PROTOCOLO DE SOLICITUDE E ENTREGA DE COPIAS DE PROBAS ESCRITAS ÁS FAMILIAS
Ana María Palazón e Belén Costa
OBXECTO
Os exames, controis, probas escritas, traballos escolares… son un recurso educativo máis no proceso de avaliación continua integrado no desenvolvemento dun currículo competencial: se programa por competencias, avalíase por competencias. Partindo desta premisa, este centro educativo considera que a finalidade da solicitude e entrega da copia de exames, controis, probas escritas e/ou traballos escolares só poden ter como obxectivo a colaboración na identificación dos recursos educativos para a mellora do rendemento académico do alumnado, e non para un procedemento de revisión de cualificacións, no marco do respecto ás competencias técnico-profesionais do profesorado deste colexio.
Quedan excluídos deste protocolo a revisión de cualificacións contempladas xa na normativa educativa, é dicir, non se pode utilizar para reclamar cualificacións nin decisións sobre promoción.
Os pais, nais e titores ou titoras do noso alumnado, como primeiros responsables na educación dos seus fillos/as ou pupilos, asumen a participación activa no seu proceso educativo, no marco do seu dereito a estar informados sobre o seu progreso na aprendizaxe e integración socioeducativa e en sintonía co seu deber de apoiar a evolución dese proceso educativo en colaboración co profesorado e cos centros docentes.
Este protocolo ten por obxecto establecer para os colexios un procedemento que permita atender a solicitude de obtención de fotocopias de exames, controis e probas escritas, realizadas no proceso da avaliación continua, no marco dunha relación de colaboración entre escola e familia, tendo como referencia o proxecto educativo deste centro, a normativa xeral de aplicacións en materia de avaliación e os dereitos e deberes de todos os membros da comunidade educativa.
PROCEDEMENTO
1. Sendo o exame/control/proba escrita un recurso educativo máis no proceso de avaliación continua, a solicitude dunha copia terá un carácter extraordinario, e expedirase de maneira individualizada previa solicitude motivada do pai, nai ou titor legal.
2. Non se facilitarán copias de exames/controis/probas escritas correspondentes a cursos escolares rematados nin a períodos de avaliación concluídos.
3. Antes de procederse á solicitude de entrega da copia manterase unha reunión coa persoa titora do alumno ou alumna afectado co seu pai, nai ou representante legal, ou coa persoa titular da dirección da etapa. Se non se cumpre este requisito, non se expedirá a copia solicitada.
4. A entrega da copia terá por finalidade a colaboración na identificación dos recursos necesarios para a mellora do rendemento académico do alumnado e non para a revisión da cualificación
As revisión da cualificación das probas ordinarias ou extraordinarias así como os procesos de reclamación relativos á decisións de promoción ou titulación, deberá seguir o procedemento de reclamación establecido especificamente pola Consellería de Educación.
5. Para os efectos da protección de datos, faise constar que a difusión das copias entregadas a terceiras persoas non está autorizada.
6. Se o número de páxinas solicitadas (poden solicitalas de varios exames/probas) excede de x fotocopias -cada centro deteminará o número-, o solicitante deberá aboar as fotocopias que excedan dese número establecido polo colexio.
COMPROMISOS DOS PAIS, NAIS E TITORES
Primeiro. Os procesos de avaliación esixen a colaboración da familia, polo que, para valorar a solicitude de acceso á copia do exame/control/proba escrita, terase en conta o seguinte:
a) A adopción das medidas necesarias para que a asistencia e participación do seu fillo ou na actividade escolar sexa regular e comprometida, de acordo co deber de alumnado de asistir a clase.
b) O interese por coñecer regularmente e apoiar a evolución do proceso formativo.
c) O estímulo ao alumno ou alumna para que se desenvolvan as actividades ou tarefas encomendadas no domicilio familiar.
d) A participación nas entrevistas e reunións convocadas polo persoal docente do centro en relación co seu proceso de atención educativa.
e) A información facilitada ao equipo docente daqueles aspectos e/ou circunstancias referidas á personalidade e circunstancias específicas do alumno ou alumna relevantes para a relación co equipo docente en relación co proceso formativo e orientador.
Segundo. Os pais, nais e titores legais son os responsables de manter a confidencialidade da copia ou copias facilitadas e comprométense a custodialas durante o seu uso e á súa destrución unha vez utilizada, para evitar perdas ou difusións non autorizadas.
* Para os efectos da normativa de protección de datos de carácter persoal, débeselle advertir á persoa que custodia a copia que a difusión a terceiros das copias facilitadas non está autorizada.
Terceiro. O colexio poderá denegar futuras peticións de copias no suposto de utilización inadecuada ou difusión non autorizada dalgunhas das copias proporcionadas con anterioridade, incluso se o motivo alegado foi a súa perda.
MODELO DE SOLICITUDE DE COPIA DE EXAME/CONTROL/PROBA
Á DIRECCIÓN DO CENTRO _______________________________
Don/Dona __________________________________________________________________, pai/ nai/titor/titora do alumno deste centro escolar de ________ curso de _________, grupo _______
SOLICITA
Copia do exame da materia de ______________ realizado por este alumno/ alumna o día _________, co obxecto de poder identificar os recurso educativos necesarios para a mellora do seu rendemento académico.
Para tal efecto, MANIFESTO:
- Que recibín información suficiente, que coñezo e acepto expresamente o protocolo do centro para a petición e entrega de copia de probas escritas.
- Que son coñecedor/a de que unha proba escrita (exame, control…) é un recurso educativa máis no proceso de avaliación continua.
- Que a difusión a terceiras persoas da copia facilitada non está autorizada, comprometéndome á súa custodia durante a súa utilización e á súa destrución unha vez utilizada, co obxecto de evitar extravíos ou difusións non autorizadas.
Solicito a copia a través de
• Remisión por correo electrónico ao enderezo: ______________________________
• Retirada en Secretaría do centro (custo ___ €/folla, a partir de ___ copias).
____________________, ______ de _______________________ de 20__
Sinatura e DNI
MODELO DE CONTESTACIÓN Á SOLICITUDE DE COPIA DE EXAME
Don/Dona __________________________________________________________________
En resposta a súa solicitude do ____/____/____, indicámoslle
• Que se lle remitirán os documentos solicitados ao enderezo electrónico indicado.
- Que están ao seu dispor as copias solicitadas que poderá recoller (aboando o custo das follas que excedan de ___ copias a ____€ folla).
Os pais, nais e titores, como primeiros responsables da educación dos seus fillos, fillas ou pupilos, aceptan e asumen a participación activa no seu proceso educativo no ámbito escolar. Sen prexuízo de que se inicie, de ser o caso, o procedemento oficial de reclamación de cualificacións (que ten unha regulación administrativa específica) a dirección deste centro entende que a finalidade da súa solicitude e da entrega da documentación ten como único obxectivo a colaboración da familia na identificación dos recursos necesarios para a mellora do rendemento académico do seu fillo/filla/pupilo, e non se trata dun procedemento de revisión das notas, Lembrámoslle que un exame, control ou proba escrita é un recurso educativo máis entre os distintos recursos e procesos de avaliación continua.
O equipo docente está á súa disposición para atender as dúbidas que lle poidan xurdir e para seguir traballando conxuntamente coa familia no proceso educativo do seu fillo/filla/pupilo, principal obxectivo do noso colexio.
Esperamos contar coa súa colaboración leal nesta importante tarefa. Lembrámoslle que a difusión a terceiros do documento facilitado non está autorizada.
Pregámoslle que asine o duplicado desta comunicación, como “Recibín”.
Asinado:
