22.02.2007. TANCURIC NAN NIKAD NI FALELO Franjo Margetić Lalić i Ivan Dižić se domišljaju mesopusta po nekadajnu – bila j' vela siromašćina, ma kumpanija vekon vesela… Na Grobnišćini su maškare opstale do danaska na falu onin upornin ki su ta običaj obavjali i kad je bil na špot, rasprostrt javnomu sudu. Na Obćini Čavle oformjena j' Udruga grobničkih maškar ka dela po svojen planu omasovjavanja maškaranih običajih. Na Čavji smo se malo pogovorili z najstarijimi jubiteji maškar na Grobništini gospodin Franjo Margetić Lalić, rojen 1909, a tu je i gospon Ivan Dižić, stari grobnički dondolaš. Povijte malo gospon Franjo, kada ste se počel maškarat? Prvi put kad mi je bilo devet let. Znan da j' finil Prvi svjetski rat, a znan i po ton ča su to leto storili aeroplan od dasak širok za su cestu. Va njen je bila bačva vina. Na smenu su ga nosili do Čavja. Kako su se nosači minjali tako su z bačve zimali gorivo. Tako j' vesela ta trajba šla se hodeć do Sušaka, a bili bimo šli i v Riku da nas se nisu bali. Vač ste se namaškarali? Bila j' vela siromašćina. Težaki su delali bez plaće i ni bilo soldih za maškare. Ozdomi se j' zelo vina, a obučevala j' se roba najstarija, znošena, poznopak i sakako. Tako da su va to vrime maškare bile grde i strašjive kod i dondolaši. Robu smo užali posujevat i sakako se šlepat. Ma kad ti se j' ča zgubilo imel si mesopust i potli mesopusta. Ni bilo bogatije, ma kad su došle maškare i zasople va sopele, a potli i va harmonike i bubnji, ni bilo važno si omaškaran. Muži i žene su fletno užali zaštropat. Celo selo se j' delalo i si su jedva maškare dočekali da se natancaju. Najveć se j' tancalo veselo: pojku, a za počinak je bil vajcer. Soplo se j' i tancalo bez prestati. Voli, konji, pa auti Užali smotako omaškarani se obać. Talijani ki su nas okupirali užali su na nas gjedat na mostu ka j' bila granica, se z strahon, aš su se bali da ih ki ne šupi z čin. Vozili smo se na sanah do trejsetih let. Potli pak z voli, z konji, a okol sedandesete z auti. Se kola su bile okrunjene z trakami od harte na boje, kod i tujki na pokrivali za glave. Va sakon selu bila j' kumpanija za to. Niki j' vavik bil za to više. Ovdika na Cerniku bil je dobar Ivan Tomiškin i si Petrini. Va tih kumpanijah vavik je bilo nikakovih neplaniranih pagarel. Jedanput je moja mat posudila jednu mojmu prijatelu tutu. Bila mu j' jako uska i ni ju mogal suć za nastran poć. Kako smo celi dan klatili, tancali i
1
pili, on ni više mogal trpet pa j' se delal va tutu. Kad je drugi dan došal, moja ga j' mat z hrustun tukla… Sad već ne greste va maškare, a da još imate ki dondul ili makareš, kakov mićeri klepetić? A iman, pravi kovani. Čuvan ga kod oko va glavi za uspomenu. Vavik mi ga dohajaju posujevat, a oteli su mi ga već i ukrast. Ma ga čuvan, aš puno j' on z manun prošal. Užal san ga vezat z onimi teškemi lanci od petnajst kil i to j' tako rušilo da malo ki ni s kuće zišal. Godilo j' mladomu bit va centru pažnje. Ženskice te gjedaju, aš bil san lip i volel san tancat, a bil san i dobar tancur. Tancuric mi nikad ni falelo. Potli j' i moja pokojna Darinka vavik s manun hodila va maškare. Škoda ča j' se prošlo tako brzo. Došlo j' vrime kad su maškare skoro zamrle, ustalo j' nas