AGNOR LGU MODONAR OG YUTA SA DEPEDCABADBARAN

AgNor LGU modonar og yuta sa DepEd-Cabadbaran

I-donar sa probinsya sa Agusan del Norte ang 1,000 metro kwadrado nga yuta nga anaa sa Barangay Comagascas, Cabadbaran City para sa pagpalapad sa school/office building sa Department Education (DepEd) Cabadbaran City Division.

Gihatagan na og otoridad bag-ohay pa lamang sa Sangguniang Panlalawigan sa Agusan del Norte si Provincial Governor Dale B. Corvera, aron sa pagpirma sa Deed of Donation tali sa probinsya ug sa DepEd Cabadbaran City Division, alang sa maong paghatag sa yuta pinaagi sa Sanggunian Resolution No. 057-2022, nga gipangamahan ni Provincial Board Member Rodulfo Pitogo, tsirman sa Committee on Human Settlement, Land Use, and Provincial Properties.

Nakita sa komitiba ang importanting papel sa nasangpit nga ahensya sa pagumol sa hunahuna sa mga kabatan-onan pinaagi sa paghatag og dekalidad nga batakang edukasyon nga patas nga makuha sa tanan ug magbutang og pundasyon alang sa tibuok kinabuhi nga pagkat-on ug serbisyo alang sa kaayohan sa kadaghanan, ug kinahangalan sa maong buhatan ang mas dako nga lugar alang sa opisina niini.

Base niini girekomenda ang paghatag otoridad kang Gobernador Corvera isip mao ang awtorisadong opisyal nga magrepresentar sa probinsiya sa tanan nga mga transaksyon sa negosyo niini ug mopirma alang niini sa tanan nga mga bond, kontrata, ug obligasyon ug uban pang mga dokumento nga naay awtoridad gikan sa Sangguniang Panlalawigan nga gimando ubos sa Seksyon 465 (b) (vi) sa RA 7160. (Jessica O. Mellejor, LGU-Agusan del Norte/PIA-Agusan del Norte)

Panginahanglan sa laptops pagpalambo sa produksyon ug marketing sa mag-uuma, gipadayag ni Gob. Corvera sa DICT

Gawas sa pagsilbing himan pagprotekta sa katawhan sa probinsya sa Agusan del Norte nga mabiktima sa cybercrime, buot usab ni Gob. Dale B. Corvera nga maapil sa programa ang paghatag og laptops sa mga maguuma aron magamit sa ilang panginabuhian ilabina diha sa ilang marketing campaign.

Kini ang gipadayag ni Gob. Corvera atol sa pag-turn over sa 25 ka laptops sa Department of Information and Communication (DICT) ngadto sa probinsya aron magamit sa kampanya batok sa cybercrime.

Gilantaw sa gobernador ang dakung matabang sa laptop sa mga grupo sa mga mag-uuma sa probinsya pagpalambo sa negosyo ilabina sa pag promote ug market sa ilang mga produkto kung maka angkon sila niini nga himan. “I am very happy that Agusan del Norte was chosen nga recipient ani nga laptops… because kini nga mga laptop will enhance the capacity and capability sa mga recipients ani unya. Mosugot ta ug sa dili halos tanan sector nagkinahanglan na niini,” sumala sa gobernador.

“And I know they will need this (laptops). I am thinking of the farmers groups nga matagaan namo og capital pag improve sa ilang productivity ug pag market sa ilang mga produkto.”

Ang probinysa naay 65 ka organisasyon nga partners niini sa pagpatuman sa mga proyektong Plant! Plant! Plant! ug Process! Process! Process! sa AGUSAN UP!, ang kampanya sa pagpaplambo sa administrasyon ni Gob. Corvera kaabag ang buhatan ni Kong. Angel Amante-Matba.

“I’m thinking of the sectoral groups ilabina niining atong mga farmers ug fisherfolks ug uban pang mga kooperatiba sa Agusan Up... In a way nga maka improve sa panginabuhian sa atong mga tao,” panapos sa gobernador. (SMP, LGUAgusan del Norte/PIAAgusan del Norte)