Aqutsisoqatigiit nalunaarutaat

Ukioq naatsorsuiffiusoq 2020/21 amerlasuutigut suliffeqarfissuarmut KNI-mut ajornartorsiorfiusimavoq. KNI-p siorna ukioq naatsorsuiffiusoq nutaaq aallartikkamiuk suliffeqarfik tusaamaneqarluarluni, suliffeqarfimmi avatangiisigissaarluni kisitsisinilu pingaarnerni angusarissaarluni siuariartorlunilu aallartippoq. Ajoraluartumik ukiut qaangiuttut ukiuni arlariinni iluamik paasinnanngitsumik takutitsisarsimapput. Whistleblowerikkut ilisimatitsisarsimasut sulisut akornanni atugarissaartoqannginnera suliffeqarfiullu naatsorsuutitigut eqqunngitsumik ingerlasoqarnera oqaluttuarisimavaat. Pisut tamakku qanoq ittuunerat qanorlu pimooruttariaqassusaat tunngavigalugu ilaatigut eqqartuussissuserisut suliffeqarfiillu kukkunersiuinermik suliallit ikiorsiullugit sukumiisumik misissuineq ingerlanneqarnikuuvoq. Misissuinerit eqqartuussissuserinermi qularnaatsuunissaat siulersuisut pingaartiinnavillugu pisimavaat. Taamaattumik ilaatigut whistleblowerikut nalunaarutiginnissimasut apersorneqarnerinut kiisalu unnerluussinermi inuit attuumassuteqartut apersorneqarnerinut nukissat aningaasallu amerlasuut atorneqarnikuupput, taamalu ililluni paasissutissiisut imminut assortuuttumik paasissutissiinerat nalilersorlugu misissuineq ingerlanneqarnikuulluni. Misissuinerit tamakku ilaatigut sulinnaarsitsinermik kinguneqarsimapput, pisullu ilaanni ataatsimi allagaatinik peqquserluttoqarsimaneranik peqquserluttuliortoqarsimaneranillu politinut nalunaarutiginnittoqarsimavoq soorluttaaq sulisumut tassunga pisut ilaannut tunngatillugu Akileraartarnermut aqutsisoqarfik ilisimatinneqarsimasoq.

Sulisut akornanni atugarissaartoqannginnera

Sulisut kinaasutsiminnik taasinatik saaffiginninnerisigut Sisimiuni kiffartuussivimmi sulisut akornanni iluarisimaarinngittoqarnera januar 2021-mi siulersuisut paasivaat. Aallaqqaammut misissueqqaartoqarpoq, misissuinerullu kinguneraa pisortaaneq ulloq 25. marts 2021 tunuarniuteqarnissaanik siulersuisut isumaqatigiissusiornerannik. Kingorna misissuinermi paasisat tunngavigalugit siulersuisut ulloq 10.juli 2021 aalajangerput pisortaaneq soraarsinniarlugu.

Naatsorsuutini eqqunngitsoqarnera

Naatsorsuuserivimmi sulisut pingaarutilimmi inissisimasimasut suliarisimasaat naatsorsutit ukiuni arlariinni sunnerlugit pisimapput. Whistleblowerikkut saaffiginnittoq tunngavigalugu suliffeqarfiup nioqqutinik uninngasuutaanik eqqunngitsoqarnersoq suliffeqarfiup nammineq iluani siulersuisut 2020-mi misissuititsillutik aallartipput. Misissuititsinermi paasineqarpoq nioqquteqarnermi ingerlatsivimmi amigartooruteqarnerujussuaq isertuunniarlugu nioqqutit uninngasuutit nalingi 2013/14imi qaffanneqarsimasut kiisalu ukiuni tulliuttuni qaffaasimaneq paasiuminaallisarniarlugu naatsorsuutit iluarsiiviginiarlugit iliuuseqartoqartarsimasoq. Suliffiup iluani misissuititsinerup uppernarsarpaa nioqqutit uninngasuutit 2013/14-imi kukkusumik naatsorneqarsimasut, kukkusumillu naatsorsuisimaneq 2013/14-imut ukiunullu tulliuttunut aamma sunniuteqarsimavoq. Suliffip iluani misissuititsinermi nalilerneqarpoq nioqqutit uninngasuutinut naatsorsuinermi fil-eq atorneqartoq inuup kukkuneratigut pilersimasoq aammali 2013/14 sioqqullugu ERP systemimut nutaamut ikaarsarnermi ajornartorsiutaasunut tunngassuteqartoq. Naatsorsuusiorsimanerup sunniutai siulersuisut aallaqqaammut Deloittemut misissoqqusimavaat. Paasisalli allat paasineqarmata siulersuisut aalajangerput PwC aamma misissueqataassasoq. Naatsorsuutinut tunngatillugu sunniutaasussat PwC-p misissuinnarnagu aamma nioqqutit uninngasuutit kukkusumik naatsorsorneqarnerat piaaraluni suliarineqarsimanersut paasiniartussaasimavaat. Misissuineq assut piffissartornarsimavoq nukippassuarnillu atuiffiusimalluni, misissuinermilu paasisat aatsaat juni 2021-p aallartinnerani inernilerneqarlutik. Nioqqutinik uninngasuutinik kukkusumik nalunaarsuisimanermi fil-ip atorneqarsimasup kukkusumik atorneqarsimannginnera imaluunniit systemikkut kukkusoqarsimanngitsoq paasineqarpoq. Ukiulli ingerlanerini ulluinnarni aqutsisunut, siulersuisunut kukkunersiuisunullu isertuunneqartumik naatsorsuuserivimmi sulisut pingaarutilimmik atorfillit suleqatigiillutik naatsorsuutit iluarsaanneqartarsimapput.

SULIFFEQARFIK PILLUGU PAASISSUTISSAT

SULIFFEQARFIUP AQQA: KNI A/S ULLUINNARNI TAANEQARTARTUT: Pilersuisoq Polaroil

NAJUGAQARFIA: J. M. Jensenip Aqq. 2, Postboks 319 3911 Sisimiut Oqarasuaat: +299 86 24 44 Telefax: +299 86 23 96 E-mail: info@kni.gl Nittartagaq: www.kni.gl

CVR-normua: 16 60 73 98 Kommune najugaq: Qeqqata Kommunia Ukioq naatsorsuiffik: 1. april – 31. marts

Piginnittut

Kalaallit Nunaanni Namminersorlutik Oqartussat, Postboks 1015, 3900 Nuuk - (100 % piginneqataassutigalugit)

Kukkunersiuineq

Deloitte Statsautoriseret Revisionspartnerselskab