Minister Endy Croes: ENTRANTE AUGUSTUS 2024, TUR
MUCHA DI KLAS 1 DI SCOL BASICO LO SIÑA LESA Y SKIRBI NA PAPIAMENTO
Manera ta conoci, den cuadro di Maneho di Idioma nobo, ta introduci oficialmente Alfabetisacion na Papiamento e aña escolar binidero. Esaki ta nifica cu desde aña escolar 20242025, e alumnonan di klas 1 di scol basico lo siña lesa y skirbi na Papiamento. Lo duna Hulandes cu un acercamento nobo cu ta pas mas den e contexto di nos muchanan. En conexion cu esaki, a prepara tur docente di klas 1 y cabesante di scol basico, unda cu nan a atende un curso di profesionalisacion. Durante e cursonan a trata: e metanan nucleo di idioma y comunicacion,
conocemento di e material, didactica di idioma materno y didactica di idioma stranhero y dominio di Papiamento. Ademas di esaki, a inverti alrededor di 1.2 miyon florin pa desaroya e materialnan nobo.
A print e materialnan na Hulanda, esaki nan a yega Aruba y a reparti nan pa tur scol basico. Minister Endy Croes a subraya cu diferente estudio internacional hopi profundo cu a ser haci riba e topico aki entre otro, rapport di World Bank di aña 2021, unda a yega na e conclusion cu den e prome añanan e alumno tin cu ricibi enseñansa
den su idioma materno. E rapport di UNESCO di aña 2016 titula: “If you don’t understand, how can you learn?” tambe a trata e tema aki. Nos profesionalnan a haci uzo di e rapportnan aki y realisa investigacion hopi profundo na Aruba y a yega na e mesun conclusion cu e rapportnan internacional.
Pa e motibo aki nos a percura pa introduci Papiamento den klas 1 di scol basico aña escolar 2024-2025. “E vision ta pa den futuro Hulandes of un otro idioma e alumnonan lo ricibi nan como Idioma Stranhero “vreemde taal” y lo prepara e maestronan pa asina garantisa cu nos
studiantenan por prepara y ta exitoso den nan carera profesional pa por sirbi Pais Aruba.
Por ultimo, e mandatario di Enseñansa ta pidi cooperacion di tur docente, maestro y esnan den e veld di enseñansa. Alabes ta gradici Departamento di
Enseñansa (DEA) y tur esnan cu a traha riba e proyecto aki. “Danki na e tereno di enseñansa, tur experto y “schoolbestuur” cu a pone hopi esfuerso y e compromiso pa hunto nos crusa e brug aki augustus proximo”, Minister Endy Croes a finalisa.
POLIS BUSCANDO: AUTO CU A PASA
TIRA, RECONOCI PA ESNAN NA E CAS
Sabana Basora - Diabierna anochi pasa di 8'or unidadnan policial di diferente districto a bay Sabana Basora 157 A, unda un drive by shooting a tuma luga.
Polis a yega y berdad a bin topa prueba cu a wordo tira, debi cu a haya impacto di bala ariba e cas. Esnan na e cas aparentemente lo a reconoce e vehiculo cu a
pasa, un indicacion cu nan di ken e ta.
Na e adres, polisnan a ricibi suficiente informe, y a pasa esaki door unda cu a cuminsa un buskeda den e parti zuid di Sabana Basora.
Den un pida mondi, parse nan lo a mira e sospechoso(shooter).
Ream special di polis a
activa y tambe a yuda busca. Unida di K9 tambe a ser mira buscando.
Varios ora despues polisnan a keda busca,
lamentablemente e helicopter a haci di falta.
María Corina MaChado a vota y a Celebra e partiCipaCion Masivo el'a yama pa cuida e voto
E líder di oposición, María Corina Machado, a vota diadomingo merdia na Los Chorros, Caracas, unda el'a destaca e gran participacion di e pueblo venezolano den e eleccion presidencial.
El'a duna un resumen di e incidentenan registra y ta pidi e testigonan ymiembro di mesa pa keda cuida e votonan.
"Venezolano a sali na un manera masivo, organisá, cu famia y nan a sorprende nos," Machado a bisa.
El'a resalta cu el'a yama pa vota tempran mainta, pero hopi hende a yega anochi y maduga pa haci fila y warda e centro electoral habri.
Machado, kende ta apoya e candidato Edmundo González, a conta con el'a recorre diferente centro di votacion na Caracas y Miranda, den zona manera Caricuao, Montalbán, El Recreo, Macaracuay, El Paraíso y Santa Eduvigis. "Nos a mira con e centronan ta yena di hende. Den tur e centro na e país nos a mira un participación grandi. Mi ta sinti mi masha orguyoso di ta venezolano y di e generación aki."
María Corina Machado: 42% di participación la 1:00 pm:
María Corina Machado a bisa cu nan a supera tur obstáculonan cu presenta, cu mas cu 1 miyon di hende desplega cu ta hasi trabou específico, tabto den y afor di país.
El'a duna un resumen estimá cu Plataforma Unitaria Democrática tabatin na 1:00 pm: un participación di 42,1% di e venezolano den e urna, aproximadamente 9.300.000 hende. "Si e sigui asina, probablemente ta bai ta un cifra di participación histórico, reclrd; y sin duda awe ta e dia di mas participacion cu kualkier eleccion den e últimonan 30 aña," el'a bisa.
