Convention Cruise 2019: Brunch and sightseeing on Lake Minnetonka

CONVENTION CRUISE 2019: BRUNCH AND SIGHTSEEING ON LAKE MINNETONKA

MUNGAKA CORNER: Njə̂ Bànyàm kà Chɔ̂’ Mfò yàb a

By Ni Jude Fokwang

Ŋgɔ̀ŋ bànyàm mɛ’ kà bàti mà chɔ’ mfò yàb. Mfò yàb kǎ ntâ’ bə̂ nyàm yì, i jì’ti mbɔ̀ŋkɛd a, ŋkǔ’ mbə ŋgâ, i lǐn mà sǎm lə̌ŋ mfòn i kwà’ à sɨ’nì.

Nchu’ bo kà bo mà chɔ’ yɔ̀ mfò yàb a, mɔ̌’ nyàm kǎ mà mbə mà kwə̀’ni bə, mbi’ ìlâ’ nyàm bo chɔ’ i a, bə mà bu’ti nchě nì nchu’ vù i a.

Nchu’ lɛ kù’, kimàŋkɔ̀’ nô bɨ̀ bô fǔ kwǎ bɔ̀m. Alɛ nchu’ bànyàm mɛ’ kà bomti a, kimàŋkɔ̀’ ti bə.

Alɛ bìmɔ̂’ bànyàm mɛ’ kà lǐn ŋgâ, i kwə̀’ni mɨ. Ndìb bo kà beb, kɨ̀ yə i bə a, bànyàm mɛ’ tûm mâŋgɔb mà ghə̌ ntà’ti nù à yě ŋgâ kimàŋkɔ̀’ ma nto bə a. Ndìb mâŋgɔb lɛ kà chě wu’ a, kimàŋkɔ̀’ lɔ̀’ i, bo i ghə̀ manjàm nda ì ma lɨ̀’ i kǎ ŋkwa fɔ’ a. Mâŋgɔb lɛ bim ŋgâ kimàŋkɔ’ kǎ njaŋ nchə̀bnsi. Bà njə̂ i kǎ njaŋ bi a, i suŋ ŋgâ mɔ̌’ nyàm bə̌ mbə wu’ yì, bofà i bim mà to ncham i a, mbə̂ i to chě ma lɨ̀’ mà chɔ’ mfò bànyàm lɛ. Nswen kà bim mà ghə̌ ncham i. Nswen bi chě wu’, kimàŋkɔ̀’ bə̂ we’ mɨ njì bi kwà’ bì mbɔ̀ŋkɛd. Alɛ i kà kɔbti ŋkwɛ̌n nswen lɛ nì njî mbɔ̀ŋkɛd sɛ̌, nji kɔ’ nì ŋkwɛ̌n ì.

Kimàŋkɔ’

Alɛ i kà jǐd kwà’ mbɔ̀ŋkɛd kɨ ŋkwɛ̂n nswen lɛ, ŋgə̌ nchě wu’. Bo bi chě wu’, i bə suŋ mɨ mbò nswen lɛ ŋgâ i lɔ’ i, ŋgə̌ mɨ ma ghə̀ghə’ mà lə̌ŋ mfòn lɛ kà bə a, ma lɨ̀’ ŋgɔ̀ŋ bànyàm mɛ’ kà lǐn mà yə ni a; ghɨ̀ghɨ̌n nswen yu’ bub, ŋkɨ njě bub. Ndìb bo kà chě wu’ ma ghə̀ghə’ lɨ̀’ lɛ a, kimàŋkɔ̀’ swì, ndàmti, ŋkɔ’, nchi bi nì lə̌ŋ mfòn lɛ. Ndìb i kà kɔ’ nchi nì lə̀ŋ lɛ a, i chu mbò bànyàm

Nswen

mɛ’ njə̂ mfò yàb. Ŋgɔ̀ŋ bànyàm mɛ’ wɔmtì i, ntɔŋ sa’ nì tù i, mbim i nì mfò yàb, mbi’ jì’tì i, mbə ŋgɔ̀ŋ nù mɛ’ i kǎ nje ŋgɔ̀ŋ nchu’ mvi mɛ’ a.

Nswen ka’ ti’ mbɨŋɨ wu’ nì chə’ntɨm boà sɔ̀bnì mbə̂ nsɨn.

BEGINNER’S RESOURCES