Eystrahorn
www.eystrahorn.is
Fimmtudagurinn 12. apríl 2018
13. tbl. 36. árgangur
Tækjabúnaður á HSU Hornafirði endurnýjaður
Nýr búnaður var tekinn í notkun á dögunum á heilbrigðisstofnuninni. Í nóvember á síðasta ári fór stofnunin af stað með söfnun fyrir tveimur nýjum síritum og hjartastuðtæki. Söfnunin gekk framar vonum og var gengið frá pöntun á tækjunum í janúar. Skinney Þinganes gaf einn sírita að verðmæti 1.095.695 kr., einn einstaklingur gaf 1.000.000 kr. í söfnunina og fleiri lögðu verkefninu lið með peningagjöfum. Gjafa- og minningasjóður Skjólgarðs tók þátt í verkefninu og styrkti kaupin eða sem samsvarar kaupum á einum sírita. Búnaðurinn er nú
kominn í notkun og hefur sannað gildi sitt nú þegar. Annar síritinn og hjartastuðtækið eru staðsett á heilsugæslunni og hinn síritinn er notaður á sjúkrasviði Skjólgarðs en reglulega eru lagðir þar inn veikir einstaklingar sem þarf að fylgjast náið með. Það er ómetanlegt að finna fyrir stuðningi íbúa og fyrirtækja í samfélaginu þegar kemur að endurnýjun tækja en fjárframlög til stofnunarinnar duga ekki til endurnýjunar á stærri tækjum. Við viljum færa öllum þeim sem styrktu kaup þessara tækja kærar þakkir fyrir stuðninginn!
Fréttir frá Sunddeild Sindra
Helgina 15.-19. febrúar héldum við í Sunddeild Sindra í Kópavog og þar tóku iðkendur og þjálfarar Breiðabliks á móti okkur og æft var saman í 3 daga. Fyrstu helgina í mars héldu 9 iðkendur á Hennýjarmót á Eskifirði en alls voru 80 iðkendur skráðir á mótið frá 5 félögum. Allir iðkendur Sindra 10 ára og eldri unnu til verðlauna í sínum aldursflokkum en yngri iðkendur hljóta viðurkenningu fyrir þátttöku. Sunnudaginn 18. mars héldum við okkar árlega páskaeggjamót í blíðskapaveðri. Þau tímamót áttu sér stað á þessu móti að notast við Splash skráningarkerfið. Splash skráningarforritið gerir okkur kleift að sendir úrslit á Sundsamband Íslands og með réttri dómgæslu fá tímana skráða. Þar eru tímar iðkenda síðan vistaðir inní grunn sem er aðgengilegur á netinu ásamt tímum sundmanna um allan heim slóðin er www. swimrankings.net. Þetta eru sannkölluð tímamót þar sem tímar fyrri iðkenda deildarinnar eru hvergi til og hafa í gegnum tíðina verið jafnvel vistaðir í exel- skjölum inni í einkatölvum og engum aðgengilegir því miður. Sundsambandið gerir t.d. kröfu um að fá tíma frá Unglingalandsmótunum á þessu skráningarformi eigi þeir að vistast inní þennan grunn. Svona mót er að sjálfsögðu ekki hægt að standa fyrir nema með aðkomu
foreldra og annarra sjálfboðaliða og viljum við þakka þeim kærlega fyrir þeirra innlegg. Einnig voru við svo lánsöm að fá 2 foreldra til að taka dómaranámskeið á Eskifirði í tengslum við Hennýjarmótið og er þeirra aðkoma ómetanleg. Sunddeildina vantar stjórnarmann og langar mig að biðla til einhvers velunnara að bjóða sig fram í stjórn, 1 stjórnarmann vantar til að uppfylla reglur um stjórnarskipan deildarinnar, stjórnarmaður þarf ekki að vera foreldri iðkanda þó svo að hefð hafi skapast fyrir
því innan Sindra. Eins vantar okkur þjálfara í deildina í haust þegar Viktoría hverfur til annarra starfa. Áhugasamir mega senda línu á sunddeildsindra@gmail.com eða hringja í undirritaða 8673757 eða Erlu Berglindi 8476634. Að lokum langar okkur að þakka fyrir þær frábæru móttökur sem við fáum frá ykkur þegar við erum á ferðinni með dósasafnanirnar okkar. F.h. Sunddeildar Sindra Gunnhildur Imsland