rārangi kōrero
ĒTITA
Ko Wai MIHI
Sterling Maxwell | Ngāti Porou, Ngāti Konohi, Ngāpuhi, Ngāti Hine
He Aha e Whai Ake Nei?
Kimihia Garcia-Grace
10 Ko te ako tahi o te reo Māori
Shay McEwan | Te Aitanga-a-Mahaki, Te Whanau a Kai, Ngāti Pāhauwera
Pā Harakeke
Harris Puanaki-Devon | Te Arawa Whānui, Tūwharetoa, Te Rohe Pōtae, Te Awa Tupua, Ngāti Toa, Kāi Tahu
15 TOI | Taramainuku
Marama Salsano | Ngāi Tuhoe, Te Aitanga-a-Māhaki, Ngāti Porou, Ngāti Wairere ki Waikato
16 Motukia Ngā Here
William Koko | Ngāti Kahungunu ki Heretaunga, Ngāiterangi, Kāi Tahu, Olosega, Sili, Taputimu
17 Maramataka o te Wiki nei
Hemi Pinfold-Whanga | Ngāi Tūhoe, Waikato-Tainui
18 Tēnā, tūkuna te hunga taiohi kia tohe, kia haka, kia puawai
Taipari | Te Whānau Moana, Te Rorohuri
He whakahoki ki tēnei kāwanatanga paru, me āna mahi koroniara
Rosa Schooner-Hibbert | Te Arawa, Ngāti Whakaue, Ngāti Awa
Ka Whaiwhai Tonu 22
Keiha Nicol | Ngāti Tūwharetoa, Te Mahurehure, Te Uri o Hau
23 TOI
Amiria-Rose Monga | Ngāti Whatua, Te Uri o Hau, Kuki Āirani
ko wai mātou?
Ko te perehi o Salient nā Te Aka Tauira, engari ko te tūhaha i a mātou ki a rātou. Ko ētahi moni pūtea i a mātou o Te Aka Tauira, ara ko te Student Services Levy. He mema i a mātou o te rōpū Aotearoa Student Press Association (ASPA).
he take
Ko te take koe ki ngā pūrongo, me īmerā koe ki te CEO (ceo@vuwsa.org. nz). Kāore koe e pai mō ngā karere whakahoki, kātahi kā īmērā atu ki te tumuaki o Media Council (info@ mediacouncil.org.nz).
ka tuhi koe?
Ki ō whakaaro ki ngā pūrongo? Ka tukua tōu tuhi reta ki te īmerā o Salient letters@salient.org.nz. Me perehi i a mātou!
Hei aha koe hei manu taketake? (Te Waikamihi Lambert | Ngāti Awa, Tūhoe, Ngāpuhi), Panga, Iwiscopes, Memes
whaia i a mātou @salientmagazine fb.com/salientmagazine @salientgram www.salient.org.nz
ĒITITATE AO MĀRAMA
Poipoia te kākano kia puāwai
He Whakaputanga kua ētita e Te Rātā Campbell
He uri tēnei nō Te Rarawa me Te Aupōuri. I tipu ake i te Tūranga-nui-a-Kiwa.
He uri tēnei nō Te Rarawa me Te Aupōuri. I tipu ake i te Tūranga-nui-a-Kiwa.
Tuituia ngā taura kahika
Tuituia ngā taura tangata
Tuituia ngā taura o Te Tumu Herenga Waka
Kei ngā karangaranga maha, kei ngā mana nui, kei ngā mauri tiketike o te motu, tēnā koutou. Ka paoro taku karanga pōwhiri mai i te maunga o Whakakoro ki Ahumairangi, nei he mokopuna o te Nōta e tuku reo matakuikui atu ki a koutou katoa. Kia puāwai ai te pā harakeke whānui, me rangaranga ngā tini rau o te motu e tātou, kia matomato ai. Kia matomato te reo Māori. Kia matomato te iwi Māori. Kia matomato te ao Māori. Kia matomato Te Tumu Herenga Waka
Kia ora! E hīkaka ana au i tō kōwhiri i tēnei pukapuka! Ko Te Rātā Campbell ahau, ko au te Āpiha Tūmatanui o Ngāi Tauira, te Rōpu Tauira Māori o Te Herenga Waka.
Nā tēnei, kua tau mai ki au te marenga nui o te turanga kaiētita manuhiri mō tētahi whakaputanga Salient mō te Wiki o te Reo Māori. He tino kuru pounamu tēnei whakaputanga, koia ko Te Ao Mārama. He mea kua tapa nā te orokohanga o tō tātou ao.
I te tuatahi ko te whakaaro, nā, ko te mauri, nā ko te āhua. Mai i tēnei ka hua ko te Kore, te Pō, ka puta ki te Wheiao, ki te Ao Mārama.
Ka hua mai tēnei kōrero i te whakataukī, “Poipoia te kākano kia puāwai.” Ko te huahuataunga o te whakapapa mai i te kore ki te ao mārama.
Mo te whakaputanga Salient o tēnei wiki, ko te ingoa “Te Ao Mārama” e tohu ana i te whakatairanga o ngā tauira Māori ki te Herenga Waka. E tohu ana i te hokianga mai o tō tātou reo, o ō tātou tikanga ki te wheiao, ki te ao mārama.
Te Ao Mārama, Poipoia te Kākano kia Puāwai. Ki tōku nei whakaaro, he tika rawa tēnei kaupapa mō te whakaputanga o tēnei tau i te mea e whai pānga ana ki a tātou katoa. Kua hua ngā mea katoa mai i tētahi kākano i ruia mai i Rangiatea. I ahu mai tātou katoa i te kākano i roto i te
whare tangata, ō tātou whānau kua poipoia e ō tātou tūpuna nō ngā kākano o ō tātou māra, ō tātou tamariki nō te aroha kua tupu i rō ngākau.
Ka puāwai ō tātou tikanga, tō tātou reo ki roto i a tātou i a mātou e whakahiapo ana i a tātou anō mō tō tātou Māoritanga.
Ki a au nei, ko te Ao Mārama he hua e whāngai ana te hononga o mātou ngā tauira Māori ki te Ao Māori. He tohu whakatupu, he tohu hauora a te Ao Mārama mo ngā tauira Māori o Te Herenga Waka. He wāhi kia whakaputaina, kia whakaāhua ngā tauira Māori i a rātou anō, reo Pākeha mai, reo Māori mai. Nā tēnei, ka kitea te puāwaitanga o ngā tikanga, o te Reo. E toro mai ana tōku ringa ki a koutou ngā tauira Māori o te Herenga Waka - nau mai, haere mai ki tēnei Ao Mārama, hākoa te roa o tō noho.
Nei rā te mihi ki te hāpai ō mua, ō muri, nā koutou te kaupapa i tutuki. E mihi pau te kaha ana ki te rōpu Salient me te Komiti Whakahaere mō te hāpai, mo te aroha mutungakore. Ki a koutou, ngā kaituhi, ngā ringatoi, ngā kaiwhakamāori (inā te tautāwhi a Vini Olsen-Reeder), e kore te puna mihi e mimiti, e kore te aroha e maroke i te rā.
Ki a koutou, te hunga pānui, nei rā te mihi nui - tēnā koutou, tēnā koutou, tēnā koutou katoa. Nāu i hāpai te poipoitanga o te kākano, tēnā, kia puāwai tahi tātou katoa.
Slay, Te Rātā
Tiwhatiwha te pō, tiwhatiwha te ao! Whakaeke mai tō roimata, tō hūpē, i ngā mate o te wā nei. Tēnei te parekawakawa te tohu o te mate, ki te hunga kua whetūrangitia ki te pō haere, e oki, Tae noa mai ki ngā matatini kua hau mai ki uta ki te whare wananga, kua wehe rānei ki tai, kia tangi kau atu mātau ngā waihotanga ō rātau mā, He rurutu roimata tā te manawa e. E tangi hotuhotu ana te manawa, te pātukituki o whatumanawa kia rongo rawatia te ao. kei te mōteatea tonu te ngākau, e korengarenga ana a hirikapo i te mahara. Kia rangonatia i tōna ahua, i tōna aroha anō hoki.
E rangi e, kingī ō te kotahitanga ō ngā iwi tēnei ō iwi e haku nei e rere ko hūpē nei kia koe kua hoki atu ki ngā rārangi kingī ō te pō, nō reira e rangi takato koe i tō tupuna Taupiri kūao ki tō whaea ki ō tupuna taha hei okinga whakamutunga, E ara te arikinui Ngā Wai Hono i te Pō e noho koe i te torona tapu hei pitau whakarei mō te ao katoa rire rire hau pai mārire.
Ka rewa a Pōhutukawa ki te pae. He tohu maumaharatanga ki a rātau mā kua whetūrangitia He karanga tēnei ki a koe e te whetū, tīrama mai. Tīrama mai kia hura ngā mata o ngā tūpuna. Tēnei te Whakarahia a mahara ki ngā tauira, ki ngā kaiwhakaako ō muri o te herenga waka.
Nau mai e Koanga e, ngā rito hou te haere mai nei, ngā oriori o te wao te rongo atu. Ko tēnei te wā kia whakarite i a tātau anō. Kia ea ai ngā mahi i tūmanakotia i te anamata, me mihi kā tika. Me tuku mihi ki ngā rangatira, ngā māreikura o mātau kua whakatakoto i te ara hei hīkoi mā mātou. He reo tēnei hei whakamana i a rātou kua poipoia i ngā kākano, kia puāwai a tōna wā.
E moe, e okioki, tukuna mai te mana ki a mātau kua waiho nei ki te kawe i tō tātau whare ki anamata.
Ka huri,
KO WAI
KO WAI
Sterling Maxwell | Ngāti Porou, Ngāti Konohi, Ngāpuhi, Ngāti Hine
Ina ngā tini whakatau kua whakatauria e au i ōku nei rā. Rua tekau mā rua ngā tau, te huhua o ngā whiringa. Te tini o ngā hapa, iti rānei, nui rānei, ērā katoa e taumaru ana i te ara kei mua i te aroaro. Anō nei he mapi nui ōku hapa, ia te hapa e pātahi ana ki te ara kei mua. Kua kōtiti taku haere. Kua pēnei, atu i tēnā. Kua takahia e au ngā ara pahū, kua wāwāhia ngā tahā. Kua hē te tūāpapa o tōku whare, kua hapa te rere o tōku waka. Kua huakina e au te tatau o te pō, ā, kua taka hoki te pōro. Kua tawhiti anō te pae tata. Nā wai i hē, kua tino hē rawa atu. Kua ngere. Kua ngere. Kua ngere.
Ka titiro mai rātou, ā, ka mene atu au. He aha atu māku? Me he tuahangata ahau ki a rātou, heoi e rongo ana au i a Whiro e pupū ake ana i roto i au. E rangona ana te taumaha o aku hē i ētahi wā. Me ko te ao kei aku pokohiwi - tē tāea te whakataha. Me he huakore aku whakatutukinga. Me he whakatutukinga hāpua kua korowaitia e te ngere e kitea ana e au, i ō rātou karu. Ko ngā kupu, “Na te waimarie noa”, “Tō hamuti” E noho ana i te mata o ō rātou arero. I taea te whanake, me whanake. He taunga kore. He taunga kore. He taunga kore.
Ko wai au? Ko hua kore.
E mauheretia ana au e ōku ake whakaaro. He wāhi e kore e kitea, e kore hoki e rerea. Ko ngā here, tē motukia. Kua hangaia e tōku ake hopo, ā, ka whakakahatia e ōku ake whakaaro whakaparahako mōku anō. Mea rawa ake ka āta whakapono ki aua kupu whakaparahako. Ka tumu te wā. Ka pōturi te hāere. He mutunga kore. Ka tau mai ko Hinepūkohurangi, e rehurehu ai te whakakitenga ki te āpōpō. Tōna matatorutanga e kikī ana i tōku ake whakatakē.
Ko wai au? He taurekareka ki ōkū ake whakaaro.
Ko wai koe?