El'a resalta e caso manera municipio Seboruco den estado Táchira, unda nan a registra un participación di mas ku 61% di e electorado; Yaracuy, caminda tabatin 48% di voto eherce; Mérida, cu 47,5%, y Delta Amacuro cu 47,5%, segun e resúmen na 1:00 pm.
Minister Maduro di Finansa ta informa: ARUBA TA DUNA PRESENTACION RIBA MANEHO FINANCIERO NA
SECRETARIADO DI CAFT
Dia 28 di juli, Departamento di Finansa a duna un presentacion riba e maneho financiero di Aruba na e secretariado di CAFT. E presentacion a tuma luga den presencia di Centrale Accountantsdienst (CAD) hunto cu e Tijdelijke Werkorganisaties Aruba en Nederland (TWO) cu ta coordina a e progreso di e reformanan den cuadro di e Landspakket.
E meta di e presentacion tabata pa informa CAFT di e trabounan cu ta wordo haci pa na Aruba pa por mehora e maneho financiero di nos Pais. Durante e presentacion CAFT por a haya un bista di e ultimo desaroyonan y tambe a haya un bista mas detaya di e procesonan financiero cu lo wordo fortifica of reorganisa e tempo nos dilanti.
Den cuadro di esaki por menciona cu ta trahando riba e implementacion di e modelo di '3-lines of defence,' cu ta un sistema di control cu lo mehora e control interno den e columna financiero di Pais Aruba.
Minister Maduro di Finansa ta gradici e ehecutivonan di Departamento di Finansa, CAFT, TWO Aruba y Hulanda, y tambe CAD pa e reunion frutifero aki na unda por a brinda un bista mas amplio riba e trabounan necesario pa por mehora e maneho financiero di Aruba. "Nos Pais ta recuperando y na un manera activo y cu rienda den propio man, nos ta traha pa sigui desaroya nos Pais su finansa publico," tabata palabranan di Minister Maduro di Finansa.
Prome Minister Evelyn Wever-Croes:
PROME MINISTER TA DESEA
DELEGACION DI ARUBA EXITO NA
WEGANAN OLIMPICO NA PARIS
“Boso determinacion pa representa Aruba riba e scenario mundial ya ta un logro grandi y Aruba ta hopi orguyoso di cada un di boso”
Paris, Francia, ta anfitrion di e Weganan Olimpico e aña aki for di 26 di juli te cu 11 di augustus. Weganan Olimpico Paris 2024 oficialmente a inicia diabierna ultimo na unda cu e eventonan tin como meta pa mescla tradicion
cu innovacion, enfoca riba sostenibilidad, union y paz, tecnologia, inclusividad y diversidad y un celebracion di cultura. Esaki ta di tres biaha cu Paris ta anfitrion di Weganan Olimpico, e prome na 1900, e di dos na 1924 y awo, despues di
100 aña, un biaha mas e miho atletanan di mundo ta competi den e prestigioso Weganan Olimpico na Paris.
Mas di 10.500 atleta for di 206 pais ta compitiendo den 32 deporte y 329 evento. Delegacionnan, durante ceremonia di inauguracion, a participa cada un poniendo enfasis na colornan di nan bandera y nan cultura. Delegacion di Aruba a luci cu diseño di Andrew Curiel, kende a inspira tambe riba colornan di nos bandera y cultura.
E apertura tawata un celebracion hopi spectacular y a enfatisa cultura, historia y innovacion Frances na unda cu pa prome biaha den historia di Olimpiada, e ceremonia di apertura a tuma luga diferente di un setup tradicional den un stadion. River Seine tawata e stage cu a mustra e bunitesa di Paris na unda cu delegacionnan a haci nan entrada cu botonan di diferente tamaño, cada pais encabesa cu nan cargador di bandera di nan pais. E procesion di 6 kilometer y 85 boto den e rio, a proyecta luganan icono di Paris manera e Eiffel Tower, Notre-Dame Cathedral, y e Museo di Louvre.
Un ceremonia diferente, enfatisando arte, musica, baile y cultura Frances.
E Weganan Olimpico ta mas cu solamente un competencia; nan ta un celebracion di humanidad, nan ta testimonio di kico por logra door di trabou duru, perseverancia, y disciplina propio. Prome Minister Evelyn Wever-Croes, den nomber di Gobierno di Aruba, ta desea e delegacion olimpico di Aruba y tur seis atleta cu ta participa den diferente deporte, hopi exito. Un danki tambe na señora Nicole Hoevertsz, Secretaria general di COA y Vice - presidente di IOC, cu a core cu e antorcha di e Weganan Olimpico door di cayanan di Paris.
“Boso determinacion pa dedica tempo pa train y prepara pa representa Aruba riba e scenario mundial ya ta un logro grandi y Aruba por ta hopi
orguyoso di cada un di boso. Awo na Paris, boso tin e oportunidad pa demostra boso talento y dedicacion na mundo. Biba cada momento cu curashi y confiansa den boso mes. Competi cu integridad y orguyo. Boso contribucion na deporte y participacion na e Weganan Olimpico ta grandemente aprecia. Aruba completo ta orguyoso di cada un di boso. Danki pa pone Aruba su nomber un baiha mas resona mundialmente den e ramo di deporte. Exito na cada un di boso’, Prome Minister a expresa.
