GROUNDBREAKING SA KALSADA SA SANGAY UG GUINABSAN SA AGNOR, GIHIMO

Gilusad bag-ohay pa lamang ang Upgrading o Improvement sa Farm-to-Market Road sa Barangay Sangay ug Barangay Guinabsan, Buenavista, Agusan del Norte sa usa ka seremonya nga gipangunahan nila ni Gob. Dale B. Corvera ug Kongw. Angel AmanteMatba.

Gawas niini, ongoing gihapon sa probinsya ang P118 milyones nga upgrading/improvement sa Culit-Pag-aoJaguimitan Provincial Road sa Nasipit, proyekto nga gisugdan ni kanhi Gob. AmanteMatba nga kongresista sa iduhang distrito sa probinysa na karon. Ang mga proyekto sa Guinabsan ug Sangay kabahin sa gipundohan ubos sa Local Government Support Fund (LGSF) - Support to Barangay Development Program

alang sa fiscal year 2021 nga nagkantidad og Php20 Milyones matag barangay ubos sa National Task Force-End Local Communist Armed Conflict (NTF-ELCAC). Sa 167 ka barangay sa Agusan del Norte, 33 naidentify ug gideklara na nga “insurgency cleared barangays” nga apil sa mga matagaan og P20 milyones nga pundo ug apil ang Barangay Sangay ug Guinabsan niini.

Sa iyang mensahe, gipadayag ni Gob. Corvera ang iyang kalipay nga gideklara ang mga barangay sa Sangay ug Guinabsan nga “insurgency cleared” na.

Iyang dugang nga sunod sa maong deklarasyon mahimong hugot pa ang panaghiusa sa mga local ug nasudnong ahensya pagpadangat og mga serbisyo. Pasabot sa gobernador nga kapin sa 50 ka tuig na ang problema sa insurhensiya sa nasud ug iyang nakita nga ubay-ubay na sa mga barangay ang

nahimong “insurgency cleared” dala sa hiniusang pagpadangat sa lokal ug nasudnong ahensya og mga serbisyo ubos sa “whole of nation approach” nga gimando ubos sa Executive Order No. 70 sa kasamtangang administrasyon. “Adunay Executive Order No. 70 (diin) ang tanan nga ahensya sa gobyerno, naghiusa ug nag deliver og mga services sa mga kabarangayan mao nga karon mga kaigsuonan makita ninyo nga naa gyod ang gobyernno kanunay naghatag og serbisyo kaninyo,” sumala sa gobernador. Sa ilang bahin, mapasalamaton kaayo Kapitan Roldan Dalagan sa Sangay ug si Kapitan Mariano Galinato sa Guinabsan maong proyekto. “Nalipay gyod kaayo mi nga niabot ang panahon nga dugay ng pangandoy sa mga tao, dili lang kami nga mga barangay opisyal. Dako kaayao among kalipay, dili matukib gyud,” sumala pa ni Kapitan Dalagan. Sumala ni Regional Director Lilibeth A. Famacion sa Department of Interior and Local Government [DILG]-Caraga nga maoy nagpahiluna sa maong proyekto sa bahin sa nasudnong buhatan mahuman sulod sa 115 ka adlaw human kini sugdi karong tuiga.

Mitambong usab sa maong okasyon sila si Vice Gov. Ramon Bungabong, Provincial Director Ellen Veede Chua sa DILG, RD Tarhata Mapandi ug PD Rey Cueva sa TESDA, PCol Martin Gamba, Col Adonis Ariel Orio, Board Members Elizabeth Calo, Dick Carmona, Rudy Pitogo, Datu Ampiyawan, Provincial Administrator Gerry Joey Laurito ug uban mga barangay officials. (Shena Mae Pabia ug Sonny Montilla, LGU Agusan del Norte/PIA Agusan del Norte)