L’otru día topemos una noticia na prensa por casualidá: “Un equipu de fútbol brasileñu contrata a les madres de los hinchas como axentes de seguridá”. ¿Resultáu? Nun hubo nin incidentes nin altercaos porque, ¿quién va querer metese con una madre? ¡Y menos cola tuya! Y ye que madre namás hai una, ¡menos mal! Pero, ¿qué fadríemos ensin elles? EN QUÉ CONSISTE ESTI PROYECTU? Con estes actividaes vamos proponete un “trabayu de campu”, d’investigación. Vamos ver qué bien conocemos a les nuestres madres, o a les nuestres güeles, y pa ello vas tener que pasar delles pruebes. ¿Anímeste a xugar? Primer prueba. ¿Qué crees que contestaría to ma/güela nestes situaciones? 1 “¡Mamaaaaa! ¿Ónde tán les botes de fútbol?” a. “Nel so sitiu” b. “Guardételes nel to armariu” c. “Nun te preocupes qu’agora les busco yo” 2 “¡Mamaaaaa, non, les botes nun tán ehí!” a. “¡Ai, igual me confundí!” b. “Bueno, a ver si les alcuentro” c. “¡Como vaiga yo y les alcuentre…!” 3 “Mama, voi quitar la sudadera que voi xugar un partíu” a. “Hala, pásalo bien” b. “Pon la chaqueta que vas garrar fríu” c. “Val” 4 “Pero mama, ¿por qué tengo que poner la chaqueta? Yo nun tengo fríu” a. “Porque ye mui guapa” b. “Porque lo digo yo y PUNTU” c. “Bueno, como quieras, nun la pongas”
5 “Mama, ¿pueo xugar a la consola enantes facer los deberes?” a. “Nin consola, nin consolo. Primero los deberes” b. “Bueno, pero un poco nada más” c. “Claro; tol tiempu que quieras”
Ficha 1/4