Motociclista a cay cu broMMer,
despues cu un auto a subi su dilanti
Tanki Flip - Diasabra atardi den careda di 3'or polis y ambulance a bay pariba di rotonde di Tanki Flip, pa un accidente di trafico entre un auto y un brommer.
Polisa yega y ta topa cu e motociclista herida y tambe un Volkswagen memey caminda.
Segun informe na e sitio, e Volkswagen lo a haya un chance pa subi caminda locual e la haci tambe. E
tawata ariba e t- kruising y a subi pa bay pariba o sea su man robes.
Un motociclista pasando auto a hay'e cu e Volkswagen. Segun nos a compronde, aki ta unda e motociclista lo a maniobra y cay cu su brommer despues di dal contra e auto
Mirando cu e la ricibi algun golpi y rasca ambulance a wordo pidi, y na yegada e Paramediconan a
hib'e Hospitaal pa mas observacion.
Polis di trafico tawata necesario na e sitio, unda cu e la haya algun
informacion extra pa su rapport for di testigo/nan.
Departamento di Cultura: NOS HOBENNAN A SOBRESALI
CU NAN TALENTO Y CREATIVIDAD DURANTE E FINAL COMPETENCIA
HUBENIL GANG DI ARTE ARUBA 2024
Recientemente cu un sala di Cas di Cultura yen por a aprecia e final di e Gang di Arte, Dream, Dare, Do 2024. Nos hobennan cu yen di energia y disciplina a demostra nan talento den Baile, Teatro, Musica, Arte Visual, Audio Visual y Arte di Palabra despues di a participa na varios
tayer riba diferente disciplina e ultimo siman. E publico a gosa y apoya cada presentacion di e hobennan cu a briya cu nan talento riba escenario.
E grupo ganado di Gang di Arte 2024 a bay pa Superstars, cual ta forma pa Erick Jesus,
Nuirick Werleman, Shanté Mardenborough, Millyanne Wilson y DyShanely Courtar. Na di dos luga Unity Dance Crew forma pa Clifton Wong, Jeannique Flanders, Aanya Asran, Katelyn Lejuez y Joleimar Morillo. Na di tres luga Dynamic Dancers forma pa Neissa Civil,
Qishayra Muller, Kenya van Dinter, Valentina Merveille y Jason Wester. E ganadonan lo participa y sigui demostra nan talento durante aña den actividadnan local y den exterior. E grupo ganador Superstars lo representa Aruba den e competencia di Gang di Arte di Reino cu lo tuma luga na Hulanda proximamente.
Un Pabien y danki na un y tur, tur hoben participante y instructornan cu a forma parti den Gang di Arte y
tur esnan cu a duna un presentacion riba e tema di e aña aki cual tabata “Union”.
Departamento di Cultura por wak atras riba un Gang di Arte, Dream Dare Do 2024 exitoso na unda nos hobennan a sobresali demostrando nan talento y creatividad y esaki sigur ta sigui habri e caminda pa nan sigui educa, desaroya y amplia nan talento den e diciplina di Baile, Teatro, Musica, Arte Visual, Audio Visual y Arte di Palabra.
HOGE RAAD TA DICIDI OF TA E PUEBLO DI ARUBA TA DICIDI?
Si esnan responsabel kier laba man pa laga otro dicidi, anto ta pakiko no a laga e pueblo di Aruba mes dicidi den un referendum, prome cu e cassatie na Hoge Raad? Pakiko esnan responsabel, no a defende e derechonan di Dios y di e pueblo Cristian? Of ta miedo tin pa defende of persigicion? Ta na unda tur e firmanan di e pueblo Cristian a keda, pa stop e casamento di e mesun sexo? E no tin balor mas? E veredicto di Hoge Raad, ta solamente un interpretacion e ta, na e articulo 1 di constitucion tocante descriminacion, esaki ta un conseho e ta pa Aruba cumpli. Pero Aruba ta riba su mes, Aruba tin su statuut y ta esnan responsabel y e pueblo di Aruba ta dicidi. E constitucion di descriminacion ta constitui, di no descrimina hendenan di tur rasa y idioma di tur paisnan di mundo. Akinan descriminacion ta papia solamente di hende cu hende y no di inmoralidad di sexualidadnan y casamento di tur clase. Si un hende ta bin biba na Aruba y e ta biba den su sexualidad di tur clase of ta casa den tur
clase, esey ta su asunto. Pero e persona mester respeta e constitucion di e Ley di Censo, cu ta papia solamente di casamento entre homber y muher y esey tambe ta e Ley di Dios. Ta e hendenan den inmoralidad y deshonesto, ta nan ta bini cu e casamento di e mesun sexo y nan ta usa e discriminacion pa nan mes fabornan. E casamento di e mesun sexo ta un pika di inmoralidad y deshonesto,
cu ta danja e mentalidadnan di nos hubentudnan y ta danja nan conducta moral di bida. Ta con bo ta bisa, laga nos diferencia un banda y bo ta scohe inmoralidad y deshonesto pa e pueblo y bo ta bisa tambe, mester respeta e decision di Hoge Raad. Hoge Raad no tin nada di bisa, pasobra ta un conseho el a duna y Aruba ta ariba su mes pa dicidi. Pakiko bosonan responsabel, no a defende loke Corte di Husticia di Aruba a dicidi na December 2022, cu no ta permiti pa parehanan di e mesun sexo casa. Corda loke Dios Tata a haci cu tur e habitantenan di Sodoma y Gomora, nan tur a keda na shinishi pa medio di candela y azufre, pa motibo di nan pikanan di inmoralidad y deshonesto. Cristo Hesus ta bisa, no tene miedo di esnan cu por mata curpa, ma tene mas miedo di Dios, cu por tira alma y curpa den fierno. Mester bin cu un referendum mas pronto cu ta posibel y laga e pueblo mes dicidi. Pasobra bos di pueblo ta bos di Dios. Pa Dios nunca no ta laat, pa drecha loke
boso a danja.
