Heffri Hutapea

MANDOR NI BODAT

HEFFRI HUTAPEA

Adong sahalak ama nampunasa kobun kalapa naung timbo-timbo bonana. Sosundat muse nunga matua amanta i, jadi ndang tolapna be manjangkit kalapana i.

Dipingkiri amanta i ma naeng manuhor bodat naung malo manjangkit kalapa asa unang pola be ibana loja manjungkit kalapana i sian toru.

Laho ma amanta i tu tokke na manggadis bodat naung malo manjangkit kalapa. "Adong bodat naung malo manjangkit kalapa?", sungkun amanta i. "Adong. Sude on nunga malo manjangkit kalapa. Pillit hamu ma nadia naeng di hamu?", ninna tokke bodat i.

Dibereng amanta i adong sada bodat naumbalga, bagak, mokmok muse. Gogo ma ra on manjangkit kalapa, i ma dibagas roha ni amanta i. I ma dipillit amanta i, dung i diboan mulak. Sahat di jabu, pintor diboan amanta i bodat na baru dituhorna i tu kobun naeng manjangkit kalapa. Sai dijujui amanta I, alai ndang olo bodat i manjangkit. Gabe mamereng-mereng parbue ni kalapa i do bodat i sian toru.

Emosi hian ma amanta i. Diboan ibana ma muse bodat i laho protes tu tokke sinangkin. "Didok hamu, lae, sude do bodat on malo manjangkit kalapa. Hape holan dipanotnoti do sian toru parbue ni kalapa i", ninna amanta i muruk-muruk.

"Tenang jo hamu, lae. Unang pintor muruk. Nadia do haroa bodat na binoanmuna i?" Sungkun tokke i. "Nion!", ninna amanta i sambil patudu bodat na tinuhorna i. "Hahaha… ai mandorna do na niboanmon, lae. Pantasan ma holan mamereng-mereng ndang olo karejo." ninna tokke i mengkel. 

CURHAT TARINGOT BAGUDUNG

HEFFRI HUTAPEA

Curhat ma sahalak ama tu donganna taringot bagudung di jabuna. "Adong bagudung di jabunami, lae. Boha do bahenon manangkup i ateh." "Oh... pangke perangkap ni bagudung ma bahen , lae." "Ndang adong muse kebetulan perangkap di jabunami." "Di jabu adong do perangkap ni bagudung na so hupangke, lae. I ma annon buat. Bahen ma umpanna roti asa ro bagudung i." "Roti pe ndang adong di jabunami, lae." "Manang jajan ni dakdanak i ma annon bahen. Otik pe asa ro do bagudung i."

"Jajan pe ndang adong, lae, di jabu." "Ikkan asin pe boi do, lae, bahenonmu umpanna, tor hatop do annon bagudung i ro." "Ehe, pas muse ikkan asinnami lagi ndang adong, lae." Emosi ma donganna i, "Antong marhua do bagudung i di jabum? Ai nanggo aha so adong!!"

Molo nipingkiran memang toho do nidok ni dongan ni amanta i, marhua do ro bagudung tu jabuna molo so adong do manang aha, ateh? 

JAVANESE POETRY