E kore koe e kite i tā rātou e kite ai. E aro noa ana ki ngā hara, kaua ki ngā hua nui o roto. Nō to rātou whānautanga mai, kua kitea tō katoa. Nāu rātou i whakaako, heoi e kore tonu koe e mārama ki tō ake mīharo. Kua kāpō i ōu ake whakaaro e tāmi ana i te kitenga o te pono. Tē aro i a koe te kimo i ō rātou karu, te nui o te whakamānawa rānei o rātou, mōu. Kua kitea koe i te tihi o te maunga, heoi kua kitea hoki koe ki raro e putu ana. Kua mātaki rātou i a koe e totitoti haere ana, e whara ana i tō takahitanga i tō huarahi. E kore rawa rātou e mārama ki te pōuritanga o tō āo, ā, ko te wawata e kore rawa rātou e mārama.
Ko wai koe? He tuahangata tonu ki a rātou.
Ko tā rātou, he manako ka kite koe i tērā.
E mataara ana, e kite ana rātou i te pono. Tō manawa roa, tō rerehua, me tō manawa tītī e whiti tonu ana ahakoa te taraongaonga. Kua kitea tō whakaaro nui, me te aroha nui ki te tangata ahakoa ko wai. Me he kākāno koe i āta poipoia, i āta arohaina, i kitea tō tipu, tō puawai ki tō momo o ināianei. I kitea tō takitū ahakoa ngā karawhiunga o te wā. Ka arohaina koe ahakoa ngā tini hapa o tō ao. He aroha i hua mai i tō momo, kōrero pono, ngākau motuhenga. Ā, i a rātou ka whakaaro mō tō rātou apōpō, ka whakaarohia ngā tini whēako ka pā ki a rātou, ā, ka whakaarohia koe hei whakakitenga mō rātou.
Ko wai koe? Ko koe ko rātou, ko rātou ko koe.
ahuatanga
He aha e whai ake nei?
nā Kimihia Garcia-Grace
Papaki ana ngā peka tārewa ki tā Ata kanohi i tana ngōki haere i te ngāhere e kapi ana i te hiwi. Kua mamae ana ringaringa, kua tīhaea ngā turi o ana tarau, ā, kua whero te tae o tana hāte mā. Ka unuhia e ia i tana hāte, mei kore ake te tao whawhati e wero ana i tana taha, e ngaukino ana i te pānga mai o te pūihi. Engari rā, e kaha pāmamae ana a Ata i te tae parauri o ana hū “Hau Tōpana” mā. Kātahi anō kia hoko i tērā wiki, kārē ia i te hoko kai o te rā nui mō ngā tini marama kia utua ngā hū rā. Moumou noa.
Kātahi rā, ka papatahi haere te papa, ā, ka takahuri a Ata ki tana tuara, whai hā ai. I eke ia i te hiwi nei i tana whakapae he tirohanga pai ki te tihi, auare ake kei te kōwaowaotia katoatia ngā rākau i te rangi. Tē kite i te aha, hāunga ngā pīwakawaka tokorua i te peka pāpaku o te rewarewa. E kaha hia wai māori ana a Ata. He pia ngaungau rānei. I mua rā i whakamātauria e ia i te kai i tētahi rau kia aumoe ai, e kawa tonu ana taua ngao i tana waha.
Ka huri te aro a Ata ki ngā nekehanga hou. Ki te mauī, e heke ana te hiwi ki raro.
Kāore e kore ka māmā ake mō tōna tinana, ā, tērā pea ka tūpono ki tētahi awa ki raro rā. Engari, ki te hinga ia, ki te takaporepore ki raro i te hiwi, ka whara mārika ia i te wero o te tao ki ana whēkau. Ka whakawhiti ia ki ana turi, huri atu ai ki tētahi atu aronga, peka ake ai i tētahi hiwi hou.
I te takanga o te ahipō i hura ngā kapua karaka nō muri i ngā rākau. Whai muri i tētahi wahanga paripari, i te tūmanako a Ata kua tae atu ia ki te tihi o te hiwi, me he maunga kē. I tana pātata haere ki te paranga, i kimikimi haere ia, ā, i mau i tētahi peka pērā te tāroa ki a ia. Ngau ana te mamae ki ana waewae i tana tū ake, whakawhirinaki ai ki te peka i tana totitoti haere. I tana putanga ki te paranga, i tae atu a Ata ki te tihi o te hiwi, tū kanohi ki te kanohi ai i tētahi wharepuni tahito. E pākarukaru ana ngā pakitara, e tītaha ana te taha matau ki rō papa, engari e whakamīharo ana a Ata i te tū tonu o te tuanui toetoe.
“Mā hea mai koe ki konei?” i whakaaroaro ā-waha ia, hākuku ana tōna reo.
Ka ngōki atu a Ata ki raro i te tomokanga, whanaia atu ai i ana hū paruparu ki muri i a ia. I pāpouri ia i tana kite i te papa oneone ō-roto, horekau he āhuru whakangā, moenga rau, whāriki harakeke rānei. Ka noho ake ia, whirinaki atu ai ki te pakitara mauī, tautau
ana i tana māhunga. Kaha ana tōna hiahia kia moe 12 hāora te roa ki konei. Heoi, ka mau ia i tana peka, kōrari ai i ngā rārā me ngā kiri o te rākau. Ka whawhati ia i ngā wāhanga nō te taha whīroki o te peka, oti ana i tētahi peka rite te nui ki tana ringa. I te taha mātotoru o te peka, i keria e ia i te papa ki tana mauī, keri ai i tētahi rua pāpaku mō ngā rārā i tangohia.
Kua aua atu tōna waea me tōna wareti, engari ka huraina a Ata i tana pūahi me ōna pepa hikareti nō tana pūkoro o muri. Taihoa ake ka tuku mihi ia ki ana warawara i mua i tana āta whakatakoto i ngā pepa ki te waenga i ngā rārā, whakamura ai.
E roa ana ia e panapana ai i te ahi kia mura, taihoa te wā ka tō te rā, ka tau mai te pō, ā, ka whakawhetai a Ata mō te mahana me te mārama o te ahi. E tau haere ana te mamae o tana taha i tana noho ngū, whirinaki ai i ana pakahiwi me tōna māhunga ki te pakitara.
I te hiahia a Ata ki te moe okioki, ā, i taua wā tonu i karanga atu tētahi reo tioro ki a ia,
“Auē, te mamae hoki o tēnā.”
Ka huri tana aro ki te tomokanga, kite ai i tētahi weka e whātere mai ana ki roto i te whare. I tungou te weka i ana ngutu ki a ia, takawhiti mai ana ki roto. Ko tā Ata he maremare noa i te whakaeke mai o te weka, tātari ana i tana mamae.
“Kino mārika. E ohorere ana au i tō piki mai ki runga nei,” tana whakahua. Engari ehara i te whakahua, e rongo kē ana a Ata i te reo tioro i rō i tana hinengaro i te ketekete mai o te weka.
Ka āta timo te weka i te wāhi e paokatia ana te tao i tana kiri, ā, ka auē a Ata i te ngau o te mamae e rere ana i tana tinana.
“Mō taku hē, mō taku hē.” ka whakahua atu te manu, heoi ka peke ake ia ki te puku o Ata kia tātari i te tihi o te mamae, e ngau tonu ana te mamae i te pēhitanga paku rā. Ka uru te manu ki raro i tā Ata hāte.
“Ae rā, he kino tēnā,” tana whakahua, hura ana i tana māhunga.
Tē rongo a Ata i ngā tapuwae o te manu i te pikinga ki tana poho, tau ai. I ohorere ia i te māhana.
“Nā, i aha tētahi tama purotu pērā ki a koe kia mamae pēnei ai?” i uia atu.
“He...aha...kē...koe?” tā Ata whakahoki. Me he kī ana tana korokoro i ngā kuiki.
“Nuh uh, nāku te pātai i tuku. Whakautu i taku ui, kaua e māharahara mōku.”
“I...taka au...ki te raru.” E anipā ana a Ata i tana tiro atu ki ngā karu whākana o te weka, e
pūkana mai ana ki a ia, tatari ana. “I tīmata he paku whawhai. Ko ētahi tama, e... whakaweti mai ana i a au.” I tītaha te weka i tana māhunga. “I karawhiua atu?”
Ka maremare a Ata i tana kata. “I wepua taku kumu.”
“Hmph,” ka timo te weka i tana uma, “i pōhēhē au ka kaha kē ō patu nā te nui o te poho nei.”
“Kāre au i te tangata kaha whawhai. Ā, i a rātou tētahi tao”
“Tika tonu. He mea tūkino tērā. Engari rā, kia kaua koe e whawhai atu ki ngā tama kaha
pērā. Nā wai rā kua hinga koe. Ka aroha.”
“Ae...” i tūpou atu a Ata. E tiro mākutu tonu ana te weka ki a ia. “Heoi, kāre au i te pōuri.”
“Oh?”
“Māku e kī i whawhai au ki te mutunga. I... tū kaha au mōku anō, mā te aha anō i tēna.” Ka
rongo a Ata i tana poho e ngoikore haere ana, e papaku haere ana ōna hā. “E manu. Ka aha au ināianei?”
“Hei aha noa iho, kua tata te wā. Kei ngaro te pārekareka.” Ka tū ake te weka, peke atu i
te uma o Ata ki te papa. “Kauaka koe e tere ki te moe.
Ka hoki horo mai au.”
Ka mātaki atu a Ata i te tere atu o te weka i te tomokanga ki te pō o waho. E mimiti haere
ana te mura o te ahi, engari kāre ia i te rongo i te makariri. E aro pū ana ia ki te whakapuare tonu i ana karu e kati haere ana.
I pai ai, i hoki tere mai te weka, e mau ana i tētahi anga wōnati ki ana ngutu. Ka piki ake ia
ki tā Ata poho, e kī ana te anga i tētahi momo wai, ka tuku te manu i te anga ki tana waha.
“Huakina mai, kaua e horomi,” tana kī atu.
Ka whai a Ata i ngā tohutohu, ā, ka tau te wai ki tana waha. E rongo ana ia i te rongo rīwai
o te wai. Ka karawhiua te weka i te anga ki te papa, noho tau ana ki te uma o Ata.
“I tae tōmua mai koe ki te wāhi nei. Engari kua tae tau mai koe i ō kōwhiringa i taki mai i a koe ki konei. E whakaaro ana ētahi he heahea ō mahi.
E kite ana au i tō māia,” tā te weka.
“Tuwhaina ināianei.”
Ka āta whakarērea a Ata i te wai i tōna waha. “Ngā mihi, manu,” tana whakahua. E mātorutoru haere ana tana waha, ā, e whatungarongaro ana ngā pakitara o te whare ahakoa te paku mura o te ahi e toe ana. Tē rongo ia i te ngau o te mamae o ōna taotūtanga, o ōna uaua rānei. Ko te mea anake e rongo tonu ana ko te mahana o te weka i tana mātakitaki i ngā karu o Ata e kati haere ana. “Moe okioki,” tana whakahua.
ahuatanga
ahuatanga
Ko te ako tahi o te reo Māori: he haerenga reo, he haerenga aroha
Shay
McEwan | Te Aitanga-a-Mahaki, Te Whanau a Kai, Ngāti Pāhauwera
Ko te whakaako reo, ehara mō te kupu noa - engari ko tāna mahi he tuiui i tētahi hononga hōhonu ake ki te ahurea, ki te tuakiri, ki te anamata anō hoki. Ki a māua ko Tom, ko te reo Māori taua reo. I tīmataria hei pākiki noa, heoi kua titikaha te ngākau kia matatau te arero, e āngia ana e te hiahia ki te kōrero otirā e te moemoeā kia tukuna iho tēnei kurupounamu ki ā māua tamariki ā tōna wā.
He tāne Pākehā tōku hoa, a Tom, e mahi ana ia ki Whakamaru ā-ipurangi, ā, he wahine Māori au e ako ana i te Mātauranga me te Hītori. Kāore māua i tino mārama, i tino mōhio rānei ki te reo Māori nō māua e pakeke mai ana. Mōna, nā ōna rā i Ashhurst, i pērā ai—he tino Pākehā te āhua o te wāhi rā. Engari, mōku nei, he tipu ake nā tōku whānau i te wā kāhore i whakaaengia te kōrero Māori, koia rātou i kore ai e tuku iho i te reo, e whakamātau rānei ki te ako i muri iho.
