Kominote a konte: Gid sou kontrepati yo pou òganizasyon ki mande don

Kominote a konte:

Gid sou kontrepati yo pou òganizasyon ki mande don

Lè òganizasyon lokal yo resevwa yon ti sipò, yo ka kontribye anpil pou devlòpman kominote yo. Se prensip sa a ki toujou enspire Fondasyon Entè-Ameriken an (IAF) depi li te kòmanse travay li.

Don IAF la bay yo vin tounen sipò sa a ki la pou bay jarèt, pou mobilize oswa pou motive moun ki vle fè bagay yo chanje e ki travay nan tèt ansanm pou mete sou pye yon inisyativ devlòpman, menm nan sitiyasyon difisil.

Kontrepati

Se mo sa a nou itilize pou n pale de resous òganizasyon ki resevwa don nou yo pote pou dirije pwòp inisyativ yo. Nan kèk peyi, yo konn rele sa koenvestisman.

Kontrepati a enpòtan poutèt li pwouve òganizasyon an pran yon angajman epi li kapab byen mennen inisyativ li a.

Byenke nou pa egzije yon pousantaj byen presi kòm kontrepati pou n fè yon don, tout don yo dwe mache ak kontrepati. Se poutèt sa moun ki prezante yon demann don yo dwe pran yo an konsiderasyon.

Gid sa a dekri diferan kalite kontrepati ki egziste ak kote yo ka soti. Mete sou sa, li bay kèk rekòmandasyon pou idantifye yo, pou kalkile yo e pou dekri yo aklè an rapò ak bidjè a.

Diferan kalite kontrepati

Kontrepat a se gendwa:

Kòb.

Se yon lajan yo bay pou inisyativ la. Pa gen ni twoke ni lòt kalite boukantay nan sa.

Pwodui ak sèvis.

Se pwodui ak sèvis

yo bay pou inisyativ la. Si sa pa t fèt, yo t ap oblije achte yo oswa lwe yo. Sa ka gen ladan l travay volontè oubyen prete lokal, ekipman, machin, tè oswa lòt bagay. Yo dwe bay pwodui ak sèvis sa yo yon valè lajan.

Kote kontrepati yo ka soti

Kontrepati benefisyè

* Li soti nan òganizasyon ki prezante pwopozisyon an.

* Li gen ladan l tout lajan, pwodui ak sèvis òganizasyon an pral bay pou mete inisyativ la sou pye e pou fè l mache.

* Li gen ladan l tou kòb ki sou kont an bank li, menm si se kòb ki soti nan lòt donè, depi yo pral itilize pou inisyativ la anplis lajan yo mande nan men IAF la.

* Salè lòt donè yo peye pou yo e ki sou kont an bank òganizasyon an ladan l tou, depi se pou inisyativ la yo pral sèvi.

Kontribisyon patisipan yo

* Patisipan yo se moun ki mennen aktivite yo e ki benefisye yo tou. Pafwa, yo konn rele yo «benefisyè» tou.

* Pou yon kowoperativ oswa yon òganizasyon pwodiktè, kontribisyon patnè yo konte kòm «kontribisyon patisipan yo» tou.

Lòt kontribisyon

* Se lajan, pwodui oswa sèvis, tankou asistans teknik, ki soti nan òganizasyon ki pa fè pati kominote a, depi òganizasyon sa yo pwomèt yo pral bay yo pou soutni inisyativ la.

* Yo gendwa soti nan gouvènman an, nan yon konpayi, nan yon fondasyon prive, nan yon òganizasyon lokal oswa nan yon donè.

* Yon bagay ki enpòtan konsènan resous eksteryè sa yo, se ke kòb la pa sou kont an bank òganizasyon ki fè demann nan.

Yon egzanp ki montre jan kontrepati yo enpòtan

Lè pèsonèl IAF la vizite yon òganizasyon ki ka vin yon donatè pi devan, li verifye jis nan ki pwen òganizasyon an ak kominote a angaje tèt yo, epi li idantifye plizyè resous ki ka vin fè pati kontrepati a. Men yon egzanp ki montre jan yon analiz te pèmèt nou wè yon kontrepati pèsòn pa t wè anvan sa.

Nan peyi Kosta Rika, te gen yon asosyasyon uit kominote ki te pwopoze yon inisyativ pou rebwazman de basen vèsan. Nan demann lan, yo te mete kèk depans administratif, transpò a ak fòmasyon an nan kontrepati a. Total kontrepati a te reprezante anviwon 20% valè don yo te mande a.

IAF la te finanse pwojè a, men li te kalkile kontrepati a yon lòt fason. Lè li te esplike kominote a ki jan li te kalite kontrepati a, sa te fè moun yo sezi poutèt yo te vin wè yo te gentan mobilize poukont yo yon valè ki reprezante 150% don yo te mande a. Sa te ankouraje yo e sa te fè yo santi yo kapab kòmanse nouvo aktivite. Moun ki responsab suivi a ak evalyasyon an nan peyi Meksik dekri sa konsa: «Kontrepati a enpòtan poutèt li fè moun yo wè sa “pòvrete” pa vle di. Anfèt, moun yo rele “pòv” yo gen anpil bagay yo ka kontribye.»