Seferino Tromp
FORTALEZA PA FAMIA
Scirbi pa Pastor Marcel Balootje.
SI BO BISINJA SU CAS TA NA CANDELA, TIRA AWA
RIBA ESUN DI BO
Un ley di un enbergadura totalmente contrali na e palabra y principio di Dios a wordo aproba, pa asina pone henter Reino Hulandes bao di scuridad, esey ta e ley di Matrimonio di mesun sexo cu a wordo aproba door di Hoge Raad dia 12 di Juli ultimo.
Kico e ley ey ta nifica pa nos spiritualmente, pasobra politicamente nos tur sa caba cu tabatin un empate, pero tur esnan cu ta stima Dios sa mucho bon cu maldad nunca por empata cu bondad.
Prome cu e caso bay cassatie, hopi hende entre otro politiconan ta tabata sa e resultado. E unico cu no tabata sa ta esnan cu ta kere nas den hende cu nan ta kere den Dios, y semper e enemigo a sa di probecha di e ocasion, ora hende ta kere mas den hende cu nan ta kere den Dios.
Ningun hende cu sano huicio no ta pone plafond nobo pa nan cas mientras tanto nan dak di cas ta lek,pasobra bo risico di perde bo plafond nobo ta hopi grandi.
Mescos cu nos no por pone Dios un banda y kere den hende cu ta busca fama y posicion pa nan mes y ta prefera di gaña nan mes y no kere den Dios.
Un ley di piedra di trompica a wordo aproba, cu alegria , pa esnan cu no conoce Dios, of ta rechasa Dios pa motibo di orguyo of arogancia, bisando cu palabra di Dios ta anticua, pero hopi ta lubida cu locual Dios a establece hende no por cambie.
Pesey kico tin cu sosode awor?
Hende tin cu bira enemigo di otro?
Mas famia mester dividi?
Mas hoben mester bandona nan cas?
Mas problema di salud mental?
Mas hende ta kita nan bida, y ta keda demostra cu tur hende su man ta mara?
Mas libertinahe?
Mas inmoralidad y perversidad?
Mas parandiamento y bebemento.
Ki efecto e ley aki lo tin riba educacion di nos yuinan.
Ki efecto e lo tin riba nos adultonan mayor cu ta gusta broma cu nieto y nieta, pero awor no por mas,
pasobra nos a drenta den un epoca di matrimonio cu no por multiplica .( Genesis 1:27-28)?
Kico lo pasa ora nos lo bay nota e cambio cu ta tumando lugar y ta para scirbi den Romanonan 1:28-32?
Tin cosnan hopi serio y severo cu lo tuma lugar,
pasobra ningun hende por haci bofon di Dios, tur locual hende sembra nan ta cosecha.
No ta bon pa sinta laga algo sosode y despues bin hunga rol di Robin Hood of Superman, pasobra e mihor manera pa no participa den maldad ta di sali for di maldad, y asina mustra temor y respet pa Dios.
Samson tambe tabata hunga cu pica y e mes a bay Gaza bay busca su problema, y ora e a ripara cu e Spirito di Dios a bandone tabata laat caba.
Awor a keda na cada ken , na cada habitante di Caribe Hulandes, pa hala mas serca Dios, pasobra e tempo aki ta trabahoso y lo bira mas trabahoso, pasobra
nan mes a habri porta,pa duna e enemigo mas bentaha door di apoya y aproba maldad.
Of boso no sa cu boso curpa,ta e tempel di Spirito Santo,kende ta den boso, Kende boso tin di Dios,y cu boso no ta pertenece na boso mes? Pasobra boso a wordo cumpra,pa un preis, pesey glorifica Dios den boso curpa.( 1 Corintionan 6:19-20).
Abstene di tur forma di maldad.(1 Thesalonisensenan 5:22).
Laga tur esnan cu ta menciona nomber di Señor abstene di maldad.
Sinceramente, Pastor Marcel Balootje.
Amnesia relaciona: Mi pareha ta lubida cosnan importante
Si bo pareha lubida momentonan importante di e relacion bo por sinti bo ofendi y menosprecia. Nos ta conta bo kico ta amnesia relaciona y con e ta afecta e relacion.
Bo pareha a lubida e fecha di nan aniversario of di bo aniversario? E ta nenga di a bisa algun palabra cu bo sa cu el a bisa? Bo no ta corda e cuminda asina importante cu nan a reconcilia? Si e situacionnan aki ta familiar pa bo, bo pareha sentimental por sufri di amnesia relaciona.