I tīmata tō māua haerenga reo Māori me te hiahia kia tata ake au ki taku ahurea, ā, kia tautoko tōku hoa i a au me tōku haerenga. I tīmata māua ki ngā mihi māmā me ngā kīwaha—he paku “Kia ora!” me te “Kei te pēhea koe?” E hīkaka ana a Tom ki te ako, ki te hopu anō hoki i ngā kupu hou, nā tōna ngākaunui ki te reo i tahuna ai tōku ake.
Ka hōhonu ake tā māua ruku, ka kitea ngā taonga ahurea i roto i te reo. Mai i ngā tohu i roto i ngā whakataukī ki ngā tikanga rētō i tuituia i roto i te pepeha, kua kore te akoranga i tū noaiho hei ngohe wetereo, engari kē, i huri hei tūhuratanga o te tuakiri, o te noho huānga hoki. Nā tōna kanohi hōmiromiro i tere mau i a Tom ngā āhuatanga whāiti o te reo, me tana mōhio, ehara noa te reo i te reo kōrero, engari he kauwaka kē hei kawe i te mātauranga me ngā tikanga a tēnā reanga, a tēnā reanga.
I ekengia tēnei haerenga me ōna taupā. E whīwhiwhi ana te arero i te whakahua, E kanikani ana te wetereo
ki tōna ake manawataki, me te moana pīpipi o ngā kupu—katoa ēnei i tū hei wero kia whakamātauria tō māua manawanui. Kua mātātoa tā māua ako tahi, he haerenga tūhura—nāna i kaha ai tō māua hononga, nāna i hōhonu ake ai tō māua takohanga ki a māua anō, otirā ki tō māua anamata.
Ki te titiro whakamua, ka tukuna iho tō māua aroha me tō māua manawanui ki te reo Māori, ki ā māua tamariki. E moemoeā ana māua mō te rā, ka pānui māua ki a rātou i ngā pūrākau Māori, ka waiata i ngā waiata e pāoro ana i te wairua o te whenua, ā, ka tuku iho i ngā tikanga Māori. Ehara mō māua anake tēnei haerenga reo—engari mō te whakamana i te whakareretanga e honohono ana i ngā reanga o mua, o nāianei, o āpōpō anō hoki koia kē te take.
Kua whānui ake tāku whakaako i te reo ki a Tom, tēnā i te wetereo noa; kua whakaaturia te mana o te aroha, te pākiki, te aroha ki te ahurea anō hoki. Kei te tautokona tētahi reo e whakatinana ana i te manawaroa, i te tautetanga, i te tauutuutu anō hoki, tētahi reo e whakangako ai i a tātou me ō tātou hononga o tētahi ki tētahi, otirā ki tō tātou hapori.
I te mutunga iho, ko tō tātou haerenga ki te matataunga o te reo Māori, ko tētahi haerenga i runga i te wawata —mā te manawanui ki te kaupapa, ka whānau mai he whānau kōrero Māori, he whānau e mārama ana, e matatau ana ki te reo, ā tōna wā. Ko ia kupu hou ka ākona, ka whāia ko te pae tawhiti kia tata, kia tata ake ki te whakatinanatanga o te whakatipu tamariki e matatau ana ki te reo Māori, otirā e kawe ana i ngā uara me ngā tikanga e mana tonu ai tēnei taonga ā tātou, ko te reo.
Ka haere kōtui tātou i a tātou e eke tonu ana i tēnei waka reo - e ārahia ana e te aroha, e whakaohoohohia ana e te ahurea, ka mutu e tū kotahi ana i tō tātou manawanui ki te reo Māori.
ahuatanga
Kia Puāwai te Pā Harakeke
nā Harris Puanaki-Devon | Te Arawa Whānui, Tūwharetoa, Te Rohe
Pōtae, Te Awa Tupua, Ngāti Toa, Kāi Tahu
Tāne te wānanga
Nāu rā te karanga
Mā te hiringa i te mahara
E tūtuki ai
Engari i mahue
Atu nei rā ai e koe
Ko ngā whakawhiunga o wehe
A tauiwi e
Ka rewa ko ngā Toa
Te ope tauā o ngā hoa
Nāna te reo i ora
I puāwai ai
I hanga i ngā whare
O te mana motuhake
Te Huinga Rangatahi
E mihi nei e
Nō reira e ngā rahi
Hāpai ake ngā mahi
Kua whakatauirahia mai
E ngā iho pūmanawa
Tomo mai ki te whare
O mana, ō ākonga mate
Anei Te Huinga Tauira
E mihi nei e
Ka huri ki ngā Api, ngā Kapu, ngā Ruka, ngā Rangi
Te Ngoi o te manawa
Te Haenga o te marama
Te Ata-i-ngā-rangi-kaahu
Hei whakaRata i te Matiu
Kei ngāi wānanga
Tēnā koutou
Hutia te rito o te harakeke, kei whea te kōmako e kō? Kī mai ki ahau, he aha te mea nui o te ao? Māku e kī atu, he tangata, he tangata, he tangata.
Mai i te taura i hī i te Ika a Māui, ki ngā piupiu o ō tātou kaihaka, ki ngā pakitara tuitui o ō tātou wharenui, e tohutohu ana ō tātou pā harakeke i te mana nui o Ngāi Māori. Ko ngā rito ko ā tātou tamariki mokopuna, ko ngā awhi rito ko ō tātou mātua, ko ngā rau kaumātua ko ō tātou kui mā koro mā, ko ngā pakiaki ko tō tātou whakapapa.
He pakeke ake te pakiaka o tō tātou pā harakeke i ngā takahanga a ō tātou tīpuna, he roa ake te whakapapa o te pā harakeke i ō tātou uri whakaheke. Ko te mātauranga tuku iho i waenga i ngā rau o te pā harakeke hei tohu i tō tātou inanahi, ka mutu, me pēhea ki te haere whakamua.
Kua rū ngā whenua o te ao tōrangapū me te ao Māori i te tau nei, he maha ngā tinihanga kua pokapoka haere ki ō tātou hapori Māori, ki tō tātou pā harakeke. Engari, me kaha maumahara e Ngāi Māori kei tua ake mātou i tō mātou tāmi whenuatanga, i ngā whakawātanga me ngā tatauranga o iwi kē kua inaki i runga i a tātou.
Nā reira, he mea whakanui tēnei o te ao mātauranga Māori, he hokinga mahara ki ngā ara i whakatakotohia e ngā iho pūmanawa o Te Mana Ākonga me te mana o tā te pā harakeketanga.
Titiro whakamuri kia haere whakamua
Ko Te Mana Ākonga ko tētahi o ngā hua nā ngā momo porotēhi o ngā tau 1960, arā ko kōkiri mana wahine, mana Āwherika-Amerikana me whakamārietanga. Nā ēnei porotēhi i tini te ao whānui whai muri atu i ngā Pākanga Nui o te Ao. Kātahi anō ka tae mai i ēnei porotēhi ki Aotearoa.
Me tū ō tātou whare wānanga hei māngai kia arohaehae ai i te pāpori, engari, i tōna wā ko Ngāi Māori te take o aua arohaehaetanga. He raumei ngā whare wānanga me te ao mātauranga kia tāmai whenua, kia hōrapa whānui i ngā kōrero kaikiri, kia whakaū tonu i te mamaetanga o Ngāi Māori. Nā ngā whare wānanga ko ngā pānuitanga i kī he hāngū, he māngere, he haumate, he taitaiā Ngāi Māori. Engari, kāore i kitea e rātou ki ō mātou manawa tītī me, ō mātou ngākau māhaki, ō mātou ringa raupā; e kore mātou e mate wheke.
Kua ngaro haere te mana o te ao Pākehā i runga i a tātou, mai i te whakaurunga o Ngāi Māori ki te ao mātauranga. Koinei te orokohanga o te Pā Harakeke o Te Mana Ākonga.
Ko te waka hei hoehoenga mō koutou i muri i a ahau, ko te ture. Mā te ture anō te ture e āki.
Nā Te Kooti Arikirangi tēnei whakatauākī, he tohutohu hei whakamahi i ngā rauemi Pākehā me ngā rautaki Pākehā kia tautoko ai i ō mātou ake. I te kitea te mana o ēnei kupu e ō tātou tūpuna, i te wā i whawhai rātou mō te āheinga o ngā Māori kia kuhukuhu ki te ao mātauranga.
Ko te waiata ronogonui o Te Mana Ākonga, nā Tumuaki o mua Te Wehi Wright, e tuku mihi ana ki ngā momo iho pūmanawa o te ao Māori, pēnei i a Tā Apirana Ngata rātou ko Ruka Rangiāahuta Broughton, ko Kuini Te Atairangikaahu ko Matiu Rata.
Ko te waharoa ki te ao mātauranga hei tōna wā ko ngā kuratini, i te mea i whakarawea tētahi anō ara ki te ao mātauranga, atu i ngā whare wānanga. Ko te whakawhāititanga o ngā kuratini ko ngā mahi pūkenga, he ara pai mā ngā tauira Māori i hunuku mai ki ngā taone nui i te wā o nohonoho tāone, kia taunaki ai i te taiōhanga.
Hei te ekenga mai o Ngāi Māori mai i ngā kura tini ki ngā whare wānanga, i te kātia te mate haere o ngā tikanga Pākehā i te ao mātauranga. Nā ngā whawhai mō te ōritetanga o tātou katoa, i te hangaia rōpū Māori o te ao Mātauranga, pēnei i a Ngā Tamatoa rāua ko Te Hōhaieti o te reo Māori.
Kāore anō i roa kau iho i te whakatūria ngā rōpū tauira Māori o tēnā whare wānanga, o tēnā whare wānanga. Ko Te Rōpū Māori nō Te Whare Wānanga o Ōtākou rātou ko Te Akatoki nō te Whare Wānanga o Waitaha, ko Te Āwhioraki nō Te Whare Wānaka o Aoraki, ko Ngāi Tauira nō Te Whare Wānanga o Te Herenga Waka, ko Te Waiora nō Te Whare Wānanga o Waikato, ko Tītahi ki Tua nō Te Wānanga Aronui o Tāmaki Makau Rau, ko Ngā Tauira Māori nō Waipapa Taumata Rau, ko Te Tira Ahu Pae nō Te Kunenga ki Pūrehuroa.
I whawhai ō tātou tūpuna mō tētahi reo kāore rātou i kōrero, mō ētahi karaihe kāore rātou i kuraina, mō tātou ki te haere ki ngā whare wānanga i unu i a rātou. Kāore rātou i whiwhi i ngā hua mai i ngā rito i whakatōhia e rātou, kāore rātou i kite ki te puāwaitanga o tō rātou ake pā harakeke. Nā reira, he haerenga kore e mutu tō tātou whawhai mō tō tātou pā harakeke, kia tiaki ai i tōna puāwaitanga mō ngā reanga e whai mai nei i a mātou.
Ki te kāhore he whakakitenga ka ngaro te iwi.
I tīpakoa te mana o tētahi moemoeā ā-iwi e Kingi Tāwhiao, tō tātou Kingi Māori tuarua. Ka pērā ki ā tātou whāriki tuitui, e honohono kau ana i ngā whiri hei whakakotahi. Ko te moemoeā matua o Te Mana Ākonga ko te whakakorenga o ngā aukati o te ao mātauranga, te ngaro haere o te wetetāmitanga me te whakamanatanga o Te Tiriti o Waitangi.
I te otinga o te tau kua pahure ake nei, i tuku pātai mai i tētahi kaumātua ki a mātou: I ahatia ki te tauira Māori porotēhi?
I ahatia ki ngā hikoi mai i te Hiku o te Ika ki Paremata? I ahatia ki te hunga i kohi 30,000 ngā hainatanga? Kei te noho kiriora mātou i raro i ngā tikanga o te Pākehā.
Ko te pūtake o Te Mana Ākonga ko ngā porotēhi ā-hapori, nā reira, kia hōnore ai i tō mātou hītori, kua whakahokia ki ō mātou ake pakiaki: te porotēhi Māori. Kua tū tonu mātou hei kaitautoko o Te Tiriti o Waitangi, o Paratinia me tauira iwi taketake katoa o te ao. Kua whai mātou i ngā kaupapa e hāngai pū ana ki ngā nohonga o te tauira, kāinga koretanga, pira hikohoko hōteke me te pūtea tāpiri o ngā waka tūmatanui. E tino whakahē tonu ana mātou i ngā rauktaki kaikiri kua whakaputaina e te Kāwanatanga, e takahi ana ēnei rautaki i runga i tō tātou mana Māori motuhake.
