LES 20: MASSA

Massa meet die hoeveelheid materie (deeltjies) in ’n voorwerp. ’n Goudstaaf is byvoorbeeld net so groot soos ’n boksie Smarties (53 mm × 118 mm × 8 mm), maar het ’n massa van 1 kg. Dit beteken dat die goudstaaf baie deeltjies het.

Dit is belangrik om te onthou dat massa en gewig nie dieselfde is nie, al word die massa dikwels gebruik om gewig te beskryf. Die gewig van ’n voorwerp word deur swaartekrag bepaal, maar die massa bly altyd dieselfde. In die ruimte, waar daar geen swaartekrag is nie, het ’n baksteen byvoorbeeld geen gewig nie, maar sy massa is dieselfde as op die aarde.

Massa word in gram (g), kilogram (kg) en ton (t) gemeet. In graad 5 werk ons net met gram en kilogram.

Jy het reeds in graad 3 en 4 met massa gewerk. Kom ons hersien dit.

Hoe meet jy jou massa?

’n Mens gebruik verskillende meetinstrumente om massa te bepaal.

Meetinstrumente

Badkamerskaal Kombuisskaal

Weegskaal

Ons meet massa met die metingseenhede kilogram en gram.

Kilogram (kg) Gram (g)

Ons gebruik kilogram om voorwerpe wat groter as 1 000 g is se massa te meet. Ons meet kleiner voorwerpe met ’n massa van minder as 1 kg in gram.

Wanneer ons van gram na kilogram omskakel, moet ons onthou dat daar 1 000 g in 1 kg is. Gebruik die diagram hieronder om met die omskakeling tussen gram en kilogram te help.

kilogram (kg) × 1 000 gram (g) ÷ 1 000

Voorbeeld

Skakel 8 153 g om van gram (g) na kilogram (kg). = 8153 g ÷ 1000 = 8,153 kg

Kyk weer na les 9 waar ons die omskakeling van volume behandel het. Om berekeninge te vergemaklik, kan jy jouself verbeel dat daar ’n komma ná die getal staan.

Wanneer ons met 1 000 deel,skuif die denkbeeldige komma drie plekwaardes na links (omdat daar drie nulle in ’n 1 000 is).