Vuossâmuš Aanaar Pride -tábáhtus, Fabrizio Brecciaroli

Vuossâmuš

-tábáhtus

Pride lii uáivildum iänááš arvetävginuoráid, mut puohahasiih arvetävgiulmuuh sehe eres-uv ulmuuh, kiäh tuárjuh arvetävgilihâstâs, láá tiervâpuáttám fáárun. Stuorrâ kaavpugijn tegu Helsigist teikâ Tamperest láá puohlágáneh tábáhtusah pirrâ ive, mut taggaar uccâ siijdâst ko Anarist nuoráid ij lah ennuv.

Tekstâ: Fabrizio Brecciaroli Koveh: Ida Lassila

Lávurdâh 2. syeinimáánu 2022 lâi historjálâš peivi Anarist, tastko talle uárnejui vuossâmuu tove Aanaar Pride -tábáhtus. Tot lii ubâ Suomâ tavemus Pride. Juurdâ orniđ taggaar tábáhtus šoodâi Aanaar Nuorâirääđi čuákkimist. Rääđi jesâneh Hilda Musta, Aino-Maija Mäenpää, Emma Saari já Kaisla Suominen láá eidu valmâštum paješkoovlâst. Rääđipargo peht sij láá irâttâm pyehtiđ uáinusân seksuaallii šoddâdmân sehe seksuaal- já suhâpeliucceeblovvoid kyeskee teemaid. Suijân toos lii tot, et sii mielâst škoovlâst taah teemah iä kieđâvuššuu tuárvi ennuv.

Talle ko sij iävtuttii Nuorâirääđi čuákkimist, et ličij pyeri orniđ Pride-tábáhtus Anarist, te västideijee rävisolmooš Ida Lassila lâi tast uáli jo moovtâ. Vuávámpargoh vuolgii jotelávt joton. Forgâ fáárun pottii meid iävtutátuliih já sponsoreh, tegu Kaisla eeji finnodâh Northern Sound. Uánihis ääigi smavvâ pargojuávkku lii finnim ennuv áigá, já sii iäljáruššâm áánsust Aanaar kieldâst lii tääl jieijâs Pride.

Pride lii uáivildum iänááš arvetävginuoráid, mut puohahasiih arvetävgiulmuuh sehe eres-uv ulmuuh, kiäh tuárjuh arvetävgilihâstâs, láá tiervâpuáttám fáárun. Stuorrâ kaavpugijn tegu Helsigist teikâ Tamperest láá puohlágáneh tábáhtusah pirrâ ive, mut taggaar uccâ siijdâst ko Anarist nuoráid ij lah ennuv. Tondiet lii hirmâd pyeri äšši, et aanaarliih nuorah láá luhostum orniđ olssis uáivildum tábáhtus.

Tiätu tábáhtusâst pieijui neetin, kavppijd já lostáid. Markkânistempargo luhostui pyereest, tastko tábáhtusân uásálistii suulân 100 olmožid. Tot lii ennuv eenâb ko uárnejeijeeh vuordii. Šoŋŋâ-uv išedij: Pride-peeivi lâi paahâs já piäiváš paaštij. Ulmuuh pottii ubâ Suomâst – joba Helsig rääjist – já Taažâst-uv. Fáárust lâi meiddei Anne Olli Säämi Pride ovdâsteijen.

Fáruluvâi jottee juávkku vuolgij Sale-käävpi oovdâst já moonâi Aanaar markkân čoođâ Saijoos šiljo räi. Paaraat lâi uáli jo ivnáá. Ulmuin lijjii fáárust jyehilágáneh plakateh já liipuh. Tastmaŋa ehidist lijjii jieškote-uvlágáneh konserteh, sahâvuáruh já savâstâlmeh. Iärásij lasseen lávdástii Kaisla Suomisii bändi Pain in the Balls sehe Amandaid, kii lii Suáđigilist vuálgus leijee mut onnáá peeivi iänááš olgoenâmijn tuáimee musikkár. Ohjelmân kuulâi meiddei tánssámpáájá.

Aanaar Nuorâirääđi tuáivu, et Aanaar Pridest šodâččij juátkojeijee toimâ. Tiervâpuáttim ive 2023 tábáhtusân!