Ko te kaupapa o Te Huinga Tauira i tēnei tau ko ‘Toitū Te Tauira Māori’. Ka tohutohu tēnei i te mana o ngāi
tauira Māori e kuhukuhu ana ki te pūnaha Pākehā ki te whāi mātaurangi, kia whakamāmā ake ai i te ara nei mō ngā ākonga o āpōpō - pērā i ō tātou tūpuna.
Mai rā anō kua warewaretia whānau Māori e te ao mātauranga, te āhua nei he mea pai mō`te katoa.
Ka riro ai ō tātou pā harakeke ō āpōpō i ngā pakiaka whanake whānui, ka ngaro haere te tauira Māori tuatahi o te whānau ki te whakapōtae.
Ko te whāinga mutunga o Te Mana Ākonga kia whakamoe. Te manako ia kua tae ō mātou tauira ki taumata kē, nā kōnā karekau he haepapa tā Te Mana Ākonga i te mea he ōrite te ao mātauranga.
Hei tētahi rā ka waipukehia ngā hōro o ngā whare wānanga e ngā tauira Māori, ka kore anō rātou e maumahara ki ngā uauatanga o ngā tauira o mua.
Ko tō rātou āwangawanga noa, ko tēhea tohu ko te mea tika mō rātou ake.
Toitū te reo Māori, toitū Te Tiriti o Waitangi, toitū te iwi Māori,
Ā, mō ake tonu atu, Me wātea a Paratinia
Kia tau iho te tōmairangi a te wāhi ngaro ki runga i a tātou katoa
Motukia Ngā Here:
Ko te whakawehenga teka o te “Māori” me te “Pasifika”
nā William Koko | Ngāti Kahungunu ki Heretaunga, Ngāiterangi, Kāi Tahu, Olosega, Sili, Taputimu
I te tau 1769, i Tūranganui-a-Kiwa, i tāmarutia ngā hautaonga tauhoko a te Pākehā nō te Endeavour e ngā tapa nui i hokona i Tahiti. E miramira ana tēnei mariu i ngā hononga mauroa puta noa i Te Moana-nui-a-Kiwa, tēna i te pakitūroa o te “tūtakinga tuatahi”. Nō ngā hapori e pāhekoheko ana ki a Tupaia rāua ko Cook, ka kūmea mai e rātou ngā kōrero o mua mō te hononga me te tauhokohoko. I tuhi a Cook mō te “matareka nui” ki te tapa; he āhuatanga hirahira ki a ia, engari kāore pea ia i mārama katoa.
Ahakoa ēnei hononga, kua roa nei ngā kōrero tātāmi me ngā kōrero o te motu i Aotearoa e whakatūranga ana i ngā tāngata Māori me ngā tāngata Pasifika hei rōpū motuhake. E whakamāmā ana tēnei ara i ngā āhuatanga matatini i kitea ai e Cook. Kua tae rānei te wā, me turaki mātou i ēnei aukatinga mārō, ka whakaae ai ehara noa mātou i te “Māori” i te “Pasifika” rānei?
I ahu mai te kupu ‘Māori’ i te takiwā tātāmi. Ko tētahi o ana whakamahinga tuatahi i te ao hou nei, e kitea ana i te rātaka a Kāpene Helmleman, he kaipatu tohorā ia i Akaroa, i whakamahi i ngā kupu ‘Mowries’ me ‘Mouries” kia whakamāramahia ngā mahi a te iwi mana whenua, a Kāi Tahu.
Nō ngā wā tata nei, ka hangaia e te Kāwanatanga o Aotearoa te kupu whānui, “Pasifika” kia whakaāhuatia ai te tupu o ngā hapori manuheke e whakakanohi ana i te hunga noho marara nō Te Moana-nui-a-Kiwa. Kua rite tonu tā Albert Wendt whakahua o te kōrero, kāore he “Pacific Islander” kia tae noa mai te tangata ki te tūnga waka rererangi ki Ākarana.
Kāore i tino mōhiotia ēnei kupu e rua ki te hunga e tapaina ana, ā, e pērā ana e tutuki ai ngā hiahia tātāmi o te Kāwanatanga. E whakamahi ana ō mātou
hapori i ēnei kupu e hangaia ai ngā tāhūrua kāhore i ora i mua, e tuhi ana i tētahi rārangi i waenga i ngā “whanaunga” puta noa i Te Moana-nui-a-Kiwa.
Ka tohua pea e te kupu “Māori” he tuakiri takitahi tēnei i ruia mai i Aotearoa anake, engari me mātua mahara, i ahu mai tēnei tātai i te hekeheke putuputu o ngā tīpuna mai i Hawaiki. I reira ngā waka i hahaua ai ka whakamānutia ai, kātahi ka whakaterehia i te nuku tawhiti o te moana, o ngā moutere maha anō hoki. Ko mātou ngā tāngata o te waka, e tāwhai ana i ō mātou tātai, i ā mātou kōrero puta noa i Te Moananui-a-Kiwa. Mā te mōhio ki te whānui o tēnei hītori, kaua e hōhonu ake ko tō mātou mārama anake ki tō mātou tuakiri, engari ka whakamānawatia hoki te hītori i Te Moana-nui-a-Kiwa.
E kitea ana tēnei momo tuituinga i tōku ake whānau. I hūnuku atu ōku kaumātua, ko Joseph Horomona rāua ko Emma Mitchell Koko (nō Ngāti Kahungunu) ki Tutuila noho ai. I nehua rāua i te taha o te kura, o ‘Marist Saint Francis Elementary’ i Leloaloa, i Hāmoa Amerikana. Nā konā, ka noho ngā reanga maha o tōku whānau Māori ki Hāmoa Amerikana, ā e haere tonu ana tā rātou nekeneke puta noa i Te Moananui-a-Kiwa.
Mai i te tirohanga arumoni hou, e haere tonu ana ngā tauhoko ōpāki i Te Moana-nui-a-Kiwa, ahakoa ngā taitapa mārō o ngā whenua hou. I te tuhinga ‘Sea of Islands’ ka toai te pūkenga, Epeli Hauofa i te kōrero mō tōna hoa mauroa nō Tonga e noho ana ki Berkeley. I ia torutoru marama, ka pau i a ia ngā mano tāra mō te kava i Whīti, ka hoko atu ai i Karapōnia. Ka mutu ka hari ia i ngā tīhate ki ngā tauira, ki ana whanaunga hoki i Tonga, kātahi ka hoki atu me te kaimoana mā tōna whānau.
Maramataka
nā Hemi Pinfold-Whanga (Ngāi Tūhoe, Waikato-Tainui)
Kia ora, nau mai ki tō mātou pānui mō te maramataka, hei te 16 o Mahuru 2024 i timata.
Tūrei: Turu
Mane: Atua Whakahaehae
Ah, Mane. He rā tēnei mō te whakatau wairua. He wawaenga te wairua o te rā. He rā pai tēnei hei tohutohu tō aroha ki a Papatūanuku. E hoa ma, Whakawhiti te kawhewhe mō te whakaaro mōhio.?
Hei te tūrei, kua piki te wairua. Kei te oho te Ao, ā ka kōwhiti te wairua teitei. He rā pai tēnei ki te whakaore te mangere. Kei te wharepukapuka, mahia ki ngā aromatawai, whakapiri ō hoa me ka haere koutou ki te korekore tinana rānei.
Wenerei: Te Rākaunui
Pai kare! Tēnei te wā o te Ōturu, He tino Nui te kaha tēnei rā. Ko te Wenerei kei konei hei āwhina I tō rama whiti. Mahia! Kei te wharepukapuka,korikori tinana, kia kaha te whakaputunga, he orite ki a Pere Wihongi kei te mahi kapahaka. Whakamahia te nuinga o Te Rākaunui.
Taite: Rākaumatohi
Ko te Taite hei piki ake te wairua. Whakamahia ki ngā aromatawai, timata ki tō rōpū nō ō moemoea, mahia te mahi māra rānei. E te whānau, nā te katoa o tēnei wairua kaha, ka hiahia koe ki te hīkoi haere ki runga ki a Maunga Wikitoria?
Paraire: Takirau
Ko te whakamutunga o te wiki, he mōwai, he wawaenga wairua. E te whānau, whakatā. Kimihia ō tino inu ā kia whakanuia te wiki i tū mai (kei Rezzies?), matakitaki mai ki Netefliki mō te kiriata i hiahia koe.
Chur!
Tēnā, tūkuna te hunga taiohi kia tohe, kia haka, kia puawai
I tū mai ngā whakataetae ā-motu Kapa Haka mō ngā Kura Tuarua, me te nui kē o ngā tohe tōrangapū i hakahaka, i pātere atu e wērā rangatahi.
Haruru pai te Whare Miere nā te pātere o ngā rangatahi ki Whakatū, ā, ko tētahi kaitōrangapū matua kua kakati e te wero o te hunga taiohi, ko Shane Jones.
Ko tōna, me waihō ko te ao tōrangapū ki te hunga pakeke, nā, tukuna ngā tamariki kia haka hei tamariki, kia kaua nōki ngā kaiako e pēhi ō rātou ake whakaaro ki ngā tamariki. Ā kāti, ko tāna, mēnā koinei te taumata o te Kapa Haka, he nui ake ngā hua a te AI pea mā te hunga kaiutu tāke.
Tuatahi rā, e mōhio pai ana te hunga taiohi ki te ao tōrangapū. Ko te kōrero rongonui a Hana-Rāwhiti Maipi-Clarke tērā mō te “reanga Kōhanga Reo,” ka tika, ko mātou kē tēnā. The Kōhanga Reo movement is inherently political as it is a response to te Reo Māori dying out due to Pākeha politics. Consequently, the seeds sown from that movement, the “Kōhanga Reo Generation,” are born, nurtured, and grown politically and thus, are aware from the womb of the struggle for Māori Liberation. Te piko o te māhuri, tērā te tupu o te rākau.
Waihoki, he takahi nui tēnei i te mana o te taiohi. We know that rangatahi are more than capable of understanding politics - history proves this. From the young students at Freyberg High School earlier this year, to the Ngā Tamatoa activist group, even back to the young Eruera Pare Hongi, the “scribe” of He Whakaputanga o te Rangatiratanga o Nu Tirene.
With young Māori genuinely being represented in Parliament by the likes of Hana-Rāwhiti Maipi-Clarke and Tamatha Paul, and in this day in age where everything is so accessible online, how could rangatahi not be engaged?
Anō hoki, ko te Ao Haka tētahi o ngā tino taonga e whakaatu ana i te ihi, te wehi, te mauri, me te mana o te Ao Māori. Ko ngā kaitito, ngā kaiako o te Ao Haka tērā e whakarīrā ana, ao te pō, pō te ao, mō ngā rangatahi te take - he ringa raupa, he pukumahi, he taonga nā te aroha e kore rawa e tāea ana te tārua e te AI. Ka pā atu ēnei taonga ki ngā take katoa mai i ngā rā ō mua ki ēnei rā tonu, nō reira ka tika koinei te wāhi papai kia tohe atu i ngā momo kaupapa e tāmi ana i te ao Māori. Kāore he wāhi tū atu mo te hunga rangatahi kia puāwai ā-tinana, ā-wairua, ā-hinengaro.
Ki a au nei, he tohu pai tēnei mo te puāwaitanga o tō tātou āpōpō. Kei te tahatū o te rangi tēnei ao hou mā te Ao Māori, nā, ko te hunga rangatahi, ko te Ao Haka tērā e kukume ana te pae tawhiti hei pae tata.
We are the seeds born from greatness, seeds our tūpuna fought to sow and nurture. I believe the path to a brighter āpōpō starts with our rangatahi being engaged in their own futures so that they may continue the fight for our future kākano - kei pīrau ngā pitomata, ngā kākano i ruia mai i Rangiātea.
Ko tāku, tēnā, tukuna ko te reo taiohi kia tohe, kia haka, kia puāwai.
Nā Taipari Taua, Te Whānau Moana, Te Rorohuri
He whakahoki ki tēnei kāwanatanga paru, me āna mahi koroniara.
