Juchari Echerio. Miiuntskani Ka Miiuntaskurhintani Juchari Echerirhu

Colectivo Anhatapu (Coordinación).

Juchari Echerio. Miiuntskani Ka Miiuntaskurhintani Juchari Echerirhu Cherán, Michoacán, México, junio 2016.

1. Juchari Echeri Nuestros Territorios; 2. Purhépecha; 3. Michoacán; México; 5. Cuaderno de trabajo; 6. Colectivo Angátapu, coordinador.

Coedición: Concejo Mayor y Consejo de los Bienes Comunales de Cherán K’eri / Espacio para la Cultura Ambiental, A. C.; y Red Temática sobre el Patrimonio Biocultural, CONACYT. Edición y compilación: Diana Alejandra Manrique Ascencio, Lenny Garcidueñas Huerta, Aída Castilleja González y Arturo Argueta Villamar Diseño gráfico y formación editorial: Lenny Garcidueñas Huerta Cronología: Josué Velázquez Velázquez Traducción y adaptación: Catarino Custodio Romero y Pedro Márquez Joaquín Primera edición en español, 2013 Primera reimpresión en español, 2014 Primera edición en idioma purépecha, 2016

Se agradece ampliamente al programa Redes Temáticas, CONACYT, su apoyo para la realización del Taller “Cherán K’eri, conociendo y reconociendo nuestro territorio”, para la primera edición en español, para la traducción y la primera edición de este libro en lengua purhé.

Este libro ha sido hecho con base en Conocimientos colectivos y recursos públicos, por lo que puede copiarse y difundirse libremente, siempre y cuando no se altere su contenido, ni se comercialice o se apropie privadamente, por persona moral o física, todo o parte del mismo.

Hecho en México ISBN: 978-607-95720-3-7

3

Juchari Echerio Miiuntani ka miiuntaskurhintani juchari echerirhu Ueenakua

Iretecha káskusinti ts’imeri irekuani imecheri echerirhu. Jimesti enka ma ireta irekaka, enka márku marhoataka t’irekuani, uantakuani, uekatsemakua ka ampemanka úkurhika nótki xáni ióni.

Iretsikuarhu ueenasinti xarharani ka úkurhipani ampe ka jima pakarasinti ireteri ampe enka imeerika, ka ima pakarasinti imeri uekatsemakuarhu ka no méni xerekurhintani. Ma iretarhu anapuecha p’orhemp’erasinti jimpokaksi márkueska, ka istu p’orhemperanhasinti jakajkukuani jimpo, juramukuani jimpo, ka nitamakurhikua ampe jimpo. Mák’u uekatsemakua, uápuru, irekurhikua ka echericheri jamekuecha, mítistiksi eska méni isi no uni jarhasinka

kurhankutsperanhani, joperu ístuksi mítisti ampe mák’ueniski ka ampe méntarueniski, ka na enka pakatperanhak’a ka méntaru ueentani sési irentani ireta ka jima irericha.

Mántani ireta exesinti ampe enka jaka ma uanontani.

Miiuntskasinti, ka arhinhatarani iápuru isi, uantanhantasinti ampe ma enka jima úkurhika, ka jimesi jarhasti imeri irekua pauani pauani. Miiusti nanimanka imeerika, ka istu irenkurhiricheri. P’orheecheri jimpo kánikua jukaparhakuesti echeri nanimankaksi júkskak’a, p’ukutapuecha, juátecha, itsi uératicha, eraxamakua ka pákuecha. Japontani sántaru jukaparhakua exesintiksi ómikuecharhu anapuecha, ka istu ts’ima enkaksi ma uanamukuni irekaka Petatsikuarhu ka Siraueni ka Tsakapu isi, ka májkueni jukaparhakuesti iorhekua imechani jinkoni enkaksi Eraxamani irekaka.

Ima ampe enkaksi arhikia iretsikuarhu anapu, ka márutaru ampe enkajtsi cha úaka jima kuturani, nak’iruka táchanika mántani ampe, terokutsperasintiksi.

Mínkurhikua ampesti, ka jima jánhaskurhisti parhakpini anapu ampe, ka mítintskurhini k’uiripu enka jima irekaka.

Isi jimpo, ekaksi ini takukukatarhu arhijka itsi uératicheri o juátecheri ampe, mántani chát’utsi’ miáni jaka ampe enka cha jatsikurhika, na enka jaka ima ampe, eratsikua ka úkua enka jimesi únhani jaka.

Juchari Echerio Miiuntskani ka miiuntaskurhintani juchari echerini, enkaksi ueenani úka, eratsikua jintespti ánchikurhita ma úni iretarhu anapu tumpi ka tataka ka nanaka sapirhatichani jinkoni ka k’ératichani jinkoni, ampe enka imecha mítika ka úkurhisti uéxurhini 2012 jimpo. Imani úkuani jimpo jirinhantatiksi nána úni eska jorhenkurhinhapirinka miiuntaskurhintani echerirhu; imani úkuarhu mámaru ampe úranhasti; mík’ukurhikua ampe, eska jánkua mánharhítani, únharhikuni ampe, uantantskua ka p’itakata ampe, ampe enka mítinhaka ka úranhani; istu k’uanispti uantantani enka táchani mítikurhinhaka, kurhach’peranhani ka mítperanhani mak’u iretarhu anapuecha.

Iámintu ampe enka jima xarharaka, karanhasti ka sési jatsinhani iúmu ekuatsi kónharhikua jimpo, ka ístu jatsikunhasti únharhikukatecha, p’itakatecha ka karanharhikukua ampe enka úpirinka ne enka uékapirinka ka tsípikua jatsini uantaxani imeri echerini jinkoni o úni jorhenkurhini ampema.

I jasi takukukata enka orheta únhaka, Kastiia anapu uantakua jimpoespti ka mántani isi uantakua p’orhe inchaatanhasti. Iasi enka únhantaka i mátaru takukukata enkari ják’irhu kámani jaka, iámintu mónhantskata jarhasti p’orhepicha jimpo, ka mántani ísku pakarasti Kastiia anapu uantakua. Ámpe ísku mónhantskata jaki, nit’u uantakuechak’u p’irhikunhantani, uantakuecha eratsintskatesti.

Ima enkaksi mónhantaka márku ánchikurhistiksi, ka jirinhantastiksi námanka sántaru sési kurhankunhaaka ma uantakua, ma arhikua, ma eratsikua iápuru iretecharhu ini k’éri iretsikua P’orhepichao.

Istu méntarueni únhantasti eska na jápka uéenani. Ini jimpo, máru arhut’atecha arisi únhantasti, exeparini eska marhoauaka iápuru ireta P’orhepichao uéenatarani uantontskurhinhani iretsikuarhu anapu ampe, mítiparini na enka jánhaka Ch’erani K’éri ka ampe enkaksi jánhaskaka, ka isi uéentani exeni ka eratsintani ka xénhchani Juchari Echerini, juchiini P’orhepichao, ka Juchari Uinhapikuani.

Aída Castilleja, Diana Manrique ka Arturo Villamar Argueta

6

7

Ampe enka jataka 10 Néna enkaksí mókuntaka 15 Jimpanhi páp’erakua jorhenkurhiparini mímíxikueri ampe 18 I no ísku uantantskuesti Ireta, juáta ka chérpikua 25 Ji echerintu irekaska Na exekurhisini ji ixu?

8

41 Juchiti Ireta Juchari k’uiripu ka echeri nani enkani irekaka 75 Juáta ka juchari tsánharhikuecha 98 Ampe enka uékapirinka eska úkuarhepirinka ixu Ch’erani K’eri 100 Uantakuaecha 9

NENAKSI MÓKUNTASKI Enka takukukata Chérani K’éri mókuntaka p’urhepecha jimpo uékaskachi xarhatani ísi eska na uantanhak’a Ch’erani ireriecha, marhuataskaksi kararatakuechani enka kúnkuarhekua P’urhe Uantakueri Juramukua (PUJAC 1991) (Academia de la Lengua Purépecha) xarhatapka, ka tátsekua uinhats’itasti Dirección General de Educación Indígena Secretaria de Educación Michoacán anapu. Indeni kararatakuechani marhuataparini xarhataxakaksi eska nómpema ts’unhapekua jukasti karani ísi eska na uantanhak’a Ch’erán ma jasi minta úraparani. Uékaxakachi eska jánhaskaaka uantaxeparini eska úsinka karani néna enka táchani uantanhak’a marhuataparini ma jasi kararatakuechani. Isi jimpo p’ichpiri, enkari arhintani jaka íasi, arhintaakari ísi eska na uantanhak’a Ch’erani ka ístu eska úsinka karani i jasi karatarakuechani úraaparini, jánhaskasinkaksi eska némenka uékaaka arhintani máteru kararatakuechani marhuataparini jatsinharhikuskaksi máteru kararakuechani (cuadro de equivalencias) ka jima xarhatasinkaksi tuo (siglo XVI), tata Máximo Lathropueri (Proyecto tarasco) ka tsimani enkaksi marhuatanhani jaka íasi.

Enkaksi ánchikuarhini jápka Ch’erani K’erini mókuntani Instituto Nacional de Lenguas Indígenas (INALI) ka Universidad Intercultural Indígena de Michoacán (UIIM) ióarhip’estiksi tánkuarheni Morelia 24, 25 ka 26 jurhia junio kutsi 2015 uéxurhini, menta tánkuarhekua enka

10

uantaxenhapirinka nena márku jasi karani iámintuecha. Isi jimpo jucha narhuataxaka enka jima uantontskuarhenhapka enkaksi uantapka jánhaskaticha Cristina Monzón, Fernando Nava, Sue Meneses, ístu uékasinkaksi sani ampe arhinteru. Jatsikuskaksi uinats’itakua uantakuecharhu enka uinhats’ika mintsirani, kutumukuarhu enka jaka urhetku, jarhastiksi máru uantakuecha enka no jukaka uinhats’itakua, eska ari: enka, jimpoka, emanka, joperu. Isi mintsikaparini eska nemanka arhintaaka úaka sesi kurhankuni iámintu uantakuechani kúnharhitaskaksi ini takukatani maru uantakuechani (glosario) enka p’urhepecharhu iretarhuk’u uantanhak’a, o jimpanherantskata, ka máru enkaksi p’itaka karakataecharhu (vocabulario). Ima uantakuecha enkaksi turhisi (castellano) jimpo úraka “comilla” jukastiksi jimpoka nótku jarhasinka inte jási jorhenkua ka jánhanskakuaMókuntastiksi: Catarino Custodio Romero Pedro Márquez Joaquín

11

*Propuesta aplicada

GILBERTI

LATHROP

SEE/UMSNH

PUJ/DGEI/INEA

a/â

A

A

a

Mb

Mb

Mb

mp

Ch

ch

ch’

ch’

ch/tz

Č

Ch

ch/ch

Nd

Nd

Nd

nt/nd

e/æ

E

e

E

Ng

?

ng

nk

y/i

?

ng

nk

?

i/?

H

J

j

J

c/qu

K

k

K

Qh

k’

k’

k’

m/n

M

m

M

N

N

n

N

Ng

?

ng/nh

n/nh

O

O

o

O

P

P

p

P

p’

p’

p’

R

R

r

R

y/rh

?

r

R

Ç/s/ƒ

S

s

S

T

T

t

T

Th

t’

t’

t’

ts

ts

ts/tz

12

h

tsh/tzh

ts’/ h

ts’

ts’

u/v/vu

U

u

u

X

Ŝ

x

x

CUADRO DE EQUIVALENCIAS

ca/co/cu

Arini kúiruskukatarhu, eskari na exeni jaka P’urhepechecha jarhastiksi t’apurhu umpakukuarhu isi: Juátarhu (p’ukumintu), Tsiróntarhu, Japuntarhu ka Eraxamani iámintu inte mák’u echeristiouesti enka jaka ireta p’urhepecha. ¿Mítestkiri o miuntaskiri naniri jarhaski t’u irekani? ¿Mítestikiri naniasi jarhaskiri ?

Michoacán

Juátarhu (p’ukumintu)

Eraxamani

Tsiróntarhu

Japuntarhu

13

14

Jimpanhi páp’erakua jorhenkurhiparini mímíxikueri ampe Ma uanontani anapu ampeeri jorhenkurhikua: “Miiuntskani ka miiuntaskurhintani juchari echerirhu” Ari kúnkurhikuarhu anapuecha enka arhinhak’a “Espacio para la Cultura Ambiental” (ECA), exesinkaksi eska ma uanontani anapu ampeeri jorhenkurhikua jimpo úaka k’uiripu sántaru sési eratsini ka sántaru sési irekani, jarhoop’iparini ka jámparini ireteri úkuecharhu. Jucha enkaksi jarhoop’ik’a jorhentpikua ka jorhenkurhikueri ampe jimpo, orhetaksi exesinka ampemankaksi úaka miáts’ikurhini imecha enkaksi jinkoni jucha ánchikurhik’a. Jurak’usinkaksi eska uantontskurhinhooka ka kurhach’peranhani isi mintsikaparini eska “uánikuecha enkaksi táchantku isi jámak’a”, úakaksi, “kúnkurhintaparini uánikua ampe úni”, ka eska úaka sántaru mítperanhani ka uantontskurhinhani.

Niáraskaksi Ch’erani, ireta p’orhepicha, nanimanka iámintu ampe mák’u k’éri jorhenkurhinhak’a, eskaksi na pauampauani márku jámani jarhak’a k’ératicha ka tumpiicha ka sapirhaticha. Terokutaparini ampemanka “K’éricha” ka ireteri kurhamukup’erakuarhu anapuecha jánkurhintani jaka úni, ka ístu imecheri eratsikuani enkaksi arhinhak’a “Red de Etnoecología y Patrimonio Biocultural”, isi káskuskaksi ini ánchikurhitani: “Miiuntskani ka miiuntaskurhintani juchari echerirhu”. Eratsiskaksi jorhentooni tumpiichani enkaksi úaka arhistatspini ka etsakunksi inteecheri ireteri jorhenkuani. Iúmu semanaksi jámaska imechani jinkoni, ka úskaksi, uápuru jámani, ka méntarueni exeparini ampe, úskaksi miiuntskani ka miiundaskurhintani inteecheri echerirhu. Sési járhati ampe niátaparini ueenakurhisti uantontskurhita tumpiicheri, k’ératicheri ka sapirhaticheri. Jima uératini, Ch’erani anapu tumpiicha jorhentpisti ampe enka ts’ima jorhenaka úni, arhistakuaparini iretarhu anapu sapirhatichani mámaru ampe enka ts’ima mítika.

