Fin dl ena spetaculer zënza spetadëures te Gherdëina y tl Alta Badia

Ski Alpin

VIDEO

Ryan Cochran-Siegle Aleksandr Aamodt Kilde y Rainer Senoner, WC Gröden

L fova de segur no saurì mëter a jì manifestazions sportives nternaziuneles ntan na pandemia mundiela. I protocoi de segurëza scric dant fova dasënn rigurëusc y n mesova tenì ite ngrum de normes preventives. Purempò fova la legrëza de pudëi mëter a jì chësta manifestazions granda. I doi cumitac urganisadëures de Gherdëina y Alta Badia à dat dut per organisé la garejedes y ie stac boni de mantenì l aut livel sportiv di ultimi ani.

Super G và ai “attacking vikings”

Davia che la garejedes mesova vester senza spetadëures fova l focus dla manifestazion cumpletamënter sun la pert sportiva. L fin dl ena lonch de garejedes tla valedes ladines à scumencià cun l superG sun la Saslong venerdi ai 18 de dezëmber. L tëmp a judà pea y l purtoi fova njenià ca a puntin, la tribunes tl traviert fova chëst ann uetes, purempò an pudù udei imagines beliscimes che ie jites ntëur l mond ntan la diretes televijives.

La cundizions dl purtoi cun na nëif suta y frëida fova fates sun mesura per i norvegri. Aleksander Aamodt Kilde ie stat l plu asvelt cun si furné da forza ma tecnicamenter nët, fajan belau degun fai. La bedaia d’arjënt ti ie jita a Mauro Caviezel, l atlet svizer ie unì batù da Kilde per n sofl de 12 centejims de secunt. Mo n atlet norvegesc ie ruà al terzo post, Kjetil Jansrud, che a nsci purtà a cësa si undescejim podium sun la Saslong. Dominik Paris ie pià via per l 200ejim iede te na garejeda de Copa dl Mond se tlassifican 12ejim y nsci l miëur di atlec talians. Do la garejeda àl rujenà de si cundizion fisica mo nia al 100%, do se avëi fat mel al jenodl l ann passà. L auter atlet che festejea si “comeback” ie Christoph Innerhofer, ël se a plazà al 26ejim post. L jëunn de Ciastel Florian Schieder ie ruà 50ejim.

L double de Kilde sun la Saslong

Alexander Aamodt Kilde fova ënghe l di do tla tlassica libra nia da bater. L atlet norveges de 28 ani ie l segondo tla storia dl schi à vëncer sibe l superG che la libra tl medemo ann te Gherdëina. Si ex cumpani de scuadra Aksel Lund Svindal fova stat l prim “re” dla Saslong tl 2015. N possa propi dì che i “vichings” y la Saslong ie urmei na tradizion: coche ei dij nstëss se sënti bën sun l purtoi dal pont de ududa tecnic, sun i sauc y per la preparazion dla nëif. La sensazion a livel sportiv ti ie garateda al jëunn american Ryan Cochran-Siegle, che ie ruà segondo a 22 centejims dal prim. L jëunn dl Vermont vën ora de na familia de atlec dl schi alpin, i “Skiing Cochrans” y nteressant ie che si oma, Barbara Cochran, gran talënt y or olimpic tl ’72, ova bel venciù la medaia de arjënt propi te Gherdeina, pra i Campionac dl mond dl ‘70. Terzo post per l’atlet dla Svizra Beat Feuz, a 0,54 secunc dal prim.

Foto: Pentaphoto

Riccardo Tonetti, Alta Badia VIDEO

Zielraum Alta Badia

L prim di talians tla tlassifica dla libra ie inò stat Dominik Paris al 15ejim post. Bëndebò avisa coche l dì dant nce i autri doi atlec de Südtirol Christoph Innerhofer (28ejim) y Florian Schieder (48ejim).