Rosa Schooner-Hibbert | Te Arawa, Ngāti Whakaue, Ngāti Awa
“Ka whakanohoia ngā Atua ki taua ahi”.
Anā te ahi pūkākā kei roto i ahau. E takariri haere ana i ngā āhuatanga o te wā kua whakamāorihia. Ki te here te kotahi, ka here te katoa, koinā te hā o taku ahi. Ko taku ahi he ahi hohoro nō ngā kāwai whakapapa, e tatari ai kia tahuna te mura o te nekehanga mana motuhake.
Te māpura o te ahi.
He kaunoti ngā taitama i taku kura i whakaparahakotia te haka, “ban the haka, fuck the haka”.
He kaunoti te hūare i tuwhaina ki ngā whakaahua whakataukī nā mātou i whakairi ki ngā kāpata, nā ngā pae pāpāho pāpori ngā kaituwha i tautoko. I pōhēhē ahau koirā te whakaaro noa.
He kaunoti te reo Māori kore o aku kaiako tae noa atu ki taku tau whakamutunga.
I kite i a ia, kei raro e pūtu ana, Tamara, mauria mai i a mātou ki te whenua.
He kaunoti ngā kupu ā-tuhi, ā-waha. E kauhau ana ki ngā marea e aro atu ana. Mate ana i te kimikimi haere mō ngā tira whakaae, ngā tira tairite.
Nāku te pōhēhē, ehara ngā maharatanga kaingākau ngā kaunoti whakamura ahi anake, engari mā te whakarauora i ngā hononga, i ngā mātauranga, i tā tātou Māoritanga, ka toitū te ahi.
ahurea
Ka Whawhai Tonu
nā Keiha Nicol
I rangona whānuitia ēnei kupu e te whenua mōhū i te akitu o te pakanga rongonui o Ōrākau, te hiku o Ngā Riri ki Waikato…Ēnei kupu rongonui, a tā te rangatira Rewi Maniapoto, ko te nako o te kiriata nei i tau ki te whakahoki i a tātou ki taua wā taurekareka.
1864, te tau whakamutunga o te horo ki Waikato a te Colonial Government me te British Crown, i raupatuhia ērā o ngā iwi o te Kīngitanga o te rohe o Waikato. Mutu ana ētahi putakari, ko ngā morehu o Waikato i honoa atu e ngā toa o Ngāi Tūhoe me Ngāti Raukawa e pūmau tonu ana te whakamīrei ā rātou ki tētahi ope hoariri nui rawa atu te rahi tō rātou ake ope taua. E mōhiotia whānuitia ana i ēnei rā te tū ki Ōrākau ko te tūnga whakamutunga a Rewi. Koia nei te horopaki o te kiriata i tāraia e te Māori, i Te Reo Māori, hei whakamaharatanga ki te hītori a te Māori.
Mai i te tīmatanga, i mīharo katoa ahau ki te reo maori, ki te kākāhu, ki te huhua hoki o te mataora i te papa whakaata. Nā te reo, ngā tāngata, me te takiwā i tōia ai au ki ngā maioro keri i Ōrākau, koia nei te takiwā matua o te kiriata. Ko tā ēnei he whakatau i te horopaki mō ngā pakanga me te pupuke haere o te āmaimai ki Ōrākau ka pau i a rātou te hāmanu me te wai. Katoa ngā āhuatanga o tēnei kiriata i whakaatu i te hōhonu me te kanorau o ngā tāngata e whawhai tonu ana mō tā rātou tino rangatiratanga me ō rātou whenua.
Ehara i te mea i kōrerohia te riri ki Ōrākau anake, engari i āpiti āhuatanga kē atu e rongo ai tātou i te wairua o te wā. I te rito o te kiriata ngā tamariki i whakauru ki te katoa o ngā mahi mai i te whakaritenga o ngā kariri, ki ngā karakia, ki te whawhai anō hoki. Ka whai hononga i a rāua, nā ngā
kōrerorero ā rāua ki te wahine rangatira a Turama rāua ko Rewi i mahara ai au ki tā ngā tamariki me ā rātou whaea, me ā rātou kaumātua, ā, ka pīroiroi hoki ētahi o ō rāua hononga ā-whānau. Engari, ō ngā hononga katoa ki tēnei kiriata, ko te whakahoahoa i tīrama marika mai, e whakatau mai nei te tūmanako me tētahi āhuatanga motuhake ki te kiriata. Nā ngā tamariki hei kiripuaki matua ki a au i panoni ai te aronga matua mai i te whawhai ki te tangata, i kaha tonu taku whakaaweawe atu ki a rāua puta noa i te kiriata. (Kia tūpato)! Otirā, ko tā tēnei tokorua me ō rāua hoa he whakakanohi i ngā tira hou e haere mai nei, e whawhai tonu nei, e ātete tonu nei.
Ki a au nei, ehara i te mea he whakamāramatanga noa iho o te hītori raupatu o ēnei wā, engari hoki he whakamōhiotanga o te whawhai mō tō tātou tino rangatiratanga, tō tātou mana motuhake, me tō tātou māoritanga. Ko tā te riri me te parekura ā rātou i Ōrākau he whakaatu i te whakatumatuma a ō tātou tīpuna, otirā te aroha ā rātou ki a rātou anō. Ehara i te mea he mate wheke noa, engari ngā kiripuaki matua i ngana kia tika te kawe o ngā whawhai. Ka whai tikanga tonu aua mate raupatu, engari ngā ringa o te tāmitanga kua panoni mai i te mau pū me ngā taiaha, ki te mau pene me ngā kirimana. Matatū tonu ana i a mātou ēnei kirimana e ruia ana i to tātou reo me tō tātou tino rangatiratanga, e whakahāwea ana i ō tātou whenua me ō tātou awa. Ko te takune mō ēnei kirimana he mea huna e te mana kāwanatanga me te mana tōrangapū, engari pēra i ō tātou tīpuna, ko tātou hoki he tāwariwari, he aumangea. Mā te tiro whakamuri noa ki ō tātou tīpuna e kite ai ngā whakaatu pērā ki te tono i whakatakotohia e Rewi i Ōrākau: “Ka whawhai tonu mātou, Āke! Āke! Āke!”
Nei au ka noho ki te māhau o tōku whare o te Tumu Herenga Waka.
Ko wai rā, ko wai rā te tipuna kei runga ko Kupe. Uhia mai ki roto ngā tipuna nō ngā hau e wha o Ngāi tātou.
Ka hoki mahara ki ngā ra o Ruka rāua ko Pāka, nā rāua i para te huarahi ma mātou, hei whai kainga rua ki roto i tēnei ao hurihuri, kia mau ki ngā rākau a te Pākehā he hoa hāere mō te iwi māori. Koinei te tāhuhu whakairo mō ngā waka tauira kua ū ki ngā one haumako o Te Herenga Waka marae.
kaupapa o te huinga tauira i te mea ka kitea inaianei, he kaupapa whakakotahi i ngā tauira Māori kei ngā whare wānanga. He mahi tautohetohe, he mahi kapa haka, he mahi hākinakina ka mutu he whakawhiti whakaaro me te wānanga i ngā take nui o te ao Māori e puta ai te ihu o te iwi. Ko te reo Māori tētahi kaupapa kei te pane o ngā ngutu.
Nā whai anō ka hua ake tēnei kaupapa o te Salient. He maheni reo Māori e whakatairanga ana i ngā kaupapa whānui mā te reo Māori hei pānuitanga mā te ao. Kia horapa, kia māhorahora te reo.
I te tau 1965 i timata te rōpu o Ngai Tauira. I taua wā ko te ingoa ko te karapu Māori. I puta te whakaaro ki te whakatū rōpū motuhake i te huinga tauira i tu ki Tamaki i te tau 1955. Kāore i tino tawhiti rawa te
Nō reira e te tī, e te tā nau mai, ruku mai i ngā wai hora kai o Ngāi Tauira. Whitiki!
Mind Your Tongue!
He kaha tā tātou whakaaro ake ki te ako i te reo Māori, engari tēnei mea te ako – he wāhi kotahi noa iho tērā o te huhua o ngā kaupapa me whakatutuki e ora ai te reo Māori o te tangata.
I tua atu i te ako, me mahi te tangata e tahuri ai te reo o ōna rā, kia mimiti ai te kōrerotia o te reo Pākehā, kia tīkina atu ko te reo Māori hei kawe i ngā mahi o ia rā, o ia rā. Me pēhea kē hoki e taea ai te pērā? Ko te haere ki te karaihe te whakahoki i te reo Māori ki te pene, āe rānei mā te karaihe e whakahoki te reo Māori ki te arero?
Tahuri mai ki tētahi kaupapa hou nei ko Mind Your Tongue! te ingoa. He kaupapa i whakaarahia ake e Vini Olsen-Reeder hei āwhina i te tangata kia tahuri ngā tikanga reo o te kāinga. Nau mai a tini, a mano, ki tēnei kaupapa e whakahoki nei i te reo Māori ki te mata o te arero! tinyurl.com/Mind-Your-Tongue @mind.yourtongue on insta
Ko wai mātou:
Ko Ngā Rangahautira te rōpū mō ngā tauira Māori o te ture ki Te Herenga Waka. Ko tā Te Kooti Arikirangi kōrero e ārahi nei i a mātou, 'mā te ture anō te ture e āki”. Ko te whāinga matua o Ngā Rangahautira, ko te poipoi, me te raupī i ngā tauira Māori o Te Kauhanganui Tātai Ture ki Te Herenga Waka. Ka tutuki ēnei whāinga mā te whakaoho, me te whakaara mai anō i ngā tikanga a kui mā, a koro mā e noho muna ana ki roto i wā tātou tauira mohoa nei. Ko te manako ia, mā ēnei tikanga te rangatiratanga o te tauira e whitawhita mai anō, ā, kawea ai ērā pūmanawa me ērā āhuatanga puta noa ki ngāi Māori whānui, te haere ake nei.
Kei ngā mana, kei ngā reo, kei ngā ihorei o Te Ao Māori, tēnā tātau katoa!
Nō te tau 2006 whakarewahia ai a Ngā Taura Umanga hei whakatenatena, hei tautoko, hei hāpai/taunaki hoki i ngā hiahia o ngā tauira Māori e whai ana i ngā pepa tauhokohoko – kao, ehara i te mea me mahi koe i te BCOM e whai wāhi ai koe ki a NTU :)
I ōna wa i whakarite mātou i ngā kaupapa tūmatanui me ngā kaupapa ringa ngaio hei tautoko i ngā tauira i tōna wā ki Te Herenga Waka, ka mutu hei whakareri i a rātou mō te ao mahi. Kua tae atu mātou ki Ngā Kaitatau Māori o Aotearoa (The National Māori Accountants Network) kua whakatūria ngā wānanga mahi, ngā karaihe reo māori, ngā awheawhe tātai pūmanawa, otirā tā mātou kaupapa taiea nei ko Tātai Hono. He pō mātanga whakangahau a Tātai Hono kī ana i te kai, te inu me ngā kōrero whakaihiihi e whai wāhi ai te tauira te hono atu me te whakarongo ki ngā mātanga Māori nō ngā umanga maha e kōrerorero nei i ā rātou wheako o te kaipākihi Māori.
I ngā tau tata kua pahemo, e āhua moe nei tā mātou rōpū, e kore e tino kitea te tauira e whakapā mai ana. Nā te hiranga o ngā tōpūtanga Māori katoa ki Te Herenga Waka me te hitori huarau o te orokohanga mai o ēnei rōpū, he hiahia nā mātou kia tahuna anō te matataua nei ko Ngā Taura Umanga, hei kaitaunaki tonu i ngā tauira māori o te kura tauhokohoko. Hono mai ki ta mātou pae papori mena koe e pirangi ana ki te whakapiri ki te NTU hou nei. Kaore e roa e tuku ai ngā taipitopito pānui mō te hono mai ki a mātou, mo te tū rānei hei mema o te kōmiti whakahaere! kia mau tonu mai!
