Mga Palamangkutanon

Mga Palamangkutanon Ni Immalie Rose E. Cafifge

Diin naghalin ang pinalian sang mga palaligban? Diin pakadto ang naga-ikis kag kitid nga dalanon? Gaano ako sa duog sang peligro?

Ang sugilanon: Sa yab-ok ako igabun-ag, kag sa yab-ok ako magabalik. Ang pamangkot: Pila ang balayran kung ibanhaw ang gikan sa minatay? Kaangay sa ginlubong nga bulawan—tubtob dos metros padalom. Abir, hamili bala ang uyang sang tiyempo sa ngaralngal sang mga huna-huna?

Sa akon paglingi sa pangpang nga akon ginakatin-katin, magaduaw ako sa lugar nga disunado; magasimhot sang hangin nga indi pamilyar sa ilong; magatampisaw sa lutak nga wala marka sang anuman nga tikang.

KAKAPOY—

Skwela. Agwanta. Kurisong. Obra. Nguy-ngoy.

Guya nga gabanaag sa punong sang disyerto; wala sing pangadtuan. Pagadal-on ayhan sang pagkutkot ang kasanagan? Isa ako ka dumuluong sa akon landong— nagabitbit bagahe nga puno sang palamangkutanon.

Makatilingala, apang diin ang mga tul-an sang akon unod humalin tuig 2018?

Diin makita ang ala-porselana nga panit, kung ang mapintas nga haplas sang nagligad ang nagalugos sa pagpamatbat sang subong? Sa ulot sang siyudad kag kabukiran, diin ako nagakabagay?

33

Mga Palamangkutanon Ni Immalie Rose E. Cafifge

KAHILIDLAW—

Saot. Alaba. Kanaw. Odoy-odoy. Ngirit.

Wala sing eskriba nga nakataklad sa kabungyodan kung diin ang labhag sing dapa-dapa nakasulat sang elehiya para sa naghamyang nga kalawasan. Makabayad bala ang bagras kag lap-ok sa dalanon nga akon ginlaktod? Mas gustuhon ko magtingkaya pabalik sa akon ginsuguran. Sa pihak sang nagatunod nga adlaw, may paghidait bala nga gahulat sa lapyo nga nawong?

Diin ako halin? Diin ako pakadto? Gaano ako sa duog sang peligro?

Wala ako kabalo. Pagkatapos sang tanan nga bulubaliskad kag liko-liko, isa lang ang akon nadangtan: Wala na ako sing balikan.

34