“surat cinta dari ida batara” (I Gusti Lanang Sutéja Naréndra

Isin Gumi

“surat cinta dari ida batara”2

I Gusti Lanang Sutéja Naréndra

Deluangné suba buuk pesaja, warna putihné ilang masalin warna coklat tapis, sada bucu-bucuné amah ngetnget. Matulis potlot podol, tulisané tusing luungan tekén corétan raré ésdé. Dugas kajeng kliwoné, suraté ento bakatanga nyelekak di palinggih méruné. Sandikalané ento, ia ayat lakar nunas nomer buntut. Kadéna tuah gaén nak iseng, sakéwala dugasé suud mamaca, prajani awakné ngetor: kerauhan!

“Dear my damuh... Dari hati yang paling dalam, harus Manira akui, Manira sebenarnya jatuh cinta padamu. Rasa ini begitu dalam, hingga tak bisa manira abaikan. I Lové you. Bersediakah kau menjadi sahayaku, melayaniku sepanjang hidupmu?”

Béh éwér munyin suraté. Masak betara nganika mabasa inggris lan bernésia? Biasané betara ngenika mabasa kawi, cara raos mantrané. Sada tulisan latin béad-béod, biasané nak sastra Bali wayah.... Piiiihhhh... Saja-saja éwér! Pelecéhan nénénan!

Sakéwala, ada cihna ané ngaé ia percaya. Suud mamaca, awakné ngetor buka seterum listrik. Bibihné caket, lidahné kaku. Sumingkin kenehné nulak, sumingkin sanget ngetor awakné. Kanti ia lemet, leleh...

Ditu lantas ia masaut, “Inggih titiang nyadia ngiringang pikayun betara!”

2 Satua puniki kawedar wantah saking kerjasama Suara Saking Bali sareng Balai Bahasa Provinsi Bali

Mara kéto, prajani ilang ngetor awakné, seger buka jati mula. Nyansan percaya ia mula kacatri widhi, kesenengan betara. Nuju déwasa ayu, ia mawinten dadi jro. Maprucut, majenggot, gidatné setata matémplok bija agemel. Ilang I Bagler ané demen mamunyah, matajen, mamitra, majaguran. Masiluman dadi jro, ané anteb abra mawibawa.

Sujatiné, liu anaké pati takon unduk suraté ento. Makejang tandruh, tusing percaya. Dija ada unduk betara jatuh cinta tekén jelema jelé buka I Bagler? Sakéwala, nepukin ia masalin bikas, luung masi. Ada pikenoh surat betarané ané “éwér” ento.

Jani, sayan rajin kramané maturan ka pura. Nyeliksik di palinggihé, ngajapajap maan surat uli betara. Yén selamet maan suraté ento, suba ngarincik lakar malinggih dadi Jro. Piiih... dadi jro mula luung. Sing ada anak bani éwér. Makejang ngawangiang, bes karoan kasenengin betara. Nyén bani éwér?

Ibi sandikala tiang maturan ka pura. Tiang tusing milu-milu lakar ngalih surat cinta ida betara. Sakéwala keneh tiangé tulus lakar nunas pangampura tekén betara.

Tondén pragat pula-pali pamuspaan tiangé tekén betara, sagét cekceké mabriuk, ramé mamunyi di gedong meruné. Béh, cihna apa yé ento? Tiang ngedat, nelektek ka méruné. Sagét ngenah deluang malepit, nyelekak di jelanan méruné. Gagésonan tiang nyagjagin, nyemak suraté ento.

“Dear damuh... Kenapa kau tak menulis surat lagi?”

Kéto dogén isiné, lantas tiang ngetor buka seterum listrik... kerauhan!

(Macang Rumah Cinta Seribu Jendela)

I Gusti Lanang Sutéja Naréndra

magenah ring Macang, Bebandem, Karangasem. Satuanyané prasida kawacén ring facebooknyané.