Whakapā mai:
Pukamata (Facebook): Ngā Taura UmangaVUW Māori Commerce Student's Association
Īmēra (Email): ngatauraumanga@gmail.com
Nāku noa
NGĀ TAURA UMANGA
Te Herenga Waka
I te tau 1969 i whakaritea ngā tauira o Te Whare Wānanga o Wikitōria he rōpū e tautoko ana, e whakawhanake ana i te reo Māori ki te whare wānanga, ā, ko Te Reo Māori Society tērā.
I te takiwā o te tau 1971, ka puta te kōrero a te kaumātua o te Kotahitanga a te Ouenuku (Joe) Rene o Ngāti Toa Rangatira, mō te reo ki āna tauira. He kaumātua ngākau nui ana ki te reo Māori o Te Whare Wānanga o Wikitōria, ka wero atu ia ki ngā tauira.
“E tama mā, e hine mā. Tērā te atua e pātai mai ki a koutou, I pēwhea e koutou te reo rangatira i hoatungia nā e au, ki a koutou”
E ai ki a Te Kapunga Dewes, nō muri mai i tō rātou rangona i te wero, ka heke te werawera i āna tauira kia tū pakari te rōpū o Te Reo Māori Society, te rōpū ā-motu rongonui. Ko ngā tauira o Te Whare Wānanga o Wikitōria ngā kaiwhakahaere, ā, ma rātou te kaupapa nei e whanake. Ka noho te kōmiti hei matakahi mō ngā kōkiritanga kia ākona whānuitia, kia puritia, kia whakamanaia hoki te reo Māori i ngā tauira o te whare wānanga me te motu whānui.
I te tau 1972, ka hui tahi Te Reo Māori Society me Ngā Tamatoa, ngā ropū reo Māori o Te Whare Wānanga o Wikitōria me Te Whare Wānanga o Tāmaki Makaurau ki te wānanga mō te reo Māori ki ngā kura. I te marama o Mahuru ka whakatakoto te petihana ki te whare paremata kia whakamanatia te reo Māori ki ngā kura. Ka neke atu i te 30,000 ngā ingoa i haina i te petihana.
Te Mana Ākonga
Kei ngā tini whenuwhenu, kei ngā aho manomano, kei te kāhuinga waka, nei mātou ko Te Mana Ākonga e tuku reo hihiri atu ki a koutou katoa.
Ko Te Mana Ākonga ko te rōpū tauira Māori ā-motu e tū ana hei māngai mō ngā hiahia me ngā wawata o ō mātou ake tauira kei tēnā whare wānanga, kei tēnā whare wānanga.
Ko ngā uara tuku iho o Te Mana Ākonga ko mana whakapapa, rangatiratanga, hiranga, tauutuutu, aroha, kanorau me mana ākonga. Ka ārahina mātou i runga i te ara tika e ngā uara nei.
Ka tūtaki mātou ki ngā momo poutokomanawa o te ao mātauranga, pēnei ko Te Kāwanatanga rātou ko Te Tāhuhu o te Mātauranga, ko NZQA, ko Hato Akoranga me ētahi atu.
Anō, ka whakamaheretia e mātou ngā Hui Kaiārahi - he hui hei whakakotahi i ngā tumuaki nō tēnā nō tēnā kia wānanga ai. Whaihoki anō, ka whakatūhia e mātou te hui ā-motu ko Te Huinga Tauira.
Mēnā he pātai, tuku īmera mai ki tumuaki@temanaakonga.org.nz
Nā mātou, me ngā mihi mākoha o te wā, Te Mana Ākonga
O NGĀ TOI
Whakakanohi
Hemaima Keane
Poipoia te kākano, kia puawai’
I kōwhiri mātou i tēnei whakataukī ki te whakahōnore me te whakanui i te tūwheratanga o te Pā i te mutunga o te tau. He tohu anō hoki i te tini o ngā reanga tauira Māori i ihu oneone, i manawanui ki te kaupapa i hua ai ko Te Kawa a Māui, me Ngāi Tauira, me Te Hōhaieiti o te Reo Māori, me Ngā Rangahautira, me te Pā hoki. Nō mai anō te hononga ki Te Herenga Waka, ā ko te kākano o te tuakiri o Te Tumu Herenga Waka ka poipoia ka whakanakehia tonutia e tātou katoa kia tipu mātoro tōna tipu.
Whārangi 15
Marama Salsano
Toi Māori
Taramainuku
Ko Marama Salsano ahau. He uri tēnei nō te whānau Ākuhata ki Ruatoki, rātou ko te whānau Ruru ki Te Karaka ki Te Tairāwhiti, ko te whānau Tautau ki Mangatuna ki te Tairāwhiti, te whānau Ngahiwi/Pene ki Hukanui. Ngāi Tuhoe, Te Aitanga-a-Māhaki, Ngāti Porou, Ngāti Wairere ki Waikato ngā iwi. Ki au ko te kaupapa o “poipoia te kākano kia puāwai” he mea e tōiri ai te mahara ki te titiro ki te taiao, ka mutu ki te poipoi hoki i ngā kākāno hīranga tuku iho, ka uaua te mau i te wā o te pouri. Ki te titiro anō ki te rangi, ko te kāhui whetū o Taramainuku, Te Waka o Rangi, me te kupenga a Taramainuku ērā hei tohu whakamaumahara kia anga whakamua. Ka whānau mai te tangata me ngā kākano hīranga, ā ka tae mai te wā kia whakatere te wairua ki te kupenga o Taramainuku, ki te tūtaki atu ki te kuia ki a Hine – nui – te – po, kia marara hei whetū ki te uma o Ranginui, ko ngā kānorau, ko ngā matarau o te kākano hiranga ka puawai, ka pīata tonu i te rangi, i ngā mokopuna hoki. Ko ēnei mahinga toi e rua, he pōhewa i te huarahi o Te Waka o Rangi i a ia e kohi ana i a ngā tipuna, i mua i tōna whakawhetūrangitia ki a Ranginui. Hei tohu anō i te ahunga mai me te hurihanga mataora o te oranga ā te mana whenua ki Aotearoa nei. Ko te upoko whakairo māwhero me te waiporoporo hei tohu i a Taramainuku i a ia e moe pohewa ana - I ētahi wā e moemoeā pōurirui ana mō ngā taupuhi, e moemoeā wawau ana, e hīanga ana, ā i ētahi wā he karere nō tua whakarere. He tohu te upoko whakairo kanorau o Taramainuku i ngā kara o te whenua, te rangi, me te moana i te atatū - i te wā ka whiti mai te rā i te pōuri hei tohu i te rā hou, tīmatanga hōu, ngā awhero mō te anamata, me te mōhio ahakoa kua mate ngā taupuhi, ka ora pai mātou.
Waenganui
Te Huihui o Matariki
Toi Māori
Whārangi 23
Amiria-Rose Monga
Toi Māori
Ko Amiria-Rose Monga tōku ingoa. He uri tēnei nō Ngāti Whātua, Te Uri o Hau, me ngā Kuki Āirani hoki. I tipu ahau ki Tāmaki-Makaurau, engari, ka haere mai ki Te Whānganui-ā-Tara kia ako ki Te Herenga Waka.
At the mention of nurturing a seed, these images sprang to mind: a tree planted by water and a mustard seed. The Bible is not short of references to seeds, crops, and messages about how their circumstances impact their growth. This artwork is inspired by the Parable of the Sower, Matthew 13:1-23, where a farmer plants seeds in four different types of soil, growing in four different ways. Seeds fell along the path, and others fell on rocky places with shallow soil, some fell among thorns, and others on good soil. This story emphasises the importance of having a good foundation. The seed here is God’s Word.
Whārangi 28
Terran Philippi
Toi Māori
Ko Tainui te waka
Ko Moketapu te maunga
Ko Raukawakawa te moana
Ko Whakatū te marae
Nō Te Whanganui-a-Tara au
Ko te pūtake o tēnei mahinga toi ko te whakatauira i ngā hīraunga ka pā ki te tangata i whakatipuria ki ngā tikanga maha.
I whānau mai au ki Te Whanganui-a-Tara, ā he kāwai whakapapa Māori, Pākeha, Tiamana ōku. Ki au nei, otirā ki ētahi atu tangata, he tino uaua te kimi i te wāhanga taurite. I koha mai tōku Whaea kēkē , ā Tracy Pātete i te matau kia au, ā hei tohu i au me taku haerenga. Ko Terran Pātete Philippi ahau.
Generation Kāinga:
Ngā rangatahi e hanga ana i tētahi Aotearoa haumanu, manawaroa hoki
Rosa HibbeRt-scHooneR | te aRawa, ngāti wHakaue, ngāti awa
Ko tā Te Mana Ākonga whakakitenga, he rūnanga mātauranga matua tāmi kore, e whakatinanahia ai ngā wawata o ngā ākonga Māori, o ngā whānau, o ngā hapū, o ngā iwi anōhoki. E whakapono ana mātou, mā te mahi ngātahi, te tūtohetohe, te mahi tahi ki a Ngāi Māori, me te whakaū ki ngā mātāpono; Rangatiratanga, Mana whakapapa, Hiranga, Tāuutuutu, Mana Ākonga, Aroha me te Kanorau, kei a mātou ngā otinga pai mō tēnei take.
Nōnā tata nei, i tū tētahi o ā mātou wānanga hauwhā ā-tau, Ngā Hui Kaiārahi, ā, nō mātou te honore ki te whakahaere i a Pūrangakura hei tā tō mātou pātuinga ki Generation Kāinga i Ōtepoti, 30 Hune - 2 Hurae.
He whare motuhake mō te rangahau Kaupapa Māori a Pūrangakura, e ārahina ana e ngā Rangatira. “Ko tā mātou mahi, he whakarato rangahau, he tautoko hoki i ngā mahi whakahaumako i tō mātou tuakiri me tō mātou oranga hei Māori - te tiaki me te poipoi i ā mātou taonga kia tautoko i te oranga tuku iho mō Aotearoa. Ko tā ā mātou mahi he whai huringa mō ō mātou hapori e whakaponotia nei e mātou, mā rātou te hurihanga nui kē atu e taki.”
Ko Generation Kāinga, arā he hoa pātui o Te Mana Ākonga, he rangahau mō ngā rangatahi e hanga ana i tētahi Aotearoa haumanu, manawaroa hoki. Tā tō mātou whakakitenga aronga, he āki i ngā rangatahi e huri ai te anamata o ngā kāinga, mā ngā tukanga taketake o te pōhewatanga, te manawaroa me te haumanutanga kia kīa ai ko Aotearoa ‘te tino wāhi o te ao,’ hei wāhi noho mō ngā rangatahi me ō rātou whānau.
Ko te wharenoho ākonga tētahi nawe kei mua i te aroaro mō Te Mana Ākonga, inā noa atu i tētahi kāwanatanga e whakarawe ana i ngā kaituku rīhi me te tokoiti whai rawa. Nō matou i whakauwhi i a Generation Kāinga i tō mātou wānanga, taea e mātou ngā raru e hāngai ana ki te wharenoho ākonga te waha. I peka atu mātou ki ētahi wharenoho ākonga, ā, i whakaatu atu ki te tīma rangahau i te ao e nōhia nei e rātou.
He wā ōna ka rangona e ngā tauira te whiwhi painga o te noho ki tētahi o ngā tini rōpū hoa pātui rangatahi o tēnei rangahau. Te whai wāhi ki te mātauranga, me pēhea e rangona ai tō mātou nei reo, me pēhea hoki e ūpokotia ai e mātou te panoni me uaua rā ka tohaina ki te hunga kua whakaparahakotia ki ngā horopaki pēnei tonu. Whai muri i tēnei wānanga, kua waiho ki a mātou
te whakaaro, ko te nuinga o mātou ngā tauira e noho manuhiri ana ki ngā kāinga tipu o ngā tipuna o tāngata kē, ā, tā mātou tiaki i tēnei whenua mahue ai he whenua pai ake i tō mātou ake whenua. Kua waiho hoki ki ō mātou tauira he maharatanga whaitake, ko mātou rawa te hunga ki roto i ō mātou ake hapori e whai wāhi ai ki te reo, ki te whakaaro me te mātauranga hei para i te ara hou. Me pēhea tātou e toro atu ai he ringa hāpai ki te iwi kua tūkinotia, ki tō tātou iwi, me ngā whānau taketake puta noa?