Esaki ta un fenomeno comun cu por pasa cu cualke persona y cu ta obedece na diferente causa. Sinembargo, e ta tambe e origen di hopi discusion di pareha. Si malinterpreta of e ta tuma luga mucho frecuentemente, e ta afecta e vinculo profundamente. Kico e ta consisti di dje y con maneha esaki?
Kico ta amnesia relaciona?
Amnesia relaciona ta consisti den un lubidamento sistematico di momentonan, eventonan of situacionnan cu pa e otro parti di e pareha ta significativo. Asina un persona por lubida datonan relevante, experencia comparti cu tabata importante of combersacionnan cu a resulta transcendental pa e relacion.
No mester trata solamente di experencianan extraordinario manera un biahe special of un concreto, e por referi tambe na momentonan di tur dia. Mescos, no solamente ta sosode cu situacionnan positivo, pero tambe por lubida discusion of cennan mas desagradabel.
Den definitivo, un di e
miembronan di e pareha tin problema pa corda loke pa e otro tin un carga afectivo importante. Asina mes, esun cu ta corda perfecto no ta compronde con su compañero por a lubida di dje.
Kico ta amnesia relaciona?
Kico ta e causa di amnesia relaciona?
E origen di amnesia relaciona no ta semper e mesun cos. Pa compronde di unda e ta bini, ta necesario pa analisa otro comportacionnan y dinamica di e relacion cu ta guia nos den un sentido of otro. Aunke asina, nos ta detaya e causanan mas comun.
Diferente perspectiva Esaki ta un di e motibonan mas frecuente pa cual amnesia relacional ta aparece; y ta cu cada miembro di e pareha ta procesa, sinti y biba e momentonan den un forma diferente. Pues, su memoria no ta mescos. Es decir, loke pa un persona por ta un combersacion of un evento trascendente, pa e otro por no ta asina tanto y viceversa.
Cada un por evalua y priorisa diferente momento, of hasta interpreta diferente un mesun situacion. Di e forma aki, e memoria di ambos lo ta diferente y esaki por duna logra na discusion. Kisas niun di nan (of tur dos) no tin rason den nan relato, ya cu cada un a biba esaki na su mes manera.
Falta di atencion y compromiso
Tin biaha e falta di memoria ta bin di un falta di interes. Si e relacion a cay den rutina, si e persona ta biba e relacion automaticamente y cu su mente na
un otro luga, ta mas dificil pa recopila den su mente e recorda cada momento, pasobra e no ta prestando atencion.
Tambe a haya cu emocionnan ta hunga un rol fundamental den consolidacion di memoria y cu e informacion cu nos ta asocia cu un emulsion intenso ta mas facil pa warda y recupera.
Pa e motibo ey, si e sentimentonan di e persona a disparce i e ta biba e momentonan den pareha solamente como un custumber, su memoria lo faya mas frecuentemente.
Rasgo di personalidad
Tin diferente personalidad tambe ta asocia cu amnesia relacional. Den kaso cu un persona ta corda tur cos y e otro ta tende pa lubida, ta comun cu e prome ta presenta rasgonan neurotopico y e di dos ta biba hopi den e presente.
Asina, pa e prome lo ta fundamental pa corda cada palabra y experencia, y lo tuma como un ofensa cu su pareha no hacie. Na contraste, e di dos lo ta mas enfoca riba bida diario y lo duna menos importancia na loke a sosode den pasado.
Sinembargo, insatisfaccion den relacion y neuroticismo ta relaciona, pa cual e malesa lo bira evidente mas tempran cu laat.
Manipulacion emocional Finalmente, nos no por descarta cu e aparente falta di memoria ta un strategia di manipulacion emocional. Afirma cu no ta corda algo por ta un herment pa evita responsabilidad, invalida loke e otro persona ta bisa y obtene un beneficio.
Ademas, si e ta practica sistematicamente, esaki por hiba na e pareha cu ta duda di nan propio criterio y ta keda na merced di e otro. Esaki ta loke ta conoci como gaslighting.
Kico ta e causa di amnesia relaciona?
Den algun relacion, un di e miembronan ta fingi di no corda eventonan relevante cu e úniko proposito di manipula e otro.
Ki consecuencia amnesia relaciona tin riba e pareha?
E consecuencianan di amnesia relaciona den pareha ta diferente pa cada miembro. Esun cu e ta corda por sinti su mes ofendi, herida y desprecia pasobra cu e otro ta lubida. E por considera cu su pareha no ta consider'é, cu e no ta apre -
cia ni balora momentonan hunto y cu e no ta un prioridad den su bida.
Di otro banda, esun cu presenta amnesia por sinti su mes presiona, exigi y hostiga pa e criticanan continuo di e otro. E acusacionnan di falta di amor of di compromiso di parti di e pareha por resulta doloroso y ofensivo, loke tambe ta resulta den numeroso conflicto i discusion.
Kico nos por haci tocante esaki?
E medidanan cu por tuma den e caso aki ta depende di cua ta e causa. Pa identific'e, ta necesario pa tene cuenta cu un contexto mas amplio. Si ta trata di falta di atencion of di compromiso, e actitud aki lo ta visibel den otro aspecto di e relacion. Algo cu tambe lo pasa den e caso di manipulacion.
Den e situacionnan aki ta conveniente pa evalua e situacion y considera di bandona e relacion pa proteha e integridad mes. Busca yudansa profesional ta clave pa saca afo cual ta e miho opcionnan.
