Niuernermi ingerlatat

KNI suliffeqarfissuaq pingasunik niuernermik ingerlataqarpoq taakkulu aqqutigalugit ulluinnarni nioqqutissanik, atuinermi iluaqutissanik ikummatissanillu Kalaallit Nunaat tamakkerlugu pilersorpaa.

KNI-p ilagaa Polaroil katillugit 70-inik ikummatissaasiveqarpoq, taakkunannga 16-it illoqarfinni 52-illu nunaqarfinni inissisimallutik, kiisalu peqqumaasivik ataaseq avataaniillu ikummatissanik tikisinneqartunut ataatsimik maqitsisarfeqarpoq. Illoqarfinni nunaqarfinnilu tamani uulianik, perrassaatinik gassinullu inissiiveqartiterpoq.

Nunarput tamakkerlugu Pilersuisoq pisiniarfinnik 64-inik ingerlatsivoq. Avannarlerpaamiit kujallerpaamut isorartussuseq 2.000 km-iuvoq. Kangerlussuarmi mittarfimmi aamma akitsuuteqanngitsunik nioqquteqarneq, duty-free, ingerlapparput.Pilersuisoq KNI-p ilagaa

Kalaallit Nunaat tamakkerlugu sullivinnut suliffeqarfinnullu KNI Engros tuniniaallunilu ingerlatitseqqiisarpoq. Niuernikkut ingerlatsiviit nuna tamakkerlugu immiaaqqanik imeruersaatinillu kulsyretalinnik ingerlatitseqqittarnissamik isumaqatigiissuteqarpoq.