Introduzzjoni Il-prijorità tal-KSU hija l-edukazzjoni, b’mod speċjali f’dak li jirrigwarda ’l-Universita’ ta’ Malta u ’l-Junior College. Huwa fid-dmir tagħna li nagħrblu u nitfgħu taħt il-lenti l-miżuri proposti. L-iskrutinju dovut huwa wieħed li jħares l-akbar interess ta’ kull student. Il-KSU jħaddan it-tema ‘nippremjaw il-bżulija’; jemmen li l-istudent għandu jħabrek, jieħu l-inizjattiva u jkun perseveranti f’xogħlu – dan kollu fi sfond ta’ Università ekonomikament sostenibbli li toffri lill-istudenti għodda adegwati, esperjenza edukattiva ta’ kwalità, u infrastruttura moderna fejn jistgħu jimirħu u jisfruttaw il-potenzjal kollu tagħhom. B’esperjenza edukattiva ta’ kwalità l-KSU jifhem: istituzzjoni li tixpruna l-innovazzjoni, ir-riċerka u l-iżvilupp; li toffri korsijiet li huma relevanti u li jwieġbu għall-ħtiġijiet tal-pajjiż; li hija flessibbli fil-metodi tat-tagħlim; u li tħabbatha ma’ universitajiet internazzjonali, fost l-oħrajn. L-aspett soċjali tal-ħajja universitarja jimxi id f’id mal-aspetti ekonomiċi u akkademiċi – ambjent san li jixhed il-valuri soċjali ta’ żmienna, li jħaddan id-diversità u l-libertà tal-espressjoni, filwaqt li jħeġġeġ il-komunikazzjoni, l-attiviżmu komunitarju, u l-inklussività. Ambjent li jippromwovi stil ta’ ħajja tajjeb għas-saħħa. Il-KSU jikkommetti ruħu biex ikun il-vuċi tal-istudenti - vuċi sensittiva għar-realtajiet ta’ żmienna, u għalhekk, vuċi b’saħħitha.
It-Tkabbir Ekonomiku Il-Gvern qiegħed ibassar tkabbir ekonomiku ta’ madwar 3.5% għas-sena li ġejja. Iddefiċit huwa mistenni li jonqos għal €130 miljun, 1.6% tal-Prodott Domestiku Gross. F’għajnejn il-KSU, dawn huma figuri inkoraġġanti.
Għotjiet ta’ Manteniment għall-Istudenti Fid-dawl ta’ inflazzjoni baxxa, il-COLA għall-2015 tammonta għal €0.58 fil-ġimgħa. Il-Gvern ħabbar l-għoti ta’ Bonus Addizzjonali ta’ darba ta’ €35, li se jingħata wkoll prorata lill-istudenti. F’dan ir-rigward, il-KSU jilqa’ kull għajnuna finanzjarja li tingħata lill-istudent. L-istipendji se jiżdiedu marġinalment prorata, bir-rata tal-għoli tal-ħajja. F’għajnejn ilKSU, l-istipendji jibqgħu sagrosanti u għalhekk jilqa’ l-konsistenza tal-Gvern f’dan irrigward. Jinnota però, b’diżappunt, li l-istudenti Għawdxin mhux se jingħataw żieda biex ikun jistgħu itaffu mill-piż finanzjarju u jkopru l-ispejjeż. Il-Kunsill jilqa’ l-miżura li d-dħul kollu ta’ manteniment mhux se jibqa’ taxxabbli. Dan jiffavurixxi ’l-istudenti li jaħdmu. It-tnaqqis minn 18% għal 5% tal-VAT fuq kotba diġitali hija miżura oħra utli.
L-Impjiegi Għalkemm ma tapplikax għal studenti li għandhom edukazzjoni terzjarja, il-KSU jemmen li l-Garanzija għaż-Żgħażagħ (Youth Guarantee) hija skema li qed tħalli l-frott. Ta’ min isemmi li kważi 4 minn kull 10 tifel u tifla ma jkomplux l-iskola wara l-eta` ta’ 16-il sena, skont id-diskors tal-Baġit. Dawn huma figuri inkwetanti u għalhekk it-tisħiħ tal-Garanzija għaż-Żgħażagħ huwa importanti. Il-KSU jilqa’ l-figuri ta’ 700 Traineeship kif ukoll 200 Work Trial tul is-sena 2015. Il-KSU jisħaq ukoll fuq il-kwalità ta’ dan ittaħriġ u l-esperjenzi fuq il-post tax-xogħol: dawn għandhom ikunu opportunitajiet effettivi, professjonali, u leġittimi.
