puisi-puisi ni luh sari suryastini

Supersemar

Cening sareng sami Raris pirengang niki Dinané mangkin pinanggal solas Bulan Maret sané kâloktah katah

Indik Supersemar sané kâwedar Olih Présidén Soekarno

Kâtiban ring Bapak Soeharto Daweg tahun siu sanga nem dasâ nem Inggih punika Surat Perintah Sebelas Maret Sané pinaka kawetuan Orde Baru

Wraspati, 11 Maret 2021

Segehan Manca Warnâ

Niki mawastâ segehan manca warna Pacang katur ring Bhatarâ kala Mangda nénten ngerubédâ Majeng gumi lan manusâ

Mancâ warnâ lelimâ warnannyâ Selem, putih, kuning, brumbum lan barak Madaging tuak,berem miwah arak Selem uli kajâ, putih uli kangin Barak uli kelod tur kuning uli kauh Ring tengah wantah brumbun

Ring natar sanggah katur majeng Sang Bhuta Bucari Ring tengahing pâkarangan Sang Kala Bucari Ring lebuh Sang Durga Bucari Somya kala mangda jagaté trepti Dagingin canang sari Parilaksanâ kalâ dados Déwa

Saniscara, 13 Maret 2021

Gumi Masan Kéweh

Dompét sampun tipis Ciri kuangan pipis Kanggoang gigis-gigis Beli ané ngranayang tis

Gumi masan kéweh

Melahang ngaba keneh Apang sing kanti lengeh Alih jalan ané beneh

Keret indriané

Selegang ngalih gaé Punang nyuang ané ten dué Mlapanin nyalanin idupé

Anggarâ, 16032021

Uyang

Uyang keneh tiang maguyang Makejang bakat rambang Makejang ngrantang Makejang matalang

Keneh sing bisa neh Makeneh ané beneh

Apang tusing kéweh Apa buin kanti jejeh

Redité, 28032021

Purnama Kedasa

Masunar galang gigis Sada remrem ulian gulem tipis Yadiastun raina purnama Benehné makebyar tan kabinawa

Purnama kedasa ané kedas

Patut iraga ngawitin mekedas-kedas Ngedasin jiwa pramana Ngedasin angga sarira

Redité, 28032021

Idep

Idep titiang mendep Manah titiang sakadi sirep Sami mapupul ring genah pinih arep Ngadungang sakancan rasâ mangdâ jangkep

Tindih puniká pinakâ pamargin urip Tresnâ kâwedar ring galah arip Saget éling saget lali mânganjali Rasâ puniki tan mari melali-lali

Sukâ duká larâ pati Becik kaon wantah pakardi hati Papineh sané becik mangdâ kâracik Kedas sakadi tangan sakadi mawacik

Jumat, 02 April 2021

Ni Luh Sari Suryastini,S.Pd.SD

embas 17 Juli 1971. Magenah ring Jalan Untung Surapati, Gang Samsam IIB No. 2, Amlapura Bali. Makarya dados guru ring SD Negeri 3 Padangkerta. Puisi-puisi Bali puniki kasurat, sangkaning nagingin arsa saking sawitranipuné, pinaka jalaran ngajegang basa Bali sané kaciriang saking kawéntenan Bulan Bahasa Bali. Malajah nyurat puisi bahasa Indonésia saking kawéntenan I Corona ring jagat Indonésia.