Isi mámaru ampe úparini, eratsintaskaksi ka niátaskaksi nanimanka na úpirinka jorhenkurhinhani ch’anaparini, jarhoop’eraparini ka mintsinharhperanhaparini. Isi jámani miiuskaksi iretarhu ka p’itooskaksi úkurhikueri eratikuechani, p’itakatechani úaskaksi, uantantskua arhioskaksi ka únharhikukatechanhksi úaska. Ueenaskaksi juchak’u mántani arhini exekurhini, ka tátsikua juchiini anapuechani ka imechani enkaksi juchantsini pírini irenkurhika; jima uératini niraskaksi ampokutecharhu iretarhu anapu juramutichani jinkoni, ka niáraskaksi juátecharhu jamperi ka p’ukutapurhu isi. Sántaru jánhaskaticha ústi eska uantontskurhinhapirinka, k’ératicha sapirhatichani jinkoni, ka ístu k’uiripu táchani ampe jorhenati, ka márutaru isi anapuechani jinkoni, ka jima sési exep’eranhasti, ka janhanharhperanhani, mámaru ampe út’sikurhinhasti ka iámintuecha kurhach’peranhasti.

Uánikua ampeksi jorhenkurhiska, ka enkaksi sántaru úka, tsípikurhiskaksi.

15

Eratsintaskiri sani meni, antisi enka uarhiperakua jarhak’a iretsikuecheri, ikiatspiticha orheta xerentskantak’i nanimanka ireta janhanharhikua xarhatak’a? Antisi jima uarhipik’i jimanka tánkurhinhak’a o jorhenkurhinhani ampe, ka uékani kámak’untani iámintu ampe enka uekatsimakueri miántskua ampe jatsikurhik’a ima ireta enkaksi ts’ima ikiakuka?

16

Eratsinta eska iápuru jimesi jinteska enka k’uiripu kúnkurhintak’a, mítperanhani ka uantontskurhinhani ka mót’akup’erani ampe. Kánikuats’ini marhoachisinti jimpokaksi jima jánhaskasinka némankaksi jinteeka jucha. Jimaksi patsakata jarhasti miántskuecha, ampe enka no k’uanik’a mirikurhini, ampe enkaksi eranhaskak’a, ampe enkaksi ma jurhiani erokurhik’a, ka ampe enkaksi mintsikaparini irekani jaka.

Ekaksi ini ampe no jatsikurhipirinka, nóksi mítipirinka ampeski juchari irekua, ampe úkurhiski ióntki isi, ka ampeksi erokurhisini orhepatini.

17

I no isku uantantskuesti

IRETA, JUáTA KA CHÉRPIKUA Uekatsemakua enkaksi tumpiecha ka uáchecha uantantskua jurhenkuarheticha karantaka:

J

arhaspti meni ireta ma enka arhinhaenka: Ch’erani, uirhipkurhaspti anhatapuecha jukani. Anhatapuecha kánikua janhanharhinhasirenti jimpoka tsípekua íntsasirenka iámu iretichani. Mítiosptiksi uitsakuechani ka marhuatasirentiksi jiuakua, pátskua o ep’u p’amerakua ampakerantani.

Jima, xáni sési jántu, kánikua janisirenti ementa jimpo, kánikua itsi jatasirenti. Isi jimpo iámintuecha kánikua tsípesirenti ka k’uínchikua ampe únhasirenti jimpoka iámintu ampe sési jarhaspka. Ka niáraspti ma jurhia enka ikichakueni jasi ampe úkuarhepka.

18

No sési niátatspiti xarharaspti, ka nónema mítespti nani uéraspi ka no ióntaspti anhatapuechani auoontani.

Irericha kánekua ikiaspti ka tánkuarhenhaspti uékani kéntitani imani no sesi niátatspitini jimpoka enka ima isi auooni jápka anhatapuechani, aparhikua ka ts’irari p’irhikurhixapti. K’arhixaptiksi anhatapuecha, ka nótaruksi tsiuantispti, mátaru uitsakuecha uénasptiksi xanini ka manakuarhiricha nótaru jatsispti nani sési irekani.

19

Ireta tsítoxapti p’ukutapuechani ka iámintu ampe enka marhuak’a sési páp’eranhaparini sési irekani. Méni jimpo tánkuarhinhantaspti ka nirasptiksi uantikuni no sesi niátatspitini.

Juáta méntaru uéentaspti p’ukuntani ka irericha tsípisirentiksi jimpokaksi méntaru irentaspka anhatapuecha jinkuni.

Xánku

I

siranta takukukata jintesti nanimankari t’u úaka patsani eranhaskakuechani, miántskuechani ka ampe enkari t’uk’u mítikurhika. Ka ísiri no mirikurhini imani ampe enka sántaru jukaparhakueka cheeti ka iretaeri.

Kurhamarhikua, mámaru niátakua ka kuataperakuecha enkaksi ixu jukanharhika marhuacheatiksini míteni sántaru ampe enka jaka uirhipantani, ka sésiri mítekuarheni t’úk’umintu.

Sési kurhanku ampe enkaksi mátaruecha eratsentaka ka jatsinharhiku ixu enka nómpema jukanharhika ampe enka t’u p’ikuarherak’a eska chéetik’ueska. Miántsi eska t’u jinteskari enka úni jaka ini siranta takukukatani.

21

¿Amperi uékapirini eska úkuarhepirinka ini síranta takukutarhu?

Eratsikurhi naninari ua uininharhitani íni cheeti siranta takukukatani, p’ikuarhera eska chéetiska, asi che; marhuata atantskuechani ka mámaru ampe enkakini sési p’ikuastaaka. Úakari ixu jatsinharhikuni imani ampe enkari sánteru tsitik’a. Jánkurhintsi sesi uni ka mámaru ampe eranhaskani eskari na jaiapanhentaaka.

22

Ari kónharhikua míntakataesti eskari jatsinarhikuaka ixu nena enka jáxepirinka íri táparhakua, p’itanharhiku nani, mánharhita, kuirunharhiku, unt’a eranhaskua ma ka jakankurhita eskari na uékaaka.

23

24

Ji echerintu irekaska Na exekurhisini ji ixu?

25

Ma kuataperakua

Únharhiku na enkari jáxika t’u Enkani nómpe úkua jatsik’a, sántaru tsitisinka ari ampe úni:

Amperini ikiatasinki?:

Amperini mískurhitasinki?:

Amperini tsíperasinki?:

26

ERATSINTASKIRI MENI ANTIRISI XÁXI ESKARI NA JÁXIKA? Kaantiski Tata Trini uantontskurhichistits’ini néenkeka ima, ka uéenasti énkuntsini eka ima sapiipka: “Enkani tataka sapichuepka jucha kánikua sési irekaspka nak’irukaksi mámaru ampe no jatsikurhipka. Ji sési t’arhexiska jimpokani juchari tatitechani ka juchari taatichani jinkoni irekaspka juátarhu. Sapichutki úntaskaksi jorhenkurhini tarheni ampe, inte sántaru sési p’ikuarherakuesti, márku jámani, méntku jimesi jámani jarhani, juátarhu isi pakarani, uantantskuechani arhioni, enkperani ampe enka uantanhantak’a ióntki anapu ampe, ka uantantani iámintu ampe enkani ji p’ikuarherak’a, anti enkani ísika eskani iasi na jáxika, ampe enkats’ini jarhootak’a isi eratsini eskaksi na eratsik’a. Isi jámparini jorhentanhaskaksi xénhchani juchari iretani.”

Tata Gabinuts’ini arisi uantontskurhichisti: “Jucha kánikua kómu nitamatispka. Ji úntaska juátarhu isi jámani enkani iúmu tsimani uéxurhini jatiripka, jimpoka juchari taati uákasichani máru koosempka. Ji nirasempka jirinhoontani eka tarhentskuepirinka ia; xánturharini, t’ipich’ukua jukarini; ísiksi jámasirempka. Jimak’anisi k’érati iauasirempti ka jucha isi átsitani xánturhatini. Ji ámpe jáma jorhenkurhikuarhu, no mítiska siranta arhini, no jámaska jorhenkurhikuarhu jimpoka juchari taati kánikua kómu nitamatispka, ka isi no uékani eskaksi kómku jámapirinka jimposini no jámaka jorhenkurhikuarhu ka jámaska juchari taatini jarhootani. Isi t’arhexiska. Jít’uni jámaska ch’ikari úani, jimek’ani méntaruenispti; ma p’ukurinksi ma “semana” kámasirempka. Jima uérasirempti sano ma ekuatsi k’ereri, máru “kuartonicha”, maru jauarakuecha, ka imani ampe jinkoni úsirempkaksi nitamakurhini. No ísispti eska iasi enka p’ukuri ch’aparicha sóntku kuáskuak’a ma o tsimani o tanimu p’ukurichani ka jatsiroopanksi ka jirejiresi kéntikunksi. Ióntki no jarhaspti xasi uétarhinchakua; imechaksi uékasinti sési nitamani, tuminaksi kánhchani. Jucha ióntki t’iresirempka k’auasi jiúmakata, kurucha tekata, ka xakua ampe enka tarhetarhu isi jukak’a.”

27

Kánikua sési jánhaskurhispti jimek’ani enkani ji sapichuepka, juchari taatichani jinkoni irekaspka, ka enkaksi márku tsípikurhiempka iámintuecha.

Ofelia Murillo

28

Kuataperakua tsimani

Mánharhita chiiti p’itakatani o kuirunharhiku eskari t’u na jáxika. Exe na enkari k’uiripini jaka sapichutki úntani ka iási jamperi. Kara ampe ka ampe úkurhiski jimek’antku isi, enka k’uanik’a iási jamperi miántani.

xani jatiriska:

xani jatiriska:

xani jatiriska:

xani jatiriska:

29

“Anhatapuecha ka p’ukuricha ísistiksi eska sapirhaticha, k’uanisinti eratooni, kuáp’ioni ka p’arhirioni”.

Jiminisi uantanhasinti:

“Anhatapu enka matsisi k’uiripik’a, no méni jurhimpint’asinti” Ísisti, anhatapuechaksi no úsinti jurhimpintani; sapirhatichaksi k’óru úsinti.

Mítiskiri ampe jimpoksi terokutsperasini anhatapuecha ma k’umachikuarhu anapuechani jinkoni?

30

Kuataperakua Tanimu

Eka chiiti k’umanchikuarhu anapuecha anhatapu maepirinka, eratsi ampe enkari jatsintukupirinka enkari uékapirinka eska inte anhatapu kókani k’épirinka, ka jatsiku eska chiini anapuecha jinteepirinka anhatapueri akukuecha. Isturi úaka jatsintikuni jimini místuni ka uíchuni o ampe enkari chiini jatsikurhika.

Juchiini k’umanchikuarhu anapuecha

31

Kuataperakua t’amu

32

Erakuanta chiiti k’umanchikuarhu anapuechani o imeechani enkari t’u xénhchok’a, enkari t’u mintsinharhiok’a. Únharhikua xántskuecharhu ka kará ampe jimpoeski enkari jimpo sési exeok’a.

33

Nanina mítini jimpanhi ampe, juchiiti, ka juchiini anapuecheri ka juchiiti ireteri ampe.

Ukua Jánkurhi úni anhatapuni ma, enka xarhatooka ma k’uiripueri tsípikuani ka istu ma ireteri irekuani. Eratsikua jinteesti inteni jinkoni xarhatani eska sano mák’uenksi k’érasinga anhatapuecha eskaksi na t’arhexik’a jucha k’uiripuecha.

Jimini marhoachiotikini mókuntani ampe enkakini ixu kurhamarhik’a:

Ji nani ueeraski o neecha jinteski juchiiti sirankua?

Amperini k’uiriperasinki?

Ampeski juchiiti tsánharhikua?

Ampe jatsiskini ji sési jási ampe enkani úaka íntspini, isi eska anhatapuecha ka tsitsikicha na íntspik’a akukua o tsipata ampe?

Ji neni sántaru mintsinharhisinki?

Ampe ka ampeski enkani ji nótaru kánhchak’a?

Ampe ka ampeski enkani antak’urhikia uni?

Ampe ka ampe uérakua anapu amperini no sési úchisinki?

Ampe ka amperini marhoachisini enkani ji juchiiti eratsikuarhu kánkurhik’a?

Ampe jási anhatapu uékapirini ji jinteeni, ka anti?

34

Mátaruecha uantasti:

Sési jási ampe enkaksi jucha uk’a íntspini jintetiksi juchari jánkuecha ka p’intekuecha.

Enka jucha andapika jintesti eskaksi kuap’ioni juchari juátechani ka eska ueenaska pínantikua jauaka iretarhu.

Uantontskurhini ka márku ánchikurhini kánikua jukaparhakuesti, ísiksi úaka sési márku úkurhitini jarhani.

Márku úkurhini, sési páp’erani ka janhanharhperani jintesti jukaparhakua ampe enka uinhaskuk’a iretani.

Juchari sántaru k’éri tsánharhikua jintesti pínandikua jinkoni irekani.

Ji k’uiripisinka juchiiti ireteri uinhapikuani jimpo.

Sési jási ampe enkani ji jatsikurhika jinteesti kuerookata ampe: tarhiata, anhatapuecha, manakurhiricha ka tsitsikicha.

Nót’sini sési úchisinti uantatsperakua ka jantiok’uerakurhini ampe.

Jánkurhintokaksi eskaksi nótaru ch’apanhooka anhatapuecha.

