tukad (IDG Trinandita

Artikel

tukad

IDG Trinandita

Sungai punika basa Indonésia. Yéning basa Baliné kasengguh tukad. Ring Bali akéh pisan wénten tukad. Ring tukadé akéh wénten klebutan. Biasané klebutan punika wénten ring batu parangan sisin tukad. Raris kakaryanin penampungan dados pancoran. Ring pancoran punika biasané wénten pura béji. Toyané kabaos tirta ring béji. Punika mawinan yéning warginé ke tukadé taler nyambat jagi lunga ka béji. Macihna béji punika wantah genah sané suci tur kapiara becik olih warginé sané maduwé wewidangan tukad punika.

Ring béji warginé ngarereh toya utawi tirta. Yéning maduwé pekaryan yadnya warginé pastika nunas tirta ring pura béji. Napi malih ring pura kayangan tiga rikala wénten piodalan utawi karya alit lan karya ageng pura béji puniki pastika dados genah nunas toya ning anggé ngarga tirta. Taler anggén ring perantenan pura mitegepin sajeroning parikrama ayah-ayahan nyiagayang kramané paica.

Sané mangkin kantun akéh warginé sané seneng masiram ring tukadé. Sejabané nunas tirta ring béji. Toyané ring beji ning pisan. Akéh warginé nginum toyané punika ring genah medal. Wénten taler sané ngaruruh nganggé galon. Warginé rumasa toya béji wantah tirta sané becik. Punika wantah toya

ning nirmale sané kasuciang. Riantuk toya punika kebaos tirta lan toya sané suci lan murni.

Setios genah nunas toya tukad wantah genah warginé mesiram, mememan lan genah ngumbah kuaca. Ring pedésaan tukadé kantun resik toyané kantun ning. Irika warginé kari nganggén tukad punika dados genah sekadi kawedar ring ajeng. Kémawon tukad ring perkotaan arang sané ngawigunayang kadi punika. Taler kejantenang ring masan endang kadi mangkin akéh klebutan utawi pancoran ring wewidangan Bali sané nyat nénten medal toya. Dumogi digelis sabeh lan medal sekadi pinunas kramané sami.

Sané mangkin tukadé ring kota sampun katiténin mangda resik, lan dados genah mawisata. Sinah puniki mapidabdab becik ngalestariang genah punika. Sujatiné ring tukadé punika jatmané tan dados ngawag-ngawag ngutang luu, nyakit basang, napi malih maparilaksana kaon tiosan. Warginé ring Bali percaya pisan tukad wantah genah suci lan pingit. Toya wantah urip i manusa. Yéning nénten wénten toya ring jagaté sinah nirdon i manusa jagi prasida maurip. Entik-entikan taler jagi padem, punika taler sarwa beburon jagi pacang mati makesami. Toya satmaka amerta ring kahuripan puniki.

Sekadi sané sampun kawedar ring ajeng. Tukadé ring wewidangan Bali sané mangkin sampun akéh kedabdabin dados genah malilacita irika kabersihin lan ketata asri. Sinah warginé seneng irika sareng kulewargané nyelimurang kayun sepisanan ngarereh udara segar taler ngatonang toyané. Napi malih rikale nyoréang utawi wengi majanten asri pisan pekantenan tukadé punika. Riantuk kaiyasin lampu warna-warni. Pidabdab puniki becik pisan. Warginé nénten malih ngutang luu napi malih limbah irika ring tukadé.

Yéning prasida kamargiang sekadi puniki minab tukadé pacang dados genah sané asri, becik, ngulangunin lan dados obyék wisata anyar sané karuruh warginé. Warginé seneng nyaksiang toya napi malih toya sané ning, raris bé sané wénten ring toya punika prasida kaaksi. Pastika ngulangunin pisan.

Ring Bali warginé seneng pisan nyaksiang toya. Kejantenang antuk setata nuju sumber toya minekadi lunga ka segara. Taler seneng ngaruruh danu irika warginé taler manggihin toya. Irika sami wantah genah meyadnya. Warginé taler seneng ngaruruh genah malukat. Ring sajebag jagat Bali akéh wénten genah malukat. Sané sampun kasub irika ring Tampak Siring kebaos ring Pura Tirta Empul. Irika genah malukat sané jangkep pisan.

Napi sané kabaos ring ajeng sujatiné nguningayang wargi Bali subakti ring Ida Sang Hyang Widhi. Kebaos segara, danu, tukad, lan genah sumber toya tiosan wantah genah sané dahat suci. Yéning ke segara jagi mesiram akéh warginé ngaturang canang sari sadurung masiram. Punika taler yéning masiram ring genah malukat tiosan. Toya segara kasinanggeh prasida ngalebur leteh ring angga sarira. Taler toya ring genah malukat tiosan.

Warginé sekadi marebut nyujur genah punika. Niki macihna warginé sayuwakti nyuciang toya punika. Toya wantah sumber kahuripan. Sami sumber toya patut kapiara lan kajaga kabersihan nyané. Sapasira mapakardi ngawé cemer sumber toya pastika jagi polih sengkala. Tukad wantah pemargin toya saking gunung nyujur segara.

Yéning pemargin toya saking gunung kacemerin minab pateh sekadi nyemerin danu, nyemerin segara. Sinah nénten nginutin Sad Kertih Loka Bali. Unteng nyané tan nginutin Danu Kertih lan Segara Kertih. Cutetné tukad punika genah sané ngulangunin pisan. Paican Ida Sang Hyang Widhi ané patut piara sareng sami

Batubulan, Sadurung Covid-19

IDG Trinandita

urati lan seneng ring parikrama Bali