TINO, EL PÁ D’ SPIDERMAN J . Fernando Iglesias González

Mención Especial en Asturiano

TINO, EL PÁ D’ SPIDERMAN J . Fernando Iglesias González

El cruxíu de la última mamposta emburrióme al corte . Nel intre fundió la rampla . Baxaben costeros, mampostes y rachos raspiándome les espaldes . Al poco quedé enterráu hasta’l pechu . Nun podía moveme y aquella llábana de pizarra que casi me diera na cabeza, taba a puntu descolgase . Debía tar mancáu, pero nun me dolía nada, sacante l’estómagu . Pensé nos que taben percima . Yera raro, nun sentía dengún ruidu y empecé a creyer que m’olvidaríen y que morrería solu n’aquel furacu . Más raro tovía yera l’arume a café que, poco a poco, s’apoderaba de tolo que m’arrodiaba . Sonó el despertador . Como cada mañana, salté de la cama ensin pensalo . Na cocina, Milia recibióme cola taza de café con lleche condensao, de siempre . ¡Qué muyer esta! -pensé- . Cuando, de recien casaos, me cambió les gotes por dos cuyaraes de lleche condensao, protestaba . Agora yá nun digo nada . Tomé’l café d’un tragu, ensin respirar . – Tienes mala cara . ¿Nun dormiste bien? Espatolexaste tola nueche . ¿Ta malu’l puntu?

–17–

– ¡Bah… como siempre! Pero lo que me fai dormir mal ye esa velea del accidente que se repite un día si y al otru tamién . Nun m’apetecía charrar del asuntu, nun quería preocupala coles coses de la mina . Yá yera bastante que nun durmiera yo, asina que fice como que nun vía la cara que ponía y dixe: – Marcho, que’l autobús nun espera . – Nun pensarás dir a pechu descubiertu… Anda, pon l’anorak, que hai una buena xelá . Punxe l’anorak, garré’l bocadillu y, de la que salía, asoméme al cuartu los neños . Nun pude por menos que sonrir al ver a Anxel . el más pequeñu, embutíu nel traxe de Spiderman que-y regaláramos pol cumpleaños . Miré pa Milia que tamién sonría . – Nun hubo manera d’echalu pa la cama ensin el dichosu traxe - dixo- . Xingué la cabeza d’un llau al otru y salí cola sonrisa tovía na boca, pensando que si nun fuera por esa muyer y esos guah .es, a La Rebaldana diba baxar . . . ¡quien yo sé! Xuntémonos los de la rampla, aterecíos de fríu, esperando la xaula . Naquella mañana nun había ganes de chances y toos mirábemos pal suelu . Solo Manolo entá nun acabara la xuerga d’ayeri .

–¡Coño Tinín! Traes mala cara ¿tuvisti folixa anueche? Seguro que la muyer nun te dexó pegar el güeyu . Mirélu un ratu, ensin gurgutar, hasta que se dio cuenta de que metiera la pata . –Esti Manolo – pensé – si nun fuera polo bon compañeru que ye, munches veces merecería una mano d’hosties . Baxamos en silenciu . Al llegar al puntu, miramos ún pa otru ensin atrevenos a decir nada . Taba feo . Cuando cayeron los primeros costeros, yá casi inconsciente, Tino creyó que yera otra vez un suañu y que la presión nel pechu yera un abrazu de Spiderman . Un abrazu d’esos, de superhéroe de menos de cinco años, que paez que te va fender les costielles . Tardaron ocho días n’encontralos baxo una llosa de pizarra de más de seiscientes tonelaes qu’arrasara tolo qu’había ente la séptima y la octaba planta . Spiderman, escaeciéndose de que yera un superhéroe, escondióse nel cuartu bañu, agarráu al anorak del pá, y fartucóse de llorar .