Enkaksi uékak’a, eska nótaru jauaka p’ukuri ch’aparicha ka¡ no sési úricheri kúnkurhikua.

Jarhoop’erakua kúnkurhikuecheri úsinti eskaksi jucha k’éri p’ikuarherooka.

Ji p’orhepicheri uáp’eska, juchiiti taaticha ka juchiiti tatitecha jinteestiksi juchiiti sirankuecha.

36

Chiiti k’umanchikuarhu naniikuarhuri sántaru jiápanhintasinki?

Nétaru jarhasinki jima, ka jima amperi úsinki?

Kuataperakua iumu

Rosalidia Sánchez Uarhoku énkustits’ini: “Jucha únharhikuska sirantarhu eska na jáxika juchari k’umanchikua, exeskaksi namuni “kuártuecheski”, naniispi enkaksi jucha sántaru sési p’ikuarherempka, kuárturhu o uérakua tsitsikicharhu isi. Ji tsitisinka jarhani nanimanka tsitsiki ampe jukaka, ka ístu inchookurini, tsitsikichani jimpo ka jimpoka jima no xáni aparhikurhiska. Ji jánhaskaska eska jukaparhakueska juchiini anapuecha márku irekani, ka sési páp’erani, ka eska úch’akurakateska nanimankaksi jucha márku jarhak’a.”

37

“Ji irekaska mápuru nanimanka kánikua sési jántika.

Anhatapuechaksi jarhasti xuxunharhati, ka itsi sési ampanharhisti. K’umanchikuarhu ma irekaska ka mímini ma kámsinka. Enkani ji sántaru tsitik’a jintesti “pelota” apantsekua ch’anani. Juchari kúnkurhikua enkaksi márku ch’anak’a arhikurhisti Jósku, ka xukuparhakua enkaksi ch’anakuarhu jukantak’a charhapitisti ka juchiiti miiukua jinteesti iúmu tanimu. Ch’anani jámani kánikua tsípini p’ikuarherasinka jimpokani nirasinka jimesi enka isi uáni sirankuecha jaka enkaksi úntani jaka turhipini.

Jimesi t’ík’antisti ka ji jimesi uiriasinka juchiiti pelota tsiranki atakatani jinkoni enkani xáni kánhchak’a.

Ampeeski enkari t’u jantiok’u sántaru jiápanhikurhintak’a?

38

Erandí Jhocelín García Huaroco

Márku niátakua

Sési xékurhini ka kaxumpini marhoachisintits’ini sántaru sési mítini mátaruni ka únhksi márku ánchikurhini.

Jóku chiiti jántsirini mátarueri jantsirini jinkoni kutsumukua o sintari ma jimpo. Xanhara je tsimarhani, jánkurhiparini mák’u arat’arhini, ka sánhani arhini xanhara je exekurhiparini eska no nema kuarhatsioka.

Ekaksi no ísku exeouaka márutaruechani, ekaksi kurhach’ouaka ka imat’uts’ini kurhach’ani, úakaksi mario xanharani.

39

Uapatsikua mánetakua

Uapatsikua T’ántarhekua

Jarhukutini

Parhikutini

Ch’erani ireta

Uapatsikua tsimanetakua

Kétsikua

40

Uapatsikua Tanintarhekua

Karhakua

Juchiti Ireta Juchari k’uiripu ka echeri nani enkani irekaka Iretarhu kánikua jukaparhasti uantap’erani. K’umanchekuarhu míntaskuarhentaskachi eska k’uanisinka uantap’erani. Juchiti taate arhisirentirini: “Uandap’a k’uiripuni, ekari uantap’eaka nochi kómu nitamaaka ka tsípeparinti jámaaka ménku isi.”

Tata Trini Iámintu ampe enkari exeni jaka ixu juchari echeristi, jima enkari atastak’a, enka isi tarhiata jurhak’a. Ima jánhaskakuaesti juchari echerieri ampe, ístu eska jucha na eratsek’a jintesti nena enka jucha janhaskak’a juchari echerini ka ístu eska jucha na jámak’a.

Adelaida Cucué 41

Ch’erani Irekaska

J

uchari echerieriskaksi, mak’ueni eska iámu ampe enkaksi p’árhek’a ka marhuatak’a, ísi ukata eska na eratsek’a ka néna enka jáxeka ireta. K’uanisinti míteni juchari uekatsemakua, néna enka jáxeka juchari irekua ka néna enkaksi jánhaskak’a eska jáxeska parhakpeni ka ísisksi míteaka nénaksi irekakuekasini ka ampeksi uékasini urhepatini.

Mámaru ampe jatsikuarheskaksi iretarhu enkaksi jimpo mítinhaka ka no jarhani máteru ireta enka mák’ueka eska juchari. Pauani pauani úkuarhesinti juchari p’ikuarherakua irekaparini ixu k’umanchekuarhu, kópekuarhu, juátarhu ka uératirhu isi. Ístu uantontskuarheparini, xukuparhaparini, k’uíncheparini, jarhop’eraparini uapatsekuarhu ka uantantskuechani kurhauaparini enkaksi aiankunhak’a, iámintu inte ampe marhua’tasinkaksi parhakpenirhu anapu ampe jinkoni márku úkuarheni. Míntaskuarhentaparini uekatsemakua ka p’ikuarheraparini eskaksi márkueska ka eska juchari jimpo jarhaska xanhatatani néna enkaksi jakuekaaka sánteru urhepatini.

Juchari echeri mót’akukuarhexati ísi eska jucha na mót’akukuarheni jaka. Juchari jimpo jarhasti úni néna enka jáxeaka ireta, juchari jimpo jarhasti irekuarheni, uantontskuarheparini ka kurhach’aparini k’ératichani, jarhop’eraparini ka jurhimpitkueparini pari séserani juchari mímixekua janhanharhiaparini máruteruechani.

Kuataperakua kuímu

¿Míteaskiri chiti irenkurhirichani? Kara ixu ampe enkaksi terukuntak’a enkaksi jatsika ka jáxeni imaechani jinkuni.

“Ch’erani no juátak’u ka echeri marhuatanhasinti, ístu kánikua marhuatanhasinti jánhaskua ka jakak’ukua, tsípirpirichaeri ampe enka ireta kánkurik’a; eska jima enka t’u t’irek’a, enkari antap’enuka ka nani enkari uarhiaka. K’uiripu, nak’iruka iauani ísi jámaaka, nak’iruka uarhiaka ia, k’uanhatsentasinti iretarhu.

Juánkunhasinti jimpoka ixu jarhaska ma jakak’ukua enka arhik’a eska nani enka jauaka túpu, eska jima k’uanhatsenhant’asinka. Enka sapichueuaka p’ikunhasinti túpu ka tsitsiki jatakuarhu jatsiranhani o parhankuarhu, eska echerirhu jauaka. Nani enka jauaka túpu jima k’uanhatsentasinti k’uiripu.

Enka antap’enuaka ma tataka sapichu, nántecha o nanitaecha uantant’asintiksi nena enka jáxeaka ima sapi. Ji exeska nena enkaksi nanitaecha p’utintukuk’a ka isi arhini: “I jantsiri sapirhaticha iauani pátiksini uápuru miiuni, pero inte ístuksini juánkuati ixu”.

Alicia Lemus

Mátaruecha uantasti:

¿Ampe míteskiri Ch’erani anapu ampe?

“Aiankustits’ini eska tua anapuecha juátarhu irekaspka jini “San Marcos”, jimanha jataspti itsi, máteruecha kétsesirenti Kúmu-itsarhu itsi p’itani. Ka jimek’antku eka chéta ampe jarhempka jimek’anksinha jurhasirenti ixu iretarhu kópekuarhu janoni; urhetkunha juátaecha uánekua anhatapu jukaspti, ka enkaksi chútauauenka inchaakutspitichani jiák’ani chésirentiksi. Minta íntsperasirentiksi enka jinteka ¡chéra! enka arhikuekak’a ¡chéra je! Uantanhasinti eska enka janopka turhisicha uáni k’uiripu kétsespti chérakuekaani ka ísiksi uinhachasirempti. Ka pénkaxamu turhisicha jimpo ísi kurhankupti eska cheranispka. Uantanhasinti eskaksi janospka enka iási t’ándarhekua uapatsekuaeka ka jimaksinha uénaspti irekani ka arhutakuarhesptiksi kauaruni enka jaka, ka parhikusirentiksi chkari ma jimpo jini juátarhu nirani. Ka enkaksi chérakuarhenka p’ikuntasirentiksi parhits’itakua ka ísi no nema úsirenti parhikuni.

Miriam

“Jakankurhikua juchari iretaeri jintesti: Ch’erani enka arhikuekak’a Chérani”

Yunuen

Ch’eráni K’éri jakankurhisinti ka

ísi mítekataesti i ireta. Arhikuekasinti eska i ireta k’éri p’ikuarherasinka jimpoka kuáp’esinka juátechani ka p’ukutapuechani, ka k’uiripuni, p’intekuechani ka uekatsemakuani.

C

h’érani ireta acha uakusecha jinkuniespti, janosptiksi Hiquingarhe ka Tangaxoani, ima enkaksi irecha Tariákuri uáp’aepka ka sobrinu jémpaepka. Uákasi ma tsakapueri, enka jini jaka “San Márkusi” juátarhu, jintesti eranhaskua Ch’éraniri uekatsemakua jimak’ani enkaksi nótki janomka España anapuecha.

1521 Uénaspti uantats’ikup’erakua eska jakak’unhapirinka katolikuecheri ampe. Janosptiksi franciscanuecha.

1533 Míntanhasti echeri, juáta, itsi uératichani ka máteru kánkuarhikua ampe karakata mintakueri enka Carlos V España

anapu intspipka k’érenchekuarhu San Francisco Ch’erani iretiechani, ma ekuatse iumu t’amu octubre kutsi 1533 jimpo. Siranta jamekua arhisinti eskamintu na janteka komeska pikachu loma jamperi, kaparhakua (San Miguel) enka jamperi pap’akantent’aka p’ukuricha jimpo (Rancho seco) ka jamekuecha nani enka jamperi uinhanharhik’a exeni.

Ch’erani ánchekuarhiparini maiampesirenti ka mámaru ampe íntskuni España anapu Irechani.

1776 Uaxastanhasti Iahuatseni ireta jimpokaksi irenkurhiricha ma uanontanni intsikorhespka echeri. Ch’eráni intsikorhesti sánterku no ma irepeta ka témpeni ekuatse echeri caballería arhikata jimpo miiukata.

1810 Uarhiperata para jarhontakuni Españani uénakuarhespti enka jimpo uánekua ampe mót’akukuarheka eratsekueri, echeriri, tominaeriri ka amperiekueri ampe.

1856 Etsakurhisti irekua turhisicheri ka ístu echerichani mínkuarheani jimasi enka no nema mínkuarheni ka ánchetani jápka.

Uénasti kánkuarhikua ka mínkuarhenhani t’upakuaecha ka ampantekuarhuecha. Sánteru ánchekuarhenhasirenti tarhekua ampe.

Inteni jurhiatekuechani jimpo uénakuarhesti p’ukuri ch’apanhani ka juátaechani mínkuarhenhani enkaksi tarheta jatsiraenka.

1861 Juramukuarhu enka tumineri ka polítikaeri ampe arhik’a (decreto 29) Ch’eráni ireta úntasti Municipio arhinhani. Máteru karakatecha arhisinti eska ma ekuatse inchamani Noviembre 1864 jimpoespka. Ch’eráni uénasti Munisipioueni jiák’anisi. Inte uantakua uinhaperanhasti Ley Orgánica Territorial jimpo ixu Michoacán anapu 1868 uéxurhini jimpo.

1902-1903 Sánteru kánekuamintu p’ikunhaspti chkari, táchanku kúnkorhekuecha enka Juramuti sésekua íntspeenka pari eska pánhapirinka chkari. Chkari trénueri xanhari úranhasirenti. Jima enka arhinhask’a “La Herradura” útasi xarharasinti.

Jurhentpiri Federico Hernández Tapia, enka kuáp’entaenka juátechani, jimek’ani uarhispti.

1910 Uénakuarhespti Méjiku anapu revolusioni.

1917 Chavistaecha janosti ixu ja’masptiksi, Inés Chávesi ka urhets’ikuri Sergio Casimiro Leco Lópesi kabaiu-eranku Masiasicheri.

Imani uéxurhinicha jimpo enka uarhiperanhani jápka no jatsinhasti tsiri. K’arhintakuarhu nitamanhasti ka p’amenchanhani ka kurhupini. Ch’erani uani taa kurhupanhasti.

1920 Casimiro Leco karakuarhesti sontaduechani jinkuni ka antak’urhispti Jeneralini.

1925 Uénanhaspti jini Estados Unidos nirani ánchikuarhini jima enka trénuecha xanharu únhani jápka ka júkskuarhu. Jiak’ani uératini ninhaxati ka uekatsemaxati k’uiripu.

1934 Arhirperata Tsakapu irericha jinkuni jamekua mínkuarhenhani.

1936 Uénanhasti juáta arhunkurhinhani.

1938 Janosti Máximo Dwigth Lathrop, enka mítekateepka eska Tata Máksimo, miánhasinti isi: “El gringo”. Turhisi uantakua uinhamu janosti ka juchari uantakua tsítakuarhesti.

K’eri xanhari (carretera 37) únhasti enka jurhak’a Karhapani uératini ka Playa Asul niárani, ixu teruakumasinti.

1940 Únhasti eratantskua Kalicantio Llano.

Ralph L. Beals uénaspti imaeri karakatani úni enka arhiraka: Ch’erani: ma ireta p’urhe enka juátarhu jaka.

1942 Káskukua ma uéenaspti enka jimpo ninhaeenka ánchekuarhenhani júkskuarhu jini Estados Unidos. Ari káskukua k’amakurhisti 1964 uéxurhini jimpo, ka tátsekua ninhastiteru méni p’itsikuarhenhani ka méni sésikua jimpo. Útasi ninhaxati ixu irericha.

