Eystrahorn 36. tbl. 34. árgangur
www.eystrahorn.is
Fimmtudagurinn 27. október 2016
Kvennafrídagurinn
Kvennafrídagurinn var haldinn hátíðlegur á Höfn eins og á mörgum stöðum á landinu. Konur söfnuðust saman við AFL starfsgreinafélag og fóru í kröfugöngu að Hótel Höfn þar sem haldinn var baráttufundur. Yfir eitt hundrað konur tóku þátt í kröfugöngunni og enn fleiri mættu á hótelið til að hlýða á erindi og tónlistaratriði. Í barátturæðum kom fram að frá upphafi kvennafrídagsins 1975 hafa konur þurft að berjast gegn launamuni kynjanna því lítið þokast í að honum verði útrýmt. Kynbundinn launamunur hefur mælst frá upphafi launakannanna, þegar um kynbundinn launamun er að ræða þá er búið að
leiðrétta launamuninn með tilliti til þátta eins og vinnutíma, menntunnar og starfsaldurs. Í launakönnunum AFL þá kemur fram að kynbundinn launamunur eykst sl. ár. Kynbundinn launamunur af dagvinnulaunum var 8,7% árið 2011, árið 2014 14,9% og 2015 17,6% sem er algjörlega óásættanlegt. Það kom fram að orsakir kynbundins launamunar eru margar, en megin orsakir felast í tvískiptum vinnumarkaði og aukagreiðslum til karla frekar en kvenna. Tengslanet karlaveldisins hefur áhrif á möguleika á starfsframa kynjanna. Þeir standa saman án þess að gera sér fyllilega grein fyrir því og nota sín viðmið og
gildi. Launamunur er enn meiri þar sem launaleynd ríkir. Fundarkonur voru sammála um að baráttunni verði að halda áfram þar til launamuni kynjanna verði útrýmt. Mikil samstaða var á meðal fundarkvenna og ríkti baráttuandi yfir fundinum. Fundurinn endaði á fjöldasöng þar sem sunginn var baráttusöngurinn Áfram stelpur.
Tekið úr launakönnun AFLs 2015
Dagdvöl aldraðra í Ekrunni tekur þátt í jól í skókassa
Í dagdvöl fyrir aldraðra í Ekrunni er öflug starfsemi. Nú í ár var gerð tilraun með þátttöku í verkefninu „Jól í skókassa“ en verkefnið felst í því að fá börn jafnt sem fullorðna til að gleðja börn sem lifa við fátækt, sjúkdóma og erfiðleika með því að gefa þeim jólagjafir. Með slíkum gjöfum er þeim sýndur kærleikur Guðs í verki. Gjafirnar eru settar í skókassa og tilað tryggja að öll börnin fái svipaða jólagjöf er mælst til þess að ákveðnir hlutir séu í hverjum kassa. Hópur ungs fólks innan KFUM og KFUK hefur staðið að verkefninu á Íslandi frá árinu 2004. Föstudaginn 14. október voru jólagjafirnar græjaðar á bleikum föstudegi. Guðnýju Helgu og Þorsteinni Matthíasson voru afhentar gjafirnar en þau halda utan um verkefnið hér á Hornafirði. Það er ánægjulegt að geta tekið þátt í jákvæðu verkefni sem þessu. Að lokum er vert að benda á að ýmsar vörur eru seldar í dagdvöl aldraðra, nóg er til af prjónavörum svo sem sokkum og vettlingum og íbúar eru ávallt velkomnir í heimsókn.
Með kveðju Anna, Eyrún og Katrín í dagdvöl aldraðra