Nyttige tips

Du har skrive leseinstruksjonar og førebudd teksten. No er det snart tid for å lese teksten høgt for ei større gruppe.

Før du les teksten høgt

Her får du nokre tips om ting du bør tenkje på før du framfører teksten.

Kroppsspråk

Korleis skal du stå eller sitje under høgtlesinga? Finn ei behageleg stilling der du kan lese høgt og tydeleg. Ta pustepausar i lesinga.

Øv for deg sjølv

Les teksten høgt for deg sjølv fleire gonger. Ein god måte å øve på er å gjere opptak av deg sjølv når du les. Lytt deretter til opptaket. Er det nokon stader i teksten der du ved å variere stemma kan forsterke enkeltelement? Varierer du dei ulike stemmene i dialogen? Skaper du ulikt tempo i teksten ved å variere forteljetempoet? Tenk også på stemmeleiet ditt. Snakk høgare eller lågare når det passar. Utnytt pausane mellom setningar og avsnitt.

Respons på høgtlesing

Når du har øvd eit par gonger på eiga hand, kan du lese teksten for ein medelev. Lytt også til medeleven din. Kor godt lykkast han eller ho med punkta nedanfor under høgtlesinga?

• lese høgt og tydeleg • gjere lyttaren merksam og interessert • variere tempoet i lesinga • variere stemma • utnytte orda og handlinga i teksten for å få fram ulike kjensler

Les teksten høgt

No er det tid for å lese teksten høgt. Bruk responsen du har fått, som hjelp til å finjustere høgtlesinga endå meir. Lykke til!