1943 Charasti Parhikutini, juáta enka chpiri uéts’ikuk’a. Jenchekua ka t’upuri japu janospti ixuisi juátarhu uánekua kutsiicha

jimpo.

1944 Kurhak’uarheni eska Ch’eráni ireta intsinhantapirinka Resolución Presidencial.

1950 Uéenasti mítakuarheni jurhentperakua ixu iretarhu, ima enka arhinhak’a “General Casimiro Leco López”. Uénaspti jarhanksi profesionistaecha. Nóteru xani ánchekuarhenhasirenti tsíri jatsikua ampe jini juátarhu ísi.

1954 Janosptiksi Jalisku anapuecha máru, uénanhaspti xunhanta p’itanhani. Ireta íntspespti sésikua ka jurhenkuarhespti xási ánchikuarhitani.

1960 Uénasti ánchekuarhenhani xunhanta p’itakua enkaksi kúnkuarhentapka témpeni tanimu iretaecha.

1964 Uaxastanhsti Centro Coordinador Indigenista, sántera urhetku eska máruteruecha.

1965 Janosptiksi jurhentpiricha kastiia anapu ka p’urhepecha uantaricha. Uékasirentiksi castiia uantakuan uinhaperantani juchari uantakuani marhuataparini.

1975 K’éri uarhiperata jarhaspti, uánekua k’uiripu uarhispti. Uantanhiata ch’ikari p’ikukua jimpo ísi úkuarhespti.

1976 Tata Jesús Hernandez Toledo témpeni tsimani uéxurhini Representantespti iretarhu.

1984 Ch’erani ireta intsinhantasti Resolución Presidencial enka k’uáp’eni jaka iretani.

Sánteru uinhamu p’ikunhasti chikari, manakuarhiricha jimpo juánhasirenti.

1985 Uénanhasti chkari arhakunhani iretaeri míntakua jimpo.

1990 Ataranhant’asinti chkari P’urépero mótsitarakuechani marhuataparini.

1995 Uántikustiksi tata Kalikstuni enka ísi mítekatepka “las cabras anapau” o “los llano anapu” ima uantantasirenti enka sipanhani jarhaenka uákcasi ka chikari ampe.

2006-2007 Uántikustiksi tata Biktoriano Lémusini k’umanchekuarhu. Uénanhaspti sési jántskaranhantani tanimu ts’umpintikuecharhu ísi paraksi úni jámani “no sesi niátatspiticha”.

2007-2011 Ini jurhiatekuechani jimpo kánikuamintu p’ikunhasti anhatapuecha. Ch’apaastiksi, sipaastiksi ka kurhirastiksi ch’ikari.

Témpeni iumu jurhia Abril kutsi 2011 jimpo, jauarasti Ch’erani ireta ka p’irhikuarhisti k’uiripu irericha. Ménteru uéntasti kuáp’ekuarhenhani ka kuáp’eni juátani ka iámintu ampe enka xáni míntaskuarhek’a.

2012 Eneru kutsi témpeni tsimani inchamani erakunhastiksi K’eri Kurhamukup’eraticha (jánhaskaticha) enka juramuaka iretarhu isi eska na jaka p’intekua, eska na mík’ukuarhenhaka. Inteksi témpeni tsimani jánhaskaticha, tanimu táchani uapatsekua anapu, p’irasti juramukua iumu jurhia febrero kutsi jimini kópekuarhu.

2013 Tsimani uéxurhinistia enka antaparheka Ch’erani K’eri.

2015 Erakunhastiksi Kéri Jánhaskati

Kurhamukup’erakua ka ístu Iretaeri kánkuarhikua.

Eskari na arhintaka enka úkuarhipka Ch’erani K’eri, táchan ireta jatsikuarhisti uekatsemakuechani, ampe enka úkuarhipka, Niátanhaka ka jurhenkuarhikuicha enkaksi jatsika miántani ka ísi no mirikurhinhani.

Nákiskiksi ima uekatsemakuecha enka chiti iretarhu jutamuka?

Kuataperkua Iúmu tsimani

Kurhamarhea k’ératichani ¿Néna, káni ó na jatini úkuarheski cheeti ireta?

“Ixu Ch’erani, janhanharhiparini, ts’iue k’ératichani arhiasintiksi Tata ka uarhimasi k’ératichani Nana. Iurhitskirichani enkaksi nótku uampuchak’a arhiasinti Male. Ka tataka sapirhatichani arhiasinti Sapichitucha (enka uáneuaka) ka sapichu en mák’uka.

Juchiti anhanhatakuarhu irekaska Máteruksi arhisti:

Eratseskaksi ampe terukunt’asini juchiti anhanhatakuarhu ima jinkuni nani enkani irekani jaka pauani pauani Arisiksi mókukuarhesti máru sapichucha ka máru tumpiicha.

Alma Durán: “Juchiti jimpo, iretaeri mintsita juataestiksi, kópekua ísisti eska ép’u” Ofelia Murillo: Anhatapuecha ísisti eska mintsita, jimpokaksi jukaparhakueska enka k’uanik’a eskaksi p’ímutaaka, ka jantsiricharhu jarhasti itsi. Jurhenkuarheska eska táchani ampe enka ireta jatsika jukaparhasti ísi eska juchiti anhanhatakua, k’uanisinti miáni jarhani.

T’u:

50

Miriam Niníz Rojas: “Jantsiricharhu jarhasti k’uiripu jimpoka enka no jauaka k’uiripu no iretaeuati. Mintsitarhu jarhasti itsi uératicha ka juátaecha jimpoka jimini uénakuarheska kúnkuarhenhant’ani. Úrhirhu jarhasti eska xáni ampe ják’untik’a; t’irekua ampe, churhipu, atapakua. Kutsikuarhu jarhastiksi juchari tata k’ératicha jimpokaksi kurhaxaka uantanksi p’urhepecha uantakua.

Jorhenkurhiska eska jucha mántani arhinni iretarhu anapueskaksi; jucha jinteska ireta.

Mántani jucha úsinkaksi íntspini sáni ampe enka juchaarika; iámintuecha enkaksi ixu irekaka mítinhaskaksi juchari irekuani jimpo, ka nani uék’uni niuaka, uantaaka: Ji jintesta Míriam ka Ch’érani anapueska, ka nani uék’i enkani irekaaka mák’uni Ch’erani anapueuaka.

Mรกtaruecha uantasti:

¿Na jáxeski míkua chenio?

Kuirusku nena enka jáxeka míkua chenio

52

Kuataperakua iúmu tanimu

Ma:

Eranhaska nénaxamuksi irekaski k’uiripuecha enkaksi incharini irekaka enka kámukua miiukua jukaka. Aiankuts’ini nena uekatsemuski.

1

Tsimani: 2

Tanimu:

3

53

Néna enkani exekuarhintak’a jucheti ampe, jucheti márku irericha ka jucheti iretarhu anapu ampe.

Niátakua Mókuantsi arini kurhamarhekuechani ka exera pámpirichani

¿Ampe sánteruni tsitisini jima enkani irekaka? ¿Amperini uantanhiatasinki? ¿Amperi mót’akupirini jima enkani ji irekaka? ¿Néna sánteruni sési jántskara? ¿Néna uékapirini eska sési niántaaka uantanhiataecha ixu iretarhu? ¿Néna eranhaskasini iretani sánteru urhepatini? ¿Káni eratsiski ampakiti ampe ma eka marhoakuka juchiti iretani? ¿Ampe tsitipirini eska úkuarhepirinka?

54

“Ji tsitisinka juátani “La Cruz” ixu Ch’érani anapu. Kópekua tsitisinka ka nirani maiapetarhu miérkolesi ka sábatuechani. Istu tsitisinka mísa nirani dominguechani” Uekatsemakua karastiksi sapiicha enka uantantskueri ampe niátaka

Kuataperakua iúmu t’ámu

Xanharapa o ísku eranhaskapani cheeti iretarhu ísi. ¿K’uiripu nani sánteru tánkuarhesini ka márku jarhani?

55

“Meni jimpo jarhaspti k’uiripu ma enka kánekuamintu mískurhiempka. Ma xanhari p’íchpiri jempa p’iímarhespti eskaksi kárapirinka. Ka máteru tsitsiki ma intsikuarhespti ka arhispti eska patsapirinka sési, ka máteru p’íchpiri kuinituni ma intsimpespti”.

Uekatsemakua karastiksi sapicha enka uantontskuarhiparini niátaka

¿Míteskiri jarhop erakua ka antisi xáni jukaparha jarhop’erani?

Jarhop’erakua kánikua k’ésti ixu Ch’eráni: xarharasinti, exetkiru ia. Enkaksi nirak’a ma k’uínchikuarhu tempuchakuarhu o itsi atats’íkup’erakuarhu. Eka ma auitaekuaro vuache (sobrino) itsi atats’ikuaaka sapini, p’imarhesintits’ini ka jatsiskaksi nirani pámpetani ka jarhuatani, míntasinkaksi pámpetani. Ka jarhop’erata imaesinti enka jucha jarhuatak’a eska no xáni k’uetsapenchaaka. Jucha úsinka ampe ma, iámintuecha jarhuatasinka.

Jimpots’inisi kurhamarhet’i: Cha néna jámasini enka xáni k’eri k’uínchikua úk’a?

K’uínchikuecha k’érasinti jimpoka uáni k’uiripu jarhop’esinka. Inte ma ampesti enka jucha no uék’a eska k’amakurhiaka.

Tata Trini

56

Márku niátakua

Juchat’uchi táchani jinteska ma k’eri anhanhatakuaeri enka iretaeka. Iámintuecha jatsiska k’éri ampe niátakua, k’uanisinti miáni ka ísi niátani.

Uinhamu jupip’era je pámpirichani jinkuni ka uirhipu úni, ka eka nema tsankuaraaka urhepatini o tátsepatini iámintuecha p’ínkuaka eska no xerekuarhentaaka uirhipu.

Eka iámintuecha kúnharheaka ixu iretarhu, eka jauaka uékakua ka mintsiperakua, nak’iru jauaka uantanhiata o xereperakua kúnkuarhetini jauakaksi ka márku úni ampe enkaksi uékaaka.

57

Michoakáni anapuecha uánikua k’uiripu nirasinti. Jirinhantaskachi ampe úkuarhesini enka isi ninhak’a, ka exentaskachi arini ampe.

Mátaruecha uantasti: Jarhastiksi manakuarhiricha enkaksi mótsipak’a mántani uéxurhini jimpokaksi jirinhasinka nani sánteru sési irekani. Inteni arhisinkaksi. Mótsikua. Ixu Michoacán tsimani ampe mótsisinti iauani nirani.

Parakataecha “monarca” arhikata ka “pelíkanu borregonecha”.

“Uáni k’úiripu enkaksi nirak’a Estados Unidos jurhenkuarhesintiksi ampema ánchekuarheni ka junkuasintiksi ixu Ch’érani. K’uiripuecha enkaksi pakarak’a juátarhu ánchekuarhesinti. Míteskaksi eska ima enkaksi nirak’a Estados Unidos k’uínchekua úsintiksi jini, ísi eska jucha na úk’a ixu Ch’erani. Octubre kutsi jimpo misa jarhasinti ka uanopekua o domingo jimpo tánkuarhenhatasinti ka k’uínchenhani.

Inte enkaksi máru ísi miántak’a, nak’iruka iauani jauaka, miántasintiksi ka k’uínchesintiksi. Jini jatini patsanharhikusintiksi “videorhu” nena enka únhak’a k’uínchekua jini. Ka ísiksi usinka míteni eska jinit’u únhaska k’uínchekua San Fransiskueri ka eskaksi ixu anapueeni p’ikuarherasinka imat’u.

Uantantasti: Yunuen Torres Ascencio

Ístu ixu juchari iretarhu enkaksi márkueka, irenkurhicha la píchpiricha nirasintiksi ánchekuarheni máteru iretaechani jimpo ka máteru paisicha jimpo eska jini dos Unidos.

58

Mátaruecha uantasti: “Ístuni míteska eska mótseticha máruksi jurap’erasinka temunkurhiri jimpoka amampecha pakarasinka k’umanchekuarhu sapirhatichani exeani jimpokaksi tumina uétarhenchasinka enkaksi axamenhaaka jimpoka iretarhu no jarhaska ánchekuarhita. Ka méni ísi inte jasi irekua kánkua kómu nitamakuesti nanachiri jimpo enka pakarak’a. Ka ísi jurhenkuarheska eska no xani sési ampeeska uérakua nirani ánchekuarheni eska sánteru sésiska ixu niátani ampema ka jánkuarhentani antani sési irekuani”.

Uantantasti: Ofelia Murillo

Ji kurhamarheska juchiti tatapichuni. Kánekua tsípiska jimpokani míteska sánteru nénaksi p’ikuarherasini enkaksi jini jauaka, eska jini jatini sánteru jukaparharasinka mímixekua ampe.

Jurhenkuarheska eska tumina kánhchakua uinhapeska ka jiniasi páp’esinti. Pero eska no sóntku ka ísku úsinka ma jurak’uni iretani ka nirani jiniasi enka no miiuaka, jimpoka no mítesinka néna nitamakuarhea, xeari sóntku ánchikuarhita, ampe úkuarhincha xanhari jimpo, ka néna nitamakuarheni jini jatini. No ts’unhapesti nirani, uáni kuiripu kuántpesinti tumina pari maiamuni p’apitini enka parhikutauaka, uánekua xanharu jimpoksi no sési úkuarhenchasinti ka nóksi sóntku ánchekuarhesinti.

Enkaksi na jirinhak’a ia ánchikuarhita axakuasintiksi tumina imaeri k’umanchekuarhu enka ixu pakarak’a.

Jini mámaru ampe jurhenkuarhinhasinti junkuasintiksi ka ixuksi ánchikuarhisinti eska jucheti tata píchu, enkani uantontskuarhikuka. Ima kurhinta úristi ka janhanharhikuaesti, jimpoka jini jurhenkuarhiska, ka néna enka jurhenkuarhika sési ampesti. Tsípeparini kurhinta úsinti. Jini Estados Unidos kurhinta úsirenti ka úkata ampe Méjiku anapu atarantasirenti.

