PANANGGUTIGOT ITI NAPENGDAN SITUASION

Adon iti damdamag a simmangbay sipod panaglukatko kadagitoy matak, bigat iti Domingo, aldaw iti panagawis iti simbaan, panagrarambak dagiti tattao, ken awaweng dagiti kampana a tumagari gapo a mangrugin ti misa. Apagsangpetko idiay plaza, makitak ti kinailiw dagiti tattao iti maysa ken maysa.

Nabayag a panawen met ketdin sipod nakakitanak iti kakastoy a pasamak. Ngem, dinamagko daytoy bagik. “Nagsubli kadin nga agpayso iti dati a panagbiag?” Kasangoanan a kitkitaek daytoy aglawlaw a malinglingdan dagiti abbong ti gudwa dagiti ruprupa a makiininnistoria kadagiti paspasamak iti tunggal maysa. Usto, ngem kasla haan. Kadagitoy a kanito, malaglagipko a nabayag metten a nakariknanak iti kastoy a pasamak, dagiti tattao nga agtitipon, agiinistoria, ken agkinkinnatawa. Malagipmo? Idiay pagadalan a napnoan sangit, bannog, ken sakrificio? Kadaydiay uppat a suli iti kuarto, addaan pay laeng dagiti lagip a naibati idi maudi a tawen. Kadagidiay a tiempo nga awan pulos mairkna no ketdi panagballaigi iti puso ken kararua gapo kadagiti kakadua. Tunggal malagipko dagitoy, iyangangesak a nauneg gapo ta ngan-ngani a mapasamak manen dagiti napengdan situasion. Nagutigotnak a makapadas no kasano kadi ti biag iti kolehio. Addaannak iti maikadua a tawenkon nga agadadal ngem sipod umuna nga aldaw, awan sabali a sangsangoekon no ketdi tay cellphone ken laptop ko. Nagutigotnak a makaraman kadagiti istoriada manong ken manangko kadayti legendary “COE Empanada”, wenno no saan ket dagiti tagaCOE a kas kunada. Nagutigotnak pay a makangngeg iti awan makaartap a cheers and yell ti CAFSD, “Go, CAFSD! Fight! Fight! CAFSD!”, a kas kunada, #UnigamesVibes! Nagutigotnak met a makapadas kadagiti naduma-duma a programa iti pagadalan a napnoan ribo-ribo a tattao, makaamammo iti kabbaro a gagayyem nga aggapo iti sabali a kolehio, no saan ket agbalin a paset kadagitoy a programa. Nagutigotnak a nakangngeg kadagiti istoria ken iliw dagiti naibati iti face-to-face. Nagutigotnak a makapadas iti naistrikto ken haan makitaan isem a maestra wenno maestro. Nagutigotnak a makapadas aglugan iti dyip inaldaw-aldaw. Ngem, ana ngata met ti riknana a makisinnipat iti katawa, agsangit idiay hallway gapo ta haanmo naala tay kayatmo a grado, no saan ket, agtaray idiay catwalk ta adda kamkamatem a quiz, exam, wenno klasem? Agdua a tawen metten sipod naibati iti pagadalan nga awan ado a tao. Ngem ngan-ngani metten nga umay ti namnama a nabayagtayo nga ararapaapenen. Ngan-nganin a maarakoptayo dagiti tattao nga ingget bayagtayo a madi nakita ken nakamusta. Ngannganin a matungpaltayon dagiti planotayo no aglukat manen ti klasrum. Kasla daydiay situasion a makitkitak idiay plaza tunggal mangrugin ti misa, sumangbay to metten ti namnama a mangipatungpal arapaap ken ririkna a nabayag a naipasardeng gapo iti naamak a darepdep. Bassit nga oras langen, wen, agsublin iti dati ngem baro nga aglawlaw.