In Osmiza: Ucio, Ciano e el cotecio remengo
Osmiza, osmiza, su a Gabroviza, xe el paradiso del triestin. No che le altre sia de meno. Difati Ucio e Ciano sto giro i xe a Samatorza. Sti do, apena che i ga un fià de tempo, i xe sempre che i bagola in giro per frasche insieme. Per quel i altri co i parla de lori i usa sempre el singolare: “Ma cossa, Uciano xe za in osmiza che el ghe da zo de otavi? Ma se dovevimo becarse tra do ore, riveremo su che el sarà za mezo incocalì!” Davanti a do otavi de bianco, Ucio e Ciano i xe impegnai a zogar una partida de cotecio remengo. Cotecio remengo xe una version strana de cotecio, che i se ga inventà lori do. Funziona che ogni tanto te ga de mandar a remengo l’aversario, però no con frasi banali tipo “orco tocio” o “tu mare grega”, ma tirando fora qualcossa de novo, che fazi rider e che no sia volgare. Oviamente se pol zogar solo co che intorno ghe xe altra muleria, se no no ghe saria chi che decidi se el viz fa rider o 9
meno. In pratica ogni tanto un dei do mola un zigo. Se la muleria intorno ridi, el ciapa un punto. Se nissun ridi, un punto in meno. Se el ziga tropo e l’oste se rabia e lo buta fora, el ga perso la partida. Per cui xe de farse ben i conti in scarsela prima de zigar, che no se sa mai che l’oste no sia in giornada bona. - Vintiquatro a sie! Te ga perso! Ciapa là, vecio mona! Mi son ancora a quatro, ti te va a tre. - Nissun ga ridù, te va zo a tre anca ti. - No gavevo miga zigà, no iera un insulto del zogo quel, solo la pura verità. - Ah ah, bravo, te futizi come el solito, se la monagine gavessi le gambe ti te saria un milepiedi! (Ridade) - Sarà, ma mi no la me pareva ‘ssai studiada però. - No stà dir monade. Più uno, semo de novo quatro pari. - Vara, ogi gavevo bastanza problemi de stiticheza, ma co te go visto i me xe passai de colpo! (Ridade) - Bel. De bon gusto propio ara. Bon ah, zinque a quatro per ti. - Eh, me par che la muleria qua ogi ga propio el morbin de una volta, i ridi per ogni monada che disemo. - Bon, desso dà le carte, dei. Come iera quela? “Dotor, dotor, son vegnù per le carte!”, “Va lecar tu mare!” - Ah ah ah moniga, la te xe andada mal. Ormai sta qua la sa anca el gato, chi te speravi de far rider? E po’ no iera gnanca un insulto. Zinque a tre. Come gaverè capì, cotecio remengo xe un zogo infinito e, sora de tuto, te pol esser bravo quanto che te vol cole carte, ma xe totalmente ininfluente. - Vara, no te mando in mona solo perché gnanca no te se meriti de vederla! (Ridade) - Osteria, bela questa, te dago ato. 10
- Zinque a quatro. Dà le carte dei. Gnanca a dir, la muleria, più che rider de quel che i disi, ridi propio de lori, do veci petessoni che ogni tanto tira un zigo, cussì, a caso. - Ciapa, ciapa dei. Ma a che ora riva quei altri? Qua scominzio a esser stufo de darte sempre straze a cotecio remengo! - Nissun ridi. Quatro pari. E po’ “remengo” no me pareva gnanca tanto original. Te scominzi a perder colpi me par. Te son cussì mona che int’una gara de mone te rivassi secondo perché te son tropo mona per rivar primo! (Ridade) - A volte volessi esser un folpo per poder tirarte s’ciafoni, strozarte, mandarte a cagar e aplaudirme contemporaneamente. (Ridade) - Ecolo, zinque a zinque. Comunque i ga dito che ogi i riva tardi, per le oto diritura. - Ale oto?!? E cossa femo intanto? No podemo miga bater carte tuto el giorno solo in do! - Ara, se te vol, per passar el tempo intanto che te le sono, podemo leger un poco de sto libro. - E che libro xe? Un elenco de novi insulti de cotecio remengo? - No, xe el diario de viagio de zinque muli che i xe andai in bici a Budapest. - In bici a Budapest? E come i xe andai fora? Col tren? Go sentì dir che no i lassa meter le bici sul tren... - Ma no, se te digo... i xe andai fora in bici. Partindo de Trieste po’, de qua dei. - Ah ah ah. Sa cossa? Bravi mone! No i podeva andar col aparechio pitosto? - Ma no te capissi gnente, in bici xe tuta n’altra roba. - Ah, se te disi ti. E cossa i ga trovà? I ga zercà el tocai ungherese? Quel che i furlani i la ga ciapada int’el daur, che desso no i pol gnanca più dir tocai che zac, i ghe taia 11
la lingua! - Eh no so, no go ancora leto. Vedemo dei, intanto che spetemo che rivi quei altri legemo un poco qua...