Ademas, si e amnesia relaciona ta un percepcion pasobra e personalidadnan of perspectivanan di e dos ta diferente, otro aspecto di e pareha lo funciona na un manera adecua. Den e caso aki, comunicacion y flexibilidad lo ta determinante.
Ta fundamental pa tene na mente cu pasobra un persona no ta corda e mesun momentonan cu bo —of di e mesun manera— no ta nifica cu e no ta stima bo of cu e no ta balora e vinculo. Pues, no mester forsa e otro pa procesa, interpreta y sinti manera bo ta hacie.
Bijbel ta prohibi tur relacion sexual pafo di matrimonio
E diabel ta purba cambia e moda di biba di hende, den libertinahe sexual prohibi. E mundo por cambia, pero e palabranan di Dios nunca no ta cambia. Gobiernonan di mundo por pasa leynan cu ta contra di scrituranan di Dios, pero Dios ta bisa den Bijbel, Bijbel Malakias 3: 6 : “Ami Senjor, Mi no ta cambia.” Bosonan no sa, cu tur relacionnan sexual pafo di e Sacramento di Matrimonio, ta un pika condenabel pa fierno. Den e di 9 Mandamento di Dios ta bisa: “ Lo bo no comete e pika di fornicacion, esaki ta e relacion sexual prohibi, esta : Na esnan cu ta biba companja, na esnan cu ta casa pa Raad so, e prostitutanan y na e libertinahe sexualnan. Bijbel 1 Corinthionan 6: 18 ta bisa: “Abstene boso di relacion sexual prohibi. Tur otro pika cu hende ta comete, ta tuma lugar pafo di su curpa. Ma esnan cu ta haci relacion sexual prohibi, ta peka contra di su mes curpa.” Bijbel 1 Corinthionan 7: 2 ta bisa: “Ma, si ta pa e tentacion di haci relacion sexual pafo di matrimonio, anto ta mihor cu cada homber tin su mes esposa y cada muher tin su mes esposo.” Bijbel Hebreonan 13: 4 ta bisa: “Tur hende mes-
ter respeta matrimonio den tur aspectonan y mantene e fielded den e relacionnan entre esposo y esposa. Dios ta castiga na esnan cu tin relacionnan sexual prohibi y na esnan cu ta comete adulterio.” Bijbel 1 Tessalonicensenan 4: 2 – 5 ta bisa: “Boso conoce e instruccionnan cu nos a duna boso riba autoridad di Senjor Hesus. E boluntad di Dios ta, pa boso bira santonan y pa boso no tin relacionnan sexual pafo di matrimonio. Cu cada uno sabi di busca un esposa den santidad y respet, sin laga e mal deseonan
desvia boso, manera sa haci den e pueblonan cu no conoce Dios.”
Bijbel Colonsensenan 3: 5 y 6 ta bisa: “P’esey, mata loke ta keda den e bida terenal den boso, esta : Inmoralidad sexual, impuresa, mal pasion, mal deseonan y avaricia cu ta mescos cu idolatria. Esakinan ta e pikanan cu ta trece e castigonan di Dios.” Bijbel 1 Corinthionan 6 : 19 y 20 ta bisa: “Bosonan sabi esey, cu boso curpa ta tempel di Spirito Santo, kende ta biba den boso, kende boso a ricibi di Dios. Boso no ta di boso mes, boso ta cumpra y e
prijs ta paga. Glorifica Dios anto den boso curpa.” 1 Corinthionan 6 : 9 y 10 ta bisa : “Boso no sabi, cu esnan cu ta comete inhusticia, nan lo no drenta den e Reino di Dios? No ganja boso mes, na esnan den relacion sexual prohibi, na e sirbidornan di Diosnan falso, na esnan den adulterio, na e homosexualnan di tur clase, na e ladronnan, na e alcoholiconan, na e blasfemadornan, na esnan golos pa plaka, na e abusadornan, ningun di nan lo no tin parti den e Reino di Dios.” Bijbel Marko 10 : 6-9 ta bisa : “Ma na principio tempo di creacion, Dios a traha nan homber y muher. P’esey e homber lo bandona su tata y su mama, pa e uni cu su muher y e dosnan aki lo bira un curpa. P’esey, loke cu Dios a uni hende no ta permiti di separa.” Esaki ta e Sacramento di Matrimonio den Misa, na unda Dios ta uni e pareha den un solo curpa, pa medio di un sacerdote. Den e Sacramento di Matrimonio aki, Dios ta duna e pareha e regaldo di bida sexual y e muher no ta donjo di su mes curpa, sino su esposo, tambe e homber no ta donjo di su mes curpa, ma su senjora, 1 Corinthionan 7 : 4.
Charcot Foot ta un padecimento diabetico ireversibel:
Tuma accion si bo mira sintomanan
Charcot Foot ta un complicacion no ulcerativo di e piel cu por presenta cerca personanan cu ta sufri di diabetes. Charcot Foot ta wordo caracterisa pa e debilitamento repentino di e wesonan di e pia di esnan cu ta sufri neuropatia, e wesonan ta debilita a punto di fractura y cu canamento sigui, e pia eventualmente ta cambia di forma.
A medida cu e padecimento aki ta avansa, e arco ta vence y e pie ta adopta un forma anormal, tumando e apariencia di e base di un stoel di zoya.