Hei whakakapi, anei ētahi whakaaro matua i puta i tēnei wānanga:
I ākina te hautūtanga rangatahi e te whanaketanga o Te Mana Ākonga, engari hoki, e te tautoko me te whakapono o ō mātou pakeke kia mahi i tā mātou e pai ai.
Nā te mihimihi a ngā rangatahi, ka mate ngā pakeke ki te mahi i ngā mahi kāore pea i maharatia tōna ngahau, pēnei i ngā riff offs, te kanikani me te katakata, te mahi haka anō hoki.
Ngā ara ako i ngā haerenga tāpoi, te pōuritanga me te arotake i te āhua o ngā wharenoho ākonga, ā, te maumahara hoki ki ngā whanaunga kua riro atu
I waha i ngā rangatahi tā rātou i pono ai, ā, i kitea mātou e ngā pakeke. He ātaahua te rongo i ngā urupare ki tō mātou kaupapa, engari ko te mutunga kē mai o te ātaahua, ko te hautūtanga o ngā tēina.
Ko te āhua o te kāingakoretanga o te rangatahi Māori i Aotearoa nei, tētahi o ngā āhuatanga kino rawa atu o te ao.
Tōna 30,000 ngā rangatahi e noho kāingakore ana ki Tāmaki Makaurau. He whiringa tēnei rangahau kia taea ai e ngā rangatahi te whai reo ki ngā mahi, ā, haere ake nei. Ko te mea nui kia rangona ngā reo katoa mai i ngā wheako me ngā hapori katoa.
Me wānanga ka pēhea tātou e whai wāhi atu ki ngā rangatahi paraheahea ake nei, ā, ka pēhea tātou e whakamahi i ō tātou whiwhi painga mehemea e whakapono ana tātou ki tēnei anamata tāmi kore mō Aotearoa.
Te Wiki o te Reo Māori:
Ngā huritao o te hiranga whaiaro
E hia kē nei ngā take hei whakaraupapa māku mō te hiranga o Te Wiki o Te Reo Māori. Ka taea e au te tuhi mō te whānako i te kōrerohanga herekore o tō tātou reo i ō tātou tūpuna, e pēhea ai aua waiaro e whakatinanahia ana ki tā ngā kupu me ngā mahi a te hunga whai mana i ēnei rā. Ka taea e au te kōrero mō te pakanga whakarauora - te Kōhanga Reo, te tohe i te kīanga kia ora, te kerēme o te Taraipiunara o Waitangi i mana ai te reo Māori hei reo whaimana e ai ki te Ture Reo Māori i te tau 1987, te hiranga rānei o tēnei wiki ki te kāinga o te makaheni e pānui nei koe. Me te aha rā, nā Ngā Tamatoa, Te Rōpū Reo Māori ki Wikitōria me te rōpū Tauira Māori o Aotearoa i whakatakato ngā waitohu, neke atu i te 30,000 ki Pāremata, i hua mai ai Te Rā o te Reo Māori (14 o Hepetema). Katoa ēnei he take noa - me mōhio kē e koe, engari i tēnei pūrongo ka aro ki ngā take whaiaro.
Ko taku tūpuna tētahi o te tini i ngaro i a ia te reo i te aupēhi i ngā kura e noho mātāmua ai te reo Ingarihi. Nā konā i aukati tā tōku kuia ako, kātahi ko taku papa, nāwai rā ko māua ko taku teina. Ehara noa i te ngarohanga mātauranga i aukati ai tā tōku tūpuna tuku iho i tō tātou reo, engari hoki ko te mataku ki te parahako ā-porihanga me te hiahia kia tiaki i tō mātou whānau i ngā mahi kaikiri me ngā mahi kino. Nō kōnei hoki i ngaro ai i a mātou te hononga kaha ki ō mātou marae, ki ō mātou iwi anō hoki i te whākorekore o te tuakiri me te whākorekore o tōku mana tūpuna ki te kōrero me te pupuri ki tēnei taonga.
Mehemea ka tipu rāwaho koe i te ao Māori, ka manene rānei i tēnā wāhanga o tō tuakiri, ka rongo pea i te tamōtanga. Nō reira kia tae mai tētahi mea e hono ai koe ki tēnā, ka rongo i te pai, ahakoa ehara i te pūāhua papai, i te tirohanga pākehā rānei. Ko Te Wiki o te
Reo Māori, te Kapa Haka, me te haerenga marae pea tētahi o ngā mea Māori tuatahi ka whakaatu ki ngā tamariki tipu rāwaho ai i te ao Māori, ehara pea i te tino tuatahitanga engari he hiranga tōna ki tēnei mea e kīia ai te reanga mahue.
Mōku ake, ko te Kapa Haka te kūaha tuatahi i te kura tuatahi, engari ko Te Wiki o Te Reo Māori tētahi o ngā kaupapa i ārahina e au nōku i pakeke rawa kia whakamiha, he tuatahitanga tēnei mōku kia hoihoi, kia whakahīhī hoki i taku Māoritanga. Kua titia te reo Māori me tōna whakarauoratanga ki tōku ngākau, ā, ki tō ngā ngākau o te marea. Ahakoa taku tōmina kua kore i tango i te tuatahi, kua ora te ngākau i te whakakotahitanga mai o te iwi kia ora tonu ai te reo. Koirā te take he hirahira tēnei ki ahau.
He whakanuinga Te Wiki o te Reo Māori i tētahi taonga mai i te tau 1972, nō mua mai i te whakamana o te reo Māori hei reo whai mana ki Aotearoa. He mea hirahira ki a au
kia mihia tēnei hei kokenga whakarauora, otirā te hunga i whai wāhi ki tōna hanganga mai, me pēnei hoki tāu. Ahakoa kei te kōrero rawatia Te Wiki o te reo Māori e au i tēnei pūrongo, he wāhanga noa o tētahi kaupapa whānui ake, me mihi ka tika, me te hunga i pakanga kia hoki tō tātou taonga ki a tātou ka tika. Whatungarongaro te tangata, toitū te whenua.
I te tau 2024, ka tū Te Wiki o Te Reo Māori mai i te 14 ki te 21 o Hepetema - koia ko tēnei wiki tonu! Ko te huarahi māmā ki te whakanui ko te kōrero Māori! (Ko te painga atu, kōrero i te ao, i te pō).
asHleigH Putt-Fallows | ngāti wHātua, ngāPuHi-ngāti Hine, tūHoe
Mō te āpōpō
Tēnā koutou e te hunga kaipānui,
Tau atu taku manu ki runga i te pinakinakitanga o maunga Tawhitirahi
Tau ana te titiro ki ngā au moana, ki ngā mau o te whenua, ki ngā ara tawhito i ahu mai ai ngā tūpuna
U ana ai te waka o Kurahaupo
Tere whakarunga i nga wai rere o Te Awapoka
Whatiwhati o parirau ki Pukemarama
Tauhokai iho ki Te Kao
Tatu atu ra ki Potahi e āhuru ai te iwi o Te Aupōuri I ōna pārae, ōna māniania, ōna awaawa, ōna maunga
Tāhorahora ana te huanui hei hīkoi mā tātou
Kei runga ko te whetū hei arataki
Kei raro ko te tapuwae hei whai
Pātōtō ana te manawa kia whiwhi
Ka puta ka ora, ki te whaiao ki Te Ao-Mārama!
‘Poipoia te kākano, kia puāwai,’ he whakataukī e whakapūmau ana te motuhaketanga o te taute, o te tiaki i te kākano, kia puāwai, kia hua. He tikanga tēnei kua toitū pūmau i roto i te ao Māori mā te kaitiakitanga me te whānaungatanga.
I te tau 2020, i whakaputa te Manatū Whakahiato Ora i tētahi ripoata, “Poipoia te kākano kia puawai: Family structure, family change and the wellbeing of tamariki Māori.” I tūhono tā rātou whakamahi i te whakataukī ki te taurikuratanga o ā tātou tamariki.
Hei tā te ripoata, he hononga tā te rerekētanga o ngā ara whānau ki te hauwarea o ngā hua ā-hinengaro, ngā hua o te whakawhānaungatanga nōki. Hoino, ehara tēnei mea te take matua mō ēnei hua hauwarea. Ko te mea nui, he hononga tā te taha ahurea o te tamaiti ki te whakatairanga i whanaketanga o te whakawhānaungatanga o te tamaiti.
I marohitia e ngā kaituhi o te ripoata te uara, te hiranga o te “rangahau me te āta wehewehe i ngā hononga o te whānau me te oranga o te tamaiti
Māori, i te mea tērā pea he nui ngā momo āhuatanga rerekē mo te oranga o te tamaiti e hira ana mā te Māori, he mea kua warea pea i ngā wā kāore mātou e hangāia kaupapa here e arahi ana e te Māori, e aro ana ki te Māori.”
Kua kūare ake nei te hangāia kaupapa here kua arahi, kua aro ki te Māori, anō, e te Kāwanatanga nā ngā panonitanga ki te wāhanga 7aa o te Ture Oranga Tamariki 1989. E mataku ana au mo ngā kawenga o tēnei ture ki ā tātou tamariki e kore ā muri e hokia. E mōhio ana au, kua rite te nuinga o koutou ngā kaipānui ki ēnei whakaaro, ki ēnei āwangawanga mō te takahi o ēnei panonitanga i te Tiriti o Waitangi me ōna uaratanga. Nā ngā whakaputanga o te Census, e mōhio ana tātou, tōna 904,100 te taupori o te iwi Māori. Nā te taiohi, nā te tere o te tupu o te iwi Māori, ko nāianei te wā tika kia tiekina ō tātou tamariki. E ai ki ngā kupu a te māreikura a Whina Cooper, “Tiekina o tātou tamariki. Tiekina ngā mea e rangona, e kitea ai e rātou. Ko te tupuranga o te tamaiti, tērā te tupu o Aotearoa.” Koinei te wā kia tū tātou hei kotahi.
Nā tōku whakatupuranga whāmaomao i ōku whenua, kua ngaro te reo i tētahi reanga ō tōku whānau, kua ngaro te nui o ngā momo hononga ki te Ao Māori, me te kore āheinga mo tō rātou Māoritanga te puāwai. Ehara tēnei i te āpōpō e hia ana au mā āku tamariki, mā āku mokopuna, nō reira, me tūhono anō au ki tō mātou Te Aupōuritanga. Mō tātou, ā, mō ngā uri a muri ake nei.
lucy scHRadeR ManueRa | te auPōu
Te kaupapa o Te Ao Mārama: He pā mataora.
He pā kaiao. He pā anamata
E kokea ana ngā whakaritenga mō te whakarauoratanga o te whakaohonga o te mauri o te Tumu Herenga Waka, me te whakatūwheratanga o te Pā Mataora. He nui ngā mahi ki te huawaere tika i ngā ritenga me te whakahāngai i tō ngā tāngata kawatau. Ā-hirahira nei, he āheitanga mīharo te whakatūwheratanga nei, kia whakūngia ai te whanaungatanga ki waenga i a mātou ko te mana whenua, ngā ākonga o mua me te hapori whānui, ā, ki te whakanui i ā mātou tutukitanga.
Hei te kawanga whare i te 6 o Tīhema o tēnei tau, ka whakatūwherahia e mātou te Pā Mataora, he whare e hapahapai ake i te tangata me te whenua. Ka tūwhera te kaupapa nei ki te katoa, ā, e whakaneinei ana mātou ka tau mai neke atu i te 1000 whānau, manuhiri anō hoki.
Heoi, mutu ana te kawanga whare, kātahi te whare ka tūwhera -- haere ake nei whakamahia ai. Tē taea te tū noa me te kī, ‘Whare ora, mahia atu’. Ki a tātou katoa te mahinga atu. Ko te whakatakanga o Te Pā mataora ko, Mō te āpōpō. Me tapatahi tātou ki tēnei moemoeā, mō te ao, mō te iwi, e puāwai ai tēnei whakakitenga o te Pā Mataora.
Ko te motuhaketanga o roto i te wāhi nei tētahi o ngā mea e whakaarotia nei e mātou. Ko te āwangawanga, ka pokea e te hunga mahi kino ana. Ko te hunga hia tāpui i te wāhi nei, nā runga noa i tā rātou kite, he
whare anō hei haere mā rātou. Nā te mea he marae Māori, ā, he hapori whakaako anō hoki, ko tā mātou, he whakahaere i roto ngā tikanga, ā, kia mōhioita ai mātou mō tō mātou motuhaketanga.
