Ólympíuleikarnir í Tókýó 2020

32. Sumarólympíuleikarnir í Tókýó fóru fram 23. júlí til 8. ágúst 2021 en þeim hafði verið frestað um ár vegna COVID-19. Keppendur og aðrir þátttakendur þurftu að búa við mjög stífar reglur gagnvart aðgengi að íþróttamannvirkjum og Ólympíuþorpi, auk þess sem þau þurftu að framfylgja ströngum sóttvarnarreglum og fara daglega í COVID-19 próf. Í fyrsta sinn í sögu leikanna voru áhorfendur ekki leyfðir sem setti sinn brag á leikana. Fyrir leikana voru þátttakendur í æfingabúðum í útjaðri Tókýó, í sveitafélagi sem heitir Tama City og notuðu þar aðstöðu Kokushikan háskólans til æfinga.

Að þessu sinni tókst færri keppendum að tryggja sér þátttökurétt fyrir

Íslands hönd heldur en verið hefur á undanförnum leikum. Keppendur fyrir Íslands hönd voru Guðni Valur Guðnason sem keppti í kringlukasti, Anton Sveinn McKee sem keppti í 200m bringusundi, Snæfríður Sól Jórunnardóttir sem keppti í 100m og 200m skriðsundi og Ásgeir Sigurgeirsson sem keppti í loftskammbyssu.

Leikarnir voru settir föstudaginn 23. júlí 2021 og þeim slitið sunnudaginn 8. ágúst. Fánaberar Íslands á setningarhátíðinni voru þau Snæfríður Sól Jórunnardóttir og Anton Sveinn

McKee sem bæði kepptu í sundi. Snæfríður Sól sem var að keppa á Ólympíuleikunum í fyrsta skiptið bætti sinn persónulega árangur í 100m skriðsundi og endaði í 34. sæti af 52 keppendum. Þar að auki bætti hún Íslandsmetið í 200m skriðsundi þegar hún synti á 2:00,20 mínútum og hafnaði í 22. sæti af 30 keppendum. Anton Sveinn synti 200m bringusund á 2:11,64 mínútum og hafnaði hann í 24. sæti af 40 keppendum. Guðni Valur gerði því miður öll þrjú köstin sín ógild á leikunum og skotíþróttamaðurinn Ásgeir Sigurgeirsson hafnaði í 28. sæti af 36 keppendum og skoraði 570-13x.