Framtíðarsýn ÍSÍ

Á undanförnum misserum hefur ÍSÍ unnið að stefnumótun sem felur í sér mótun á framtíðarsýn og nánari skilgreiningu á hlutverki íþróttahreyfingarinnar. Jafnframt hafa verið mótaðar þær áherslur sem framkvæmdastjórn og skrifstofa ÍSÍ horfa til í þeim verkefnum sem eru innan hreyfingarinnar.

Lögð er áhersla á að ÍSÍ er fyrir alla þjóðina, en jafnframt eru helstu áherslur að þjóna sambandsaðilum, íþróttafólkinu og þeim sjálfboðaliðum sem starfa í hreyfingunni til að gera íþróttastarfið enn betra.

Framtíðarsýnin er að:

• Íþróttir skipi mikilvægan sess meðal allra landsmanna alla ævi, í gegnum þátttöku og upplifun sem sameinar íslensku þjóðina.

Hlutverkið sem við höfum er að vinna að því að:

• Íþróttahreyfingin verði ríkur þáttur í lífi og heilsu þjóðarinnar allrar með kraftmiklu og fjölbreyttu starfi, jákvæðri upplifun og sameiningarmætti.

Í þeim daglegum störfum sem hvíla á ÍSÍ verður horft til þess að efla fagmennsku. Það verði gert með því að hafa heilbrigði þátttakenda að leiðarljósi, og með þessum aðgerðum er jafnframt horft til þess að betri árangur náist í íþróttastarfi.

Samhliða þessu er horft til þess að fylgja stafrænni þróun og beita nútímatækni, að allt starf og árangur sé sýnilegt og vel kynnt og að ÍSÍ hafi fjárhagslega getu til umbóta.

Skipulag á skrifstofu ÍSÍ hefur jafnframt tekið breytingum og svið hafa verið sameinuð. Ný svið hafa verið skilgreind sem vinna þvert á þau svið sem fyrir eru hjá ÍSÍ. Byggja þær breytingar m.a. á þeim breytingum sem orðið hafa í samfélaginu, þeim áskorunum sem íþróttahreyfingin býr við í dag og þeim verkefnum sem eru fram undan á komandi misserum. Nánari aðgerðir fyrir helstu áhersluatriði liggja fyrir og verða kynntar íþróttahreyfingunni en þær þurfa einnig að mótast af þeim áherslum og umræðum sem eiga sér stað á Íþróttaþingi ÍSÍ 2023.