Il-KSU ma jistax ma jesprimix id-diżappunt tiegħu li l-istudenti li ggradwaw f’korsijiet fix-Xjenzi tas-Saħħa, li fost l-oħrajn ġejjin mill-korsijiet tal-podjatrija u l-fiżjoterapija, għadhom fid-dlam vis-à-vis meta se jkun determinat l-impjieg tagħhom mal-Gvern. Il-KSU jemmen li l-ekonomija kreattiva għandha tingħata spinta ’l quddiem. Għalhekk hija inkoraġġanti l-aħbar li l-industrija Maltija tal-films se tirreġistra żieda ta’ madwar 500%. Essenzjalment, l-akbar benefiċċju mill-ambitu edukattiv se jkun l-introduzzjoni ta’ korsijiet speċjalizzati għal film makers lokali. Il-KSU huwa konxju tat-talent moħbi li hemm fost iż-żgħażagħ Maltin u Għawdxin u għalhekk iħeġġeġ il-produzzjoni ta’ films Maltin professjonali.
Il-Qasam Edukattiv Il-KSU jilqa’ ż-żieda fin-nefqa rikurrenti u kapitali b’madwar 10% għall-qasam edukattiv. Naturalment, nisħqu li l-€477 miljun għandhom jiġu allokati b’għaqal fl-akbar interess tal-istudenti. L-investiment kapitali għandu jkun wieħed li jixpruna l-kreattività u l-innovazzjoni, fost l-oħrajn. Ta’ min iżid li l-għalliema jibqgħu l-akbar investiment għal edukazzjoni ta’ kwalità. Il-boroż ta’ studju jibqgħu parti integrali biex nikbru fil-kompetenzi tagħna. Filwaqt li jilqa’ b’entużjażmu opportunitajiet ġodda għall-istudenti, il-KSU jinnota li fid-diskors tal-Baġit ma kinitx speċifikata l-firxa ta’ dawn il-boroż u l-kwantità relattiva. L-allokazzjoni speċifika fil-Baġit għal skemi ta’ inċentivi biex il-Gvern jassigura l-pubblikazzjoni ta’ kotba Maltin hija inizjattiva tajba. Il-Kunsill jibża’ madankollu li bejn il-kliem u l-fatti hemm baħar jikkumbatti. L-ilsien Malti huwa ġawhra prezzjuża. Din l-inizjattiva jeħtieġ li tiġi implimentata b’konkretezza.
Ir-Riċerka “L-Università ta’ Malta se żżid l-attività tagħha fir-riċerka.” F’dan ir-rigward il-KSU jsibha diffiċli jieħu l-partiti politiċi bis-serjetà meta huwa konxju tad-diskrepanza u d-distakk bejn l-Università ta’ Malta u universitajiet internazzjonali f’dan il-qasam. IlKSU jinnota li l-investiment fir-riċerka, l-iżvilupp u l-innovazzjoni huwa fqir. Għandna l-perċezzjoni li dan is-suġġett jissemma’ biss għall-konvenjenza politika u biex wieħed
ikun politikament korrett, iżda fil-siegħa tal-prova jsir ftit wisq. Il-KSU f’dan ir-rigward jitlob għal aktar fondi u injezzjoni ta’ kapital. Il-Kunsill jisħaq li jekk ma ninvestux f’dan il-qasam se naqgħu lura. Wieħed jinnota wkoll li 80% tar-riċerka f’pajjiżna ssir millUniversità ta’ Malta.
L-Universita’ ta’ Malta L-aħbar li se tiżdied in-nefqa kapitali tal-Gvern minn €4.5 miljun għal €7 miljun hija waħda li nilqgħu bi ħġarna. Madankollu, wieħed għandu jikkonsidra li l-popolazzjoni tal-Università u l-Junior College kulma jmur dejjem qed tiżdied. Il-KSU jisħaq li l-Gvern għandu jappoġġja bis-sħiħ it-tisħiħ infrastrutturali tal-Università kif preżentat fil-Pjan Direttur.
Youth Village Il-kunċett ta’ Villaġġ għaż-Żgħażagħ fl-eks-Skola Umberto Colosso ntlaqa’ tajjeb. IlKSU jipproponi l-installazzjoni ta’ board room u sala għall-konferenzi mgħammrin bl-aħħar teknoloġija, għall-benefiċċju ta’ organizzazzjonijiet studenteski. L-użu ta’ dawn il-faċilitajiet għandu jkun bla ħlas.