Tata píchu k’arhatasirenti ka tsitisirenti kurhinta úrio ísi nitamani ka jima uantaxekuasirenti ánchikurhirichani máru. Méni jimpo kurhamarhiaspti: Jarhuataksini? ka nóksi uékaspti jimpoka jatsispka k’amarani k’arhatani. Enka na k’amarapka ia arhiaspti eska kámaraspka ia ka eska uékasirenka jarhuatani uni kurhinta. Ánchekuarhirichaksi kurhamarhespti jurhenaspi siuankuaeni jasi uáni eska uénapirinka ia. Erak’uasti ka uénani úni kurhinta siuankuaeni jasi ka

59

sánhani úntasti enka na k’amaraenka ia k’arhatani jarhuatani kurhinta úni. Ma “hora” jarhoatasirenti ka ísi jurhentastiksi máteru ampe úni.

Méni jimpo chúnhant’aspti ma ánchikurhiri ka tata pichu kurhak’urhisti eska intsinhapirinka sésikua ánchikurhini. Jima anapu acheti no mítespti eska jima jurhenkuarhexapka ánchekuarhini. Tátsekua sánteru jurhenasti ia ka karhatanhasti ka jurhenkuarhesti ampe ka ampe jatsikunhasirempi kurhintarhu. Tátsekua junkuasti ixu Ch’eráni ka iási kurhinta úsinti. Nóteru nirasinti ia jiniasi. Inteni ampe sánteruni kurhaanhch’aska.

Jurhenkuarheska eska úsinka ma nirani máruteru ísi ka jurhenkuarheni mámaru ampe, ka tátsekua jurhentpent’ani cheeti iretarhu. Sési jarhasti enka ma uéraaka ka jurhenhkuarheni mámaru ampe ka no mirikurhini nani enkari anapueka ka míteni nanirisi nirani jaki.

Uantantasti: Miriam Niníz Rojas

60

Kuataperakua témpeni U t’u ma cheeti uantantskua.

Kurhankuarhe iretarhu néna enka nitamakuarheka ma k’uiripu enka nitiika “Norte” ka karantsi ixu.

Úakakarsi karatsperani jarhani

61

Néna enka jucha ixu parhakpeni jakankurhik’a ampema ísichi kurhankusinka iámintu ampe eska enka jaka uanontarheni.

Enkaksi Castilla anapu jimpo uantontskuarheaka sési p’ikuarherakuarhesinti. Enkaksi Juchari anapu jimpo uantontskuarhek’a manak’urhasinkaksi ka mámaru nínharini, ka ísi uantontskurhita sési kurhankukuarhesinti ka mámaru xarhatakuarheni eska na p’ikuarherani jauaka.

Jurhenaskiri p’urhepecha jimpo uantani? Taaticha o tatitaecha uantasini p’urhepecha jimpo? Ekari ampe no jurhenaka, uékapirinti jurhenkuarheni?

Máteruecha arhistiksi:

Kurhakuaskaksi máru tataka sapichuechani ka máru tumpiechani eskats’ini arhipirinka uantakuechani p’urhepecha jimpo, ka arisits’ini arhisti:

Intskurini ma putimukua: arhikuekaparini: “dame un beso”

Nana echeri: “madre tierra”.

Kaxumbekua: juchari jáxekua sánteru jukaparhakuaesti.

Ch’ikari: arhikuekaparini “leña”. Tsitisinka jimpoka

P’ukuri: kurhancnhasinka, jimpoka ísi arhinhasinka juchiti auita uáche. arhikuekparini: “pino” Iunuéni: “enka kúntantak’a mámaru ampe”

Mintsita: arhikuekaparini “corazón”. Tsitisinka jimpoka iámintu ampe manatasinka.

Ch’amonini: “eco”. Tsitisinka jimpoka iámintu ampe k’uanhatsentasinka eska ch’amonheta.

Janastarhpekuarhu: “nani enka ma jánhaskak’a”. Jintesti jima enka takukukataecha jaka, “Bibliotekarhu”.

Parakata: “mariposa”.

Tsitsikï: “flor”.

T’upuri: polvo”.

Janíkua: “lluvia”.

Xuma: “nube”.

Erándini: arhikuekaparini “amanecer”. Ima jantu sánteruni tsitisinka. tatita mentku chkariri ampe uantaxesinti.

Uantakua enkari sánteru tsitik’a:

KUÁP’ENI

TATA JANIKUA

Nénachi jáma jucha p’ichpiricha

¡Ah Tata Janikua!

Xáni sési junkuak’ia

Nénachi jucha kuáp’epirini Juchari jatsikuarhekua ampe, jánkua ampe, xukuparhakua ampe.

Nénachi kuáp’epirini sani,

Charrapunkuani mántani uéxurhini

“Antisi enkaksi p’urhepecha jimpo uantontskuarheaka sánteru terekuarhekiksi ka enka españoli jimpo uantontskuarheaka nóksi xáni terekuarhesinka.

Dalia Tsitsiki itsi jatsintukusti sani, tata Janikua ¡Qué bonita chuparrosa, cariñosa xáni alegrekia

p’ukurichaksi p’ukumintio, nóteru xáni jukastia

no kuatantani chuparrosa xuparhakeni para tsitsiki itsuni

Ka Eraxamani itsit’u enka nóteru xáni iurhek’ia Japuntarhu kurucha urapiti nóteru uémesintia Ka k’uiripu enka nóteru uék’a P’urhe uantani Nénachi kuápepirini sani Gilio

Mák’u piritani ka chararani iámintu ch’amantuntani ka iámintu tsitsiki sapirhatichaksi luegu luego tsiparhunhani Chapasi de Comachuen

Alicia Mateo

Máteruksi arhisti: “Ch’upiri juchari tsípekuaesti, ísichi t’arhexeska. Nák’irukaksi intsinhaka jimpanhe ampe tátsepani jarhasti ch’upiri, parhankua ka jima manakuarhexati eratsekuecha ka jima uérhusti mámaru ampe.

Enka Ch’erani iretiecha uénapka kuáp’ekuarheni eska nóteru p’ikunhapirinka ch’ukari, iámintu ampe kurhikakuecharhu uérasti. Kúnkorhenhantasti ch’upirirhu uanantani japarini. Jima uantontskuarhenhasti, mámaru eratsekuecha, mántani chúri eska na janhapka kuátanhani ka eratsenhantani” Tata Trini

Para uni kuáp’ekuarhenhani eska nóteru p’ikunhapirinka chkari, Ch’erani ireta mínhakuarhesti ka nóteru jiáretani eska inchaakupirinka uérakuaecha. Nóteru ma troka inchasti íntspekuarheni ampe. Ísi mintsikaparini eska nóteru nema inchaakupirinka kurhikanhasti iápuru uapatsekuecharhu Ch’eráni anapuecha.

Uékani íni ampe sánteru mítekuekani, sapirhaticha kurhamarhestiksi máruteruechani.

Kurhamarhemperakua enka Adonay Ángel úkuka Yair Duranini.

Adonay: ¿Ampe uantontskuarhenhasireni ch’upirirhu uanaparhakutini japarini?

Yair: K’uiripuecha uantontskuarhenhasirenti néna sési ják’untani uantanhiatani, néna enkaksi niáraenka ch’ukari p’ikuricha ka na enka xáni ch’ukari jápka. Ka ístu kurhamarhemperanhasirenti na jatini k’amakurhipirini xási ampe.

Uantontskuarhenhasirenti eska no meni k’amakurhipinka, joperu juramukua jatsisti jarhuatani eska sésintaaka. Ji ísi exesinka.

Adonay: ¿Ampeksi uantontskuarhesireni sapirhaticha?

Yair: Sapirhaticha? Uantontskuarhesirenkaksi eska iámintu ampe, manakuarhiricha k’amakurhixapka, eska nóteru jarhaspka anhatapuecha, ka naniteruksi

Yunuen: Jucheti ch’upiri ma ekuatse tanimuespti, uapatsekua tsimantarhu o kétsekua, enka jápka ueakumani enka P’arhachu isi ninhaka.

Joel: Amperi úsireni tú jima kurhikakuarhu japarini?

Yunuen: Ísi eska iámintuecha jánkuarhentasirenkaksi jarhop’erani ampe enkaksi úpirinka. Enka nema mítepirinka sáni ampe, k’uanisirenti aiankuani iámintu irenkurhirichani, sapichani ka k’ératichani enkaksi jima japirinka, ka ekaksi ima mítepirinka sáni ampe, imat’uksi uantantasirempti. Ístuksi jarhop’erasirenka páni itsi ka chákari ampe, o úmantani sáni ampe. irekapirini kuinicha? Eska nóteru jarhaspka ia echeri amparhaticha nani enka “avena” jatsikunhapirinka ka máteru tsikikuecha.

Adonay: ¿Ampe t’irenhasireni kurhikakuecharhu?

Yair: Jima kurhikakuecharhu t’irenhasirenti ima ampe enka juchari mímixekueka: máskuta, atapakua, nakatamalecha, kamataecha ampe.

Adonay: Na xáni miiukuaespi cheeti kurhikakua?

Yair: Jucheeti ch’upiri tsimani miiukuaespti taninta uapatsekuaeri. Ch’upirirhu japarini kuátanhasirenti, jimaksi t’ireranhasirenti enkaksi kuáni jarhaenka. Ístu uantontskuarhenhasirenti, eskaksini na arhika ia, p’ukurichaeri ampe.

Kurhamarhperata enka Joel Macias García úkuka Yunueni Torres Ascencioni.

Joel: Nákispi cheeti ch’upiri?

Joel: Úpirintsini aiankuni sáni uekatsemakua ampe enka jima kurhaakari?

Yunuen: Jo andi no, ma ampe enkani pakats’itini pakaraka imaesti enka uantantapka nanita ma ka jucha jinkuni irenkurhisinti. Ima aiankustits’ini uekatsemakua kánekua ióntki anapu; uantantasti Casimiro Lekoeri ka Inés Chávesiri ampe. Isi uantasti eska ima Ines Chávez jurhasirempka kakani juchari iretani, ka uarhiitichani páuasirenti ka no sési káuani. Ístu uantantasti eska juáta enka krusi ma jaka, o ixu no iauani isi jarhaska ma p’orhota enka jini uéntak’a Páskuarhu japuntarhu, ka jimak’ani enka ixu uarhiperanhaenka tata jémpecha páuasirenti sapiichani imani p’orhotarhu. Ka enka na nóteru ampema kurhakuarhenk’a ia k’uanhatsentasirentiksi. Ísi uantanhasinti eska ima p’orhota jarhaskateru pero no uánekua mítenhasti nanimintu jarhaski.

Ekari uék’a sánteru míteni ampe úkuarhespi, kurhamarhempekua kánekua marhuasinti sánteru sesi míteni. Úa cheeti kurhamarhempekuechani ka ni kurhamarheani k’uiripuechani.

65

Uantantskua néna enkani sirantaeri pixiki úkuarhentaka Uantantskua karantastiksi sapiicha enkaksi uantantskueri ampe niátapka.

S

áni namuni uéxurhinisti ia, enkani ji nanaka sapichuepka, úspkachi ma sirantaeri pixiki sési jasi. Pixiki k’éspti jimposini kuatantapka enka ióntani jápka uinini tarhiata. Enkaksi étskupka ia “méchani” ueenaspti tarharani, iámintuecha jima jarhaspkachi. Taati juchetirini jupik’utixapti enka jamperi pixiki tarharapirinka. Ma ampe úkuarhespti enka no nema erokuarhenk’a: jurak’utakuarheska enkarini jupik’utini jápka taati ka uenaska jít’uni kárani pixiki jinkuni. Enkani na karhakua nirani jápka ia jánhaskaska eska pixiki tsítakuarhespka ia. Iási jísini pixikipka ia ka iámintuecha exesirentits’ini k’étsekua jatini.

Urhetkuni chésirenka, pero enkani sánteru tarharaenka ka jarharheani juchiti márku irerichani nóteru uékasirenka ia jurak’uni. Xúmani ma xéntaska kánikua ampakiti ma ka nóteruni chéska ia, pero ima xúma púpurhasi úkuarhesti ísi eska máteru xúmaecha na jáxeka ka sóntku jatini iámintuecha uerasirenti. Ístu jucheti píchpiri xúma ueraspti.

Ji sánteru iauani karharaska, sánteruni jarhareaxapka, iauani niraska ka exeska néna enka jáxeka parhakpeni echeri. Iauani niraska jima jamperi enkani no meni eranhaskapka niárani… jima kánekua ts’irakuarhespti.

K’uiripu no irekaspti jima ka iámintu ampe ísku jarhaspti, no nanimaru járhaticha ka táchani jási, ka iámintuksi merexespti eska xanuateni jási tsárati. Jarhasptiksi máru juátaecha peru iámintu iéstakua jukarini ka jima kétsesirenti iurhekuaecha t’uput’upusi ka meremerek’usirenti mámaru jási atakata. Jánkuarhentaska kétsentakuekani ka no úska nóteru kárani ia ka ueenaska jarharentani imani enka xani no nanimaru jántepka. Iauani eraaska ma parhakpenini chupipiti ma, ima echerispti, antarheraska ka jimarini erokaxapti p’íchpiri xúma. Imarini jarhuatasti k’uanhatsentani juchenio ka arhistachestirini néna janonkuani echerintu.

66

M

a uéxurhini jimpo jucheeti iretarhu uánekua k’uínchikua úkuarhesinti.

K’uínchikua úsintiksi urhekuticha enkaksi niátak’a tsípekua jinkuni ka p’ikuarherani eska ísi uétarhesinka. Márku irericha, p’íchpiricha ka irenkurhiricha jarhop’eranhasinti mámaru ampe niátani, tanimu jurhia k’uínchesinti. Kústakua jarhasinti, charakua ka k’uiripu máruteru iretiecha enkaksi jurhak’a k’uínchini.

