartpeper

1 Plaas die bone in ’n groot kastrol en tap koue water in tot die bone bedek is. Maak toe met ’n deksel en bring tot kookpunt. Skakel die plaat onmiddellik af en laat staan die bone oornag in die water. Verhit ’n bietjie sonneblomolie in ’n oondkastrol en braai die lamsnek en ribbetjie oor stadige hitte tot mooi bruin. Verhit die oond tot 180 °C. Voeg die gekapte ui by die vleis en braai vir 10 minute. Plaas die kastrol vir ’n uur in die oond sodat die vleis sag word. 2 Skakel intussen weer die plaat aan en kook die bone tot sag. Haal die kastrol met die vleis uit die oond en voeg die kerriepoeier, borrie en appelkooskonfyt by. Geur met sout en swartpeper. 3 Dreineer die bone en voeg saam met die geskilde aartappels by die vleis. Voeg ’n koppie water by. Meng deur en plaas terug in die oond. Laat die kerrie vir minstens nog twee uur in die oond. Jy kan die temperatuur verlaag na 160 °C en die kerrie stadig kook. Hou dop en indien nodig, kan jy nog water byvoeg. 4 Wanneer als klaar en reg is, laat staan vir so 30 minute om die geure kans te geen om te trou. Bedien dan op rys en met Mrs Ball’s se blatjang. As jy regtig in ’n Indiese bui is, trek ’n sari aan en maak ’n slaai van fyngekapte tamaties en uie om saam met jou kerrie te eet.