A Declarazión de Salzburgo ta un mundo multilingüe VIVIMOS EN UN MUNDO EN O CUAL: En un mundo interconeutato, l’abelidat ta fablar moltiples luengas y comunicar-se á traviés d’os entrepuzes lingüisticos, ye una destreza cruzial. A competenzia en atras luengas ye una nueva mena d’alfabetizazión global y mesmo ra conoxenzia parzial de más d’una luenga ye benefiziosa ta ra soziedat y l’endividuo. Ye por ixo que l’aprendizache de luengas amenista espardir-se ta toz, chóvens y adultos. Manimenos, á millons de personas en o mundo lis s’empacha ro suyo dreito inallenable á mantener, espleitar y desarrollar as suyas luengas d’identidat y comunidat. Ista sinchustizia cal que s’endreze á traviés de politicas lingüisticas que refirmen á endividuos y soziedaz multilingües. Os partezipans en a sesión Lanzadera de Talento: Aprendizache de luengas y entegrazión en un mundo globalizato (12 á o 17 de deziembre de 2017 salzburgglobal.org/go/586), demandamos politicas que avaloren y sus-tiengan o multilingüismo y os dreitos lingüisticos. A Declarazión de Salzburgo por un mundo multilingüe contará con o refirme d’un informe completo y dentratas de blog sobre aspeutos clau, que serán publicatas á ro largo de 2018.
SalzburgGlobal.org
• Cada uno de os 193 estatos miembros de l’ONU y a mayoría d’os suyos ziudadanos son multilingües. • Se fablan 7.097 luengas. • Y 2.464* d’ellas son en vías d’acotolamiento. • Más d’a metat d’a poblazión mundial fabla 23 luengas dominaderas. • O 40% d’a chen no tiene azeso á educazión en una luenga que replecan. • 617 millons de ninos y adoleszens no plegan á livels de rendimiento minimos en leutura. • 244 millons de personas son migrans internazionals, de os cuals 20 millons son refuchiatos, un incremento d’un 41% dende 2000. Os migrans y refuchiatos agrupatos formareban o 5º país con mayor poblazión d’o mundo. O nuestro mundo ye multilingüe por naturaleza. Sin dembargo, muitos sistemas educativos y economicos, prozesos de ziudadanía y almenistrazión publica meten en desventaxa á millons de personas, debito á ras suyas luengas y capazidaz lingüisticas. Debemos confrontar iste desafío si queremos lograr os Oxetivos de Desarrollo Sustenible, adoptados en 2015 por 193 países ta “acabar con a pobreza, protecher o planeta y guarenziar a prosperidat ta toz”. Un sistema educativo chusto, zentrato en politicas lingüisticas aposatas y equilibratas, ye fundamental ta o progreso inclusivo. PRENZIPIOS • O multilingüismo embolica tanto l’amostranza esplizita de luengas como ros patrons de comunicazión informal que emerchen en soziedaz multilingües. • O plurilingüismo ye a conoxenzia de moltiples luengas por endividuos. • As zercunstanzias istoricas, cheograficas y sozioeconomicas recuten ta muitas farchas y usos d’o multilingüismo. • A educazión multilingüe y o refirme á o multilingüismo sozial, por estatos y organizazions internazionals, endizca ro entrecambeo de conoxenzias y comprensión intercultural y enforte as relazions internazionals. A creyazión de politicas lingüisticas concretas puede enfortir a codesión sozial, amillorar os resultatos educativos y endizcar o desarrollo economico. Un enfoque aditivo de l’aprendizache de luengas permite á os ninos creyar una alfabetización aposata en a suya luenga materna; aduya á ras comunidaz á retener as suyas luengas d’identidat, conoxenzia y creyenzias; y creya oportunidaz ta aprender nuevas luengas que alportan benefizios personals, recreyativos, culturals y economicos. Meter en marcha politicas que afavorexen o multilingüismo ye una traza de presguardar o recurso unico y vital d’a diversidat lingüistica y endizcar un cambeo positivo en o mundo, en custions economicas, sozials y politicas.
The Salzburg Statement for a Multilingual World was jointly drafted in English by Salzburg Global Fellows. All translations have been provided through the goodwill and voluntary efforts of the Fellows and their colleagues. Read the original here: education.salzburgglobal.org/statements