Für di Churze: Bärner Bäre

Buechstabesuppe

Gschicht u Illustratione vor Elsbeth Boss

Bleigraui Wuuche hange am Himu. Es schiffet u strääzt, u giesst wi us Chüble. Use cha me bi däm Wätter nid. Stinklänwylig isch es! Oberstinklängwylig!! Superoberstinklängwylig!!! Si ligt uf e Teppich vor ds Bett, blinzlet mit de Ouge, däicht Zyt vergöng eso schnäuer, u lost em Luft zue, wo der Räge usöd stosswys a d Fäischterschybe pängglet. Plötzlech gseht si ungerem Bett e Trucke. E Trucke, wo si no nie het gseh. Si chehrt sich uf e Buuch u häägglet se füre. Es isch e schöni goudegi Schachtle! Söu si der Dechu lüpfe? Ineglüüssle? Was chunnt ächt füre? Was, wen es Gschpängscht drinn huset? Oder es wiuds Tier usegumpet? Oder e gheime Schatz drinn ver-

steckt isch? Süüferli lüpft si der Dechu u gwunderet … Büecher, nüüt aus Büecher! Si fischet eis use, ligt uf ds weiche Schaffäu uf em Bett u list. Spannend! Mega spannend! E Gschicht vomene Bär, wo tagelang, u o ir Nacht, list. E Läsi-Bär. E Büecher-Läsi-Bär. E Büecher-Läsi-Läsi-Bär! Ab auem Läse gheie ihre d Ouge zue, si schlaft y u isch plötzlech säuber e Bär. Der Läsi-Bär! Hocket mit emene grosse, dicke Buech i de Taupe uf eme Stueu u list. Buech um Buech. Wo der Läsi-Bär im Buech, won är grad list, zrugg bletteret, si aui Buechstabe wägg, verschwunde! Dert wos grad no Gschichte gha het …, nüüt aus lääri, wyssi Syte! U der Bär gseht, dass ungerem Stueu, won är druff hocket, huuffe Buechstabe lige. Was itz? Ohni Buechstabe gits kener Gschichte. Ohni Wörter sy Gschichte nume no Erinnerig.

Söu är itz di Buechstabe nöi zämesetze, us nöie Wörter nöii Sätz zämeblätze? Mit dene zämebblätzete Sätz nöii Gschichte erfinge? Aber wie? Gschichte cha me nid nume so us de Finger sugge. Oder? – Är isch nume e Läsi-Bär, ke Läsi-Gschichtedichter-Bär. Är tuet ds Buech zue u ramisiert Buechstabe am Bode zäme. Wörtli chönnt er scho schrybe, wen er di richtige Buechstabe fingt. «B-U-C-H» auso «BUCH» setzt är zäme, de «PAPIR», fingt no e «E» u flickt dä iche, «PAPIER» mit E isch nämlech richtig. U de fingt er no e T, nimmt der E ume wägg, u de tigeret plötzlech e «TAPIR» dür ds Zimmer. De tischelet er di Buechstabe um zu »PIRAT» u gondlet mit de Seeröiber über ds Mittumeer. De fingt er e F u ne SCH u ne A u das git «SCHAF». Einisch het er e spannendi Gschicht vomene böse Wouf im Schafspeuz gläse! U das Schaffäu ligt itz uf sym Bett! – Wörter gö. Sätz nid. Der Buechstabehuuffe chan er ömu nid eifach so la lige. Me weis ja nie, was öpper mit dene no chönnt aasteue. «Ds Aufabeth het 26 Buechstabe.» Är weis das, zeut aber sicherheitshauber nache: A B C D E F G H I J K L M N O P Q R S T U V W X Y Z … U är wärweiset wi mängs Aufabeth ächt i däm Huffe versteckt syg. Mit dene chönnt me auso aus ufschrybe, was eim grad eso i Sinn chunnt. I Sinn chunnt ihm viu, aber äbe … Wörter sy no lang kener Sätz!

Är packt das Buechstabe-Wörter-Satzgmisch i Naselumpe, füut e Pfanne mit Wasser, verbrösmelet e Gmüesbouillowürfu drii, rüert um, dass ir Pfanne e Wirbusturm orkanet, laht de d Buechstabe i ds heisse Wasser rünele u ploderet e feini Buechsstabesuppe. Der Läsi-Bär däicht nämlech, wen är de di Buechstabesuppe ggässe heig, de chönn är de o Sätz u Gschichte schrybe.

U grad won är ds Muu ufsperrt für ne Löffu vo der GschydheitsSuppe z schlürfe … gheit ihm ds Buech us de Taupe, polet vom Bett uf e Bode ache …, u si erwachet. «Brummmm, brummmm», brummlet si, chehrt sech uf em Schaffäu uf e Buuch, zeut Schäfli u pfuuset eifach ume y. Was si tröimt, wetsch wüsse? Däich vomene Bär wo Büecher list u Buechstabesuppe löfflet.

Elsbeth Boss ist eine Berner Geschichten-, Kinder- und Kochbuchautorin. Die Illustrationen stammen aus dem Buch «Bärner Bäre» erhältlich im Werd & Weber Verlag. www.weberverlag.ch