Communicaziun allas medias
Fausta Capaul, la piuniera dil turissem a Breil
Il matg 1873 publichescha Fausta Capaul in inserat per sia nova pensiun a Breil. Cun mo 26 onns lantschescha ella cheutras il turissem. Ella fa quei en in vitg muntagnard e puril ed en in temps nua che sulettamein ils umens camondan. 150 onns pli tard vegn la piuniera Fausta honorada. El decuors digl onn 2023 dat ei in omagi cun pliras occurrenzas sut il tetel “Fausta piuniera - 150 onns turissem a Breil/Brigels – eine Hommage”. Il punct culminont ei ina inscenaziun teatral-musicala avon la Casa Fausta Capaul a Breil.
Dunnas sco Fausta Capaul, che han scret historia ein raras en Surselva. Ellas ein era strusch zacu vegnidas undradas. Entras igl onn giubilar cul focus ‘150 onns turissem a Breil’ duei quei semidar. Fausta Capaul ei stada ina dunna emanzipada, ina persuna independenta cun atgna fatschenta. Sia ustria Casa Fausta Capaul ei aunc oz bein enconuschenta ed astga valer sco tgina dil turissem en la destinaziun Breil Vuorz Andiast. Quei omagi biling repartius sigl entir onn 2023 duei possibilitar in’avischinaziun alla persuna Fausta Capaul, a siu temps, all’entschatta dil turissem e riscar in bufatg sguard egl avegnir .
Hosps illusters en la Casa Fausta Capaul
‘La pernottaziun cun pensiun cumpleina cuosta mudests 5 francs’. Aschia carmala Fausta Capaul en siu emprem inserat digl onn 1873 hosps da vacanzas. Ella envida els en il ‘Luftund Molken-Curort Brigels’. Amiez il vitg, gest sper baselgia, tgamuna la giuvna dunna sia nova pensiun. Sco quei ch’il cudisch da hosps muossa, ha Fausta Capaul giu success sco hoteliera ed ustiera. Numerus hosps renomai digl entir mund naven da Paris sur New York tochen Sankt Petersburg han pernottau tier ella. Denter auter ei il commerciant Jelmoli da Turitg d’anflar el cudisch. El ch’ei daventaus beinenconuschents entras siu magazin da moda. Probabel la pli prominenta viseta dat ei la stad 1893 cun la regina da Hollandia Wilhelmina Helena Pauline Maria von Oranien-Nassau e sia enturascha.
150 onns turissem a Breil
La historia da success da Fausta Capaul e l’entschatta dil turissem a Breil ein colligiai stretgamein. Quell’entschatta avon 150 onns fuss buca stada pusseivla senza l’avertura dalla via da Vuorz entochen Breil igl onn 1870. Aunc oz regorda il curtgin Crest La Crusch cun sia marvegliusa vesta a quell’emprema via da colligiaziun. En quei curtgin vegn igl onn giubilar 2023 lantschaus Gliendisdis- Tschuncheismas. Ei suonda in exposiziun da maletgs da Charles Flach, il ‘pictur da Breil’ e fideivel hosp dalla Casa Fausta Capaul. Igl uost ha liug l’inscenaziun teatral-musicala dil duo artistic Annadora Friberg e David Flepp - 6 ga sut tschiel aviert amiez il vitg. Miez settember terminescha in’occurenza cun in sguard sil futur dil turissem entras scolaras e giuventetgna il program. Il giubileum da 150 onns turissem a Breil organisescha in comité cun Otmar Seiler alla testa. Participai ein il Forum cultural Breil, Surselva Turissem e l’Uniun dramatica Breil.
Gliendisdis Tschuncheismas, 29-05-2023: avertura
4/5/6 + 11/12/13-08-2023: inscenaziun teatral-musicala avon la Casa Fausta Capaul
Fenadur/ uost 2023: exposiziun da maletgs dil 'pictur da Breil' Charles Flach en la Casa Fausta Capaul
Sonda, 16-09-2023: occurenza finala Tuttas occurrenzas ein bilingas (romontsch/tudestg)
E : Las 3 stizuns da Breil pasternaria Gabriel, cascharia Grob e mazlaria Schmed produceschan e vendan a posta per quei giubileum products cul label ‘Fausta piuniera’.