12
1. Leaving Trieste
Via. Una setimana via. Serar baraca e buratini, o meio, lassarli che i se zoghi vanti de soli int’ela baraca e che magari i te prepari una sorpresa pe’l tuo ritorno, cior in man la bici, dopo do ani che la iera imbusada in cantina a ciapar polvere, e partir, savendo che per sete giorni la sarà in totale simbiosi con ti e i tui pensieri poderà corer liberi senza nissun scoio in mezo, esatamente come le sue riode sbrisserà veloci sula strada. Ma andemo con calma. Diversi ani fa, che poderia esser diese come zinque, mi e el mio amico Eric Medvet se ierimo fati una promessa: ispirai dela rumizada ciclistica de Paolo Rumiz, se semo diti che entro i trenta ani dovevimo far assolutamente anca noi qualcossa de simile. Cole dovude proporzioni, oviamente. Per el giusto rispeto, se Rumiz a zinquanta ani 13
iera rivà fin Istanbul, noi a trenta dovevimo far qualcossa che sia tipo i tre quinti de quel viagio, no de più. E visto che el nostro rispeto per el mulo Rumiz iera ‘ssai ma ‘ssai grando, gavemo fato ancora meno de tre quinti. Ma solo per rispeto eh, credeme. Insoma, “entro i trenta ani” se disevimo, perché co se xe muleti se pensa che a trenta ani nassi qualcossa che te fa entrar int’el mondo dei veci, dele responsabilità, dei “xe longhi” e dei “nosepol”. In realtà dopo, co te bagoli intorno ai trenta, te se acorzi che te son più giovine de prima, perché de vecio adolescente te passi a giovine adulto, che volendo xe anca meo, perché te rivi ala consapevoleza de gaver tute le carte in regola e la piena potenzialità de far qualcossa de bel per ti, per i altri e per la tua cità, a meno che no te gabi voia de lassarte andar al nosepolismo cosmico. Dopo te ga de zontar anca che fra disocupazion, precariato, co.co.prot, co.co.incool, contrati a “chiavata” e lavoreti post-laurea o pre-work-experience o know-howciaping o appredist-with-great-experience-cumuling, tanti dela nostra generazion una setimana libera no fa ‘ssai fadiga a trovarla. E in fondo, anca se te lavori, te scopri che esisti le ferie, per cui ala fine la roba principale che te ga de valutar xe se dopo i trenta te se senti ancora muleto, cola voia de molarte el fil e svolar un poco lontan dele certeze che te ga intorno per veder coss’che nassi in giro. E a Trieste, poco de dir, semo un poco tuti eterni muleti. Cussì, quatro ani fa, a vintioto ani, quindi con do ani de antizipo sui canonici trenta, gavemo ciapà su le bici, o meio, lore le ne ga ciapà su a noi, e semo partidi de Piaza Unità puntando Berlino. Gavemo anca fato la foto là del bivio de Barcola, con l’orseto che te mostra i chilometri 14