VUALTRIS FASEILU

A L R

“Dut chel ch’o voleis che i oms a fasin a vualtris, ancje vualtris faseilu a lôr: cheste di fat e je la Leç e i Profets” (Mt 7,12)

Tropis voltis, intes sieltis impuartantis da la vite, vino cirût une bùssule sigure che nus insegnàs la strade di cjapâ? E, come cristians, si sino domandâts cuale ch’e sedi la sintesi dal Vangeli, la clâf par jentrâ intal cûr di Dio e vivi come siei fîs, chi e cumò? Ve’ une peraule di Gjesù che e fâs al câs, une sô afermazion clare, inmediade di capî e di vivi. La cjatìn intal Vangeli di Mateo: e fâs part dal grant discors de Montagne, là che Gjesù al insegne cemût vivi adimplen la vite cristiane. Lui stes al riassum dut il so nunzi in cheste lapidarie afermazion. Vuê, ch’o vin bisugne di messaçs plens di significât ma curts e zovevui, o podaressin dâ acet a cheste peraule come a un presseôs tweet di tignî a mens ogni moment.

“Dut chel ch’o voleis che i oms a fasin a vualtris, ancje vualtris faseilu a lôr: cheste di fat e je la Leç e i Profets”

Par capî miôr ce fâ par chei altris, Gjesù nus invide a metisi al lôr puest; propit come ch’al à fat Lui, che par amânus al à cjapât sù la nestre cjar umane.

Domandinsi ce che si spietìn nô dai nestris gjenitôrs, dai fîs, dai colegas di lavôr, dai responsabii di guviâr, da lis guidis spirituâls: bon acet, scolte, inclusion, jutori intes dibisugnis materiâls, ma ancje sinceritât, perdon, coragjo, pazience, consei, orientament, istruzion… Par Gjesù chest mût di fâ interiôr, cun lis azions concretis ch’e vegnin dopo, al compìs dut ce ch’e domande la Leç di Dio e dute la sioretât de vite spirituâl. E je la “Regule d’aur”, un insegnament universâl contignût intes difarentis culturis, religjons e tradizions che l’umanitât e à svilupât intal sô cjaminâ. E je la fonde di ducj i valôrs pardabon umans, chei che a costruissin une convivence pacjifiche cun rapuarts personâi e sociâi juscj e solidâi.

“Dut chel ch’o voleis che i oms a fasin a vualtris, ancje vualtris faseilu a lôr: cheste di fat e je la Leç e i Profets”

Cheste Peraule nus insìte a jessi creatîfs e gjenerôs, a cjapâ l’iniziative a pro di cualsisei, a butâ puints ancje viers chel che nol è un amî, come che Gjesù stès al à dit e fat. Nus domande la capacitât di lâ fûr di nô stès, par jessi cussì ancje testemonis crodibii de nestre fede.

Cussì nus insìte Chiara Lubich: “Provìn. Une zornade spindude cussì e val une vite. (…) Une gjonde mai provade nus innearà. (…) Dio al sarà cun nô, parcè ch’al è cun chei ch’a amin. (…) Cualchi volte o larìn forsit plui planc, o sarìn tentâts di sconfuartâsi, di finîle. (...).

Ma no! Coragjo! Dio nus dâ la gracie. Tornìn simpri a scomençâ.

Tignint dûr, o viodarìn ben planc cambiâ il mont ator di nô. O capirìn che il Vangeli al puarte la vite plui biele, al pie la lûs intal mont, al da savôr a la nestre esistence, al à in sé il principi de risoluzion di ducj i problems. (…) E tornarà a nassi la sperance”. (…)

Letizia Magri (Traduzion di Franca Mainardis)

RistoR ante a l Molino di Glaunicco

Località Molino, 3 - Camino al Tagliamento (Ud) telefono 0432 919 357 - Facebook: almolinoristorante