Dolomites Gardena Südtirol Ski Trophy a Kilde

Vencian tramedoi garejedes de Copa dl Mond sun la Saslong fej Kilde l “all in”, purtan a cësa monc l “Dolomites Val Gardena Südtirol Ski Trophy”, l pest che ti vën dat al atlet cun plu ponc tla doi garejedes. Metù a jì dal cumitat urganisadëur adum cun Dolomites Val Gardena à Kilde pudù se ncunferté sun 5.000 euro, na sujurnanza te Gherdëina y n bust de lën che unirà metù ora tla “Hall of Fame” sun la utia Saslonch.

Vënta franzëusa sun la Gran Risa

L fin dl ena lonch ie pona jit inant sëura l jëuf de Frea cun la garejedes tecniches tl Alta Badia. La dumënia fova sun l program l tlassic slalom lerch che ie nscì bel ruà ala 35ejima edizion. L cumitat urganisadëur ie inò stat bon de mëter a jì na garejeda spetaculera. Te n beliscimo di de surëdl, cun temperatures sota nul y la nëif cumpata ne udova i atlec nia l’ëura de ti vester al purtoi lijender.

L campion franzëus Alexis Pinturault à desmustrà che l ie l pont de refëriment te chësta disciplina vencian, fajan doi manche belau perfetes. L ie si prima vënta sun la Gran Risa. N resultat de marueia per l jëunn de 20 ani dla Norvegia Atle Lie McGrath, che ie pià via cun l numer 29 tla prima manche ruan 4, per pona miuré tla segonda manche ruan sul segondo scialier per me 7 centejims de secunt da Pinturault. Terzo plazamënt per l atlet dla Svizra Justin Murisier, a 0,28 secunc dal prim. Per Murisier iel l prim podium te na carriera plëina de nzidënc sui schi.

Tonetti mieur y unico talian

manche. Purempò à l atlet bolzanin Riccardo Tonetti sapù desmustré che l fova mo vel’ speranza: pià via cun l numer 33, ruvel 23ejim tla prima manche. Cun na boniscima segonda manche, firmel l mieur tëmp de manche y ie bon de recuperé 12 plazamënc, ruan 11ejim.

L “gigant” Zenhäusern venc l slalom

La prima garejeda de slalom dla sajon fova propri sun la spetaculera Gran Risa tl Alta Badia, do che l calender ie stat mudà per l Covid 19. I atlec ne se ova nia pudù musré l un cun l auter dal 8 de fauré 2020, canche i fova piei via tl ultimo slalom a Chamonix, daldò fova la sajon 2019/2020 stata fineda via te n colp.

L fova damandà n aut livel tecnic sun n purtoi njenià ca cun ega, per na nëif mo plu cumpata y dlaceda. L plu asvelt danter i pei strenc ie stat l atlet svizer Ramon Zenhäusern. Do na prima manche sterscia y balanzeda, iel stat bon de recuperé 7 plazamënc cun na segonda manche senza fai.

Al segondo y terzo post rua i doi atlec austriacs Manuel Feller y Marco Schwarz, tramedoi adum sun l podium per n sofl de centejims (de ndut me 0,12 secunc). L fova vëiramenter na garejeda scialdi emoziunënta, dantaldut ajache l jëunn talënt de Sëlva Alex Vinatzer fova prim do la segonda manche. L fova de segur nia saurì piè via coche ultimo tla segonda manche te na garejeda “n cësa”. Purempò ie Alex furnà scialdi da snait y ala fin iel ruà 4. per mé 7 centejims de secunt dal podium y de ndut 19 centejims dala vënta. N grandiscimo resultat per l jëunn atlet che avrà segur ngrum de ucajions de desmusté inant si gran talënt tecnic.

L auter atlet ladin Manfred Mölgg ie ruà 19ejim, el ie tlëur de se refé do avei giatà l Coronavirus de nuvëmber. Ala 28ejima posizion rua Simon Maurberger, l atlet de 25 ani dl Ahrntal. VIDEO