“Metaphors of Brokenness”

“Metaphors of Brokenness”

(A Compilation of Short Meranaw Pananaroon exhibited during the Meranaw Poetry Workshop held on September 23, 2021)

So kiyaodas ka o garing aken, na lagid o kareges o lawas a ig a di makapmbalingan. Na so kiyaodas ka raken na lagid o raon a pkhaolog a di khasoy ko phoonan.

So gedamen o wata ko kiyaodas o lokes iyan, na isanden o seda a di makapembalingan ko rana-ranaw ko inged.

Isan a ikaranongko so kapengiginawae, ka obo minirampay sa daan a piragatan nago mamba lengkas so asal a kanggiginawae. Ogaid na sabenar na so satak a lo aken, na lagid den kapened o mareges a oran.

Aya man a kanggaring sa tangked a lolot ka na pelenganan sa limo, Ka tobadiwan so ranon na asara pimbitakan, a lomalan sa tademan na da oba sa ginawa sii ko kathothonganay

Ogaid na mataan a so rata a ginawa na isan o kawigoyag sa dunya a di tatap. So sanggibo a ranon na lagid den o apoy a kiyaododan sa a ig a dadn a kayaw niyan Ka amay ko mada so panamar na lagid o kakhada o apoy a mala.

Pekhababasan so lo a isano mariga a komilas sa bongamas. Ka di aken den sayanan oba aken mambasa ko ginawangka a rasay A o sekabo I gadong na tomoongko so rapa, a timosan loyaangko na miseg so taam iyan

Kanogon ay kanogon kanogon o lo o ladan, a miyarasay gomorawk ko mamis a katharo o datu bae a skabo e onga o puso aken Na tanodan di tanodan, a dapn a puso a ba miyonga sa manosiya. Na tademan di lipatan a miyabaloy so puso a igagadong a isan o kapplaodlaod a daden makambalingan

ILMO

Macarimbor, Abdul Muhaimen U.

PANSOM

Mangorsi, Mohammad Roun E.

SO BAE

Sittie Nysreen Atomar

INTRODUCTION TO THE LIST OF THE 365 MERANAW WORDS

Assalamo Alaykom Warahmatullahi Wabarakato!

So Meranaw Word of the Day na isa ko manga programa a Mindanao State University- MeranawCultural Heritage Center a makanggogolalan sa Meranaw Language Program, para rekano langon amanga ginawai, tonganay ago pamiliya mi ka antano kapephanaden-tademi so basa tano a Meranaw apiya anda tano matatago. Para pen aya ko manga pagariya, layok ago dayo tano a kenaba manga Meranaw ka aniran mapaganad go kasaboti so basa tano na kasabapan sa malebod ago mapiya a ditano di kapakazizinabota, balabaw ron so manga mababaling sa Lanao del Sur, Lanao del Norte ago so manga ped a darepa na samporena sa Mindanao State University-Marawi City.

Aya di ron salakaw na giyaya programa na panagontaman ami sa kasiyapa ko basa Meranaw para di kalilipatan o omani isa, datar o manga kangodaan imanto a malo den miyakalogaw so kapephagosara iran ko basa iran a Meranaw. Ikadowa na soporta mi pen aya ko programa a Department of Education a pembethowan sa Mother Tongue Based Multilingual Education oba kalokalo na miyoman ko manga instructional materials o manga goro sa kipephangdaon iran ko basa Meranaw sii ko manga wata tano. Ikatlo na singanin ami a mabaloy aya a poonan ko kapephanamari tano sa kapaka aden tano sa melagilagid a kisoraten ko basa Meranaw odi na so tigiran a standardized Meranaw orthography para ko manga goro ago morit, so manga researchers, ago so manga kalombayan sii ko pekhaori a masa.

Sanggibo salamat ko langon a minipagepeda ami sa Facebook ago ped a darepa sa diyami di kapanaden- tadem na go kapaganada ko basa Meranaw. Phanalamatan ami pen so manga kaka odi na ariya mi a pephakabegay sa mapontok a osayan ko sabaad ko manga words ka aden pekhasaboti phiyapiya. InshaAllah na itataros tano den a kapephaganada tano ko basa Meranaw. Pangninta ko Allah a began tano Niyan lalayon sa bager ago kapasang!

Alhamdulillah! Kataya so telo gatos ago nem polo ago lima (365) a manga words para reketano langon! Paganaden Tano!

by Dr. Johara D. Alangca-Azis

Head, Meranaw Language Program with Prof. Rocaira Gumal & Dr. Sharifah Masorong, MLP Members