It-Trasport Il-KSU mhux sodisfatt bis-servizz attwali tat-trasport pubbliku, għalhekk iħeġġeġ l-implimentazzjoni tas-sistema l-ġdida mill-aktar fis. Permezz tal-Kumitat Ad Hoc fi ħdan il-ħidma tal-Kummissjoni għall-Politika Soċjali, il-KSU kkommetta ruħu li jsegwi mill-qrib l-aħħar żviluppi, kif ukoll jikkontribwixxi b’mod siewi fid-dawl ta’ din ir-riforma. Il-KSU jilqa’ bi ħġaru l-aħbar li l-prezz tan-noll mhux se jogħla. Madankollu, il-KSU jinsab preokkupat, għax konxju li preżentament il-proġett staġna u hemm nuqqas ta’ ċertezza. Il-KSU jittama li kollox jiġi riżolt u s-sitwazzjoni prekarja tintemm. Il-KSU
jħeġġeġ il-kontribut sħiħ tal-pubbliku sabiex it-tranżizzjoni tkun trankwilla u effettiva. Il-KSU jaqbel mal-Gvern li kampanja nazzjonali hija mandatorja. Il-programm ta’ skontijiet ulterjuri fuq l-ivvjaġġar bit-trasport pubbliku huwa inevitabbli fiċ-ċirkostanzi tal-lum. Il-KSU jilqa’ wkoll mekkaniżmi li jinċentivaw il-car pooling u car sharing. Il-KSU huwa xettiku fuq l-użu tal-bus lanes għal min jagħmel it-traġitt b’karozza mimlija b’aktar minn tliet min-nies. Mill-esperjenza jemmen li dan mhux inċentiv b’saħħtu. L-ipparkjar f’żoni riservati għall-high occupancy cars hija inizjattiva interessanti. L-għotja ta’ 15.25% tal-prezz fuq roti u roti tal-elettriku (pedelec bicycles) hija inċentiv tajjeb, imma fil-kuntest ta’ riforma serja, din hija ftit wisq f’għajnejn il-KSU. Il-KSU jemmen li hemm bżonn ta’ kampanja b’saħħitha li tindirizza tibdil fil-mentalità, fiddawl ta’ pjan strateġiku nazzjonali. Għal aktar dettalji dwar l-inizjattivi tal-KSU f’dan ir-rigward, ibgħat ittra elettronika lil president@ksu.org.mt.
Għawdex L-iżvilupp ta’ hub diġitali u hub mediku huma indikazzjonijiet pożittivi għall-istudenti Għawdxin. Il-KSU jisħaq però li hemm bżonn investiment kapitali fil-kampus ta’ Għawdex, biex dan ikun tal-għola kwalità. L-istudenti Għawdxin hekk jixirqilhom. Il-KSU jinnota li l-Għaqda tal-Istudenti tal-Mediċina ta’ Malta tinsab f’kuntatt masSegretarju Parlamentari għas-Saħħa, Hon. Christopher Fearne, fid-dawl tal-aħħar żviluppi fin-negozjati ma’ Barts School of Medicine and Dentistry. F’dan ir-rigward il-KSU jappoġġja l-organizzazzjoni Għawdxija GUG.
Oħrajn L-Awtorità Maltija tal-Komunikazzjoni mistennija tħaddem madwar 300 hot spot sal-aħħar tal-2016. Il-KSU jipproponi l-kostruzzjoni ta’ inkubaturi tal-kreattività u l-innovazzjoni madwar Malta u Għawdex; dawn ikunu żoni aċċessibbli 24/7 – spazji fejn wieħed jista’ jpoġġi u jaħdem f’ambjent aktar interattiv. Il-KSU jemmen li dawn l-ispazji huma estenzjoni ta’ bibjoteka kif nafuha llum.
X’ma ssemmiex Il-KSU jinnota li l-wegħda tal-Gvern li jibni (jew aħjar, jiffinanzja) parkeġġ multi-storeyed ġewwa l-Università fl-isfond tal-Pjan Direttur, ippubblikat mill-istess Università, ġiet posposta għal aktar tard fil-leġislatura.
Konklużjonijiet Il-KSU biħsiebu jippubblika viżjoni medium-term kif jidhirlu li għandha timraħ l-Università ta’ Malta millperspettiva tal-istudenti. Għal aktar dettalji ħossok liberu tibgħat ittra elettronika lil socialpolicy@ksu. org.mt.
Kunsill Studenti Universitarji Nhar it-Tnejn, 24 ta’ Novembru 2014
ksu.org.mt