Ariistiksi máru k’uínchikuecha iretecharhu: Kandelaria, ch’anantskua, “Semana Sánta”, K’uanikukua o K’uaninchintskua, Nabidá enka uarharicha uéranhajka. Jarhasti sántuecheri k’uínchikuecha enka iretecharhu úkurhintajka, ka enka uapatsikuecharhu únhantajka, ka enka ánimecha kéjtsïtaminhak’a imajtu iápuru únhasïnti.

Aiankuakaksini néna enka jánhak’a Kórpasi o k’uaninchintskua k’uínchikua jimpo.

Kánikua sési jáxisti i k’uínchikua, tsípikueni jánhasinti ka iápuru iretecharhu úkurhisinti. Juebisi Kórpasiri no jintesti ma jurhiata míntakata, máiu o júnio jimpo úkurhintasïnti. Katoliku jakajkukua jimpo isi míntakata jarhasti eska tanimu ekuatsi jurhiatikua jimpoeuaka tsíntskuarhu uératini, joperu no májku jurhiatikua úkurhintasinti iápuru, exeparini eska úaka p’orhemp’eranhani. I k’uínchikua isi mítikatesti eska k’uaninchintskua, jimpoka táchani

67

ampe ánchikurhiriha jimek’ani xarhatasinka ampe enka jimpo nitamakurhinhak’a. Jimaksi xarharasinti tarhericha, axuni ataricha, k’uípu akuricha, tekaricha, tsúntsu úricha, kústaticha, ampe atarantsticha, jorhentpiricha.

Ima jurhiatikua chúskusinti kústaticha kórpasiri kústakuani arhirani ekaksi jámak’a pámpitani táchani ampe ánchikurhirichani.

Uanopikuarhu mámaru ampeksi k’uaninchisinti, ampe enka ánchikurhinhak’a ch’anarakueni jasi úkata, ka xép’iticha k’arhakurhinhantasinti imani ampe: uaxantsikua o jatakua sapirhati, tsíri piiukata, kurhinta sapirhati, mantelasi ampe. Juátarhu anapu ampe kánikua xénhchakatesti, k’uípu akuricha juásinti k’uípu ampe ka istu manakurhiri ampe enkaksi tsípiti jupiok’a ka máru enkaksi uántikuak’a: axuni ampe, jiuatsi, k’uiiusi, tukuru, akuitsi ampe. isi úparini intsimperanhasinti ampe ka mót’akutsperanhani, ka ístu auantani kurhakuni eska ementa sési junkoka ka ampakiti p’ikuntskua jarhani, ka eska mámaru ampe úricha sési nitamakurhioka.

68

¿Chíini iretarhu ampetaru k’uínchikua úkurhisini? ¿Kórpasiri k’uínchikua na úkurhisini?

Kuataperakua témpeni ma. ¿Náki kuínchekua sánteruri tsitisini? ¿Anti?

69

Mirinkua Uantantasti Alicia Lemus

Í

sistinha eska uantasntkua uarhiiti veramsiri; mirinkua k’uiripuechani páasinti.

Jantsiri manakurhiriri jukasti, uarhiti máesti. Mirinkuanha p’irhikurhint’asinti, ísistinha eska ma tsípirpiri ni ampakiti ka nít’u no ampakitii, jimesi jámasinti.

Mirinkuanha tatachichani xarhakuasinti, mámaru jási xarhakuasinti ka xanharu jatsikuarhesti, no iápuru jámasinti. Exe je eska Ch’eranini kauaruecha arhukusinka, inteksinha jintesti mirinkuaeri xanharicha. Achetichani xarhakuasinti imaechani enkaksi no niátak’a ísi eska náepirinka iretani jinkuni. P’irhikurhisinti ka uarhiiti úkuarhentani. Nóteru mítekuarhesti na jáxeski, ji kurhantiska eska ísiska eska ma uarhiiti ióntki anapu sirit’akua ka xukuparhani eska jiáni. Tatachicha kakonhaskasinti imani uarhitini exerini ka tátsekua exesirentiksi eska námintu jáxeka: ikichekua janturhani ka jak’urhani.

Chérhekuarhesirenti. Tátachi k’ératicha enkaksi uantantaenka mirinkuaeri ampe ísi uantasinti eska páasirenka kauaru “Bajonero” arhikatarhu ka eska jima k’uaninhasirenka tsítaani. Inteni jási uantantskuecha uánekuaesti.

Nák’iruka ísku no jakak’ukuaeni jáxeka ísi jakak’usinti Ch’eráni ireti, ixu ísi mítenhasti.

70

71

Máteruechaksi uantasti: :

¿AMPESKI ENKARI TSITIPIRINKA NO MÉNI MIRIKURHItINi?

Eduardo Bautista: “P’intekuechani, juátaechani, Kueraakatani, ka sánteru anhatapuechani jimpokari no iápuru exesinka” Ofelia Murillo: “Enka juchiti ireta jauaraka kuáp’ekuarheni p’ukuri ch’parichani nóteru jiák’utaani” Yunuen Torres: “Anhatapuechani enkaksi ixu iretarhu jaka jimpokaksi k’amakurhixaka” Rosalidia Huaroco : “Enka juchinio anapuecha márku jauaka enka juchiti taati junkuaaka ementa o p’euantskua jimpo” Yulisa Yanet Velázquez: “Enkaksi chúrekua t’ireni jauaka tatitaechani jinkuni, nák’iruka nanita uarhika ia, útasteru tánkuarhesinka mántani chúri ka niranksi p’urhempeni tatitani ka ísi márku jarhasinkaksi imaechani jinkuni. Kurhamarheasinka mámaru ampe ka arhits’ikusintits’ini ka jarhoatants’ini ka jít’uni jarhuatasinka. Jucheti jimpo sesi ampeesti ísi úni ka para iámintu márku irericha. Tatitats’ini márkuerantasinti.”

Tata Trini : “No méni mirikurhiaka enkarini taate jucheti jurhentaka: ampe enkani ji uánekua vap’aechani jatsiaka ísi niátani, juichiti taati ísi úspti, tatachi ma enka k’eri familiani jatsipka ka nomintu jatsikuarheni, ka nak’iruka ísi iámintu juchantsini urhepani petasti jimpoka úska eska na k’uaninchaenka”

72

Alma Durán: “Juchiti nanitani jimpoka kánikua kéri ampespka juchiti irekuarhu, imarini jurhentasi p’urhepecha” Quetzálcoatl Hernández: “Juátani”

Jatsinharhiku ixu ampe enkari tsitipirinka no mĂŠni mirikurhini:

Tatachi máeska enkani iótakuarhu nira’ka- Sánteruni sesi jámasinka eska jurhiata miiurakua, xarhenkuni jauarasinka ka uantatsekuarheparini uantatsekuarhetarhu apontesinka”

Nanachi ma turhipentasinti ka xerekuarhentasinti uerani ka uerani Janikua

Jurhiata

Mintsikuarhekua kuatalejoo

Ixu uénasinti xanharakua

Toru tsakapueri Kauaru

Mintsikuarhekua kuatalejo kutsanta Itsi uératirhu

74

Juáta ka juchari tsánharhikuecha Xanharani tua anapu xanharuecharhu isi

“Ch’erani uánikua juátecha jarhasti, uánikua jintestiksi juátecha enkaksi ióntki charaka ka pátakurhinksi, ch’upiriristiksi inchatsikurini, ka uérakua anhatapuechanksi jukarhikurhiosti, inteechaksi ireteri kuárichesti.”

Tata Mersé

75

Nana Imelda ka nana Adelaida arhistits’ini eska enkaksi niuaka juátarhu karhanharhikuni uétarhisinka orheta kómu-arhikurhini ka sésikua kurhatakuni: “K’uanisinti juátani kurhakuni eskats’ini kuách’akuaka ka kuáp’intsini”.

Jorhenkurhiska anti enka iápuru isi arhinhak’a eska na arhinhak’a, ka jánhaskaska eska juchari iretarhu mámaru ampe jarhaska enka no mítinhaka, ka ampe enka kánikua k’uanik’a mítini, mintsikasinka no kuatantani jirinhani jarhani jimpanhi ampe.

76

Miriam Niníz Rojas

Enkari uék’a mítini ambeeski juáta, uétarhisinti iámintu chiiti p’ikuarherakuechani jinkoni antarhierani, mítini na jarhaspi ióntki isi, ka kurhankuntani eska inte kánikua jukaparhakuaeska juchari iretarhu.

Sapiicha ka tumpiicha niraskaksi xanharani xanharu ma jimpo enkats’ini orhechipaka tateecheri ka naneecheri uantakuecha. Ísiksi exentaska imani no jakak’ukueni jási irekuani enka p’ukutapurhu isi t’arhexik’a, ka enka k’uanik’a kuáp’ini.

Kurhankuskaksi na enka juchat’uni p’irani jaka tsípikuani enga jima uérak’a, ka jánhaskaskaksi eska kánikua marhoasinka kurhankutsperani kuerookata ampe jinkoni.

Nanina mítini jimpanhi ampe, juchiiti, ka juchiini anapuecheri ka juchiiti ireteri ampe.

Niátakua Mókunta ampe enkakini ixu kurhamarhik’a ka exeroo chiiti pámpirichani na enkari mókuntaka.

Na jántiski ma uanontani chiiti iretarhu? mítiskiri na enka jántipka ióntki? mítiskiri náki manakurhiricha jarhaski ini echeri jimpo, ka ampe jasi uitsakuecha jarhaski?

Jarhaski iorhekua ma, japonta o itsi uérati jimeesi enkari isi t’u irekaka?

Kara ampe ka amperi jimpo úsinki t’u irekani enka parhakpini anapu kuerookata ampeeka?

Nári exesini, antisi p’ukutapu xáni jukaparhakue?

Ampeeski sántaru k’éri uantanhiota chiiti iretarhu inteeri enkaksi no sési úkuni jaka ma uanontani anapu ampeni?

Nári arhisini, nanina úpirini sántaru sési irenhani chiiti iretarhu?

77

“P’ukutaput’u jintesti juchari k’umanchikua, jucha jimini anapueska ka mítperaskaksi inteni jinkoni. Néentarku néma Ch’erani anapu enkari t’u kurhamarhioka, mítisti námankaksi arhinhak’a juátecha ka itsi uératicha. Ísi k’uiripisinti ma, k’umanchikuarhu anapuechani kurhach’ooparini ka ístu p’íchpirichani.”

Alicia Lemus

78

Únharhiku uitsakuani o anhatapuni enkari sántaru tsitik’a.

Juáta jintesti nanimanka anhatapuecha, Uitsakuecha ka manakurhiricha irekaka Únharhiku manakurhirini enkari sántaru xénhchak’a.

79

P’ukutapu jintesti juchiti ireteri mintsita Uantantskua enkaksi sapirhaticha karaka ekaksi tánkurhintapka uantantskuechani karooni.

M

éni jimpo jarhaspti parhakpini. Jima iretsikua k’éri ma jarhaspti ka imani iretsikuarhu, iretsikua sapichu ma, ka jima ireta ma jarhaspti. Kánikua sési jántispti imani iretarhu ka sési jási p’ukutapu jarhaspti juátecharhu; enka úpka, k’uiripu enka no xáni jatiritipka nótaruksi uantasirempti eratani imani ampe. Iámintuecha sántaru uékaxapti mítini jimpanhi úrakua ka jimpanhi ampe enka xarharapani jaka. K’ératichak’usi jánkurhini jápti eska iámintu ampe isi japirinka eska jimek’ani enka imecha sapirhapka. Nót’uksi ambe úsirempti úni jimpokaksi no kurhach’anhsirempka.

Nitamasti uéxurhinicha, ka tumpiicha úntasti exeni eska nótaru káni p’ukuricha jarhaspkia, ka eska itsi uératicha k’arhinkuxapka. Niárasti jurhiatikua enga itsi nótaru jápkia, nít’u t’irekua enka echerirhu jukak’a. Iámintu t’irekua jinteesptia enka jatakua sapirhati jimpo juánhak’a ka enka jatsikunhak’a ampe ma enka jimpo no tsip’ioka. Jimak’anksi jánhaskasti eska ima jasi t’irekua no sési úkuaxapka, ka jimak’ani iretarhu úntaspti tánkurhinhani. Exesptiksi eska sáni ióntakuarhuespkia; nák’iru isi nóksi ísku pakarasti, úntastiksi jatsiontani p’ukuri sapirhati, ka kuátani imani eska xáni sáni útasi pakarani jápka.

Isiksi jarhaspti ióni uéxurhini, eratani ka kuáni p’ukutapuni.

Jimak’ani úntastiksi tumpiicha jorhentanhani kuáni iámintu kuerookata ampeni ka ústiksi úni eska p’ukutapu méntaru xunhapintapirinka ka méntku jimpanhint’ani jarhani eska orhetku isi.

80

Iretecha kánikua jukaparhakua ampe exesinti p’ukutapuni, jimpoka jima ueerasinka mámaru t’irekua ampe: xakua, terekua, ka sipiati úrakua ampe.

Nana Adelaida

81

“Ióntki ninhasirempti “Kutsantarhu”, juátarhu karhakua, ka jini uarhanhasirempti ka jiuakurhinhani eska kórpasi jimpo na jiuakurhinhak’a. Jimaksi junkasirempti kétsintani k’uínchikua ma úntani, ka nótkiksi jamperi janunhkuasirempti iretarhu enka méntku xáni k’éri ma janikua uekorhiempka, kutsanta ma, ka ch’anuantani (xanuantani) jamperi. Uantanhasinti eska enkari Kutsantarhu uarhooka, janikuanti ioarhintasinka.”

82

“Jima jatiru méntkisi, juchiiti taati k’éricha ka ji ísiksi miánharhimuska.

Enkani ji mítika inte tsakapueri enkaksi arhik’a “Tórurhu” jintesti eska jima ióntki irenhaspka.

Ima jintesti ma ampe enka útasi pakarani jaka iótki anapuecheri enkaksi juátarhu uanatini irekapka, jimaksi jatsikurhiospti irekuechani.

