1 minute read
Dumulugok sa Tig-ilinit
-Dumulugok sa Tig-ilinit Ni Bjørn
Bang! Bang! Bang!
Advertisement
Tatlo ka segundo nag-untat ang akon ginhawa. Sa ikaapat, wala gihapon may nag-ilig halin sa ‘kon kaundan. Alangan—kay indi ako ang kasumpung sang mga diyos sang de-armalayt. Magapadayon ila operasyon, samtang magatinir ako sa pulungkuan.
Ang mga landong nag-inupuray sa idalum sang tig-ilinit; athag ang dalag nga balhas sang isa ka soltero. Sul-ob ang lubog nga unipormi, nagabitay ang paniro sa iya abaga. Kag sa iya pagkapilason, maabot ko—pinasahi siya nga soldado.
Abi isugid, soldado, kung paano indi maglaylay ang uniporme sa akon lawas? Paano ginhurma kag ginpatig-a ang mga butkon mo nga madamol? Ukon nangin mapintas lang ang pagtuga sa akon? Kay sa magamay ko nga dagway, mga paghinulsol indi ko makamol-kamol.
Bang! Bang!
Dalagan, soldado, kay akon huna-hunaon kung ikasarang sang akon tiilan nga magpalagyo sa kaput sang kamatayon. Kung magaabot na ang akon lahog nga katapusan, ikasarang bala sang akon sag-ang ang singgitan nga gabagrong?
Daguob sa liwat—matinis, maabtik, makalitik. Samtang gatiyog sa banglid, nagalagas ka sang imo ginhawa. Ang kada tapak sang imo botas akon ginapiyungan—ginapamatian Kung bala magadungan ang musika kag mga bala nga galinapta.
Ah…ang kaamyon sang isa ka baganihan. Sa masami, wala na sang may ikalipay imo ginikanan. Panigurado, imo lang sulat ang ginahulat sang imo kahigugma. Sa matuod, ni isa wala ako sing may maprotektahan.
6
Dumulugok sa Tig-ilinit Ni Bjørn
Bang!
Ginbaha ang kadudulman sang palakpak, kag napundir ang tig-ilinit sa akon pagtangla. Tion na para ihulog mo ang lahog nga nawong; ang kurinot sa imo agtang ipatapan agud madula.
Duko sa tuo kag sa wala, natapos na ang panugiron. Ah, sagad ka sa papati!—ina lang ang mahambal ko. Sa lain nga tig-ilinit, mangin sin-o ka naman? Sa lain nga banglid, ikaw bala mangin akon kapareho?
Nakakadlaw ako sa binuang nga handum. Indi man sa talawan ang akon corazon; Ugaling, may yara lang gid tig-ilinit nga mahapdi. May yara tig-ilinit nga indi magapabor sa akon.
7
Photo by Bjørn