Lè reprezantan IAF la te vizite kominote a, yo te rann yo kont te gen yon pepinyè bò kote lekòl la. Se timoun yo ki te okipe pepinyè sa a, yo te konn plante pyebwa, yo te konn netwaye tè a ak èd fanmi yo, epi komite lokal pou jesyon dlo a te ranmanse kòb pou achte zouti ak lòt pwodui pou yo. Sepandan, bidjè yo te mete nan aplikasyon pou don an pa t gen okenn nan bagay sa yo nan kontrepati a.

Kontrepati a nan bidjè a

Men kèk rekòmandasyon pou suiv lè w ap prepare bidjè a:

Prezante bidjè a an dola ameriken, mete dat bidjè a epi met to chanj dola a nan kòb lokal la nan menm dat sa a.

Kenbe fèy kalkil yo pou montre ki jan ou te kalkile montan kontrepati yo, paske si demann ou pase nan pwochen etap la, yo pral mande w enfòmasyon sa a.

Itilize pòs bidjè yo ki pral sèvi nan inisyativ ou sèlman.

Pou chak pòs bidjè ou chwazi, kalkile valè ki pou li a sou total don ou mande nan men IAF la.

Mete tout sa ou konsidere ki fè pati kontrepati a nan bidjè a.

Si demann ou pase nan pwochen etap pwosesis la, nou pral ede w konprann plis detay sou kontrepati a pi devan

Pou chak pòs bidjè, idantifye omwen yon sou-pòs ki mache avè l. W ap jwenn kèk egzanp sou-pòs pou chak pòs bidjè nan fòma bidjè ou ka telechaje sou sitwèb IAF la.

Kalkile valè kòb ki koresponn ak pwodui ak sèvis ki nan kontrepati a selon sa produi ak sèvis sa yo koute sou mache a.

Ou pa dwe mete okenn depans òganizasyon ki fè demann nan te fè anvan li siyen konvansyon an ak IAF la nan bidjè a.

Fòma

$ Montan ki koresponn ak valè acha semans yo sou mache lokal la: pri pou chak kilo pou kantite total kare tè/ ekta tè ki nan jaden an.

$ Montan ki koresponn ak valè acha angrè òganizasyon an pote e ki nesesè pou fètilize kantite total kare tè/ekta ki nan jaden an.

$ Montan ki koresponn ak pri materyo yo ak lòt pwodui yo bay pou bati pepinyè a sou mache a: bwa, klou ak lòt bagay.

$ Montan ki koresponn ak pri èdtan travay volontè yo sou mache a pou bati pepinyè a.

$ Montan ki koresponn ak valè lwaye mansyèl teren an pou pepinyè a, nan pri mache a, pou kantite mwa don an kouvri.

$ Montan ki koresponn ak pri sou mache a pou bagay sa yo, kit yo tounèf, kit yo ize (valè a ap mwens). Kantite bagay pou chak valè initè.

Kèk rekòmandasyon pou kalkile kontrepati a

Resous imen

* Si kontrepati a gen ladan l salè moun ki afilye ak òganizasyon ki fè demann nan oswa ak lòt òganizasyon, salè sa yo dwe tou gen prestasyon sosyal ak lòt avantaj anplwaye yo sipoze resevwa selon sa lalwa peyi a mande.

* Si kontrepati a gen ladan l prestasyon sèvis nan men moun ki pa fè pati òganizasyon ki fè demann nan, se pou nou kalkile valè yo selon pri yo sou mache a.

* Travay volontè a se tan oswa sèvis patisipan yo bay san yo pa touche nan objektif pou yo bay inisyativ la jarèt. Valè kontrepati sa a kalkile selon pri sèvis sa yo koute sou mache a chak jou Egzanp: Si kontab òganizasyon an touche $X chak mwa, plis $Y kòm prestasyon sosyal, lèfini li pral pase mwatye tan li pou inisyativ la pandan Z mwa, men ki kalkil ki fèt pou kontrepati a: (X + Y) x 0,5 x Z.

Bilding

* Itilize valè lwaye a, pa itilize valè acha a.

* Pou fè kalkil la, miltipliye lwaye mansyèl la, nan pri mache a, pa kantite mwa yo pral itilize bilding nan pou inisyativ la.

* Ekri total la nan sou-pòs “Lwaye” ki anba “Depans administratif”.

* Pou lòt sou-pòs, ou ka kalkile sa ou peye pou achte mèb ak founiti yo, oswa sa ou peye pou sèvis piblik yo.

Machin

* Se valè lokasyon pou itilize, se pa valè acha a.

* Pou fè kalkil la, miltipliye lwaye mansyèl la, nan pri mache a, pa kantite mwa yo pral itilize machin nan pou inisyativ la.

Rapèl final

Don IAF la bay yo dwe yon sipò pou bay jarèt oswa pou motive moun ki vle fè bagay yo chanje e ki travay nan tèt ansanm pou mete sou pye pwojè kominotè yo. Veye pou bidjè a montre se sa nou vle toutbon.