Alicia Lemus 83

Mátaruecha uantasti:

Mítiskiri ampeeski Japinkua?

Íksi uantontskurhitecha “uantantskua” arhinhasinti. Mémichantsini arhichioni jarhasinti. Intechani jinkonts’ini arhistachini jarhasinti eska uétarhisinka kaxumpini.

Sinicha enka nana Kutsi jatsioka “Juchari nanita uantasirempti: Eranharhiku je nana Kutsini ka inteksini arhioti eka i kutsi p’amenchakua ampe jauaka o uarhikua ampe. Jucha sési páp’erakua jatsispka, kuerookata ampe jinkoni o p’ukutapuni jinkoni, ka méntku iámintu ampe jinkoni enka jaka ma uanontani.

Enkaksi sapirhapka ka úntaksi sini uauakurhini, Nanitats’ini arhisirempti: “P’i je sinini ka nana kutsini intsimpi je eka ima sési uirhipiti jauaka eska jurhiata, jimpokaksi imeeriska. Isit’si sóntku antatantouaka.

84

Alicia Lemus

“Jintesti enka kánerak’a jatsikurhikuani.

Uantanhasinti eska isi jimpo tsíri jatsikuarhu jucha kurhankurhisirempka: Nóri exesini enka siuinicha úkurhik’a? Exesinti enka sapiicha uiriik’a siuinicharhu inchookuni?

Sántaruksi isi úsirempti jimpokaksi arhinhasirempka: ¡Uirii, antanku, uirii, antanku! Uantanhasinti eska inteeska japinkua. Siuinicha ísi exenhasirempti eska sési jimpoksi uinhapikua máeska, eska ampakiti ampeeska. Jo peru uantanhasinti eska úpirinka támu ísi uérani, eka tataka sapichu enka siunirhu inchookupirinka ikikurhi máepirinka, nótaru exenhantasireimpti, siuini pasirempti ka nótaru k’uanhatsini.

Mák’u jási úkurhisinti tsírini jinkoni: enka xanini ják’iini jási ma uérooka ka iúmu jak’i sapirhati jukani, intet’u japinkuesti. Inteni jimpo tarheri sési uérooti. Ísi uantanhasinti eska enka inte jási xanini uérapuaka, no ma ampe kueratooka, méntkisi jauati tsíri ka ampakiti p’ikuntskua.”

Adelaida Cucué

“Juchari nanitat’uts’ini jorhentasti kaxumpini ma uanontani anapu ampe jinkoni.

Eska ari ampe, arhisiremptits’ini eskaksi no méni jupikapirinka kuínini ma o xerekuani, jimpoka inteksi Diósiri kuerookateska; enkari t’u p’ikuaka xerekuani ma, ementa jimpokini sirpiri atooti. No sésisti p’árhini kuínicheri irekuani. Nak’iruksi exepirinka xerekua ma uekorhini, nóksi jámasirempka p’árhini. Inteni ampeksi sési inchats’isempka jimpoksisi janhanharhiempka.”

Akuitsi sapichueni jasi ma enka sési útspik’a Xáxisti eska akuitsi sapichu ma mámaru jási atantskata. Jucha arhisirempka pataki o patakutsirhi. Ixu jakak’ukua ma jarhasti eska enka ma k’uiripu ják’irhu kámooka inteni akuitsi sapichuni, eska kánikua jorhenasinka máru ampe úni. Arhisinkaksi: Jénti, ija, ják’irhu káma patakutsirhini. Enkari tekoouaka ísi úni jorhenkurhiokari sántaru sési sirikuni, úakari úni mámaru ampe enkari uantempka eskari no úpirinka úni.”

Adelaida Cucué

Jiuatsi o ts’ame “Jiuatsi o ts’ame antarhierooti ka k’uístankini. Ampe enka úk’a, mirikuat’asintikini. Juchari taatits’ini énkusti eska káni eka imani mirikuat’empka, jintespti enka t’ireni jarhempka tsípa anapu o ísku uaxakatini jarhani ka jimak’u kurhooni jiuatsi k’uaunchini jarhani.

Eka isi k’uaunchik’a jintesti jimpokakini jirinhantaxampka, pákuekankini. Eka ima ísi kurhoouempka, isi p’ikuarherasirempti enak’i ísku úntempi uarhani, ka jiuatsi teresamurhasirempti jimpoka k’uít’axapkia. Jimak’anisti enkakini k’uistak’a ka pánkini. Uaxakatinti jauaka ka k’uíeranti ka márutaruri tsínharhini ka nóri mítini naninakini ísi páski.

Juchari taatits’ini arhisirempti eskat’sini jiuatsi pápirinka. Méni jimpo juátarhu exespka ma. Enak’i terekurhik’i ka mámaru nínharhintani, no jánhaskurhisti ampesi uk’i; ióntki anapuecha k’óru mámaru ampe jakak’usempti eska úkurhipirinka. Ji no exespka eskarini jiuatsi uékaxapka páni. Sapichueni jámani chékurhisti eskakini jiuatsi pooka tsitantani. Inte jasi ampeesti enkaksi kurhantik’a eska juchari taaticha ka tatitecha exesirempka.”

Alicia Lemus

85

Témpini ma niátakua

Mítiskiri ampe arhikuekasinki enka jiuatsi k’uaunchik’a, ka enka tukuru uerak’a? Mítiskiri mátaru xási jakak’ukua ampe? Kara ka únharhiku inteni ampe ini kuirukukatarhu:

Mátaruecha uantasti: “… juátecharhu uérasinti itsi ka tarhiata. Ísiksi úkurhisinti janikuecha enka janik’a. Eka juáta “Piloni” káts’ikua jukantak’a janikueri, janioti jimpoka janioka…” “…enka auantarhu jóskuecha uininchik’a, nana Kandelarieri k’uínchikua jimpoekuarhu, ka Jararu jósku xarharani, míntesti eska janunkaxakaia tsiri jatsikua.

Jimposi ima jurhiatikua úch’akueranhat’i euakua ampe.

86

Anhatapu jukanchasti jarhani, xáni jimpo jimpoka tsípitiska.

K’uanisinti janhanharhini anhatapuecheri ka manakurhiricheri tsípikuani.

“P’ukutapu janhanharhikuesti jimpoka tsípitiska. Ji ísi exesinka eska xunhanta jinteska iurhiri p’ukuriri. P’ukutapu janhanharhikuesti jimpokaksi jucha jima t’arhexiska, jimaksi t’arhexisti juchiiti sapiicha. Orhetku ji mintsita p’amerasirempka enkani p’ukurini ma kuáskuempka, uétarhinchakua jimpoespti, jimpokaksi jima uératini t’iresirempka. Ekaksi p’ukuri ch’aparicha xáni jámaka kuáskuani, ji uantaska: ¡Náxamuksi xáni chétapu nitamaski ts’imi p’ukuricha!”

Tata Gabinu

Anhatapuecha ampakerantasinti tarhiatani ka íntskusintits’ini enka jucha jiret’ak’a.

Anhatapuecha echerirhu p’irasinti t’irekua.

87

Mátaruecha uantasti:

Ísi eratsintaskaksi juátarhu isi jámatini:

Jánhaskaska na enka kuerookata ampets’ini xáni janhanharhik’a, jimpoka mántani ampe enka juátarhu jaka kánikua jukaparhaska ka uétarhinchanhani. Imats’ini kuáp’isinti ka juchaksi no jukaparhakua exooska nit’uksi eratooni jimposi uánikuecha k’amaratia, ka uánikua itsi uératichaksi k’arhinkustia.”

Yulissa

“Xanharu sapirhaticharhu ísi, sántaru jukaparhakua ampe enkani jorhenkurhika jintesti mítiontani juchari p’ikuarherakuechani: ts’émuskaksi, sipiruskaksi, mámaru ampeksi mítiska juchari iúmu p’ikuarherakuechani jimpo. Ji ísi kurhankuntaska jimpoka juátarhisi jámparini sipirusinkaksi, eska nurhitini ampe, ka echeri námanka ják’untik’a, ka mítintasinkaksi mámaru ampe enkaksi sapichutki úntaka mítika.

Ofelia

88

Márku niátakua

Jucha mántani arhini úaka orhekuani márutaruechani ka jorhentooni jimpanhi ampe. Jánkurhiparini úni ampe eska na uétarhik’a, antakurhiokaksi eskats’ini márutaruecha kánikua mintsinharhioka.

Ni je máru jónharhitini xanharani mápuru ísi chiiti iretarhu, pámpieksini nema enka sántaru jatirikia.

Niuati ma orhepani enka éskapooka ka ima orhekuauati márutaruechani. Úakats’i p’ukutapurhu isi nirani o márutaru nanimanka nómpe no sési jántika. Ísi jónharhitini jánkurhi mítini ampe úkurhixaki jimesi.

Jorhenkurhi méntarueni mítini ampe: jánkurhini p’ikuarhitsini jarhootasintits’ini jánhaskani ampe jarhaski ma uanontani. Ísi úparini úakaksi úntani jánhaskani ampe jaki jini sántaru, ima jamperi enkaksi no mítika.

Jarhoototikini enkari ini ampe mókuntaska: 1.- Sipiruskiri ampe ma enkari mítika?

2.- P’ikuarheraskiri ts’irani o aparhini?

3.- Amperi kurhooski?

4.- P’arhiskiri anhatapu o t’ókstinini jasi ampe?

5.- Kurhooskiri manakurhiri ampe jámani jarhani?

89

Terekua ka uitsakua ampe enkaksi p’ikuk’a ka máru enka jucha ikarak’a, ka manakurhiri enkaksï jupiok’a ka marhoatanksi.

Exe!: P’itakata ampe enka ixu jukanharhika, p‘itastiksi sapiicha ka tumpiicha enkaksi jámaka íni úkuarhu enka arhinhak’a: “Mítini ka miiuntaskurhintani juchari echerirhu.”

Xakua ka terekua ampe enka juátarhu jukak’a ka manakurhiricha enkaksi marhoatak’a ka enkaksi sipiati úrak’a iónisi úranhastia Ch’erani.

Mítiskaksi kuerookata ampeni, ka intets’ini jorhentasinti ka kánikua arhikuekasinti inteni mítini ka úrani.

Ini jorhenkuani taati jémpecha jorhentoosinti Uájpechani, ka méntku jauenasinti sántaru ka sántaru Míjkukurhinhani ka Jorhentperanhapani enkaksi exepani jarhajka Námanka úranhajka ka ampe enka jimpo marhoajka.

“Ménichani ji isi uantasinka eska uitsakuecha no sipiatiska, eska intet’u juchari t’irekueska.

Mítiskaksi sipiasini, nurhitinini, quiénsabeni, gordolobo.

Jarhasti Cenicilla, kulantru ka romero juátarhu anapu.

Jatsioskaksi uánikua uitsakuechani enkaksi mámaru ampe jimpo marhoak’a eska torexikua; máru p’orhe jimpok’uni mítioska eska íni ka no mítika náksi arhik’i turhisi jimpo.

Nana Adelaida

Nanina jimpanhi ampe mítini, juchiiti ampe, ka juchiini anapuecheri ka juchiiti ireteri.

Na enka arhinhak’a: Ampe enka úranhak’a:

Niátakua Úkurhi takukukata ma jimankari karooka uitsakuecheri ampe juátarhu anapuecheri ka ístu enkaksi iretarhu ikaranhak’a. Jatsioku sani uitsakuani sirantarhu, ka uákari ichuskuteni ják’untani ka uánikua takukukatechani jima karhakua kúts’itooni. Jurak’u jima k’arhini namuni jurhia. Ekaksi k’arhiokia, úakari mánharhitooni mátatarakua ampe jimpo.

Eskari na sántaru jorhenkurhioka uitsakueri ampe, jimari karanharhikupani jauaka.

90

Gordolobo:

Marhoasinti jukua jimpo ka p’amekurhita ampe jimpo.

Cardosanto:

Marhoasinti enka Kapat’arhakua p’amerooka.

Iáteni:

Jarhootasinti enka no úaka iarhatsini.

Floripondio:

Úsinti jukua jimpo, ka p’amerhikurhikua jimpo.

Eka no sési úranhooka úsinti xúrpini, o ísku jánhaskan ampe, o eratsikua tsitani.

Toronjili urapiti:

Ampakerantasinti nani enka atakurhioka, ístu p’ameorhakuani, o enka siturhichani p’amerouaka, ka enka jukari t’ireoka ka ístu usinti t’irekuani sési jiántani.

Matondurikua:

Uantanhasinti eska marhoasinka enka no úaka sapiichani kooni, ístu marhoasinti sántaru temunkurhirini janhech’ani.

Xéparini: Uétarhisinti sési mítini nanina úrani ka na enka xáni uétarhioka mántani jási sipiati, jimpoka úsinka no sési útspini enka no auaka eska na jinteeka.

91

Xate tsitsiki:

Arnika urapiti: Marhoasinti

Kamelina:

Romeru:

P’ikup’isinti júkua ka ístu úsinti éskuarhu jupanharhitarani.

Ajusi ka sirupsi jinkoni puruatakata marhoasinti jukua p’ikup’ini.

T’ikatsi: Ementa anapu t’irekuesti. Ístu nanimanka uarhiri jauaka jima kétsikua jatsinhasinti ka ima sani antsitasinti no sési ják’untikuani.

92

júkua jimpo ka p’amekurhita jimpo.

Úranhasinti enka penchumikuani tamisi pooka, ka ístu uarhiiticheri p’amenchakuani jimpo.

T’irekua úntskuarhut’u marhoatanhasinti.

Purhu tsipata: Ixu anapu t’irekuaesti ementa anapu.

Salvia morada o té del monte:

Axuniri éskua:

Nurhitini:

Matsoorhakua p’ikup’isinti. Ístu tempuchakuecharhu kamata úranhasinti. Disiembri jimpo achamasi uátskuecha nana Iurhixini pákusinti.

Akampa: Urapi p’itanhasinti. Ístu xarhipiti jukarirhu jatsikunhasinti o xarhi k’urhuntarhu Semana Santa jimpo.

