Eystrahorn 26. tbl. 31. árgangur
www.eystrahorn.is www.eystrahorn.is
Fimmtudagur 15. ágúst 2013
Glæsilegt Unglingalandsmót á Hornafirði Ljósmyndir: Kristján Jónsson
Góð aðstaða til íþróttaiðkunar og öflugur hópur sjálfboðaliða voru lykillinn að vel heppnuðu Unglingalandsmóti sem haldið var á Höfn um verslunarmannahelgina. Hornafjörður hefur nú endanlega stimplað sig inn sem einn af ákjósanlegustu stöðum á landinu fyrir Unglingalandsmót UMFÍ. Undirbúningur hafði staðið yfir í næstum ár á vegum landsmótsnefndar en á síðustu vikum stækkaði hópurinn þegar kom að uppsetningu keppnis- og tjaldsvæða. Á mánudagsmorgun komu fjölmargar vinnufúsar hendur saman og gengu frá eftir mótið. Keppni hófst snemma á föstudag og lauk ekki fyrr en síðdegis á sunndag. Sérgreinastjórar unnu frá morgni til kvölds landsmótshelgina
til að allt gengi snurðulaust fyrir sig. Keppt var í frjálsum íþróttum, fimleikum, skák, starfsgreinum, körfuknattleik, strandblaki, fótbolta og mótocrossi. Framlag tuga sjálfboðaliða á keppnis- og tjaldsvæðinu alla helgina var ómetanlegt. Af gestum að dæma þótti það mikill kostur að keppni fór fram á sama svæði og þannig hafi ekki þurft að fara um langan veg ef unglingarnir voru að keppa í mörgum greinum. Unglingalandsmótin eru fyrst og fremst fjölskylduhátíð. Á kvöldvökum stigu á stokk Páll Óskar, Jón Jónsson, Parket, Stuðlabandið og fleiri. Auk þess var í boði ýmiss afþreying fyrir unga og aldna alla daga. Á miðsvæðinu voru afhjúpaðir þakkarskildir
um Unglingalandsmótin 2007 og 2013. Mótin hafa hreyft við íþróttamálum í héraðinu og verið hvatning til frekari uppbyggingar og iðkunar. Íþróttir og tómstundastarf er mikilvægur hlekkur í daglegu lífi þeirra sem byggja staðinn. Það er því engin ástæða til annars en að halda áfram á sömu braut, stefna fljótlega að því að halda landsmót hér aftur og bæta aðstöðuna enn frekar. Öllum þeim sem komu að framkvæmd mótsins eru færðar sérstakar þakkir. Íbúar geta verið stoltir af framkvæmd Unglingalandsmóts UMFÍ árið 2013. Matthildur Ásmundardóttir, formaður USÚ
Á heimasíðunni blandan.is skrifar Freyr Ólafsson eftirfarandi:
Sigur sjálfboðaliðanna Um liðna helgi sótti ég heim Höfn í Hornafirði, ásamt tveimur sonum mínum, þriggja og ellefu ára. Unglingalandsmót togaði okkur til sín. Ég hef verið upptekinn af starfi sjálfboðaliða í íþróttum og víðar. Eftir þessa helgi er það starf þeirra sem stendur uppúr. Ég leyfi mér að segja að sjálfboðaliðarnir á Höfn voru sigurvegarar helgarinnar! Frammistaða sjálfboðaliðanna var mögnuð. Sama hvert var litið stóðu þeir vaktina. Á frjálsíþróttavellinum var frábærlega mannað. Knattspyrnuhúsi var breytt í körfuknattleikshöll. Klósettþrif, andlitsmálun, tjaldvarsla, brautarvarsla í hoppiköstulum, dómgæsla í körfubolta, knattspyrnu, svo eitthvað sé nefnt. Allsstaðar voru það greiðviknir og glaðlegir sjálfboðaliðar sem stóðu vaktina. Augljóslega af mikilli ánægju. Gáfu af sér. Sveitarfélag með rétt um tvö þúsund íbúa tók þannig á móti okkur feðgum að vindstrengurinn stífi gleymist, greiðvikni ekki. Til hamingju Hornafjörður. Til hamingju UMFÍ. Takk fyrir okkur!
hornafjordur.is er nýtt netfang samfélagsvefsins