Legends, humakot ng samu’t saring parangal sa Intramurals 2024 Dance Night

Ipinamalas ng Senior High School (SHS) Legends ang kanilang husay at talento sa pagsasayaw sa Dance Night na ginanap sa University Gymnasium ng Mindanao State University-General Santos (MSUGenSan) noong Oktubre 11, 2024.

Tampok sa patimpalak ang iba’t ibang kategorya ng sayaw tulad ng folk dance, retro, hip-hop, at modern contemporary, na nilahukan ng mga estudyante mula sa iba’t ibang departamento, kabilang ang Legends, na nagbigay ng kanilang pinakamainam upang makamit ang tagumpay.

Sa pagtatapos ng gabi ng kompetisyon, humakot ng samu’t saring parangal ang Legends matapos makamit ang ikalawang gantimpala sa lowland folk dance at ikatlong gantimpala sa modern contemporary dance.

Hindi rin sila nagpahuli nang makuha nila ang ikawalong gantimpala sa retro dance at ikatlong gantimpala sa hip-hop dance sa naturang Dance Night.

Bahagi ng pagdiriwang ng ikalawang araw ang kompetisyong ito para sa ika-51 foundation anniversary at intramurals ng pamantasan.