Me whakamāori anō te pūtake o te marae me te hanganga o te Whare Mataora, kia mārama pū te marea, ehara noa tēnei i te whare matatini. Me nui ā matou akoako, whakaakoako i a mātou anō, mō mātou ake. Me whakaaro mātou, mō ā mātou mahi e hāngai ai ki te tikanga, ā, me te mahi i te mahi tika, ki tēnei wāhi hou. Engari, me kaua mātou e pōkai kaha rawa. He wā whakanui tēnei, te whakatūwheratanga, ā, kei runga i a tātou katoa te haepapa ki te hāpai ake i te kōunga o te Whare Mataora me te tohu o tō mātou marae.
Nā
Rhonda Thomson (Ngāi Tahu)
RHonda tHoMson | ngāi taHu
toi nā Hemaima Keane
5. Ko wai te kaihautū o te waka o te pō
6. Ko wai te pāpā o Māui
11. Ko wai te atua, i whiua i ōna karu ki te rangi
12. Ko wai te wahine i kau ana ki tōna whaiapo, I te moutere o Mokoia
13. Ko wai a Māui i huri āhua ai ki te kurī
14. Ko wai te tangata i whakaeke i a Paikea
15. Ko wai te atua e noho tonu ai ki te kōpu o Papatūānuku
16. Ko wai i mea mai te kōrero rongonui, ' Kia whakatāne au i ahau.
18. Ko wai i korowai i a Māui o roto i ōna makawe
21. He aha te ingoa o te whetu, tōna rite ki te matau a Māui
22. He aha te hanga o te matau a Māui
24. He aha te ingoa o te wahine, i huri āhua ki te toka
25. He aha te ingoa o te wahine, i kapongia i te marama
26. Whakamutua ngā kupu. "He kākāno ahau, I ruia mai I ..........."
1. Nā wai i whati i te manawa o Mauao?
2. Ko wai te ingoa o te Taniwha kaitiaki pounamu?
3. Nā wai I whakamate i a Mauī?
4. Ko wai te atua i whakawehe i ōna mātua ko Ranginui me Papatūānuku
7. He aha te ingoa o te wahine tuatahi
8. He aha te ingoa tūturu o Hine-nui-te-pō?
9. Ko wai te tuatahi ki te mau moko
10. Ko te whaiapo o Mataora
16. Maumahara te taniwha o Pōneke, kua whakamahi i tōna ingoa i tētahi hāpori. He aha te ingoa.
17. Ko wai i noho ki Hokianga, whai muri i a Kupe
19. He aha te ingoa o te maunga,waka,atua nō roto o Te Waipounamu
20. Mai i a wai i whānako i a Māui i ōna maikuku
23. Ko wai i whakaīngoatia i a Aotearoa
Patapatai whakatangata:
Hei aha koe hei manu taketake?
Waikamihi
He aha tāu mahi tuatahi i tō taenga atu ki te kainga i te whare wānanga?
a) Whakatā, hīrere.
b) Kotahi atu ki te pouaka mātao, noho tahi ai ki ō hoa whare, tākaro kēmu ātea.
c) Noho mohoao, hoki ki te moenga, mātaki i tētahi hōtaka tae atu ki te 3am.
d) Tīmata ngā aromatawai, whakamahere te toenga o te wiki.
e) He momo nohoanga anō, pērā i te wharekori tinana, mē ētahi atu momo runaruna.
He aha tō tino kēmu kāri?
a) Perehitene me te papaku
b) Taupaki
c) Poka
d) Uka
e) Kāri mahara
He aha tō tino wāhi kauhoe?
a) Wāpu
b) Tātahi
c) Waihīrere
d) Awa, Manga rānei
e) Roto
Tūī (mostly A’s)
E mōhiotia nei ngā manu tūī hei ngutu pī, hei whakatinanatanga o te whakangahau. Ka kitea koe e tangata kē atu he māia, he ātahu, he rawe hoki ki te whakakotahi i ngā tāngata. Rite ana ki te āhua o tā ngā tūī whakakikiri putiputi, ka taea e koe te horapa whānui i ngā whakaaro mā tō āhua me āu kōrero whakatautau. Kia rongo rātou i te tauwhāingatanga, ka taea hoki e ngā tūī hei kairiri, kia tūraha atu ai ērā atu manu i tā rātou taumatua.
Ko tōu āhua tonu he harikoa engari e kore koe e mataku ki te whakawaha i ōu whakaaro, ā, ki te kōhete i ētahi atu tāngata ki te whakaaro koe e tika ana kia pērā.
He aha tō tino kai hākari?
a) Parāoa parai
b) Pāua kirīmi
c) Pūrini mamaoa
d) Hāngī
e) Kai kōhua
He aha te wāhanga hirahira o tō hātepe ata?
a) Te whakapaipai i tō mata
b) Te kawhe
c) Te whakarite i tō tina
d) Te hākinakina
e) Te whakapai moenga
Ka pēhea ō hoa kōrero mō tō āhua?
a) Ngākau whiwhita, ngākau hihiko, wahapū, whai tikanga
b) Hinengaro tuwhera, nanakia, koi
c) Tautōhito, pōkīkī, mataara
d) Kaiarahi, whakatutuki mahi, māia
e) Whanokē, mātātoa, pīwari
Mena koe he manu, he aha tāu e kai ai?
a) Putiputi
b) Tārakerake wini
c) Kiore
d) Manu kē
e) Ngā tipu me ngā huarākau māori
Kea (mostly B’s)
Ko ngā kea anake ngā manu tairanga, kua waitohungia anō hoki ki waenga o ngā tino manu mōhio o te ao. Mōiriiri ana rātou mō te uiui, mō te hīanga, mō te mōhio hoki. Ki te tū koe ki te mātaki i te kea, ka kore rātou e tawhitawhi ki te peke i te katoa o tō waka, ki te eke rānei i tō waka. Ka whakaarohia tonu koe e ērā atu tāngata he whakatoi, he tātākī, me he maha ōna hoa. Te tikanga ia he pai ki a koe ngā ngohe whakaoti rapanga pērā i ngā panga, ngā kēmu kāri, me ngā papa kēmu. Hei tā tō kōkā, he ‘nanakia’ he ‘haututu’ rānei koe.
Rūrū (mostly C’s)
Ka whakaarohia koe hei puna o te kī, hei tangata whakaiti hoki. Iti te kupu, he hiahia nōu te whakatātare me te whakarongo, engari e mātai ana koe i ngā wā katoa. He koi te rūrū, he rere mōhū i te pō. He kore nōu e hiahia ana te tohaina ōu manako me ōu moemoeā, ēngari kē ko te aro kia ea ngā mahi. Ahakoa ngā ruru e whakaarohia ana he pīwari, he pūkenga kaiaruaru o te pō, kei whakahāweatia rātou. He rongo ā-manawa kaha tōu mō te tangata, otirā i te nuinga o te wā ka tika.
He aha tō tino taupā?
a) Te pūhaehae
b) Te mahi ohia
c) Te noho mohoao
d) Te mahi kia tika e ai ki āu tikanga
e) Te reretahi
To tino kiriata?
a) Hare Pota
b) Pirates of the Caribbean
c) The Matrix
d) The Hunger Games
e) Grown Ups
Te taunga mīharo hei haerenga māu?
a) Te Kaha
b) Te Whakataka-kārehu-a-Tamatea
c) Te noho tōpuni ki Te Urewera
d) Tāhuna
e) Rakiura
Kārearea (mostly D’s)
He kārearea māia, he kārearea whakatau, he kaiarahi whakatuanui kē rā hoki. Ka pukumahi, ka pūtohe hoki koe kia puta ai te ihu kaua māu anake, engari mā to whānau hoki Ko tō tino hiahia mō ō taiao kia mā, kia whai rautaki, ka mutu, ka tino whai hua te hātepe ki a koe. I ētahi wā nā tōu ake kakī māro ka raru ai koe, ā, he uaua tō tahuri ki te tuohu. Ahakoa tēnei, he pai ki a koe te rongo o te eke panuku, e whakapono ana koia te pūtake o tō kaha. He rite tonu tō tū ki te aroākapa i ngā mahi kapa haka, ākene hoki ko koe te tino mokopuna.
Kākāpō (mostly E’s) Ko te kākāpo te manu anake ko ia tāna ake momo i te ao. I te nuinga o te wā e omaoma haere ana rātou i te oneone o te ngahere, ā, hei te pō ka piki i ngā rākau. Ko tā ētahi atu he katakata, he ātahu koe, engari tūmataiti nei ka kitea tō āhua motuhenga ka hāneanea koe. Pērā tonu i te kākāpō, he pīwari e manawanui ana ki a Papatūānuku, ā, he pai ki a koe te tirotiro haere i te ngahere.Kaingākau koe ki ngā mea kākāriki katoa arā ngā rākau, ngā pītoa, te kawakawa, me ētāhi atu o ngā otaota rongoā. He wā ōna ka rorirori, ka pōrangi hoki, engari kē koe he koi.
Te
Lambert | Ngāti Awa, Tūhoe, Ngāpuhi
IWI-READS
Rangitāne
Tini whetū ki te rangi,ko Rangitāne ki te whenua. Koirā anake.
Ngāpuhi
Ka pērā koutou i a Dothraki, mananui ,ā, kāre e mutu te maha i a kōutou.
Ngāti Porou
Tē taea e koe te whakahēhe tino tauke te waiata ‘Paikea’.
Ngāti Kahungunu
E waru ngā hoa wāhine o Kahungunu, ākene pea ko te tērāte take ka pūrei upa koutou.
Ngāti Toa
I ako ahau, mēnā kāre āu kupu pai, kaua e whakaputa.
Kāi Tahu
Mānā koe ka tahae i tetahi anō tohorā ka waea atu ahau ki ngā pirihimana.
Waikato
Kātahi te iwi manaaki ko koutou, ka pōhiritia, ka whāngaihia, ka manaakitia te tini me te mano. Kia pono au, ka haere noa ngā tāngata ki Waikato mō Te Tohu Paetahi.
Taranaki
Aroz ki koutou katoa, ko ia tangata kua tūtakina eau, nō Taranaki, he ngākau nui tōna.
Te Arawa
He aha ki te pūngawha, tēnā pea he tūmatarau. Engari, pēhea koutou, e heke, e kauhuri, e marere turi hoki. I roto tētahi waiata kōtahi, e te iwi ehara tēnei te Taumahekeheke o te ao.
NGĀ MIHI
WHAKAPUTANGA KUA ĒTITA E
Te Rātā Campbell
RINGATOI
Hemaima Keane
Marama Salsano
Amiria-Rose Monga
Terran Philipps
Te Huihui o Matariki Chi Huy Tran
KAIWHAKAMĀORI
Cynthia WiRepa-Kingi
Taipari Taua
Taini Tomoana
Harris Puanaki-Devon
Arapera Tapiata
Ashley McGregor
Ataraira Cameron
Lily-Belle Pohatu
Amiria Hynes
KAITUHI
Sterling Maxwell
Kimihia Garcia-Grace
Shay McEwan
Harris Puanaki-Devon
Rosa Hibbert-Schooner
Hemi Pinfold-Whanga
William Koko
Tuia Tapuke
Taipari Taua
Keiha Nicol
Te Waikamihi Lambert
Taini Tomoana
Ruby Stuart
Hemaima Keane
Rhonda Thomson
Ashleigh Putt-Fellows
Lucy Schrader Manuera
Amiria Hynes
Cynthia WiRepa-Kingi
Kaea Tibble
Keyarnah Millner
Toru: Ngan Dang ; Monisha Dahya ; Darcy Lawrey ; Prunella Azzahra ; Cedar Porteous ; Ducky
Rua: Office Ghost ; Phoebe Robertson ; Te Huihui Tran ; Ashleigh Putt-Fallows ; M&M ; Guy van Egmond ; Jia Sharma ; Mauatua Fa'ara-Reynolds; Henry Broadbent
Tahi: Teddy O'Neill ; Ava O'Brien ; Ethan Rogacion ; Dan Moskovitz ; Will Irvine ; Kate Seager
