Pfimi Interlaken

Oschtermomänt zmitts im Herbscht

E Gschicht, wo jede Tag nöi gschriebe wird

Da sitze si jetz, die vier Lütli, u schriebe zäme e Gschicht. Es isch ke Nöii. Si spielt vor öpe 2000 Jahr. Die Vier us drü Generatione hirne u studiere. Dusse isches Herbscht. U die Gschicht, wosi sötte schriebe, isch dänkt für de ar Oschtere 2023 ufzfüere.

Me isch sech einig: Es söll ir hüttige Zyt spiele. Aber was isch hüt wichtig? Es brucht Äggschen u Spannig, Töifgang u Drama u der rot Fade sött me bi all däm nid verliere. Eifach zverstah söttis si u am Sinn nah ar Gschicht vor langer Zyt ähndle. Der Iistig isch schnäll gfunde. Ou dIdee vom töife Fall vom Houptdarsteller isch de schnäll entwicklet. So, u jetz? Nachem Absturz u em Versäge chunnt zgrosse Hinterfrage. Wie hets so wyt chönne cho mit mir?

Aber dä Töifpunkt isch ja nid dHouptsach. Da isch no e zwöiti Person, wo ufzeigt, was wie vor rund 2000 Jahr ou hüt nach me schiinbar verkorkste Läbe möglich isch. Nämlech das Mönsche ame Punkt i ihrem Läbe erchenne, dass Eine git, wo unschuldig isch ztod cho. U de no freiwillig. Um Freiheit, Liebi u Liecht is Läbe zbringe. Dä Einti begägnet hüt no jede Tag Mönsche am Töifpunkt vo ihrem Läbe, wo alles verlore schiint. Hoffnigslos. E Blick uf dä Einti u was er a däm Tag, wo mir a Karfritig fiire, für üs het ta, längt. U wie bi däm Mönsch, wo denn schuldig mit däm Einte – Jesus Christus – isch hiigrichtet worde, längt es Igestah: I has verdient, du nid. Du bisch würklech Gottes Sohn.

Was für ne Momänt, wenn mir im Herbscht als Jahreszyt oder im Herbscht vom Läbe dörfe inne halte u erchenne, was für ne grosse Liebi hinder dere alte Gschicht steckt. E Liebi wos schafft, ou hüt no täglech Mönsche ade dunkelschte Orte zerreiche. U de wirds bunter, Liecht dringt düre Näbel. U wies der Herbscht üs idrücklech zeigt, cha Veränderig öpis Wunderschöns si.

Di vier Gschichteschrieber si sech einig: Das Drama wird es Häppiend ha. U das wünschi ou üs allne: E Oschtermomänt zmitts im Herbscht ud Erchenntnis, dass nie zspät isch.

Daniela Francioli-von Allmen

www.pfimi-interlaken.ch