E lesion importante nervioso aki (neuropatia) deriva di diabetes por produci importante complicacionnan di salud. Pesey esnan cu ta padece di sucu, ta necesario cu nan ta conoce kico ta causa exactamente charcot foot, pa di e forma aki, tuma tur e medidanan necesario pa su prevencion.
Charcot foot generalmente ta aparece cerca pashentnan cu diabetes mellitus cronico y casi semper, hopi mal controla. Su presencia por tin aparicion di un sin numero di problema, in-
cluyendo perdida di pia, fractura, colapso of perdida di e arco di e pia, deformacion masivo, ulcera, amputacion y den casonan hopi grave, morto di e pashent.
E artopatia neuropatico ta un padecimento hopi grave cu por hiba na un deformidad importante, e incapacidad y hasta incluso amputacion. Debi na su gravedad, ta importante cu pashentnan cu tin sucu, un enfermedad frecuentemente relaciona cu neuropatia, tuma medidanan preventivo y consulta inmediatamente si ta presenta e signo of sintomanan.
Charcot foot ta un deformidad compleho di e pia, considera como un complicacion progresivo, lento, sin dolo y cronico cu ta sosode den un of den varios articulacion debi na deficit neurologico, manera cu por ta un neuropatia. E ta desaroya como resulta di e perdida di sensibilidad den e pianan debi cu e nervionan ta wordo afecta y e causa di un weso kibra cu no a wordo detecta door di falta di sensacion. E malesa aki ta avansa y tin destruccion di e tehidonan suave di e pia.
Sin sinto dolor, e pashent cu fractura ta sigui realisa su bida diario cu un weso kibra, empeorando e condicion medico, pa cual, den mayoria di e casonan,
solamente ta keda e posibilidad di amputa.
Den otro caso, e destruccion di e articulacionnan ta asina grave cu e ta causa malformacion permanente den e pia cu protuberancianan oseo. E condicion aki ta rekeri un sapato special pa semper.
Entre e caracteristicanan aki di e lesionnan no ulcerativo di e pia diabetico nos por menciona:
* E pia ta cambia di forma debi na e infeccionnan di e weso y articulacionnan cu e ta produci.
* Den un comienso ta dificil di detecta, debi cu ta surgi un area cora y inflama, cual ta trata como un infeccion.
* Na principio e Charcot Foot no ta doloroso y hasta por confundi'e cu un proceso di celulitis.
Ta fundamental cu personanan cu ta sufri di diabetes pa nan controla den forma periodico, e salud di su pianan, ademas ta importante pa nan sa cu e pia ta un structura conforma pa weso, musculo, ligamento, etc, unda cu cada un di e partinan ta actua den harmonia.
Personanan cu ta sufri di diabetes mester yega na un riguroso control di su pianan ya cu mantene un pia sano , ta reduci e riesgo di complicacionnan manera ulcera of amputacion.
Ta conveniente aclarea cu Charcot Foot no por wordo reverti, pero cu su efectonan destructivo por wordo para si e wordo detecta na tempo.
Den e sentido ey, mester tene na cuenta cu su presentacion ta rapido y ta cuminsa cu un colora-
cion cora di e pia, compaña cu temperadura halto di e cueero; riba e signo ey ta asocia cu hinchameno y den casonan cu e sensibilidad no wordo afecta, di dolor.
Un persona cu ta sufri di diabetes y ta sufri algun di e sintomanan aki, por ta desaroyando un Charcot Foot of por ta frente un otro situacion di emergencia pa cual mester consulta di inmediato un dokter.
MI DEDICACION NA MEMORIA DI IMELDA RUSTVELD
Cu e articulo aki, mi ta desea di manda tur palabra di condolencia na henter famia di señora Imelda Rustveld y na tur cu a stim’e.
Mi tawatin sigur 8 aña di edad, tempo cu mi a scucha e nomber, scucha e bos y mira Imelda Rustveld su potret riba e caft di un disco Lp na radio 1320 am, VOZ DI ARUBA.
Mi tata Addison Croes (dfm), E bos di Aruba, e tempo ey tawata disfruta di un sintonia respeta den su programa Festival Crioyo, dedica na Aruba su artistanan di canto y tambe
senta Aruba, e aña ey na e festival di ranchera Antias, arasando cu tur premio cu por tawatin. Algun cantante cu mi por corda rib’e Lp ey tawata Vale Croes, Yolanda van der Linden, Linda Wolf, Bubu Bislick, Bertha Croes y tambe Imelda Rustveld. Apart cu mi tawata fan grandi di e musica ranchera, danki na mi mama Josefa- y mi tata Addison Croes, di biaha ora mi a wak e potret di Imelda Rustveld compaña pa un fam cu mi a haya sumamente interesante, mi a bira fan. Ora mi a laga Juan Carlos toca e cancion, mi a bira hasta mas fan ainda. E cancion dje Lp ey tawata e famoso cancion La Basurita, interpreta pa eo e cantantenan Mexicano Beatriz Adriana y Maria de Lourdes. La Basurita ta un di e cancionnan clasico di ranchera cu di chikito mi a gusta y scuchando Imelda interpret’e tawata motibo suficiente pa mi pidi Juan Carlos toc’e mas biaha den Festival Crioyo.
algun internacional. Papi, manera mi tawata yama mi tata, tawata transmiti tanto cariño riba mi ora cu e tawata papia di e artista Arubano. E tawata hibami, casi tur siman, radio cu ne y hunto cu Juan Carlos Hill, nos tawata dicidi cua disco di cua cantante tawata tin cu toca. Mi tawata permiti pa bay den studio 2 di Voz di Aruba y baha e Lp-nan abou y hiba algun pa Juan Carlos toca.
