Jafnréttisáætlun íslandspósts

JAFNRÉTTISÁÆTLUN ÍSLANDSPÓSTS 1.

MARKMIÐ

1.1. Samkvæmt lögum um jafnan rétt og jafna stöðu kvenna og karla, (18.gr.laga nr.10/2008), er öllum fyrirtækjum og stofnunum með fleiri en 25 starfsmenn skylt að setja sér jafnréttisáætlun. Markmiðið með gerð jafnréttisáætlunar fyrir Íslandspóst er að allir starfsmenn fyrirtækisins njóti sömu virðingar og hafi jöfn tækifæri til starfsframa. Einnig að allir starfsmenn sitji við sama borð óháð kynferði, skoðunum, aldri, efnahag, trúarbrögðum, litarhætti og þjóðerni, kynhneigð eða stöðu þeirra að öðru leyti. Allir einstaklingar skulu eiga jafna möguleika á að njóta eigin atorku og þroska hæfileika sína.

1.2. Íslandspóstur vill tryggja að fyrirtækið sé eftirsóttur og framsækinn vinnustaður þar sem leitast er við að gera starfsmönnum kleift að þróast í starfi og nýta hæfileika sína til fullnustu. Fyrirtækið setur sér það markmið að samskipti starfsmanna einkennist af virðingu og trausti. Áhersla er lögð á fjölskylduvæn gildi og að starfsfólki gefist kostur á sveigjanleika í starfi eftir því sem við verður komið.

Jafnréttisáætlun miðar að því að tryggja jafna stöðu starfsmanna og vinna gegn kynbundnum launamun og hvers konar mismunun með markvissu forvarnar- og fræðslustarfi. Íslandspóstur leggur jafnframt áherslu á að tryggja góðan aðbúnað og öryggi starfsmanna og leitast við að leggja starfsmönnum jafnan til þann búnað sem best er til þess fallinn að þeir geti sinnt starfi sínu af kostgæfni.

2.

FRAMKVÆMD OG UMFANG

2.1. Áætlun þessi tekur til allra starfsmanna Íslandspósts.

2.2. Jafnréttisnefnd er skipuð af forstjóra. Hlutverk jafnréttisnefndar er að fylgjast með lögum og reglum stjórnvalda varðandi jafna stöðu kynjanna, fylgja eftir framkvæmd jafnréttisáætlunar Íslandspósts og kanna ábendingar starfsmanna og viðskiptavina með tilliti til jafnréttis. Enn fremur er nefndinni ætlað að endurskoða jafnréttisáætlun Íslandspósts með tveggja ára millibili.

3.

AUGLÝSINGAR OG RÁÐNINGAR

3.1. Íslandspóstur leitar hæfustu starfsmanna hverju sinni. Þess vegna þarf launastefna, aðbúnaður og umhverfi að vera jafn aðlaðandi fyrir bæði kynin. Jafnréttissjónarmið skulu metin til jafns við önnur mikilvæg sjónarmið við stöðuveitingar.

3.2. Í starfsauglýsingum skal þess gætt að höfða til beggja kynja. Heimilt er að auglýsa sérstaklega eftir öðru kyninu í störf þar sem hitt kynið er í miklum meirihluta. Heimilt er að beina konum í þær starfsgreinar þar sem karlar eru í meirihluta og körlum í þær starfsgreinar þar sem konur eru í meirihluta.

4.

STARFSAÐSTÆÐUR OG KJÖR

4.1. Við úthlutun verkefna, tilfærslur í störfum og uppsagnir skal þess gætt að kynjum sé ekki mismunað.

1|F r a m k v æ m d a á æ t l u n j a f n r é t t i s á æ t l u n a r Í s l a n d s p ó s t s

27/8 2018

4.2. Við ákvörðun launa og fríðinda skal þess gætt að kynjunum sé ekki mismunað. Körlum og konum skulu greidd jöfn laun og skulu þau njóta sömu kjara fyrir sambærileg störf í samræmi við 19.gr.laga nr.

10/2008. Það telst þó ekki mismunun að taka sérstakt tillit til kvenna vegna þungunar og barnsburðar.

4.3. Starfsfólk Íslandspósts skal eiga kost á sveigjanlegum vinnutíma, hlutastörfum eða annarri hagræðingu vinnutíma, þar sem því verður við komið. Þannig skal starfsfólki auðveldað að samræma fjölskylduábyrgð og ábyrgð í starfi. Konum og körlum verði einnig gert kleift að minnka við sig vinnu tímabundið til að sinna fjölskylduábyrgð, s.s. umönnun sjúkra barna, maka og foreldra.

4.4. Leitast er við að hafa gott aðgengi og aðbúnað fyrir fatlaða starfsmenn á starfsstöðvum Íslandspósts.

5.

MENNTUN

5.1. Við símenntun og þróun í starfi skal þess gætt að konur og karlar njóti jafns aðgangs að fræðslu.

Jafnframt skal leitast við að gefa starfsmönnum kost á því að takast á við sem fjölbreyttust verkefni í störfum sínum.

6.

FRÆÐSLA OG RÁÐGJÖF

6.1. Starfsmönnum og stjórnendum skal standa til boða ráðgjöf í jafnréttismálum. Þetta á bæði við um störf þeirra og starfsaðstæður, s.s. kjör og samskipti á vinnustað, kynferðislega áreitni, kynbundna áreitni, kynbundið ofbeldi, valdbeitingu og önnur þau mál sem snúa að jafnrétti og samskiptum kynjanna á vinnustað.

6.2. Starfsfólk fær árlega kynningu á jafnréttisáætlun Íslandspósts sem og stefnu Íslandspósts um forvarnir og viðbrögð gegn einelti, ofbeldi og kynferðislegri áreitni.

7.

ÍSLANDSPÓSTUR SEM VINNUSTAÐUR

7.1. Áhersla er lögð á að Íslandspóstur sé eftirsóttur og framsækinn vinnustaður þar sem leitast er við að gera starfsmönnum kleift að þróast í starfi og nýta hæfileika sína til fullnustu. Að því er stefnt, að á grundvelli gildanna Traust, Vilji og Framsækni sem og sanngjarnra tækifæra starfsmanna til starfsþróunar og möguleika á samræmingu vinnu og fjölskyldulífs megi Íslandspóstur vaxa og dafna sem fyrirmyndarfyrirtæki.

8.

GILDISTÍMI OG ENDURSKOÐUN

Jafnréttisáætlun Íslandspósts gildir frá þeim degi sem hún er samþykkt af stjórn félagsins og er endurskoðuð á þriggja ára fresti. Framkvæmdastjóri starfsmannasviðs ber ábyrgð á framkvæmd jafnréttisáætlunar og á hverju ári kynnir hann niðurstöður verkefna fyrir stjórn Íslandspósts, stjórnendum og starfsfólki.

Jafnréttisáætlun þessi var samþykkt af stjórn Íslandspósts þann 27. ágúst 2018.

2|F r a m k v æ m d a á æ t l u n j a f n r é t t i s á æ t l u n a r Í s l a n d s p ó s t s

27/8 2018