BRÜHL – KYEVTI LANE KAAVPUG, kost MICHAEL JACKSON -uv eelij Tekstâ já koveh: Jasmina Schreck
Augustusburg-lane väzzimkuávlu
Já talle lâi vala tot ehidispeivi 1990-lovo pelimuddoost, ko Michael Jackson eelij Phantasialandist. Tääl, ko mun oppeet smietâm tom, tot oro viehâ omâs äššin. Ubâ suotâstâllâmsaje lâi áávus tuše oovtâ ulmuu já suu skipárij tiet, já uáli ennuv ulmuuh monnii keččâđ taam immâš. Tiäđust-uv mii ubâ peerâ-uv lâi tobbeen, lâihân viijmâg-uv miinii tábáhtuumin mii uccâ kaavpugist.
Puávtáččij ettâđ, et mun lam aassâm ubâ elimân rävisolmožin Oulust, mut pärni- já nuorâvuotân mun viettim Saksaast, iänááš Brühl-nommâsii kaavpugist. Brühl lii viehâ uccâ kaavpugâš, jis tom verdid Saksa eres kaavpugáid: tobbeen láá suullân 46 000 ässed. Brühl lii Saksa viestâruásist, Köln já Bonn kooskâst. Brühl lii pegâlmâs kyevti ääšist: loonijn já suotâstâllâmsaajeest. Augustusburg-nommâsâš lanne lii alda kaavpug kuávdáá, já tot lii meid uáli pivnohis väzzimkuávlu. Lanne lii jo masa 300 ihheed puáris, mut tot vahadui nube maailmsuáđi loopâst. Maŋeláá ovdištum lanneest valdii vuástá staatâkuosijd 1990-lovo pelimudo räi. Onnáá peeivi lii suotâs väzziđ lane baarookstijlâsâš muorâkäärdist. Mii lii vala pyereeb, muorâkäärdi tyehin lii meid uccâ luándusuojâlemkuávluš, kost láá ennuv puáris muorah, já tobbeen kullojeh mielâttes ennuv lodeh eromâšávt kiđđuv.
10
