Odü da defora

Tl cör dl’Europa se tënn l’autonomia de Südtirol fora coche n punt danter le raiun linguistich todësch y chël romanich, tl sëns ideal y ince concret. Al é porchël daldöt iustifiché ch’ara vëgnes conscidrada coche ejëmpl por la soluziun democratica de conflic, deach’ara é le resultat de n prozes politich comples che degügn, ala fin dla Secunda vera dl monn, n’ess miné che foss jü da stlüje jö cun suzes. Dal’Acordanza de Paris, olache Gruber y Degasperi é stá bogn da rové a öna dilan a süa odüda politica lungia, cina aldedaincö s’á l’autonomia – coche vigni prozes politich – damané tresfora adatamënc. I me recordi ciamó personalmënter vigni singul argomënt ch’i un traté, belanfat sc’ara nen jô de chestiuns linguistiches o economiches. Avisa chiló vëighi iö le compit dla politica: ti jí do ai problems sön la basa de analises detaiades y se porvé cun dötes les forzes da ciafé na soluziun. Te Südtirol éra jüda da fá, insciö che l’autonomia provinziala é incö n tesur de valüta – por la Talia y por l’Europa.

Prof. Romano Prodi

Presidënt dl Consëi di ministri talian dal 1996 al 1998 y dal 2006 al 2008, presidënt dla Comisciun europeica dal 1999 al 2004.

Les relaziuns danter l’Austria y Südtirol é caraterisades por tradiziun da n lian dër sterch d’amizizia. Südtirol é aldedaincö, ince tres les relaziuns ezelëntes ch’i un bele da tröp tëmp incá danter l’Austria y la Talia, n elemënt de coliamënt important y tres indô l’argomënt – y gonot cinamai le post – de mies incuntades cun le presidënt dl Stat talian Sergio Mattarella. L’autonomia de Südtirol vëgn odüda a livel internazional coche model d’ejëmpl por la sconanza de mendranzes. De chësc podunse ester braui düc deboriada. Deboriada laurarunse por la mantigní y por la svilupé inant.

Dr. Alexander Van der Bellen

Presidënt dla Republica federala austriaca dal 2017 incá Südtirol á na priorité assoluta tl Ofize por le dërt di popui dl Minister dl Ester austriach. L’ampliamënt dl’autonomia de Südtirol, le dërt de autodeterminaziun porté inant tl tëmp dal’autonomia, l’Austria che sënt te na manira acorta süa funziun de proteziun tl interes de n svilup pazifich y dl bëgnester te Südtirol, cun chisc temesc me dái jö indlunch: te mi ofize, söi iadi de laur, pro referac y seminars, le fin dl’edema, tratan la vacanza. Le respet di dërc nia ma individuai, mo ince coletifs di grups etnics y dles mendranzes é na fondamënta importanta por le svilup dl’Europa tl dagní y na condiziun por la pesc ince te d’atri posć dl monn.

Ambasciadú Univ.-Prof. Dr. Helmut Tichy

Diretur dl Ofize por le dërt di popui y dla sënta ofiziala dl Minister dla Republica federala austriaca por Chestiuns europeiches y internazionales

Südtirol taca por me daldöt adöm cun Silvius Magnago, le „pere“ dl’autonomia de Südtirol. Te n convëgn de studënc todësc a Desproch ala fin di agn 1950 êl sté bun, deach’al â imparé dal passé, da nes dé inant a nos jogn la speranza de n dagní de pesc y liberté. Nia cun la violënza, mo cun le dialogh dôn pretëne dala Talia le dërt al’autonomia di sudtirolesc. Chësc ê gnü arjunt te tröc agn de laur porté tres cun perseveranza. Cun süa autonomia teritoriala é Südtirol deventé n ejëmpl ezelënt de co rové a na soluziun por les gran mendranzes tla Uniun federala di grups etnics europeics (FUEV). La regiun, che mantëgn sües strotöres tradizionales, é öna dles regiuns plü riches tl‘Europa y plü arjignades al dagní.

Dr. Hans Heinrich Hansen

Surastant dla mendranza todëscia tla Danimarca dal 1993 al 2006, Presidënt dla FUEV dal 2007 al 2016 Cun le secundo Statut d’autonomia é nüsc antenac politics stá bogn da implí n fossé sot, da evité che le proiet dl’autonomia jiss sot y da mantigní le spirit dl’Acordanza de Paris. Cun coraje da baié y richëza de idees istituzionales ái ciaré al dagní y á invié ia na era de pesc y de svilup che n’é zënza stada ignó tl’Europa. Ai á cherié la basa por n’autonomia dinamica, generala, che agësc te na manira responsabla y che vá a öna cun le pinsier europeich. Trames nostes „comunités autonomes“ á inant debojëgn de chësc dialogh („s’ascuté sö un cun l’ater“, nia „s’ignoré un cun l’ater“) y de chësta richëza de idees a livel istituzional (por podëi cherié danü la conviënza de nüsc zitadins, cun dötes les desvalianzes, te n monn che se müda). Ince incö messunse indô ciaré al dagní.

Lorenzo Dellai

Presidënt dla Provinzia Autonoma de Trënt dal 1999 al 2012, presidënt dla Comisciun paritetica di dodesc por la XVII. perioda legislativa

Do che le secundo Statut d’autonomia é jü en forza dan da 50 agn, ál metü man n svilup de suzes, che n’ê nia logich y che vëgn araté aldedaincö a livel europeich y internazional sciöche ejemplar por la sconanza dles mendranzes. La Detlaraziun d’apajamënt dl strit dl 1992 desmostra che ince problems ris y doiusc, che vá zoruch dî tl passé, pó ciafé na soluziun sce düc i partezipanc se prova dassënn y cun scerieté da ciafé na soluziun. La Talia y l’Austria é aldedaincö liades da relaziuns strëntes y de amizizia te na manira bilaterala tla UE. I á crëta, che da jí inant sön le tru deboriada tl svilup dl’autonomia de Südtirol rovarán a n dagní positif y plëgn de prosperité.

Dr. René Pollitzer

Ambasciadú austriach tla Talia dal 2015 al 2020 An mëss dé pro che les bases por la soluziun positiva dla chestiun sudtiroleja é gnüdes cheriades ince cun le sostëgn di trentins, sides a livel nazional co a livel local. Scemia ch’al é sté tl pröm val’ incomprenjiun, á les classes dirigëntes dl Trentin acompagné y partí l’archirida de soluziuns che ti dess la poscibilité al’autonomia da se realisé coch’al alda, tl reconescimënt plëgn dles aspiraziuns legitimes por la sconanza dla mendranza. Te chël contest, tla unité dl Statut, á ince la chestiun trentina podü ciafé na soluziun adatada. Pian ia dai resultac de chësc mez secul orunse lauré inant deboriada y costruí nosc dagní basé sön l’autonomia, la conviënza y la cooperaziun sura i confins fora.

Dott. Maurizio Fugatti

Presidënt dla Provinzia Autonoma de Trënt