Un di e LP-nan, cu nunca mi a lubida, tawata e Lp cu e 10 cantantenan Arubiano di ranchera, cu a repre-
Añanan despues mi a bini bek di Hulanda y 8 aña pasa, mi a topa Imelda, su yiu Milly, cu ya tawata un amiga di mi, y nan famia, den un restaurant na Boegoeroei. Aki mi a cera conoci oficialmente cu Imelda y nos a cuminsa papia cu e sa yiu di ken mi ta y cu hasta mi mama tawata den grupo di aguinaldo antes. Imelda y Milly a bisami cu nan lo haya masha leuk si mi yega e siman siguiente nan cas na Cura Cabay y train cu nan grupo di aguinaldo cu yama “Flor di Pasco”. Mi a dicidi di tuma e reto y nos a train y presenta varios luga den temporada di Pasco. Mi a cera conoci tambe cu un grupo di cantantenan maraviyoso cu semper a tratami bon. Mi tawatin e honor di a graba den studio di Diego Henriquez y Dan-
ny Koolman, dos cancion, cu ta riba e cd ey. Semper mi lo keda agradecido na Imelda cu cada bes tawata anima nos pa saca e miho di nos. E honor mas grandi tawata ora cu Milly y Imelda a honrami pa ta e padrino di e cd ey, hunto cu Nancy Ramos, cu a bini Aruba for di España na 2016. E storia por continua, pero mi ta termin’e aki gradiciendo Imelda Rustveld pa tur e cariño y animacion brinda. Pa semper nos lo keda celebra y presenta e bos di oro di Aruba su reina di musica ranchera y aguinaldo den nos programanan navideño na Magic 96.5 fm cu Erin Croes. Pa Erin semper tawata un placer pa tawatin Imelda Rustveld den su programa Na Drempel di Fin di Aña p’e entrev-
istanan campeon. Esta un dama talentoso cu energia, Imelda tawata. Danki Imelda, masha danki pa tur cos, forsa na su famia stima, grupo Flor di Pasco, su amigonan y cu Imelda sosega trankil sabiendo cu cu el a laga un bunita stempel cultural y musical atras riba nos tur.
“Señor ta mi wardador, mi’n tin falta di nada Den cunucu di yerba berde e ta ponemi sosega. E ta hibami na awa trankil, Pa mi bolbe haña forsa”.
Salmo: 23
Nos ta anuncia fayecimento di:
Khloë Alexandra Heronimo
Cariñosamente yama: “Koko” *12-12-2007 - †19-07-2024
Na nomber di su:
Mama: Kimberly Maduro
Tata: Joselito Heronimo
Padrasto: Elton Maduro
Rumannan: Kyandra Maduro, Kimy-lienne Maduro, Joseanny Heronimo
Stiefzus: Zaynah Maduro,
Wela y Welo:
Ivelisse Sanchez y Jose R. Kock
Wela stima: Mama (Fea) Dirksz
Welo: †Jossy y Lourdes
Wela di cariño Trudy Hasel
Bisawela y Bisawelo: Catharina (Jeja) Tromp-Sanchez y Carlos (Jejo) Sanchez. †Catrien Dirksz
Tanta y omonan:
Stephanie Kock y Dalbert Pujols
Rose-Ann Kock y Aigel Brete
Jiandra Kock
Reynaldo Sanchez y Eric Arends
Alexander Solarte Tovar
Sharline Buckley
Jeanine Rodriquez
Marina Heronimo
Josmar Heronimo y famia
José Heronimo y famia
Jermaine Heronimo
Jaymir Heronimo
Tanchi mama, Jaja y Dess
Tanta grandi: Pechi y Mai, Chichi y famia
Omo grandi: Ruben y Sora, Ricky y Gina Croes
Mihor amiga: Jeande, Shardy
Prima y Primo: Kayla Solarte Tovar y Shayna Pujols, Aiden Brete y Alliyen Brete, Ivan Amaya y Alexandra, Maelyh Heronimo, Marajah Heronimo, Shandrik Wanga
Famia: Kock, Heronimo, Maduro, Dirksz, Tromp, Briesen, Briezen, Ruiz, Semeler, Sanchez, Solarte Tovar, Brito, Buckly, Henriquez, Brete, Martinez, Pujols, Loopstok, Croes, Maduro, Growell, Ras, Starke, Eckmeyer, Krozendijk, Lopez, Gonzalez, Geerman, Kelly, Villanueva, Vrolijk, Solognier, Wolff
Disculpa nos si den nos tristesa nos por a lubida algun famia, amigo of conocir.
Ta invita pa e acto di entiero cu lo tuma lugar diamars 30 di juli 2024 na misa Inmaculada Concepcion di 2:00 pa 4:00 pm, despues nos lo hiba “Koko” pa Santana de Vries na Sta Cruz.
Ta pidi pa bin bisti na colornan alegre y depues di entiero no ta ricibi Bishita na cas.