Cháksarhukua:

Malba:

Tsitsikisti.

Marhoasinti júkua jimpo ka p’amekurhita jimpo.

P’ikunhasinti ka San Fransiskueri k’uínchikua jimpo pánhani xanini pirirantani.

Tsitsikisti. Ístu úranhasinti eka xarhipirhutakua p’iuaka, o chinkuali jimpo.

93

Enkaksi nika juátarhu isi, exoontaskaksi mámaru járhati terekua. Mák’u jási eska xakua ampe, terekuat’u kánikua úranhasinti t’irekuarhu ka ístu sipiati úranhani eska ióntki na mík’ukurhinhapka Ch’erani. P’ukutapu kúntantasinti jorhenkuani ka jakak’ukuechani ka jima uaxat’akurhisti ireteri p’intekua. Ángel Moreno, enka jánhaskatika terekuecheri ampe enkaksi uápuru jukak’a iauani ísi, niraspti juchants’ini jinkoni ekaksi Kutsantarhu nípka ka ekaksi juátarhu pakarapka. Tsípa jimpo, máru iretarhu anapu kuátaticha exeroostiksi máru terekuechani enkaksi tsípku exekuapka ima jurhiatikua enka ónchipka ka janini jarhani.

94

I ma jasi terekuesti enkaksi “Suillus” arhinhak’a. Ístu arhinhasinti turhisi jimpo “Panza” o” Pambazo”.

P’orhe jimpo arhinhasinti “Pana terekua”. Anhasinti.

Jorhenaticha arhirasti “Clitocybe gibba”. Santaru mítinhasti eska “Clavitos”, “Señoritas”, “Montoncitos” o “Tikinche”.

Jorhenaticha arhirasti ini terekuani “Neolentinus”.

No akueesti.

I jási terekua “Galerina” arhinhasinti.

No sési útspisinti.

Terekuecha kánikua marhoaspti eska t’irekua ka ístu uinhaperantani k’uiripuni imani jurhiatikuechani ka chúrikuechani jimpo enkaksi uantanhiota jatsipka, ekaksi jauarapka iretani kuáp’ini, eskaksi nótaru xáni ísku eratanhapirinka. Ireta miántasinti ka diómeiamukua arhisinti Tata Kueroop’irini. Uáni terekua uirikanhapti ka úmanhantani jima enka kurhikanhempka, tsípikua jinkoni enkaksi jatsipka ampe enkaksi t’irepirinka imani jurhiatikuechani jimpo enka no jápka p’ikuntskua ampe jimpoka iámintu k’uiripu jimak’u jarhasempka iretani patsatani.

Amperi úa úni enkari jimpo kuáp’iouaka manakurhirichani ka uitsakua ampeni enka p’ukutapurhu irekaka?

Kuataperakua témpini tsimani

96

Miánta eskari t’út’u jinteeska enkari chiiti iretani kantsani jaka. Amperi uékasinki úni t’u chiiti iretani jimpo?

Para parhakpeni sánteru sési jánteni.

Uni eska na uétarhek’a, janhanharhini ka miákua jukani.

Irekuarhini sánteru sésipirinti enkaksi jánkuarheaka sési p’ikuarherakuarhu jántu jarhani enka iámu sésiuaka ka jurhimpitkueni. Márku marhuatani, patsapatsantani ka t’irerani juchari niátakuaesti.

Jraue eranhaskani ménterueni irenkurhini ixu iámintu kuerakataechani jinkuni ka juchari k’uiriputa chani jinkuni, kánekua jukaparhakuesti para uni mót’akuni ampema. Juchari irekua ka tsípekua no támuesti eska náepirinka juchari parhakpeni echerini jinkoni. Jaue jucha uénani enkaksi uékaaka mót’akuni juchari jánkuani ka únichi sánteru sési jási ják’uni parhakpenini.

97

Mátaruecha uantasti:

Ampe enka uékapirinka eska úkuarhepirinka ixu Ch’erani K’eri “Eska iámentu ampe sánteru sési niántaaka ka eska marhuanhaaka iámintuecha mák’ueni. Eskaksi k’ératicha jarhop’eaka, tumpiecha, sapirhaticha ka iámintuecha. Inte kánekua jánhastpeati sési niátakua ampe ixu Ch’erani. Ampe enka xáni úkuarheka ia no ískuesti”.

Yunuen “Eska juchari sapiicha sánteru sési irekaaka, ireta ma jimpo enkaksi úaka jámani ka nómpema arhiani ampe. Eska no jauaka uantanhiata ka eskaksi sési irekuarhiaka íni iretani enka jucha irekani jaka, eska jauaka p’ínantekua” Alicia Lemus “Ji uékapirinka eska sési ánchekuarhepirinka juramukua enkaksi jatsikuarheka”

Eduardo “Eskaksi chúnkumaaka íni ampe enka uénakuarheka ia ka eskaksi no kuataraaka kuáp’eni juchari ampe, eska no nema kakantaaka”

Adán “Eska juchari jánkua ka p’intekuecha no tsitakuarheaka”

Vladimir “Eska iámintuecha jukaparharaaka enkaksi jatsikuarheka, jimpokaksi urhetku nómintu jukaparharasirempa sési jimpo”

Alma “Eska sánteru k’épaaka kuáp’iticha ixu anapuecha ka eskaksi iámintuecha jarhuataka no chketakuparini. Exe je jatsiskaksi ma ampakiti p’ukuri tsiuarakua ka sóntkuksi sési niraxati”

Ofelia “Eska chúnkumaaka sési úkuarheni jakua ampe ka eska úkuarheaka sánteru mámaru ampe mímixekuarhu. Eska sánteru jatsikuarehanhaaka tumina ampe jánkuarheparini, p’ukuri ikarant’aparini ka eska no kurhiranhaaka. Eska chúnkumaka jarhop’erani mámaru ampe niátani eska juchari ireta sánteru sési jauaka, pimpinhanteni p’ukuricha jinkuni”

Rosita

Ji uékapirinka enskaksi no mirikurhiaka ampe enka jintepkaksi jucha, ampe enka jintekachi iási, juchari ireta, iámintu ampe ka iámintu ampe enka úkuarhika. Eskaksi jukaparharaaka imani ampe enkaksi mítitarkuarhentak’a eska iretaeska. Ji urhetkuni no mítespka uánekua ampe ka no tsitisirenka p’intekuechani. Ka iási eratsentasinka eskani Ch’erani anapueska ka ménku isi ixu anapueuaka ka no uékapirinka tsítani imani ampe enkarini ireta íntskuk’a, uantakua ka ima ampe enka xarhatak’a. Ji uékasinka eska chúnkumaka juchari ireta ixu anapu p’ikuarherani ka eska no tsíncheaka ima enka márkuerantak’a p’ikuarherakua”.

Yulisa “Eska no tsíncheaka juchari p’intekuecha jimpoka jima xarharasinka ampe enka jintepka Ch’erani, ka eskaksi iámintuecha jukaparharaaka mímixekua jucharini ka eska no k’uratseaka inteni jinkuni”.

Miriam “Eska ireta sési jauaka ka eska no xani uarhiperanhaaka eska urhetku”.

Quetzal “Eska ireta sésimintu jauaka, eska k’uiripu niaataka imani ampe enka míteka ia, eska k’uiripu sánteru janhanharhiaka iámintu kuerakatani ampe. Eska mímixekua chúnkumaaka eska na nirani jaka ka eskaksi p’iskuntaaka ióntki anapu ampe janhanharhia.

Betsy “Enka tsínchek’a ma uinhapekua eska janhanharthperakua, uákaksi k’amakuni íámintu ampe, arhikuekaxampka, uákaksi sánteru sóntku k’amakiuri. Mayaechaksï mítetixapti ia. Jaue miántani eska ixu parhakpeni mák’ueska enka juchari irekuaeska ka eskaksi chúnkumáka ikichekua ják’uni no ioni jimpo nóteru jauati nani irekani”.

Josue Velázquez “Ji kánekua mintsikaxaka, ji eratsesinka eskaksi k’amaraxaka ma uatnsipu irekani, tsánharhixaka ka mintsikaxaka eskani exeaka jimpanherantani ísi eska náepka urhetku, p’ukuricha ka anhatapuechani junkuni enka sési jápka. Isi ixesinka jimpoka juchari k’uiripu kánekua sési ánchekuarhexati jánhastani sapirhatichani. Eskaksi xeénchaaka echerini, eskaksi irekaaka”.

Adelaida

UANTAKuAECHA Amberiequeri, amperiekueri: Sobre religión.

Anhatapuecha ka uitsakua ampe: Las plantas.

Auitaekuaro vuache: Sobrino (hijo de hermano) Ver dicc.

Eranhaskakuecha: Iliusión.

Eratsikua tsitani: Locura.

Eratsintani: Reflexionar.

Euakua: La semilla.

Irenkurhirichani: Vecinos.

Ireteri patsataticha: La ronda comunitaria.

Isku jánhaskani ampe: Alusinaciones.

Janhanharhikua: Respeto.

Jánhaskani: Entender, aprender.

Jiua: El coyote.

Jorhenkua: Saberes, Conocimiento.

Jukaparhakua exeni: Valorar. k’érenchekuarhu: Ciudad, capital, universidad.

K’uít’ani: Hipnotizar.

Kakaperata: Conquista.

Katonhaskani: Encandilar kamach’akup’eni: Gobernar.

Kantsani: Construir.

Kapat’arhakua: Riñones.

Kónharhikua: Página.

Kuataperakuecha: Ejercicios.

Kuerookata ampe: La Naturaleza.

Kutsanta: Ciclón.

Ma uanontani anapu ampe: El medio natural.

UANTAKuAECHA Maiapetarhu: Mercado.

Manakurhiricha: Los animales.

Mánetakua: Primero.

Matsoorhakua: Dolor de estómago.

Mirikuastani: Papandear.

No sesi niátatspiti: Monstruo.

P’amekurhita: Infecciónes respitatorias.

P’ikuarherakuecha: Los cinco sentidos.

P’ukutapu: El bosque.

Sipiati: Medicina.

T’antarhekua: Cuarto.

T’ipich’ukua: Calzón de manta.

Takukukata: Libro.

Takukukatani: Libro.

Tanintarhekua: Tercero.

Tsimanetakua: Segundo.

Tsiuantispti: Retoñar.

Uarhiiticheri p’amenchakua: Menstruación.

Uantsipu: Rueda, círculo, ciclo.

Xakua: Quelites.

Xánturharini: Descalzo.

Xanuateni jási tsárati: Vidrio, cristal.

Xúrpini: Hacer insensible.

Talleristas ECA Alejandra Velázquez Bucio Osfabel Diteos Rendon Sofía García Calderas Diana Alejandra Manrique Ascencio *Apoyo a la realización de los talleres: Adelaida Cucué

Red Temática sobre el Patrimonio Biocultural (Conacyt) Aida Castilleja González Arturo Argueta Villamar Ángel Moreno Fuentes Gimena Pérez Ortega Marisol Reyna Contreras

102

Consejo de Bienes comunales Ángel Chapina Carlos Francisco Javier Vargas Leyva Salvador Chávez Niniz Luis Sánchez Tomás María Guadalupe Guerrero Campos Valentín Alonso Martínez María Nieves Guerrero Jerónimo Albino Leco Carrillo Samuel Madrigal Huaroco José Alfredo Vicente Fabián Salvador Ceja Guerrero Francisco Guido Huaroco Rogelio Velázquez Herrera Eufemio Jerónimo Sánchez Isabel Ortiz Campanur Roberto Sixtos Ceja Francisco Sebastián Muñoz Luis Guerrero García Antonio Vicente Macías Oscar Villa Ortiz Concejo Mayor Cheran K´eri Pedro Chávez Sánchez Enedino Santaclara Madrigal Mario López Hernández Benito Niniz Estrada Víctor Hugo Campanur Sixtos Austreberto Macías Jerónimo Salvador Bautista Tehandón Salvador Campos Gembe María Dolores Santaclara Gembe María Elena Hurtado Rosas Alfredo Mateo Hurtado María Seberiana Fabián Turja

Agradecimiento especial a la Mtra. Gloria Macías Amezcua, Integrante del Concejo de los Asuntos Civiles y de la Comisión de Educación (20122015), por su decisiva participación en la Primera reimpresión en español, y en el impulso a la traducción y la generación de esta Primera edición en lengua P’urhepecha

Fotografía Niños y jóvenes de Cherán Juan José Estrada Serafín Diana Alejandra Manrique Ascencio Alejandra Velázquez Bucio Verónica A. Velázquez Guerrero Lenny Garcidueñas Huerta Registro fotográfico de los talleres Juan José Estrada Serafín Ilustración, collages y diseño de recursos didácticos Lenny Garcidueñas Huerta Algunas de las artesanías y máscaras que ilustran el libro fueron creadas por el artista Ignacio Martínez, quien amablemente prestó sus obras para la presente edición.

Traducción del purépecha María Edelmira Estrada Catarino Custodio Romero Pedro Márquez Joaquín Aportaciones acerca de la lengua purépecha Alicia Mateo Diseño de estrategia educativa de los talleres Yurixhi Ochoa Ochoa Identificación hongos Mariano Torres Mapa de la página 78 Construcción del Consejo de Bienes Comunales y GIRA A.C. con base en la imagen de www.google.com/earth/ index.html y el Ordenamiento Territorial Comunitario de San Francisco Cherán Cronología mínima de Cherán k’eri: Coordinada por Josué Velázquez Velázquez Ilustración página 84.

Maíz: Zea mays en Otto Wilhelm Thomé, Flora von Deutschland, Österreich und der Schweiz, 1885.

Nido: Del libro “Sammlung von Nestern und Eyern verschiedener Vögel: aus den Cabineten des...” de Friedrich Christian Günther,1772.

103

Juchari Echerio, se terminĂł de imprimir el 6 de junio de 2016 en los talleres de Impresos Sandoval, Ciudad NezahualcĂłyotl. MĂŠxico.

Con un tiraje de mil ejemplares.