par, glavni j' bil Diža… Gospon Ivan Dižić, čuli smo da ste vi dondolaš ki j' održal tradicijska nit maškaranja na Grobništini. Povijte malo kako j' to bilo? Od djetinjstva jako san volel maškare i maškaral san se do pred tri leta sako leto. Ni vrag me ne bi bil fermal. Užal san se obuć va Mateta mesopusta. Tako san dobro glumil da san mrtav va kaseli, da j' moja žena došla i počela me trest za ruku. Ivić si živ, si dobro? A ja san se držal za ozbiljno mrtav. San ih malo prestrašil. Bil ti j' to smih potli jojš pol leta. Jedanput san pak bil Matetova udovica, sa va črnoj ženskoj mobi. Tako san plakal kad su ga obsudili na smrt da su mi zasprave suze tekle, ali od žalosti ča j' finjeval mesopust. Turci pobigli pred dondolaši Dondolaš san pak bil sako leto. Z tin se j' opravo (????) početak mesopusta. Imal san osan dondulih ili klepetal. Se smo užali obuć, onako strašjivi strašili smo dičinu, a vraga se dica, nejće prestrašit kad su stari povedali da su i Turci od straha pobigli pred dondolaši. Hodili smo od kuće do kuće. Judi su nas čekali. Pu bojih gospodarih sega j' bilo pripravno. Onda smo sagdi pojili, popili, zasopli i zatancali z domaćimi. Ženske su bile omaškarane va ciganke na kolih i one su tobože gatale i va košare pobirale ča su dobile za gatanji. Niki j' dal jaj, niki kobasic ili pancete, voće, soldih, a za pijaču da se ne govori. Kad smo se to sabrali, pol sela j' šlo z Zastenic za nami Vlačini na Jezero. Tamo se j' speklo se ča su nan judi dali i klalo na stoli. Si su jili i pili. Tancali smo i zafrkancije i kumedije delali do jutro. Potli pedesetoga leta više ni bilo maškaranih kolon. Ja i moja klapa, stari Lalić i ovi drugi nismo teli odustat. Ja san sako leto obisil svojih osan dondulonih i nabijal san od kuće do kuće za se moći. Da nisan sad bolan još bin staroga Lalića oprtil i šli bimo još i sad mi dva. Sad od kad ne moren kampanat, poklonil san sedan klepetih ovin našin mićerin dondolašon, aš su dohajali da njih jih posudin. Ja san rekal ziberite saki po jednoga i od sad vi morate tuć sako leto dokli god budete mogli, kod san i ja i onput kad ostarite ćete ih i vi mladin predat. Sjećate se još česa ča j' bilo prvo, a sad ni o maškarah?
2
Da. Obavezno smo šli va Pohum, pu Ludvika se j' tancalo va Sali. Svitele su lampe na karbit, bilo j' to škuro i dobro, ni se baš videloako ti j' ruka skliznula na zabranjeno mesto. Ali tel san nič drugo reć. Užalo se j' va jednon kantunu storit fanj veliku gajbu od jesenovih kolićih povezanih z škrebuton. Na vratih je stal vrag ili vuk i još jedan drugačije obučen čuvar toga rešta. Onputa su dva vraga lovili po sali divojke i zapirali ih va tu gajbu. Ako su vrazi lovili reklo se j' da love duše, a ako su lovili vuki, onda se j' reklo da love janjice. Mladići su morali za svoju divojku platit, ako su teli da ju poskrivać pušća van z rešta, da š njin nastavi tancat. Soldi tako nabereni dali su se sopcen da čim duže sopu. Mladići ki nisu imeli soldih mogli su samo gjedat do jutro va svoje divojke u reštu. Vavik su mater užale divojkan reć kad smo došli po njih: hote ma pazite aš mesopusni špaš more bit Katarinski faš. Ča ti j' značilo ako se ne ponaša kod tribi da će za 9 misecih rodit dite. Biserka FUĆAK
3