IKUSI MENDIZALEAK‌
Pasa zen urtean bezala, ikasturte honetan IĂąigo Aritza eta Andra Mari ikastolaren artean dugun mendi taldea martxan da. Iaz bezala, asmoa hilean behin, normalean hileko hirugarren igandean, bi ikastolen familiek mendi irteera bat egiteko aukera edukitzea da. Proposatzen diren irteerak 6-8 km-koak dira eta ez oso zailak adin txikiko haurrek egiteko modukoak. Hitzordua 9:30ean izaten da, elkartu ondoren irteera abiatzen den puntura batera joaten gara. Ibilbide erdia egin ondoren norberak eramandako hamaiketakoa egiten da. Indarrak berritu ondoren, ibilbidearen bigarren zatia egiten da. Bukatu ostean, tragotxo bat hartzen dugu eta bazkal garairako etxera itzultzen gara. Adin desberdinetako haurrek parte hartzen dute eta bakoitzak bere erritmoan denek ibilbidea gustura bukatzen dute. Oso pozik sentitzen dira ibilaldia amaitu dutelako. Gainera taldean errazago egiten dute eta hobeki pasatzen dute. Ikasturte honetan egin genuen lehenengo irteera Etxarriko Auntzetxera izan zen, Urrian Baztango Xorroxinera joan ginen, azaroan eguraldi txarragatik irteera bertan behera utzi behar izan genuen, abenduan ez da irteerarik egiten agenda oso estu egoten baita, urtarrilean Lacturalera bisita polit bat egin genuen, otsailean Arbizuko Artabakar bordara joatea aurreikusita bazegoen ere, elurteagatik azkenean Ergoienako bira egin genuen. Hemendik aurrera hiru irteera gelditzen zaizkigu: martxoaren 17an Atako haranera, apirilaren 21ean
Aralarko Albiako trikuharrira eta Bustaizko bordetara eta azkenik maiatzaren 19an egun pasa egin nahi dugu Nerbioko iturburuan baina agian plana aldatuko dugu. Irteera hauen artean aipamen berezia merezi du Xorroxinera egindakoak. Pasa zen ikasturtean gure ikastolek Behe-Nafarroako ikastolekin batera Nafarroan bizi proiektua abiatu zuten. Hau dela eta, harreman polita hasi da eta horren adierazlea izan zen Erratzuko Xorroxinera batera egin genuen irteera. Baztan erdibidean egonik, aukera eman zigun mendi irteeraren aitzakiarekin elkarrekin egun ederra pasatzeko: ibilbidea egin, bazkaria partekatu eta herri kirola egin. Esperientzia benetan zoragarria izan zenez gero, ikasturtea amaitu baino lehen halako beste irteera bat antolatzea aztertzen ari gara eta honek eskatuko luke arestian aipatutako plangintza aldatzea. Horren berri izanen duzue! Amaitzeko, bi ikastolen familia guztiak animatu nahi ditugu mendi irteeretan parte hartzera. Irteera guztietan agertzen da familia berriren bat eta probatzen duenak errepikatzen du. Hasieran familiak beldur dira ea haurrak gai izanen ote diren ibilbidea egiteko baina uste duguna baino askoz hobe erantzuten dute. Bestetik oso aukera polita da Sakanako Ikastoletako familien arteko harremana estutzeko eta elkar ezagutzeko. Giro bikaina egoten da eta jende oro ongi etorria da. Esan behar da ere, Etxarrin mendi irteerak prestatzeko elkartzen den guraso batzordea irekita dagoela nahi duenak parte hartzeko edota bere proposamenak luzatzeko. Beraz, has zaitezte mendi botak prestatzen eta hurrengo mendi irteeran elkarrekin gozatuko dugu!