Grunnskólamót höfuðborga norðulanda

Grunnskólamót höfuðborga norðulanda 2019-2020

Grunnskólamót höfuðborga Norðurlanda var haldið í fyrsta skipti árið 1948 í Stokkhólmi. Síðan þá hefur mótið verið haldið ár hvert til skiptis í Kaupmannahöfn, Osló, Helsinki og Stokkhólmi fram til ársins 2011 en þá var það haldið í fyrsta sinn í Reykjavík. Markmið mótsins er að sameina skólaungmenni á Norðurlöndum í gegnum íþróttir og rækta þannig norrænan frændskap. Fyrir utan íþróttakeppnina sjálfa er lögð áhersla á að ungmennin kynnist hvert öðru sem og sögu landsins sem heimsótt er og venjum þess.

Mótið er haldið í síðustu viku í maí ár hvert. Fyrir hverja höfuðborg keppa 41 nemandi, 14 ára og yngri: 15 drengir í knattspyrnu, 10 stúlkur í handknattleik, 8 stúlkur í frjálsum íþróttum og 8 drengir í frjálsum íþróttum. Auk þess fylgja keppendum fjórir þjálfara og tveir fararstjórar. Þjálfarar Reykvísku keppendanna eru menntaðir íþróttakennarar og hefjast æfingar nokkrum mánuðum fyrir hvert mót. ÍBR sér um undirbúning og þátttöku í samráði við ÍTR, grunnskóla borgarinnar, íþróttafélögin í Reykjavík og sérráðin.

Stokkhólmur 2019

Undirbúningur allra þjálfara reykvísku liðanna hófst í janúar fyrir mótið í Stokkhólmi og úrtakið gekk vel og mikið af virkilega flottu upprennandi íþróttafólki úr að velja. Mótahaldið gekk vel og okkar krakkar stóðu sig vel á allan máta. Krökkunum gekk vel að keppa og yfir heildina litið var árangur mjög góður.

Reykjavík 2020

Búið var að undirbúa mótahald í Reykjavík í lok maí 2020 en vegna COVID 19 varð ekkert af því. Unnið er að því ásamt hinum þjóðunum að finna út hvenær Reykjavík heldur næst mótið.